الجزء

الجزء الثالث من رواية قلبي ملكي ولكن أنت من

الجزء الثالث من رواية قلبي ملكي ولكن أنت من

وفي الجزء الثالث ماذا سوف يحدث مع أبطال الحكاية ؟ هل ستكون الأحداث في صفهم أم سيكون هنا رأي آخر ؟ كل هذا وأكثر سوف نعرفه سوياً في السطور التالية من رواية قلبي ملكي ولكن أنت من للكاتبة الموهوبة كيندا .

الجزء الثالث من رواية قلبي ملكي ولكن أنت من

ملاك … … تعالي نكملو حكينا في دار …
وخشت ريحانه وقلبها يدق بسرعه .
ريحانه … شن في تكلمي ؟؟؟
ملاك … احكيلي ..من امتي تحبي ليت ؟؟
ريحانا … هوا هدا موضع مهم ؟؟
وهنا ملاك طول تدكرت كلام بنت خالت امها هدكا اليوم علي البنت الا يحبها ليت وفي اللحظه الا كانت بتقوللها خلاص وكيف بتتكلم … هنا تكلمت ريحانه وقالتلها …
ريحانه … شن حابه تسمعي بزبط ؟؟؟ اني قصتي مع خوك غريبه شوي …برغم ان الفرق الا بينا 10 سنين … الا وكان ديما يعامل فيا عيله .. الا اني من لما كنت صغيره كنت معجبه بيه .. من قبل حتي مانفكر اني نبدا نلتزم شوي شوي .. يعني من سن المراهقه لما كنت زيكم عادي نفكر نحب وننحب .. كنت ديما معجبه بي ليت ونشوف فيه هوا البني ادم الا نتمني في يوم يكون من نصيبي … بس مش بدرجة الا وصفتها ريما ههههه يعني هدا اعجاب من ايام المراهقه وكبر في داخلي من غير مانحس يعني عطيته اهتمام اكتر من اللازم … لحد ماسمعت ان ليت كمل البكالوريس في كلية طب بتقدير وجتكم بعته اربعه سنين برا وبوك بعته لدوله تانيه باش يكمل قرايته … هنا قررت اني ننهي كل احلامي الطفوليه ومشاعر المراهققه الا خلتني نهيم في عالم بروحي … والحمد لله هالموضوع قربني لربي اكتر وخلي ايماني بالله اقوي .. وتأكدت ان لو كان من نصيبي رح يكتبه ربي ليا بدون مانعصي ربي … ولو لا فااكيد ربي رح يبعده عليا وبس ❤ ❤ .
وهنا ملاك عيونها دمعو للمشاعر والحب الا كانو واضحات في عيون ريحانا ومن طريقة كلامها وهنا قالتلها …
ملاك … واهو ربي قربه ليك وكان من نصيبك ❤ … ربي مايخلي حد اكيد حبيبتي ❤
ريحانا … باهي ممكن توا نعرف شن الموضوع المهم ؟؟
وفي اللحظه هيا كانت ملاك الكلمه علي راس لسانها .. وهيا بتقوللها كل الا سمعاته ..
ملاك .. بصراحه اني سمعت مره ان هوا .. يحب يحب << وهنا تلعتمت وبعدين اندفعت وقالتلها >> .. يحبك … اي سمعت انه يحكي لماما ويقولها انه يحبك وعاجبتيه من قبل وان ناوي اول مايروح يخطبك ويتزوجك وتتسقدى معاه وتستقري بري … وخلاص خلينا نكملو فيسع وننزلو قبل مايطبو علينا فوق …
ريحانا ❤ ❤ تمام .
وهنا قعدة كل وحده تتحرك وعقلها في مكان تاني … ريحانا فرحانه ودنيا مش سيعاها .. يكفي البني ادم الا حلمت بيه والا رسمت فيه كل احلامها وشروطها كانو علي اعتقاد منها انهم في ليت … بينما ملاك كانت تلوم في نفسها وفي صراع داخلي … من ناحيه علاش كدبت علي ريحانا .. وماقالتلهاش الحقيقه الا سمعتها من قريبت امها.. ولكن في شي في داخلها يقوللها ماتكسريش الا في داخلها لعل الكلام الا نقال مجرد اشاعه ويطلع صح يحبها .. ووالشي الي خلاها تتردد اكتر ان هيا عايشه نفس مشاعر ريحانا وشافت نفسها فيها .
