وفي الجزء التاسع والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء التاسع والعشرون من رواية عاصفة الصمت
نزار : خلي نخشوا داخل… حتى الحيوط عندهم ودان
رامي : اي صح
* خشوا داخل ف الدار الخارجية وقعمزوا
نزار : ايوه السﻻم عليكم
صﻻح : وعليكم السﻻم
نزار : شن اﻻمور واﻻخبار
صﻻح : تمام الله يبارك فيك
نزار : اسمع انا نبي نشري منك بدلة جديدة تقدر اتجيبلي واﻻ ﻻ
صﻻح : بدلة شنو ؟؟ اه ايه ايه ﻻ عادي نقدر نجيبلك … ادلل
نزار : امتى انمر عليك
صﻻح : انا توا مش فاضي قاعد في الفيافي جايب عجانة … لكن نبعتك لواحد يعطيك بدلة جديدة
نزار : به تمام
صﻻح : خﻻص تو نبعتلك النعتة ف رسالة
نزار : اوكي تم
صﻻح : سﻻمات يامان
نزار : سﻻمات
رامي : شنو قالك
نزار : قالي انا مش فاضي قاعد ف الفيافي جايب عجانة
رامي : وقصده قاعد ف البر و في جبهة
نزار : بزبط
رامي : باهي زعما مع منو
نزار : نتوقع مع الثوار
رامي : القيافة ثاير ههههه
نزار : ههههه والله توقعته مطحلب لكن تبي واﻻه …
رامي : شنو
نزار : احسن شخص قابلته في مجال العفن هههههه
رامي : هههه اياح
نزار : والله بجديات
مروة : شن اديري
لبنى : اندير في قهوة
مروة : احسبيني معاك
لبنى : هادي لنزار ورامي
مروة : قالك واﻻ من راسك
لبنى : ﻻ من راسي بنخش نقدمها نبي انغيض نزار
مروة : مصح وجهك والله رامي شاب كويس
لبنى : كويس ماقلت شي لكن والله قلبي قاعد مع نزاااار
مروة : نزار ايحب نزار خاطب نزار بيتجوز وانتي مخطوبة افهمي
لبنى : باهي بﻻش تو نمدهاله من الباب
نزار : اهو بعتلي النعتة …
رامي : وين
نزار : في منطقة كدا … شارع الحوتي
رامي : هي اماﻻ ..
نزار : هي … شوية بس خلي نرط على المكالمة
رامي : اوك خود راحتك…
* بعد نزار شوي ورد ع اﻻتصال
نزار : اه غادة
غادة : شن الجو حبيبي
نزار : تمام ياعيوني …
غادة : اه شن بنقولك …
نزار : قولي
غادة : انا وماما وحنين بنطلعوا للقيادة بيرفعنا بابا
نزار : انطمري في الحوش فاهمة
غادة : بالله عليك حبيبي
نزار : والله ماك ماشيتيها كلمة والكﻻم مرة
غادة : باهي خﻻص اهو قاعدة
نزار : بنتصل راه بنسمع دوشة بنغبرها ع راسك
غادة : اوكي نيزو خﻻص مش ماشية
نزار : باهي هيا عندي مشوار توا تو نكلمك
غادة : رد بالك ع روحك سﻻمات
* وقفت لبنى جنب الباب ونادت نزار … نزار
رامي : خشي يالبنى
نزار : قالت نزار ماناداتكش بش تقولها خشي
لبنى : كيف حالك رامي
رامي : الحمدلله ….
