الجزء

الجزء الثامن والعشرون من رواية عاصفة الصمت

الجزء الثامن والعشرون من رواية عاصفة الصمت

وفي الجزء الثامن والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الثامن والعشرون من رواية عاصفة الصمت

ابتسمتله لبنى وعلى خدها دمعة … تقدم ومد يده بيمسحلها دمعتها كالعادة بس ماقدرش لبنى مخطوبة ! سكر قبضة ايده ونزلها … غمضت عيونها لبنى لثواني وقتله : حبني او حب غيري صرت بعمري خيال قانعة واعرف مصيري مالي بقلبك مجال..
* كدابة طبعا *
رد عليها نزار : انت كالبيت الكبير اللي ضللني بوروده …صعب ابعد عن حدوووده ….
ومشي كل منهم ف عكس اتجاه اﻻخر …
وقفت لبنى وتلفتتله … لقاها مكملة طريقها … فمشي ع حاله ف نفس اللحظة تلفتت لبنى ولقت نزار خش داره …

اليوم بياني بش المفروض فرحانة ..لكن لا مش فرحانة … شن دنبك يارامي شن دنبك … حنحاول نحبه حننسى نزار …

نزار : ها غادة شن اخبارك …
غادة : الحمدلله حبيبي
نزار : شن مدايرة
غادة : كويسة
نزار : استحشتك هلبا
غادة : حتى انا هلباااا هلبات نستنى غير امتى يجي يوم بيانا
نزار : هانت مزال تﻻتة ايام … شنو نعطيك فلوس تاخدي الحاجة بروحك واﻻ ناخدلك انا
غادة : ﻻﻻ خودلي انت ع دوقك ياروحي
نزار : ان شاء الله به …
غادة : كيف كان بيان بنت خالتك
نزار : باهي كويس …
غادة : طلعتها تاخد واﻻ انت خديتلها ع دوقك
نزار : كله ع دوقي من اليبرا لصاروخ
غادة : باهي كويس ربي ايهنيها ان شاء الله
نزار : ان شاء الله سنفورتي …
بعد فضانية ان شاء الله حنمشي نأتت الحوش …
غادة : ان شاء الله يارب يﻻ حبيبي توا انحس ف روحي نعسانة
نزار : اوكي بيبي ليلتك سعيدة …
سﻻم
نزار : سﻻمات …

على تاني يوم … في الصبح ساعة 11
خ رقية : نزار هي امتى بتمشي تاخد حاجة البيان
نزار : باهي مع العشية ان شاء الله
خ رقية : به طلع معاك لبنى وصفاء ومروة خلي اتوتي روحها بالك عيلة خطيبها يقولوا العرس قريب
نزار : خليها بعد الفضانية وتلبيسة ومنه انا نشري اﻻتات ومنه هيا تاخدة حجاتها…
خ رقية : ان شاء الله به

لبنى : الو اهلين رامي
رامي : اهلين بيك لبنى شن اخبارك
لبنى : الحمدلله كويسة
رامي : ان شاء الله دوم …
لبنى : رامي انا مش فاضية توا .. تو نهدرزوا ف وقت تاني
رامي : تمام خودي
راحتك … سﻻم
لبنى : سﻻم

مروة : خيرك اتوزعي في الولد
لبنى : ماعنديش خلوق نهدرز الحق

مروة : مسكين رامي … مابعده منك
لبنى : باهي يامروة شوية شوية وان شاء الله خير .. تو نبدى انحبه

بإختصار شديد فاتت هالتﻻتة ايام .. طبعا نزار خدي كل شي ورفعهم لمحل زينة غلف السوابيت وخدالها مونة وماقصر في شي …
في يوم الفضانية لبس نزار بدلة ازرق كحلي روعة … وقف ع مراية الممر يواسي ف قرواطته .. خطمت لبنى من جنبه وقتله : غير بشوية عليك وانت اتعاند …
نزار : عفلقتني من بكري نحاول نزبطها اليوم بدات مابتش تزبط
لبنى : اكيد ﻻنك متوتر … هات نواسيهالك
نزار : به بالك تزبط معاك …
مدت يديها لبنى … وكانت لبسة قطعة بلوزة شيفون ببضاء … وتحتها كنتيرا حمراء تبرز مفاتنها .. وباخة برفان جايبهولها رامي هدية .
{مفروض مانخليهاش اتقرب مني هكي … بس يﻻ خليها ماعتقدش عندها مشاعر اتجاهي بعد خطوبتها }
لبنى تفكر>>محﻻك يانزار … تخيلتك عندك عرس واحد من صحابك وانا نواسيلك في قرواطتك …
* واستله قرواطته ونزلتله رقبة السورية وسرحت في عيونه للحظات … وقتله : انا مااعلن عنادي ﻻ وابدي الصدق ﻻ بس صار اﻻمر عادي وغيبتك ماهي مشكلة…نزار : القوي ماتهزه ريح… ومايصح اﻻ الصحيح …
لبنى : قلت ابعد واستريح
نزار : ومايصح اﻻ الصحيح ..
لبنى : ربي يسعدك نزار
نزار : وبسعدك ياضرسي … وعد مني لنديرلك احﻻ عرس يحكوا بيه الدنيا كلها
لبنى : ووعد مني لنرقصلك في عرسك ونقيم نجمتك قيمان
نزار : ربي يحفظك …حتمشي معانا
لبنى : ويحفظك … لو مامشيتش لبيان خوي الوحيد لمن بنمشي
نزار : سلمها وخيتي ….