وفات اليوم ورا اليوم … والكل لاهي في العرس … الا ام ليت .. الا كانت متضايقه .. لان ولدها تاجلت وقاللها انه احتمال مايحضرش العرس كله .. ويجي الاسبوع الا بعده بسبب مشاكل صارتله في اخر لحظه ..وماحصلش حجز تاني الا الاسبوع الا بعده …
مريم … اعصابي علي نار … اني بجد خايفه يامحمد …
محمد .. ماتخافيش اني مرتب لكل شي … وتفاهمت مع خوي .. وفهمته ان مادبيا نتهني علي ليت توا وياخد مرته معاه لانه مش معروف امتي يروح تاني … بس البنت شني ؟؟
مريم … اني هدرزت لملاك بصدفه وطلعت عارفه وسالتني وقلتلها اي ليت بعتني ومافيش منها دوة الاجنبيه …
محمد … علاش كدبتي عليها يهديك ربي ؟؟
مريم .. لان هيا وريحانه صحابات .. واني خايفه تقول كلمه لريحانا وتغيرلها رايها .. وبدات ان البنت طلعت عاجبها موضوع وموافقه علي حسب مافهمت من امها …
محمد … خلاص معناها الموضوع مات … بري اليوم لحفلتك … وهوا بكرا مروح .. ماتفتحيش سيرة موضوع نهائيا … خلي لين يفضي حوش .. ونقعمز انه وياه بروحنا ونتفاهمو ..
مريم … ريحتني .. غمه وتنحت من علي صدري … خليني معناها نمشي نوتي روحي … باش نمشي بكري لصاله …
محمد … باهي عصومك صغير شن بتديرله ؟؟ بترفعيه ؟؟ راهو اني طالع مع خوي عبدالسلام بنرفعو الاكل والحاجات لصاله وبعدها ماشيين للقهوه يعني ماتعبيش عليا …
مريم … لا لا مش عابيه عليك … ريحانه مش ماشيه لصاله .. قالت توا نقعد معاه ..
محمد… علاش مش ماشيه ؟؟
مريم … ماك عارف بوك مريض وعنده سكر واليوم ياناري من صبح يرجع جاته نزله معويه فاقالت بتقعد مع جدها ماتبيش تخليه بروحه وتقعد مع عصومي في نفس الوقت …
محمد … باهي مالا خلي نتوكل اني ولما يوتي الغدي كلميني خلي ننزل نساعد الولاد في قضان القيطون ونلم الكراسي معاهم ..
مريم … الغدا لوطه امك لقطت مبكبكه وحطتها علي نار وخلاص لان مافيش حد لاهي … وبالله عليك وانت نازال كلملي ريحانه تركبلي فوق تساعدني لان ملاك تسقدت مع ريما للمزين من بكري ..
محمد … ماشي تمام .. سلام عليكم …
وطلع عمي محمد … ونزل … ونادي علي ريحانه وقاللها تركب … وركبت فوق لمرة عمها … ساعدتها في لبس والاستشوار وماخلتهاش لين تسقدت لصاله مع ساعه 5 عشيه … وبعدين خدت عصام ونزلت … ونزلت بيه لوطه .. وبدت تضم وترتب كل شي كيف ماكان … واوال ماكملت …شافت ساعه لقتها ساعه 11 في الليل ولقت جدها رقد .. ردت عليها الدار وطلعت لصاله … فالقت فيها عصام متلوح راقد قدام تلفزيون … وهنا خدت شرشاف لفاته بيه وركبت بيه فوق باش تحطه في فراشه … وبالفعل ركبت وحطاته في فراش وخدت شرشاف الا كان ملفوف بيه في ايدها وردة عليه الدار وطلعت … ووهيا طالعه من شقه بعد ماردت الباب وبتفتح باب الاصنصيل شافت الاصنصيل كان لوطه وركب فوق … فاتوقعت ان عمها روحها لان اصلا مافيش حد في عماره كلها الا جدها وعصومي … ولهدا كانت واخده راحتها وقاعده بتوته ميكي وبدون وشاح … واول ماوصل الاصنصيل وكيف نفتح الباب …. هرب الضي …
وهيا قلبها زاد نقبض اكتر واكتر ووخرت وقالت ….
ريحانه … عمي محمد ؟؟ …
ولكن قبل ماصوت يتكلم … شمت ريحه كانت مميزه ومعبيه كاردوري متع شقه كله … وريحه هيا ماشمتها من قبل … فالخوف خلاها بدون ماتفكر … حطت الشرشاف عليها بسرعه ووخرت … وهنا حد جي وولع المولد فارجع الضي … واول ماشافها قاللها وشافاته .. شهقو في وجوه بعض وقاللها …