رامي يهمس : هوينا ياراجل خلينا نهدرزوا كلمتين …
نزار : مافيش …
لبنى : تعال شوي نزار …
نزار : به
* طلع نزار ومدتله القهوة
نزار : قتلك انا
لبنى : ﻻ بس رامي ايحب القهوة درتها ع خاطره
نزار : ياربي مدايرتله حتى قهوة
لبنى : هههه ايه اماﻻ شنو حتى هوا رامي …
نزار : باه باه وجهك من اهنا
رامي : ضرسي جيبيلي حبة راس راسي مصدع …
* تلفتله نزار بقوة لدرجة القهوة انسكبت في الصفرة وقاله : منين سمعتها الكلمة هادي
رامي : لبنى قتلي عليها …
* تلفت للبنى وقالها : وعﻻش مقايلتهاله
لبنى : حبيت نسمعها منه …
نزار : بري يالبنى من قدامي بري
لبنى : عﻻش خيرك
نزار : بري قلت انا
لبنى : باهي به … خﻻص
* مشت لبنى وخش نزار حط القهوة وقاله نوض
رامي : به خلي نشرب القهوة
نزار : مش ﻻزم نوض مستعجل
* خدي رامي الفنجان وشرب منه رشفتين وحطه وقال : ماه لبنى تزعل مني بعدين وانا مانقدرش على زعلها
نزار : تي باهي خﻻص ﻻزم بتفاصيل
*لبنى مزالت وراء الحيط من برا تسمع وتضحك **
رامي : خﻻص هي كملتها … هي نمشوا …
وقف رامي ولبنى مشتت تجري خشت داخل للحوش
وطلعوا هما الزوز ماشيين للعنوان اللي بعته القيافة …
وفي طريق لقوا عدة بوابات …
لين وصلوا للعنوان
تلاقوا مع صاحب القيافة وسئلوه على كل شي وفهمهم كل شي … وروح نزار هوا و رامي وكل واحد منهم فتح الموضوع لعيلته …
ام نزار دارت حالة قلبت عاليها واطيها وحرجت وتغششت ونزار مصرر يبي يمشي … ومن ثاني يوم طلع نزار ورامي مشوا من سوق لسوق وخدوا كميات كبيرة مونة وكل منهم روح لحوشه وعلى اساس العشية بيطلعوا … بش يسافروا
نزار : يمى خديتلك مونة وسبيزة اتكفي عام تام … وهدا مبلغ دسيه عندك وقت الحاجة اصرفي منه
خ رقية : عﻻش شن فيه
نزار : انا بنسافر يمى …
خ رقية : ووووه يعني قاعد حاطه فبالك هالموضوع
نزار : ايه
خ رقية : مصمم يعني
نزار : ضروري يمى …وحنكلمك اكيد بش نطمن عليك
خ رقية : فكنا ياودي من هالدوة
نزار : ﻻ ضروري نمشي… كان جي حد دورني ديروا روحكم خضر حتى النخاع… جبتلكم اعﻻم خضر علقوهم ف الحوش وكان سئلوك عليا قوليلهم هدا ﻻ ولدي وﻻ نعرفه
خ رقية تبكي : وكيف تبيني نقول هالكﻻم
نزار : معليشي ع سﻻمتكم ضروري اتقولي هكي …
لبنى ومروة وصفاء تﻻتة يبكوا
اضبط نزار خواته…وبيسلم ع لبنى مسحت دموعها مد ايده فظبطاته لبنى وبكت وقتله … رد بالك ع روحك يانزار ..
نزار : ان شاء الله حتى انتي …اسمعي اهو رامي قدام الباب يبي ايسلم عليك …
لبنى : به لحظة انحط وشاح وانجي
نزار : به اوكي …. بسﻻمة يمى
* اضبطها وباسلها راسها *
خ رقية : بسﻻمة ياولدي …
* طلع نزار قدام الباب الرئيسي ووقف … تلفت فشبح لبنى و رامي واقفين قدام الباب … يهدرزوا ولبنى تبكي …
{الظاهر انها حباته … وخايفة عليه … لدرجة شادة يده … اخ وخﻻص ربي ايهنيكم ماعندي مانقول خلي نمشي سيارتي ونكلم غادة … بس مانقدرش انقولها اني ماشي اكيدة تلفونات مراقبة …. }
نزار : اهلين غادة …. شن اخبارك
غادة : تمام بخير شن امورك
نزار : كويس بخير
غادة : حبيبي بنقولك حاجة
نزار : قولي
غادة : نبي نطلع اليوك العشية
نزار : وين
غادة : حنين وامي بيطلعوا للقيادة بيرفعنا بابا
نزار : ﻻ مافيش مشي
غادة : عﻻش حبيبي اهو بابا معانا
نزار : خليهم يمشوا عيلتك انا مانبيكش تطلعي ونلقاك عافسة برا الحوش ياويلك
غادة : اح باهي به
*نزار بيب ل رامي بيييييييب واشرله هيا سادك هدرزة *
رامي : ردي بالك ع روحك ياروحي
لبنى : حتى انت رد بالك ع روحك
رامي : هي خلي نمشي ولد خالتك قريب ياكلني ههههه سﻻم
لبنى : هههه سﻻمات .
نزار : ردي بالك ع روحك وطلوع ﻻ
غادة : باهي ان شاء الله …
نزار : سﻻم …
خش رامي لسيارة وقال : خيرك اللطف اتبيب
نزار : مصحك قلت بتسلم ماقلتش بتهدرز
رامي : معليشي البنت تبكي ماقدرتش نخليها ونمشي
* اتعفلق نزار ﻻن كل ماكانت لبنى تبكي كان نزار جنبها بس هالمرة تبكي قدام شخص اخر …وواساها شخص اخر… فعفس بنزينة بسرعة عالية
رامي : خيرك تجري
نزار : ﻻ شي ….
* سافروا هما اتنين… ومش واخد معاه شي اﻻ لبسة تانية فقط …. قابلتهم عدة بوابات وهلبا مشاكل ويحل فيها رامي ووصل لمنطقة المحددة واستقبلهم شخص… ووزع ع نزار ورامي كﻻشن وخﻻهم يرتاحوا من صباح اليوم اللي بعده بدي نزار رسمي في الجبهة هوا ورامي … وتﻻقوا مع القيافة … حاربوا وتقدموا … في شهر 4 جت كتيبة لعيلة نزار ومعاهم ظابطة خشتلهم
خ رقية : ماعندي شي في الحوش ظابطة : وين ولدك
خ رقية : ماندريس عليه مسافر قال
ظابطة : ولدك مع اﻻنقﻻب
خ رقية : نهاره حرف ﻻﻻ ولدي مايديرهاش
ظابطة : شن اتكدبي فيا واﻻ شنو
خ رقية : ﻻ مانكدبش فيك هوا قالي مسافر بيقرا لكن كان طالع يحارب خزيه عليه وعلى وجهه
صفاء شدت العلم وطلعت لظابطة وتقول : ياقاييبد تورتناااا ع دربك طوااالي
خ رقية : شفتي بعينك احنا خضررر
مروة : حتى دمنا اخضر
ظابطة : اه باهي كان عﻻفتوا اي معلومات قولونا
خ رقية : اكيدة اماﻻ شنو
* طلعت الظابطة من اهنا وسكرت مروة الباب وقعمزت خ رقية تبكي ع ولدها اللي منقطعة اخباره *
شهر 6 ساعة 8 مساء
غادة : وينك معش اتبان ومعش اتقابل
نزار : عمل ياروحي
غادة : واﻻ ملتحق بثوار ههههه
نزار : ههههه ﻻﻻ شن ثوار هادي
غادة : نبصر عليك حبيبي 
نزار : اسمعي عندي انتظار شوية ونكلمك
غادة : اوكي بباي
نزار : باي …. ها ضرسي شن الجو ….
لبنى : تمام … كيف حالك وشن اخبارك
نزار : كويس
لبنى : والله استحشتك يانزار بنهبل عليك
نزار : حتى انا استحشتكم هلبا
لبنى : نقولك حاجة
نزار : قولي
لبنى : الحوش من غيرك بعععع
نزار : ههههه استاحشت هبالك … اسمعي التغطية بلهون
لبنى : خالتي تبي اتكلمك
نزار : تغطية مانسمعش فيك الو الوو
لبنى : فصل الخط ياخالتي
خ رقية : فشل الخت ياخالتي من بكري اتلوقني عطيتيني نتكلم حتى تشيشة
لبنى : ههههههه سامحيني خالتي تو نحاول تاني
رامي : فمن كنت اتكلم
نزار : ف العويلة
رامي : من بكري انحاول ماشدش الخط
نزار : ههههه كلمتهم وكلمت حتى لبنة
رامي : وخيرها ما كلمتنيش
نزار : شن بدير ب زويلك
رامي : اتسهوك عاد هي
نزار : برا من عليا برا خلي نرقد تعبااااان
مكرم : ياعمتي نزار طالع مع الثوار خ عايشة : اللطف
ع مصباح : ومن امتى الدوة اهياه
مكرم : مانعرفش بالك ليه شهرين الله اعلم ﻻزم تفسخ بنتك منه ﻻزم
ع مصباح : انشوفها شن اتقول قبل
مكرم : تي شن اتشوفها شن اتقول اغصب عليها خﻻص ونردولهم حاجتهم
ع مصباح : غااااادة …. يااااا غادة
غادة : نعم نعم يابوي
ع مصباح : مكرم ايقول ان نزار جرد وقال افسخي منه انتي شن قولك
غادة : اللطف
مكرم : ايه جرد
سكتت غادة شوي وقالت : باهي مالياش عﻻقة شن توجهه السياسي مدامه ولد كويس خﻻص ﻻش نفسخ
مكرم : تي فهميها ياعمتي
خ عايشة : اسمعي يابنت بﻻش تزعبين مدامه جرد خﻻص ماعندنا مانديرو بيه يقتل فوﻻدنا
غادة : مانيس فاسخة يمى خيرك !