صفاء : لبناااااااااا زودي رامي يتصل بيك …
تلفت نزار … للمراية زعميته يواسي ف شعره … ولبنى مشت للدار.

اتفقوا عيلة نزار مع عيلة غادة وفض فيها واتفقوا على العرس بداية شهر 12 ودارو وبدي بيان نزار …. نادوه وخش بش ايلبس الدبلة ومن اول ماخش جت عينه ع لبنى ..
{سبحان الله اول شخص جت عيني عليه هي ضرسي …. }
قعمز نزار جنب غادة وهوا مبتسم كانت غادة لابسة قفطان عسلي حلو اللي خداه نزار … ومسكلها يدها و لبسها دبلتها ولبنى بتبكي دم تمنت لو انها مكان غادة …
لبساته غادة دبلته وعيلتها زغرتوا … ﻻ اراديا وقفت لبنى وماعرفتش عﻻش وقفت وحست نفسها غبية فكلمت حنين وقتلها وين الحمام .. دلتها حنين على مكان الحمام وخشت لبنى تبكي ومقهورة ..
تم البيان وروح نوار بعيلته وكل مايخطموا من جنب بالو ضي يشوف للمراية ويلقى لبنى حزينة وقعدت هكي طول الطريق
ووقت وصلوا الكل يهدرز ويضحك اﻻ لبنى خشت طول لدارها
كانت مضايقة فابدلت وطلعت للبلكونة وقعمزت تشم ف هواء …
{واجعتني لبنى حتى بعد انخطبت لرامي مازلت انﻻحظ في الحزن ع عيونها ….اخ وخﻻص حنعرسها وكان سخر المولى عرسي بعد شهر ونص … ان شاء الله ربي ايكمل ع خير …
وصل مسج لنزار
من الكوالي – تم المراد ياديناري وهاني رديتلك المعروف اللي درتهولي من زمان …عيش طير فيافي ياغالي ….
{شن قصده ! بالكﻻم هدا قصده قتل بلقاسم الحبيب ؟؟؟؟ ﻻﻻ معقولة ؟؟؟ هههه جو كان هدا }

مكرم ~ كنت نحسابك حتبطلي منه الموضوع …
غادة ~ ﻻ عﻻش انبطل منه انا نحبه نزار
مكرم ~ به ابعتيلي صور بيانك كيف طلعتي خاطري نشوفك
غادة ~ برا العب بعيد … تصبح ع خير
مكرم ~ به تعالي لسطح نهدرزوا
غادة ~ مانبيش وحتى النيم بز بنسكره معش بنفتح بكل بااااي …
مكرم ~ اسمعي خطيبك فيه اﻻيدز …
غادة ~ فيه عينك مش غير فيه اﻻيدز
مكرم ~ قصدك مش مصدقة
غادة ~ ايه مش مصدقة
مكرم ~ به غدوة تو نجيبلك ورقة انه مريض باﻻيدز وتو تشوفي ﻻزم نتبتلك ..
غادة ~ هههه العب غيرها اكرم
مكرم ~ غير اصبري ان غدا لناظره قريب مع القايلة تلقيه تقرير مرضه قداااامك

رامي…ﻻزم نتصل بنزار ونقوله على هالخبر القنين …

نزار : ايوه نعم
رامي : احنا فري دوم
نزار : كيف صار
رامي : تم الموضوع انا هكي جاني الخبر
نزار : قصدك خﻻص رسمي
رامي : ايه ايه
نزار : به نوص نوض وجهك للمكتب لم كل شي فيه الوتايق وماتخليش وﻻ ورقة حتى طرف صغير وافتح الخزنة وطلع الفلوس وخودهم عندك للحوش غدوة ان شاء الله ناخدهم منك ..
رامي : اوكي هي
نزار : اسمع امسح الخزنة والمكتب ماتخليش بصمات نهائي…
رامي : تم تم …سﻻمات …