ليت … سلام قول رب رحيم … من انتي ؟؟؟
واوال ماشافاته ريحانه .. تحمر وجهها من الخوف ولان كان قدام باب الاصنصير مازال واقف مالقتش روحها الا خشت بسرعه لشقه تجري وخشت لدار عصام وسكرتها عليها … وهوا مصدوم يشبحلها .. ووهيا قعدة تكبه من خرم باب الدار تشوف فيه لما شافها خشت بيطلع او لا …
ريحانا … << قلبها يطق وخايفه >> … اكييد رح يطلع لما يشوفني خشيت … يارب يطلع يطلع … لاااااااا خش ؟؟ مستحيل ؟؟ اااااه غبيه غبيه .. شن دخلني لشقه اني بس .. شن خلاني مانمشيش اصلا .. ااااااه ياربي اه ..
وفي اللحظه الا تتناقش فيها بصوت عالي … سمعاته سكر باب شقه ويقول …
ليت … مريييييومه … محمد … وينكم يافاملي … اميررررره …ياعويله وينكم …
وطبعا مافي حد رد عليه حتي الجن متخفي بالشرشاف داخل الدار …. واول ماسماعته اسكت وسمعت باب داره تسكرت … فتحت الباب بشووووي وتسللت من غير مايحس بيها … ولكن اول مافتحت الباب … سمعت صوت قاللها ….
ليت … هههههههههههه يالي تحت شرشاف … ممكن تقولي العيله وين ؟؟
وهنا ريحانا انصمدت في مكانها ووقف بدون اي حركه وهوا يقرب منها …
ليت … احم احم … من معاي ؟؟
وهنا تلفتت وقالتله ..
ريحانا … متأسفه اني بنت عمك ريحانه واهلك في عرس بنت عمك ريما اليوم حفلتها …
ليت … ااااه تماااام يا ريحانه ❤ ❤ … ليك وحشه والله … باهي ممكن تنحي شرشاف ؟؟؟ ومد ايده باش يسلم عليها ..
ريحانه … اسفه مانقدرش لاني مش لابسه حجابي … ونزل ايدك لاني مانسلمش علي رجاله ..
وطلعت وسيباته يشبحلها وهوا مصدوم … بس اول ماطلعت وسكرة الباب وركبت للاستسيل بسرعه ونزلت … انفلق بضحك .
ليت …. ههههههههههههههههه امتي كبرت وامتي تحجبت المفعوصه هيا …
وعلي اصوات ضحكته العاليه … ناض خوه مخلوع يبكي … وطلع من دار … فااول ماشافها .. مشاله يجري بسرعه وخداه في حضنه وقالله …
ليت … والله كبرت يمفعوص انت … خليتك في قماط مصرع كبرت … تعالي تعالي وشوف شن جبتلك معاي يامعفن .. وخداه وخش بيه لدار … وقعد يلعب هوا وياه لين نعسهم نوم ورقدو … ومافاقش تاني يوم الا علي صوت فيروز وامه توتي في الفطور وريحة الشاهي والبيض يفحفحو لحد خشمه وهوا في سريره …
ليت … << وهنا ناض بسرعه من سريره بعد مانحي خوه من غمره وطلع من دار وقال >>> الله الله … هدا الجو الا مستاحشه اني ❤ <3صباح الورد والياسمين ❤ يااحلي ام في دنيا ❤ استاااااااحشتك هلبااااااا << وخداها في حضنه >>
مريم … اي اي صدقتك يا كداب .. كان هدا امس اسنتني مش روحت نلقي شناطيك فم الباب ونلقاك راقد … وبعدين خيرك ماقولتليش انك مروح امس كنت فوتت حتي صاله ..
ليت … هادي قصه طويله ياامي … ماحصلتش امس بس قعدة في الانتظار علي امل نحص كرسي في اخر لحظه ويكون حد غير رايه وناخد بدله .. وبالفعل بعد انتظار من الفجر واني في مطار .. حصلت … وقولت نخليهالك مفاجاه .. بس استنيتكم شوي وغلبني نوم من تعب والله ..
مريم …والله يامعفن قلبي عليك غليله .. خلاص معاش تبعد عليا .. شهاده وخديتها وتم ❤ اقعد هنا …
ليت … هههههههه اني اصلا من روايح الحلوه هيا شكلني بنغير رأي وبنقعد … اي قوليلي وين بوي وملاك ؟؟