مكرم : بتفسخي غصبا ع وجهك
ع مصباح : هيييه ياسر شن تحسابها سايبة او … اتكشخ ع بنتي قدامي
مكرم : مش هكي ياعمي مصباح اشبحها شن اتقول
ع مصباح : مدامها تبي تقعد معاه خﻻص مانبيش نغصبها ع شي …
في يوم ما مش عارفة في اما منطقة بتحديد …
نزار : الله اكبرررر
هيثم : ماشاااااء الله سمح سمح عطيه واحد ثاني يانزار
علي : ع اليمين يانزار عليمين
رامي : ار بي جيي يانزااااار
كيف بيهرب نزار لكن جت جنبه بزبط متفجر وانصاب ونقلوه للمعاينة ….انبترت رجل نزار اليمين … في نفس اليوم في الليل فاق نزار
{قدر الله وماشاء فعل اكيدة ربي يعاقب فيا عاللي كنت اندير فيه قبل استغفر الله واتوب اليه…ﻻﻻ مش حنبكي الله غالب هدا ربي ماكتب الحمدلله على كل حال الحمدلله… }
الدكتور : ها يابطل كيف حالك اليوم
نزار : الحمدلله احسن…
الدكتور : معليشي هدا مكتوب والمكتوب مافيه منه هروب
نزار : الحمدلله على كل حال .. امتى نقدر نطلع من اهنا
الدكتور : ماتقدرش تطلع لين اتجي جماعتك اطلعك لو سمع بيك حد انك ثاير يديرو فيا البهادل
نزار : باهي ممكن تلفون بنتكلم
الدكتور : مافيش تغطية اهنا استنى جماعتك تو ايجوك مع الليل
وفي نص شهر 7 عاند نزار ورجع لجبهة وخدي سيارة 14.5 قعمز فيها ويضرب …
وايضا حتى رامي في سيارة على 14.5 ….ناداه واحد من شباب عجنب فتلفت …
نزار : رااااامي اطلع منهااااا
حاول نزار نزل من سيارة وماشي يعكز لكن صاروخ اسرع منه
تلفت رامي على غفلة و كيف بينزل من 14.5 ضرب الصاروخ السيارة وتفجرت… رامي شبت فيه نار كله ع بعضه و انحرق… وجوه جماعته وغطوه ببطانية وتقلوه للمستشفى وفي نفس اليوم بعتوه برا …
بعد تﻻت ايام .. دار نزار اتصاﻻته فقالوله عايش بس جسمه كله متفحم حرق من الدرجة التانية …
قعد نزار ف جبهات رغم ان رجله مبتورة وتم التقدم لين وصلوا لطرابلس في 22/8/2011
وفي يوم 24 رجع نزار لعيلته ….
خ رقية :وليدي والله نحساب مش حنشوفك تاني يروروروروروري
مروة : حمدلله ع سﻻمتك
صفاء : طيب ع سﻻمتك ياوخيي
نزار : الله يسلمكم والله استاحشتكم ..
خ رقية : والله احنا اكتر
صفاء : اقسم بالله نقعمز نبكي بروحي من كثر مستحشتك
مروة : استفقدتك والله
نزار : سلمكم …ايييه يادنيا والله شفت الموت بعيوني نحساب ان خﻻص معش بنشوفكم تاني غير ربي كاتب عمر والحمدلله جتني في رجلي …. معش تبكي يمى الحمدلله اهو قاعد قدامك
خ رقية : ياناري قاعد عزري ياولدي قاعد اشبيب
نزار : الحمدلله على كل حال الحمدلله …. شن بنقولكم
خ رقية : قول
نزار : رامي ….
صفاء : خيره
نزار : وهوا فوق 14.5 جاه صاروخ كيف بينزل لكن صاروخ ضرب ف سيارة وتفجرت عليه وانحرق …
خ رقية : اللطف
نزار : والله زي مانقولك وجعني
صفاء : ﻻ حول وﻻ قوة اﻻ بالله
نزار : اخييه عالدنيا وخﻻص ليبي يحارب في ليبي والله لين قعدت نبكي
خ رقية : ﻻ حول وﻻ قوة اﻻ بالله وكيف حاله تو
نزار : قاعد برا يتعالج كلمت امس واحد قاعد معاه غادي قالي كله مربط بالفاشة من فوق لتحت … ويستر الله وخﻻص
خ رقية : عليك عملة شن بنقولوا للبنة
نزار : وينها هيا
خ رقية : راقدة
نزار : اماﻻ خليها راقدة …. تو بعدين نفهمها بشوية يشوية
خ رقية : به خش ارتاح وليدي وارقد تشيشة اكيدة تعبان
نزار : بنموت من تعبي …
خ رقية : نوض اماﻻ اتكى نوض …
نزار : ايه هي
* خش لداره نزار ورقد ونومه كوابيس شوي شوب اينوض يصيح ويولي يرقد لين ادن المغرب وهوا على هالحال …
غادة : باهي اهو تمت الحرب خيره ماكلمنيش
حنين : اتصلي بيه
غادة : رقمه خارج التغطية
حنين : جربي تاني
غادة : به …. اهو شد شد ياحنين
حنبن : ينادي
غادة : ايه …..
يسمع نزار ف تلفون وفاق مخلوع شاف الرقم ورد : اه غادة
غادة : حبيبي والله قريب نموت عليك
نزار : سﻻمتك كيف حالك
غادة : الحمدلله انت كيف حالك واخبارك طمني عليك
نزار : ﻻ الحمدلله حالي باهي
غادة : شهرين ياروحي وانا انحاول شهرين نستنى غير نسمع اخبارك
نزار : تغطية مافيش ومافضيتش الحق
غادة : باهي انت وين توا
نزار : في الحوش كيف روحت
غادة : طيييب على سﻻمتك ياعمممري الحمدلله ياربي والله مش مصدقة والله تعرف برغم اني طحلوبة واﻻه اﻻ اني قاعدة شارياتك ونبيك …حتى جي مكرم يكشخ ويصيح قبل شهرين قالي افسخي قتله ﻻ شي مانفسخ
نزار : مصح وجهه
غادة : بكل لكن بوي وقفله قاله مدامها تبيه خﻻص سكره موضوع
نزار : ربي يحفظه عمي مصباح عارفه اصيل …بس بنقولك حاجة ياغادة
غادة : اه قول حبيبي
نزار : اا امم رجلي ايه رجلي اليمين انبترت …
شهقت غادة وقتله : كيف صار
نزار : صاروخ جي جنبي بزبط مالحقتش نهرب
غادة : ﻻ حول وﻻ قوة اﻻ بالله معليشي حبيبي هدا امر الله …
نزار : الحمدلله على كل حال … بس خايفك تشوفيني مبتور تنخلعي
غادة : من وين بزبط
تنهد نزار وقالها : من فوق الركبة بشبر
* وخنقاته العبرة *
غادة : معليشي ياروحي ماتنكدش روحك … نخليك ترتاح توا وبعدين نهدرزوا …
نزار : ان شاء الله .. سﻻم تو
غادة : سﻻمات …
حنين : خيرك توحوحي شن فيه
غادة : نزار
حنين : خيره مات او
غادة : بعيد السو عليه …
جنين : اماﻻ شنو
غادة : رجله انبترت
حنين : ههههههههه يستاهل
غادة : خيرك هكي مافيش حاجة اضحك
حنين : هههت تخيلتك ماشية معاه ف الشارع يمشي ويتقردح ههههه وايعكز بالعكوز هههه وسرواله فاضي وزيدي عاد كان الجو ريح وعجاج تبدى رجل سرواله زي العلم هههههههههههههه وووك عليا جنابي ههههههه اللهم ﻻ شماتة ههههههه سامحيني لكن تخيلتكم ههههه اي ياجنابي هههه وﻻ وعاد كيف بيسوق السيارة واﻻ كيف بيقيم البونبة وهوا ولد واحد واﻻ واﻻ وهلبا وﻻت ياعليك حالة وخﻻص
غادة بتبكي وقتلها : كملتي
حنين : هههههه ايه خﻻص
فتحت الباب لبنى وخشت ع نزار لقاته مقعمز من اول ماشافها مسح دمعته …
قعمزت جنبه ومسحتله دمعته وباستله راسه وقتله : والله مافي حاجة في الدنيا اتفرحني قد شوفتك …كل ليلة انوض نصلي ف قيام ليل بش اترد سالم انت ورامي … الحمدلله على سﻻمتك ياغالي . والله الحوش مايسوى من غيرك وﻻ حيسوى
نزار خداها عنده واضبطها وبكي بكي بكي لين طاب خاطره طبطبت عليه لبنى وقتله : ياريته فيا وﻻ فيك
نزار : معش اتقولي هكي … انا راجل نتحمل لكن استاجعت من هلبا حاجات …شباب زي الورد ماتوا قدامي والله يالبنى والله والله
* انهار نزار وشد ف كلمة والله
وتعاطفت معاه لبنى هوا يبكي وهيا تبكي ومضبطين بعض هيا من شوقها ليه وهوا منهارر تماما
لبنى : معليشي ياروحي معليشي قصدي راحو هدا حد عمرهم
نزار : اشبيب شبيب ياضرسي كنت نهدرز انا وياه كان واقف بحدااااي بحداي بحداي اهنا صوت رصاص ونضربوا ونهدرزله ع موقف اتجيه رصاصة فدماغه وانا مازلت نهدرز نتلفت نلقاه طايح سايح فدممممه
لبنى : ياحليلي ياحلييييلي وووك عليا
نزار : كل مانحط راسي بنرقد يجي قدامي كابوس
* تكاته لبنى ع سريره وقعمزت جنبه اطبطب عليه
نزار : تعبان يالبنى تعبان شاد دمعتي قداش ليا
لبنى : سﻻمتك من التعب سﻻمتك …كيف حال رامي
* شد راسه نزار وقالها : سامحيني يالبنى …
لبنى : خيره خيره رامي
نزار : في المانيا رامي
لبنى : عﻻش شن صارله احكي
نزار : اتفجر جنبه صاروخ وعنده حروق في جسمه
لبنى : ووووه عليا ماحس
نزار : سامحيني لبنى والله ماقدرت نوصله سامحيني
لبنى : به وكيف حاله وشن صارله
نزار : قاعد ف المانيا ان شاء الله ربي يشفيه
* حطت راسه لبنى عالسرير جنب نزار وقعدت تبكي …. نزار معش عرف ايحط ايده عليها او ﻻ … بعدين طبطب عليها بحنية ….
لبنى : عﻻش حظي هكي ياربي عﻻش اشمعنى انا بدات والله وجعتني يانزار ووجعني الولد ياناري
نزار : معش تبكي يالبنى والله تزيدي فيا…. تزيدي فييييا
لبنى : ياحليلي يانزار انت ورامي والله هلبا عليا هكي …
نزار : اسمعي ضرسي … رامي حتتحسن حالته ويروح بإذن الله تعالى … انا حنتصل بيه بعدين وحنعطيك تكلميه وتطمني عليه غير امسحي دموعك بس
غادة : ياكلبة عﻻش مقايلة ل امي ع موضوع نزار
حنين : مانحسباش الموضوع سر
غادة : مبردك ياحنين والله باردة راهو
حنين : تو من جدك انتي مزال بتكملي معاه حياتك ياغبية فوتي النم تو يجيك غيره كان بوك وافق انه يخليك معاه فمش حيوافق انك تتجوزي نزار ومبتور اصﻻ حتى واعر تعيشي معاه … فكري فيها
غادة : ماعندي مانفكر
حنين : غير اسكتي وفكري في كل العواقب فكري بعقلك مش بقلبك فكري …
* سكتت غادة وتفكر وتفكر وتفكر وطال سكوتها وقالت : والله تعرفي حسه كﻻمك صح
يتبع………
لقراءة الجزء التالي : الجزء الثلاثون من رواية عاصفة الصمت
لقراءة الجزء السابق : الجزء الثامن والعشرون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