{زغرطوووو واخيرا بنعيش حررر بدون قيود واخيرا … خلي نتصل ب القيافة }

القيافة : ايوه نعم
نزار : مرحبتين مرحبا
القيافة : ياودي عاش من سمع هالصوت
نزار : تعيش وتسمع ياغالي
شن بنقولك
صﻻح : نعم…
نزار : عمك الحاج كش ملك
صﻻح : ﻻﻻ تتسهوك
نزار : والله بجديات واكيدة تو تسمع من هون ومن هون
صﻻح : كويس فصالحك الشي هدا . مر عليا نهدرزو
نزار : ان شاء الله وانت طيب … يﻻ نستادنك تو
صﻻح : ادنك معاك …سﻻمات

{بنقفل التلفون بش ﻻ يتصل بيا حد وﻻ يقولي اخدم عندي … خلي نستقل بحياتي …. وحننتقل بعيلتي في الدوبلكس الجديد يسكنوا معاي …ايه لمن بنخليهم امي وخواتي .. ناخد انا الدار الكبيرة بحمامها ونعطيهم باقي الحوش واكيد غدوش مش حتزعل من الموضوع …
امممم به وكان مارضتش … يﻻ كان مارضتش نشري شقة جنب الدبلكس ونسكن فيها انا وغدوش وخﻻص…}
فكر فكر نزار وخداه النوم …

ومن تاني يوم مشي هوا وخواته وامه بش يشروا اتاث الحوش .. وبعت رامي مع العمال وصاحب الطانطا وعطاه مفتاح السكن الجديد … وكمل طريقه هوا وعيلته بش لبنى تاخد حجاتها … لما يخشوا محﻻت نسائية يقعد نزار برا المحل يستنى فيهم …وبصدفة لبنى قامت قطعة روب قصير جدا بلون الاحمر الفاقع … في نفس اللحظة تلفت نزار بصدفة وشافها اتقلب في الروب اﻻحمر … فدكر يوم كانت ماشية لعرس بنت حليمة وكانت لابسة فستان احمر وقريب طاحت فهوا شدها …. قامت رلسها لبنى بصدفة وشافتلها التقت العينان … هز راسه حلو
لبنى قامت حواجبها بمعنى .. ماطلبتش رايك
نزار هز كتافه بمعنى ع راحتك ..
واشرلها بعﻻمة صح يعني قنين ..
هزت راسها باهي امشي من اهنا
ابتسم نزار وابتسمتله لبنى وحول نيزو من جنب المحل ..

في محل ثاني تبع فساتين اﻻفراح و بدﻻت المناسبات خش معاهم ع اساس بياخد حاجة لغادة …
لبنى : خود هادي … غادة ضعيفونة والبدلة هادي نوع منفوخ حتطلع عليها … بلون الفوشي قنين
نزار : تمام وانتي خودي هادي بلون تركواز …
لبنى : مششش حلوة
نزار : ذوقي توا معش يعجب يعني
لبنى : هههه ايه معش يعجب
نزار : به نقي بروحك هي
لبنى : اهو بنقي …
* حطوا ايدهم الزوز على نفس البدلة بصدفة *
نزار : ئه شايف ذوقك ولى من ذوقي
لبنى : حطيت ايدي قبلك
نزار : هههه انتي عارفة ان ايدك جت بعدي
لبنى : به حول انا بناخدها
نزار : حولي عجبتني بناخدها لغادة
لبنى : ﻻ بناخدها انا …رامي ايحب اللون هدا
نزار : ﻻ غادة اتحب اللون هدا
لبنى : غادة ضعيفة هادي مقاسها 42 وغادة تلبس 40
نزار : عادي انقصهالها في الخياط
لبنى : نزار !
نزار : هههههه باهي خوديها خﻻص اكيد حتطلع عليك قنينة ..
لبنى : تسلملي ♥

صفاء : ريتي اتقول متجوزين النهار اﻻحرف روسهم فروس بعض ويتفتفوا ف الحوايج
مروة : فرخة لبنى قاعدة اتحبه حتى بعد انخطبت وهوا خطب مافيش فايدة
صفاء : ههههه اصﻻ مش مدورها هوا
مروة : ايه …
صفاء : بالله ياناري علينا ﻻ انخطبنا وﻻ نحبوا قعدنا زي القزونات انا وياك
مروة : معش اتزيديني خليني ناسية ….
صفاء : اهو بيخلص نوار
مروة : باهي طيب فيهم