مريم … بوك مشي يجيب في خبرز .. شوي ويوصل وملاك قعدة لوطه مع ريحانا بنت عمك …
ليت … اي علي سيرة ريحانا هههههه شن قصة الجنيه الا مخليتيها مع ولدك هادي … تي هادي بتونسه ولا بتخوفه …
مريم … علاش تقول هكي ؟؟؟
ليت … امس طلعتلي بشرشاف ههههههه والله منضرها مانقولكش … لا والالعن علي اساس متحجبه قدامي وماتبيش تسلم … تي هيا مفعوصه امتي كبرت ؟؟
مريم … اي وخيرها من حقها البنت خايفه علي روحها .. مش بنيه وطول في عرض وانت راجل .. من حقها تستر روحها قدامك وماتسلمش عليك شني انت محرم ؟؟
ليت … تي يما هادي اني لما سافرت خليتها عيل
مريم .. لا مش عيل … لما سافرت انت عمرك 27 سنه وهيا 17 سنه .. هي صح مسخوطه وقنوسه وملامحها صغيرونه .. لكن البنت كبيره وولت مره راهو 24 سنه عمرها ..
ليت … تي باهي يما خيرك تفنصي كبيره كبيره شن بنخطبها اني … وبعدين اني هكي نشوف فيها وخيتي صغيرونه وخلاص يعني زي عصومي .. لهدا اني مديت ايدي قلتلها نحي الشرشاف مش لاني قي بالي شي تاني حطي في بالك بس …
مريم … ماتبلغمنيش معاك … خوك عصام 5سنين فاماتكسرش رقبتي بدوه المفقعصه وبعدين من قال …
وفي اللحظه الا تتكلم فيها خش محمد وقال ….
محمد … صوتكم لبرا … مسرع وصلت وبدوشتك انت ومنرفز امك هههههههه
ليت … هههههههههه غير تعالي تعالي انت وينك ياهراب عندي هلبااااا دوه معاك … وتيت فليساتك ههههههه شهاده وجبتها ❤
محمد … اااااااه ياودي غير نفطرو … وبعد الفطير عندي معاك موضوع طويل .
ليت … واني نفس الشي … عندك معاك مواضيع مهمه وبصراحه متشوق ناخد رايك فيها …
محمد …غير استريح وملحوق عليها موضيي ومواضيعك … بس قولي … شن الا روحك بيك من غير ماتقولنا …
ليت .. هدا موضوع طويل .. خلي امي تحطنا الفطور في بلكونه ونحكيلك …
مريم << غمزة لي محمد >> … خلاص اني بنحطلكم الفطور وبننزل نفطر لوطه يستنو فيا … وانت كمل فطورك وانزل لوطه سلم علي حوش جدك وعمامك
ليت … حاضر من عيوني ياست الكل ….
وهنا … حطتتلهم الفطور في االبلكونه ونزلت وخلتهم يفطرو مع بعض .. والباين ان ليت مستعجل علي رزقه وفرحان ويبي يزف لبوه الخبر بكري بكري … واول ماطلعت وسكرة الباب ونزلت … قعدة عين معاهم وضحكه معاهم وقلب يخمم فوق … وخاصة لما فاتت ساعه واتنين وتلاته واربعه ومانزلش ليت … هنا بس حست بشي وخافت ان يكبر موضوع وكلهم مازال لوطه … واول ماجت ساعه 1 ظهر ومانزل حد قررت تركب وتشوف شن في .. وفي اللحظه الا بتفتح باب الاصنصيل شافت ولدها طالع منه يجري ووجهه احمر وواضح انه مداعك مع بوه دعكه لسقف وطالع ومايشوفش في شي قدامه …
فاركبت فوق تجري باش تعرف شن صار بزبط .. واول ماركبت … لقت محمد في بلكونه واقف يدخن بعصبيه … وعاطيها بالقفي … فاقالتله .
مريم … شن في ؟؟؟ شن صار طمني ؟
محمد …
يتبع……………..

لقراءة الجزء التالي : الجزء الرابع من رواية قلبي ملكي ولكن أنت من

لقراءة الجزء السابق : الجزء الثاني من رواية قلبي ملكي ولكن أنت من

للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا

جميع الحقوق محفوظة للكاتبة كيندا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى