متابعة سعيدة للجزء الثاني عشر من الرواية الجميلة رواية رجل يحببنه الكثير للكاتبة المبدعة لوزة، نتمني ان تلقي إعجابكم بإذن الله ، لذلك جهز فنجان قهوتك وكل تركيزك لتلقي جرعة من الروعة والجمال الذي لا مثيل له .
الجزء الثاني عشر من رواية رجل يحببنه الكثير للكاتبة لوزة ليبية
نزلت عزيزة لحوش اﻻها … وهاني ناض خدي دوش منعش ولبس سورية بيضاء و سروال جينز اكحل وسلت شعره خدي نظارته ومفاتيحه وتيزتانه ولبس كندرته وطلع لشارع
منال ل دنيا: دنيا حق تكلمي في صديقي سراج ؟؟
دنيا:هوا اللي يكلم فيا ويجري ف جرتي غير ياسويدي كلميني
منال:قصدي انتي تهدرزي معاه ؟،
دنيا:ايه نكلم فيه
منال:به عﻻش ؟
دنيا: اهو مرات نكون مكسدة فيتصل بيا فنرد عليه
منال:باهي بش تعرفي اني معجبة بيه ونبيه
دنيا:ﻻ ماقتيليش نحسابك تكلمي فيه هكي وخﻻص
منال:تي شن هكي وخﻻص وقته التسليه انا معجبة بيه ونبي انطيحه فرحت قالي اطلعيلي قدام المصرف نبيك ضروري وقت طلعتله نحساب بيقولي انا نبيك قالي انا معجب ب دنيا ونبيها كلميهالي
دنيا:بجديات ؟؟ ههههههههههههههه مايطلع منه
منال:شنو مايطلع منه هادي اقطعي عﻻقتك بيه
دنيا:ﻻﻻ خليه نستفيد منه ف مرة من المرات
منال:شنو انتي ماتحسيش ؟
دنيا:به الولد طلع مش مفكر فيك شن بنقوله فكر في منال بسيف
منال:والله ماتتحشمي حتى كلمة طيبة ماتعرفي تقوليها
دنيا:الحشم خليته ليك احبيبة …
شبحتلها منال من فوق ل تحت وطلعت من المكتب اتبكبك وتقول ياريتني ماتكلمت من نقالها ومصح وجهم هما الزوز الطيور على اشكالها تقع والله اﻻ مانوريك يادنيا
لقاها حسام في الممر قالها :منال خيرك تتكلمي بروحك
منال:دنيا بتكلم اللفعة ولد عمها بش تقوله حسام يتحرش فيا ويديرلي لقطات نص كم
حسام:ﻻ اله اﻻ الله … خيرها هادي هبلت واﻻ كيف
منال:انت شاب كويس وماريت منك اﻻ كل خير فقلت ﻻزم نقولك
حسام كيف جاي بيخش للمكتب شداته منال وقتله ننصحك ماتكلمهاش برا طول كلم ولد عمها وخليه ايجي اهنا وقوله كل شي
حسام:هكي تقولي ؟
منال:ايه
حسام:شن اللي يخليك تساعديني هكي برغم انها صاحبتك ؟
منال:اكتشفت انها مش صاحبتي غدرت بيا وخنبتلي فلوسي
حسام:اصﻻ كنت مستغرب كيف قاعدة معاها
منال:فيسع كلم ولد عمها ﻻن الدوتظام قريب ينتهي
حسام:وكي به
نزل حسام ل هيثم وحكاله اللي صار
هيثم:باهي كيف بتجيبه ل اهنا وانت مافيش بينك وبينه دوة وحتى ولو مش حيسمع منك يعني ف النعاية بنت عمه ومش حيرضى فيها
حسام:ﻻﻻ نعرف شن نقوله خلي نتصل
اتصل مرة واتنين وتﻻتة وفي الرابعة رد ..
حسام:ايوه السﻻم عليكم …كيف الحال …الحمد لله… قتلك عبدالهادي نبيك ضروري بالله … ايه قدام المصرف … بخصوص مسألة تتعلق بعيلتك ….ﻻﻻ مش عيلتك ككل ﻻ فرد منها …اوكي نستنى فيك ..سﻻم
هيثم:شنو بيجي
حسام:ايه قال شوية وجاي
خشت روابي من باب المصرف وبينما حسام و هيثم يهدرزو مانتبهولهاش لين قتلهم تتناقشو هكي معناها بديرو عملة
حسام:هههههه اهلين روابي
هيثم:هههههه صح كيف عرفتي
روابي:نزبطكم اصﻻ
حسام:شن جايبتينا
روابي:جبتلكم دونات اللي يحبهم هاني …وينه اماﻻ
حسام:هاني طلع من العمل قال عنده شوي حاجات بيديرهم
روابي:اها ياخسارة باهي اسمع انا عازمتكم على الغدي انتو التﻻتة اتصل ب هاني
حسام:اعتق….
قاطعاته روابي وقتله:على خاطري ماتقولوش ﻻ بالله عليك
هيثم:انا والله ماعندي مشكلة
حسام:اكيد ماعندكش مشكلة بما ان الماكلة بﻻش 
روابي:هههههه هيثوم قاعد بخيل زي قبل
هيثم:هههههههه تغيرت شوية ناخد للمرا ف حاجات ونصرف عالحوش
حسام:ﻻ بالك بتخليها تموت من الشر
روابي:هههههه ايديرها هيثم مش بعيدة عليه …. غير هيا حسام اتصل ب هاني
حسام:به استني هي …
خدي نقاله حسام واتصل ب هاني … حسام:ايووه يامعلم شن الجو
هاني:اهلين يابرنس شنو اشتاحشتني اماﻻ
حسام:حدد مكانك فيه كبسة جنبك واﻻ ﻻ
هاني:ﻻ بروحي ياقدر شن فيه
حسام:روابي جت للمصرف وعازمتنا عالغدي ومصرة انك اتجي
هاني:تي ﻻﻻ شن عازمتني هادي
حسام:ايه اهي جنبي شن نرد عليها
فكت روابي النقال من حسام وقتله الو هاني شن الجو
هاني انصدم للحظات وقالها: اهلين روابي
روابي:شنو بتجي
هاني:ﻻﻻ صعب الحق
روابي:قصدي هكي تردني اول طلب ليا من وقت طويل حسام قالي كان وافق هاني نطلعو
هاني فكر يقولها ان العيلة دايرين غدي فرد عليها:والله شن بنقو…
قاطعاته روابي وقتله:غير هيا هاني بﻻش اعذار عارفاتك بتقولي العويلة مطيبين
هاني:ههههههه
روابي:هههه قاعدة نحس بيك قبل حتى ماتتكلم
هاني:باهي يستر الله عطيني حسام تره
روابي:اوك اهو معاك
حسام:اها يامبحبح
هاني:$#@&*&#@
حسام:ههههههههههه
هاني:$#@&* ياكلب دفيتها فيا وخليتها ف وجهي ياعافن من قال نبي نقابلها نخاف نضعف قدامها
حسام:خﻻص تو تقولي المكان وتو نتﻻقو يﻻ سﻻم
روابي:واخيرا وافقتو…. اوكي حنتﻻقو ساعة 3 في مطعم اللبناني يﻻ سﻻم
حسام وهيثم:سﻻم
هيثم:نقالك ايرن حسام
حسام :كنت سارح … هدا اللفعة شوره جي …
هيثم:به رد رد
حسام:اوكي…. الو … ايوه …. باهي تمام شوية وطالعلك هي سﻻم هيثم:خلي نجي معاك
حسام:ﻻﻻ خليك اهنا كان بتجي معاي بيفهمها حاجة تانية
هيثم:اوكي حنبيت عليك من الروشن متع مصرف كان صارت دعكة تو نجي نديرلك الدعم
حسام:هههه منور
ناض حسام من كرسيه وطلع من باب المصرف
وقف ايدور ف عبدالهادي مالقاشي جت سيارة لبوة تجري من بداية الشارع ودرس قدام حسام
عبدالهادي:احسومة وين وين معاش اتبان
حسام:اهلين عبدالهادي شن امورك
عبدالهادي:اهو معدلة … شنو منو موضوع وضروري وحياة او موت شن فيه
حسام:والله شن بنقولك … متحشم الحق كيف بنقولهالك
عبدالهادي:هههههه فهمت فهمت تبي هروين واﻻه
حسام:الله يفكنا سوه
عبدالهادي:اماﻻ خش ف موضوع طول
حسام:انا اتهمني سمعتك ياعبدالهادي وسعمت عيلتك واللي صاير الصراحة نتحشم حتى كيف بنقوله
عبدالهادي:تي شن تهدرز انت قول $#@&*$ قول طول خيرنا حسام
حسام:دنيا
عبدالهادي:خير عمها
حسام:دايرة على حل شعرها سامحني في كلمتي مكورجا عالمدراء وانت افهم
عبدالهادي:دوة غليظة هادي
حسام:ماتاخدش مني موقف لكن انت تعز عليا ومانرضاش يقولو بنت عم اللفعة مدايرة ومدايرة
عبدالهادي:باه باه تمام وكان طلع كﻻمك كدب
حسام:اسئل من تبي في المصرف الكل يعرف بالشي هدا
عبدالهادي خش يجري للمصرف وركب الدور التاني طول
ويسئل وين مكتب دنيا فﻻن
جاوباته البنت قتله تاني مكتب عاليسار
مشي في الممر ووصل لمكتب دنيا خشله وجبدها من شعرها وقالها:اطلعي قدامي يابنت الكلب وطيتي روسنا
دنيا:خيرك عبدو شنو فيه
عبدالهادي قام ايده بيضربها وقالها :ﻻ عبدو وﻻ نمي حسابك في الحوش ياتافهة والله اﻻ مانبدى قاتلك ياهفكة يافنص المرة اﻻولى فوتهالك لكن هادي مش حنفوتها…. تنزلي قدامي فيسع مانبيش ندير العرعوري قدام الناس
دنيا:باهي به ارخي ايدي ..
طلعت دنيا من مكتبها ونزلت الدروج وطلعت من المصرف فتحت شنطتها بتاخد نفاتيح سيارتها قالها عبدالهادي:مصح وجهك هاتي مفاتيح اهني اركبي فسيارتي تو نوريك انا والله اﻻ مانكسرلك راسك ياتافهة ركبها سيارته وطار بيها لحوش عمه
هيثم ل حسام:شنو منو
حسام:والله برغم اني مانحبش هكي لكن جبرتني ندير هكي.. بتخرب حوش هاني وبتتبلى عليا هلبا ياراجل
هيثم:خليه يكون درس ليها
حسام:يﻻ ان شاء الله ربي يسامحني…هي انتهى الدوام نوض خلي نروحو انا بندوش ونبدل وبعدين نتﻻقو ف المطعم
هيثم:تمام يابرو
خي هاني اكل من المطعم ورفعه للحوش
خش لحوش امه حط اﻻكل في المطبخ جاته مرام
مرام:هاني
هاني:شوفي مرام …. انا رجل متجوز ومالياش شهرين … والحق حاشبك اختي ومافيش مرة فكرت فيك غير هكي … فنتمنى منك ان ماتخليش عﻻقة الاخوة اللي بينا اضيع بمواضيع انحبك ونبيك
مرام:ان
هاني:خليني نكمل دوتي …. انا كنت نتصرف معاك بعفويتي في جميع اﻻمور مانبيش نبعد عليك عشان سبب انك تكنيلي مشاعر … انتي بنت كويسة وقنينة والف شاب يتمناك …
مرام:باهي خﻻص حندس مشاعري….بش قصدك بتتغير عليا
هاني:ﻻﻻ نتمنى انك تفهمي كﻻمي ومعش تبكي يامهبولة خﻻص يامشفشفة
مرام:ههههه ربي يحفظك هاني كل شي فيك حلو حتى كﻻمك قلته بطريقة منمقة بش ماننجرحش
هاني:وانا نقدر نجرح مرومة المهبولة هههههه
مرام:ربي يحفظك هاني
هاني:ويحفظك …. وين عزيزة
مرام:ركبت فوق
هاني:به اهو جبت غدي واتي صحتين عليكم …. يﻻ خلي نركب تو
مرام:اوكي
ركب هاني لحوشه حط ماكلة في المطبخ وشاف لساعة لقاها 2:15 فقرر انه يطلع بش يوصل عالموعد بالتمام
هاني:عزو حبي … تغدي انتي انا طالع
عزيزة:وين ماشي
هاني:الشباب طالعين هكي مشوار ضروري فقالولي هيا معانا
عزيزة:ﻻ ماتطلعش خليك معاي
هاني:ﻻﻻ ﻻزم نمشي عطيتهم كلمة
عزيزة:ماخصنيش فيك اقعد معاي
هاني:عزيزة نقولك عطيت كلمة
عزيزة:ﻻ ماتطلعش
هاني:عزيزة مانحبش اﻻسلوب هدا
عزيزة:به برا هي صحابك اهم مني
هاني:ااياااه علينا عاد
عزيزة:شنو مش طايق حتى كﻻمي
هاني:والله عصبتيني عزيزة هي سﻻم
طلع وسكر الباب وهوا متكنطي
نزل الدروج وصل باب الرئيسي طلع منه وفتح سيارته وركبها وهو متغلل من عزيزة
هاني يتمتم والله ماوقتها العركة ياعزيزة الله يسامحك بس عفلقتيني لين وليت نشبشب عرق
مسح ف بالكينكس واتجه ل المطعم
خش هاني وركب لدور الثاني لقي هيثم قاله:نحساب روحي جاي بكري وهو انت كاي قبلي بالله شن متوقع ماكلة بﻻش تجي حتى قبل موعد بساعتين ههههههه
هيثم:ههههه حطيت المرا في حوش امها وجيت اهنا طول هههه
هاني:بالله النساويت يديرو ف حاجات مرات اتكلفز الرقبة
هيثم:عﻻش شن صار
هاني:ﻻ شي هكي
بعد ربع ساعة جي حسام واﻻخيرة كانت روابي
روابي:الله محﻻ لمتنا دكرتني بأيام الجامعة لما نلتمو في الكفيتيرية ناكلو نصاص طعمية
حسام:هههههههههههه ياعليك ايام
هاني:ههههههه بس احﻻ ايام
شبحتله روابي بنظرة متع فعﻻ احﻻ ايام
تنحنح هاني وقال :تعرف ياحسام لقيت هيثم اول واحد اهنا
حسام:اكيدة بطنه خالعاته
هيثم:ههههه تي باهي وانتو حشيشتكم تلبسوني
روابي ابتسمت وشبحت لهاني وقالت :اسمعو قبل مانطلبو غدي عندي خبر بنقولهولكم
حسام وهاني:اها قولي
روابي:انا انح…..
يتبع……….
لقراءة الجزء التالي : الجزء الثالث عشر من رواية رجل يحببنه الكثير للكاتبة لوزة ليبية
لقراءة الجزء السابق : الجزء الحادي عشر من رواية رجل يحببنه الكثير للكاتبة لوزة ليبية
للإطلاع علي فهرس الاجزاء كاملة : جميع اجزاء رواية رجل يحببنه الكثير كاملة للكاتبة لوزة ليبية
جميع الحقوق محفوظة للكاتبة لوزة ليبية .