خلصوا وطلعوا
خ رقية : خي كم بتوا ف الدكان اللطف
نزار : ماه اﻻنسة لبنى معش بطلت بتاخد المحل كله
لبنى :هههههه فلست بيه ياناري
نزار : ﻻ عادي مش خسارة فيك
مروة : باه عطيني مصروفي هي
نزار : تو اللي يسمع يقول باخل عليك فحاجة شاوري بس والحاحة اتكون عندك طول …

مكرم يدوي مع نفسه : ههههه بلقاسم اتوفى هههههه احسن هكي نقدر نرد غادة ليا ..لكن كيف بنردها راجل عمتي الزقة مش حيوافق بعد مافضوا فيها …كيف الراي كيف
خلي نمشي للمكتب اكيدة حنلقى ديناري غادي نهدرز معاه ونغافله ونخنب التقرير متعه ونعطيه لغادة

* مشي مكرم كدة يوم للمكتب ويلقى فيه مسكر …ويبي يقول لنزار ان غادة اتحبه قبل لكن سكت وضم فمه … خاف من الديناري … انتقل نزار بعيلته للحوش الجديد غادة وافقت انها تسكن مع عيلته بعد الزواج… ووصل نهاية شهر 11
29/11/2010
وكان نزار منهمك ايوتي لعرسه وحاس ان شئ ما ناقصه …
لبنى اتوتي معاهم وقلبها يبكي .. وطقينا في تاريخ 15/12/2010
قبل عرسه بسبوعين اتوفى عم غادة فعمك مصباح اجل العرس حتى اشعار اخر …. رامي كلم نزار على اساس يبي العرس بداية شهر من السنة الجديدة … اﻻ ان اخته مرضت اطر يسافر بيها …. و بعد مايروح حيستأنف العرس ..
بس رامي عطل برا لين تم شهر 1 ورجع في 10/2/2011 وكانت اخته مزال مريضة فقرر ايأجل العرس لصيف على اﻻقل

في 15/2/2011

بنغازي >> نوضي نوضي يابنغازي طز طز في القدافي …

في يوم 16/2/2011
نزار : ها رامي خش خش باب مفتوح
رامي : سﻻم عليكم
نزار : وعليكم السﻻم شج ياغالي
رامي : الله يسلمك …شن اخبار العويلة ولبنة كيف حالها
نزار : الحمدلله … اسمع سمعت اخبار من هون وهون
رامي : شنووو
نزار : بنغازي ثارت ووقفت ضد النظام زي تونس ومصر
رامي : تتسهوك
نزار : والله زي مانقولك تو …
رامي : كيف شن دارو وخيرني ماسمعتش
نزار : طلعوا فشوارع يقولو نوضي نوضي يابنغازي طز طز ف القدافي
رامي : وبه شرطة بنغازي شن دارت
نزار : تي حتى الشرطة معاهم
واليوم ايغطي عميرينة ومطلع الشعب مسيرة فساحة الخضراء
رامي : اه نحسابها مسيرة هكي وخﻻص ماحسبتش عالموضوع هدا .
نزار : تي برا كمل نومك برا..
رامي : هههههه ﻻﻻ لكن بجديات مليح كان يتنحى …
نزار : ايه بالك حالنا يتنقرش نحو اﻻحسن
رامي : وانت مع من
نزار : ليا ساعة ندويله ونقوله بالك حالنا يتحسن وهوا ايقولي مع منو اكيدة ضد هالنظام شن وصلني لهمواصيل غير دولته اللي بانيها شبابي كله وانا مرة ف ايد هدا ومرة ف ايد هدا
رامي : اممم حتى انا معاك في هالكﻻم
نزار : كان فيه راس موضوع بنمشي
رامي : وين بتمشي
نزار : قصدي كان صارت حاجة هكي واﻻ هكي
رامي : ياودي يستر الله وخﻻص

غادة : حقا ماما مكرم بيطوع
خ عايشة : ايه قال
غادة : اممم والله خايفة تنقلب حال البﻻد
خ عايشة : ﻻﻻ ان شاء الله ﻻ … تعرفي كان طرني الموضوع نطلع نطوع حتى انا
غادة : هههههه على اساس توا تعرفي تستخدمي السﻻح
خ عايشة : ايه معلمينا قبل في الثانوي عسكرية…
غادة : احنا في ثانويتنا فيه حصة ثقافة بس
خ عايشة : ﻻﻻ فاتك الجو ايماتنا احلى …

17/2/2011 ثارت الشرق كلها بالكامل وبعض المناطق … وبدي قمع الرئي العام …. فات شهر 2 وجي 3
19/3/2011 تدخل الناتو وقصف رتل طان متوجه لشرق

نزار : مانيش متجوز يا رامي لين
يهدى وضع البﻻد
رامي : والله طارت النية من كل شي اقسم بالله …خالي شدوله وﻻده التﻻتة ومش معروف عليهم شي …
نزار : بجديات ؟؟؟
رامي : والله بجد كله كله على خاطر اتكلموا بس شدوهم طول
نزار : ﻻ حول وﻻ قوة اﻻ بالله ربي ايصبر امهم وبوهم
رامي : اي والله …
* وبينما هما ايهدرزوا سطرب قدامهم مكرم بتندرا كبيرة ونازل ﻻبس بدلة خضرا وشاد كﻻشن
وحاط نظارات …
مكرم : اوباش انتوا ضد النظام
نزار : جاي تتبلى علينا وار كيف
مكرم : والله كان نأشر بس ايجو ايطبوكم … انا امر كتيبة توا
نزار : هههههه امر كتيبة باهي برا امشي لجبهات شن جاي شام صنانك
مكرم : معش تغلط والله انفرغ فيك نزار : مانيش خايف تبي اتفرغ فرغ الرب واحد والعمر واحد
مكرم : به افسخ
نزار : خيرك انت اتنط من موضوع لموضوع زي العيل
مكرم : قلت افسخ انا و البنت معادش ليك كل المواضيع تمت وحنتجوزها تبي واﻻ ماتبيش
* وقفله نزار وتقدم بخطوات للامام ومكرم مصوب الكﻻشن ع نزار وفك التأمينة … تقدم نزار لين لصقة فوهة الكﻻشن ع صدره وقال : غادة خطيبتي ومهما يصير هيا ليا فلو تحساب ان هالكﻻشن مخوفني
فأنت غالط … وكانك فالح وامر كتيبة حق برا لجبهات مش جايني اهنا تفحج عليا بتندرا و بسﻻحك الرجال فجبهات مش ف الشوارع وبين الحياش ….
* كيف مكرم بيضغط الزناد جاه رامي وشدله سﻻحه وقاله : عاد القتل واخد عليه مش جديد عليك هني روحك واحنا مش ضد النظام ريحنا تره
مكرم : به تره قولوا مقولة هادي
……..وليبيا وبس
نزار : وحق ربي كان ماتمشيش من اهنا مامظل اﻻ واخد كﻻشنك ونفرغه فيك …
رامي : برا ع حالك ياراجل برا …

* شافلهم عالجنب وقالهم : به به تو انوريكم …
وتلفت عليهم وركب سيارته وقالهم باين عليكم جردان …. تفو عليكم عبيد الناتو تو انوريكم
وسطرب بسيارته وغبر الشارع ومشي
نزار : عفلقني هالغبي
رامي : زعما حق بيتبلى علينا
نزار : اعلى مافي خيله يركبه كان جي حد وشدونا تو نتﻻقوا
رامي : هههه شي ايفدد تو هالكلب جاي يتمرجل علينا كنت نعطي فيه بالكفوف
نزار : كان انت تعطي فيه بلكفوف فانا كان يشتغل تحتي وياخد ف تيروات …. اسمع ماﻻخير فكرة اتلود في راسي الباين بنلتحق بصفوف الثوار
رامي : عارف اصﻻ
نزار : كيف عرفت
رامي : عارفك ماتتحملش تقعد هكي امكتف ف الحوش و هالحمار هدا يتمرجل عليك
نزار : ايه ومن غير هكي وضع البﻻد ايفدد اتحسه مغموم وابصر كيف …
رامي : به وعيلتك انت ولد واحد
نزار : من غدوة حنمشي ناخدلهم مونة اتسد عام تام وكل مستلزماتهم وحندير اتصاﻻتي بلقيافة وحنقوله يعطيني احداتياث واﻻ يربطني ب امر كتيبة لصفوف الثوار فديت خﻻص
رامي : بالك القيافة موالي لنظام
نزار : حتى ولو.. القيافة مايشهدرش بيا حتى كنت عكسه في الراي
رامي : تمام وانا معاك يا نزار
نزار : بتمشي معاي ؟؟
رامي : اكيد اماﻻ شنو …
نزار : خلاص تمينا … حنتصل بالقيافة توا …

يتبع………

لقراءة الجزء التالي : الجزء التاسع والعشرون من رواية عاصفة الصمت

لقراءة الجزء السابق : الجزء السابع والعشرون من رواية عاصفة الصمت

للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى