الجزء

الجزء العشرون من رواية الزوجة التائهة بين الأحلام والواقع

الجزء العشرون من رواية الزوجة التائهة بين الأحلام والواقع

وصلنا إلي الجزء العشرون ومازال هناك العديد من المواقف الجميلة الرائعة التي لا مثيل لها بين ابطال الحكاية فلا تفوت قراءة السطور التالية من ابداع الكاتبة كيندا .

الجزء العشرون من رواية الزوجة التائهة بين الأحلام والواقع

ناضت ليلى من نوم وغسلت وجهها وبدت تضم فى الحوش وهيا تضم لقت رساله على شكماجه قرتها وبعدها حطتها وطبست لى سرير بتاوسيه بس وهيا تواسى فى مخده لقيت تلفون احمد نساه فاقاماته تبى تحطه على شكماجه ………. وصلت رساله من رقم غريب فافتحت
الرساله ولقت انا رقم كاتبله << صباح الورد باش مهندس شنى خداك نوم حتى اليوم وماكش جاى راهو الموعد ساعه 11يستنى فيك ومانقدروش نأجلوه >> وهنا ليلى جتها صدمه وقعدت تقلب فى نقال شوى وبعدين لوحت نقال على سرير وقعدت تبكى وكان وقتها ساعه 11 صبح وفجأه سمعت باب الحوش يتصكر فا مشت لوسط الحوش ولقت احمد مبتسملها ووهوا كيف بيقولها …
احمد ….. حبيبتى ….
ليلى … << قطعت عليه طول وقتله >> من هيا الا باعتتلك رساله على نقال ؟؟؟
احمد … منى الا بعتلى رساله انتى على منى تحكى ؟؟؟
ليلى … اسال نفسك انت لمنى عاطى رقمك ولا الباين انا من كترة ماعاطى رقمك لبنات لين معاش قدرت تفرق يااحمد
احمد … انتى من سمحلك تتكلمى معاى هكى بغض النظر على رساله تعرفى اخر مره يعلى عليا صوتك فاااااهمه … نقولك شى تعالى مديلى كف وخلاص …. وخدى باكو الا كان فى ايده ولوحه على كنبه وخش لدار نوم قعد يدور فى نقاله لقاه فوق سرير خداه وطلع وقربع الباب وراه وهوا نازل لقى امه
قالتله …
ام احمد … احمد وليدى خيرك جيت على عموم جيت فى وقتك قبل نبيك تجيبلى …
احمد …. ماعنديش وقت بنطلع وباللهى عليكم ارحمونى رااااهو انى خلاص وصلتلى صفااااااار وقربع باب الحديد وطلع
فاام احمد استعجبت من ردة فعل ولدها فاقررت تسال ليلى شن فى بس رجليها ماخلوهاش تقدر تركب فوق فاوقفت فى اول درجه وقعدت تنادى ….
ام احمد…. ليلى لييييييييييلى وينك يابنيتى ردى عليا اللطف خيره مايرد عليا حد ياليييييلى بنيتى وينك ردى عليا تربحى ……. ياصفااااااااء ….. صفاااااااء تعالى نبيك تعالى ….
صفاء …. نعم ياااااام خيره صوتك سمعته لعند دارى شن فى
ام احمد…… اركبى شوفى ليلى خيرها وشن فى … احمد طلع وراقيله زيت وليلى نضبح عليها وماتردش والمرأه حامل مررررات حتى صارتلها شى برى اركبى شوفيها خيرها
صفاء ….. باهى مالا قولى للمسكسكه بنتك تكمل ضمان باقى صاله باهى …..
ركبت صفاء فوق وصللت لباب و ….
صفاء … طق طق طق ليلى وينك ….. لييللى ..
ليلى …. << فتحتلها الباب وعيونها منفخات من بكى وقالتلها … خشى ياصفاء خشى ..
خشت ليلى لدار نوم ولحقتها صفاء بعدين صفاء قالتلها …
صفاء … ليلى خيرك تبكى وخشومك حمر لطف شن فى حسك خوفتينى ؟؟
ليلى…. لا لا مافى شى غير مريضه شويه …
صفاء … معقوله تكدبى عليا ياليلى بالله عليك شن فى ؟؟؟؟
ليلى هنا لما سمعة الكلمه هيا نهارة بالبكى وطبتت صفاء وقعدت تبكى وصفاء قعدت تبطب عليها بس لحد ماهدت وبعدين قالتلها تعالى نخشو للمطبخ نديرلك طاسه زهورات بالنعناع باش تهدى وبعدين احكيلى شن فى …. ناضو هما الاتنين وخشو للمطبخ وصفاء حطت الميه فى الكاتر وحطت وريقات نعناع فى طاسه وكيس زهورات واعطتهولها تشربه واول ماهدت ليلى تماما قالتلها.
ليلى ….. انى حاسه انا فى شى غلط فى حياة احمد ياصفاء
صفاء …. كيف يعنى ….
ليلى …. يعنى متلا تدكرى مره لما كلمتك على تلفونك وقتلك اعطينى احمد لما كنت فى حوش بوى ….
صفاء …. باه
ليلى … ….. اتصلت هدكا اليوم بتلفون احمد بس لقيته اكتر من ساعه مشغول ولما قتله قالى لا مش عندى وقالى اعدار ماقتنعتش بيها بس سكتت وقلت انى مرات فاهممه غلط ….. بعدين لما روحنا تانى يوم صبح تقربيا كلاماته بنت ورد عليها وحسيت صوته تغير وارتبك وانى سمعت صوتها صح الكلام مش واضح بس كان صوت صوت بنت وقاللها اهو جاى وبعدين اليوم وحده بعتتله رساله على صبح وقالتله امتى بتجى وزياد تقوله صباح الورد ….
صفاء …. باهى ياليلى ان بعض الظن اتم ومن قالك مرات صح نساه تلفون ؟؟؟
ليلى …. لا يكدب عليا … لانا نفس رقم الاكلمه امس وبعتله رساله اليوم … لما فتحت مكالماته لقيت هديكا الليله فى الوقت الا انى اتصلت بيه باش نقوله علاش نتصل بيك وتلفونك نلقى فيه مشغول وهوا قالى نسيته نقالى فى مكتب لقيته متصل برقم بنت هيا وقعدو يدوو مع بعض قريب 10 دقايق باهى فهميهالى كيف ؟؟؟؟ مش نسى تلفونه ….. ولقيته متصل بيها قريب 10 مكالمات وهيا ماردتش عليه بكرى لانا طلعى التاريخ ومكالمه …….والكارته انا بعدها كلمته وقالى تلفونى ناسيه باهى كيف فهمهالى ترا …..
صفاء …… ليلى واللهى مانى عارفه شن بنقولك بزبط بس الا نبى نقولهولك انا احمد واللهى كويس وطيب ومستحيل يخونك ومرات انتى فاهممه موضوع غلط وظلمتيه وصدقينى واللهى احمد مستحيل يخونك …
ليلى … واللهى ياصفاء مانى عارفه حاجه حاسه نفسى دايخه ومش فاهمه شى ونبى نبكى بس …
صفاء…. استهدى بالله واستعودى من شيطان وصدقينى هدا وسوست شيطان زايده بس لدلك نقولك شى فوتيه موضوع ومعاش تكلميه فيه ودبرى روحك عاديه وهوا من نفسه لو فى شى واللهى الامايجى ويقولك وكان هدا معناها واللهى انتى مرات يتهيالك ويكون مجرد زميله فى خدمه بس لانك حاليا ماعندكش ولا دليل على انه يخون فيك لا لقيتى رسالة حب ولا مكلمه عاطفيه فا هكى رح تنكدى عى روحك بس ياليلى …. اسمعى توا استهدى بالله وانزلى معاى وغيرى جوك خلى نغيرو جونا ونهدرزو مع ميمتى فازو نوتيلا شوى لانها خليتها تطيب فى بازين لرجاله فا خلى ننزلو ونوتو حنا باكوت البكلاوه ونستفوها ونوتو صفر التفريق وكلينكس ونستفو الحلويات فى باكوتها هيا نوضى هيا للوشى وغيرى جوك
ليلى … اوك حبيبتى انزلى انتى وانى توا نلحقك نخش الحمام بس ونلبس عبايتى ونلحقك
صفاء ….. اوك خلاص توا مالا خلى ننزل نساعد فازو نوتيلا قبل ماتبدى تغرد من لوطه ههههههه وانتى الحقينى
ليلى …… هههههههه اوك حبيبتى
خشت ليلى للحمام وغسلت وجهها وقعدت تشوف للمرايه شوي وتدكر فى اللقطات الحلوه الا عشوها مع بعض ولقطة البحر وكيف غطسها ولقطة البشكليطات وسينما ولندن والاوتيل واى لقطه حلوه عاشوها مع بعض وبعدين قالت بينها وبين نفسها زعمك مايكونش مجرد اكتئاب حمل ويصورلى فى حاجات هيا عاديه فى الاصل …. ااااااه ياربى انى شالله يكون هكى موضوع وبعدين قامت شعرها فوق وطلعت خدت عباية صلاه متعها ولبستها وهيا كيف طالعه من دارها شافت باكو الا ملوح على صالون فامشت قامته وفتحاته وهنا لقت انا الباكو فيه تاكم دهب ابيض مع فصوص كهرمان على اللون الاحمر ورساله كاتبلها فيها ….
حبيبتى ليلى … انى تشحورت اليوم بسببك من فجاير ربى وقعدت نستنى فى صايغ لين فتح باش ناخدلك شى زى تمنك انتى بالنسبه ليا فايريت تقولى بيه بس ههههههه مش اتفقنا انكم انتم نساوين زى قطاطيس ههههه تاكلو وتنكرو ههههه نبصر نبصر ماتزعليش ياشفشه وهدا تاكم كان مفروض نجيبهولك فى مستشفى بمناسبة نوضانك بسلامه وبمناسبة انك رح تجيبلى احلى بيبى فى دنيا يااحلى ام واحلى بنووووته فى دنيا وان شالله يارب يعجبك واسف لانا جى متاخر شوى ….. مهبولك احمد …. ❤ ❤ ❤
فا هنا ليلى كملت رساله وقعدت تبكى بس بعدين قامت تلفون واتصلت بيه بس للاسف ردت الاستوانه المعتاده <<< الرقم الدى اتصلت به مقفل يرجى اعادة الاتصال لاحقا >> وهنا ليلى صكرت نقالها ووقفت شوى ومسحت دموعها الا استمرو معها حتى بعد اتصالها وحطت نقال فى جيبها وخدت مفتاح ونزلت واول ماخشت لعزوتها قالتلها …..
ليلى … اهلين ماما شن اخبارك
ام احمد ….. الحمد لله يابنيتى تمام انتى الا وينك من بكرى نادى فيك ولاحس ولاخبر فاقولت بالك البنت صارتلها حاجه
ليلى ….. لا لا ماما بس كنت فى دار نوم هدا علاش ماسمعتكش
ام احمد …. خيره احمد طلع زعلا ن ….
ليلى …. مش عارفه ياماما توا لما يروح نساله
ام احمد …. فى داخلها قالت <<< توا انتى مش عارفه ولا تفوتى فيه عليا >> وبعدين قالتلها باهى باه مالا هوينا صفاء فى دار بادية توتى اللحقيها خلى انى نكمل باقى الغدا وعشاء
ليلى …. باهى باه ماما
ومشت ليلى وقعدو يهدرزو وصفاء فرحانه ومتزقططه وليلى تساير فيها مسايره …… بينما احمد وصل للخدمه متعفلق خش للاجتماع الاول وكمله وبعدين عنده شوية خدمه دارها وبعدها نحى جاكيت متعه وعلقه على كرسى وفتح نقاله وحطه فى جاكيت وخدى تاب متعه ونزل لى الكرسى اللوح الا فى جردينه متع الشركه وهدا الكرسى كان مفضل ليه فى تقعميزه وقعد يقلب فيه وسارح فى عالم تانى لحد ما جاه نائب المدير العام وقاله وينك ياراجل من بكرى انى وسكرتيره ندورو فيك راهو المدير العام متع المشروعات يبى يجتمع بيكم …. وهنا احمد ركب فوق وخش لغرفة الاجتماعات ولقى سكرتيره تستنى فيه وقالتله تحتاج اى شى بش مهندس فاهنا قاللها ….
احمد … ايه تلقى فى شوية ورق على المكتب خوديه واطبعيه يعنى ديرلى منه نسخه ولما نطلع نلاقهم زوز فوق مكتبى
سكرتيره …. اوك … ومشت للمكتب متعه وهنا كيف خدت الورق وبتطلع لمحت جاكيت متعه فا مشت وخداته وقعدت تشم فيه وتغمر لحد ما فاجأه شرين النقال الا فى جاكيت فا طول دخلت ايدها فى جاكيت وقامة تلفون فالقت .الاسم الا يتصل بيه <<< حبيبتى >> فا ترددت شوى بعدين فتحت الخط وقالت بصوت دلع …
سكرتيره …. الوووووو منى معاى
ليلى …. عفوا انتى الا منى هدا تلفون زوجى انتى منى
سكرتيره …. اه فهمت عليك هوا راهو عنده اجتماع توا ومش فاضى اتصلى بيه بعدين اوك سلام وصكرت تلفون
وليلى هنا جتهاا صدمه وقالت لصفاء شفتى انى مصدومه ردت عليا وحده وقحه حقيره كانا تشوفى صوتها تقولى ولا نقوللك اعود بالله من شيطان رجيم
صفاء …. شن قالتلك …
ليلى … قالتلى احمد مش فاضى وعنده اجتماع عادويله بعدين وسكرت
صفاء …. ها ريتى معنها هادى سكرتيره متعه وهوا اكيد فى اجتماع فا خلاص معناها مرات حتى لما بعتتله رساله وهكى كان عنده اجتماع واكدتله بس
ليلى …. اااه ياربى ماعندى شن بنقول خلاص كملى كملى ياصفاء
وهنا دارو حاجتهم كلها وليلى قعدت مع صفاء لوطه ومابتش تركب واحمد روح ركب فوق غسل وجهه وغير حوايجه ونزل وقعد مع خوته يستنو فى رجاله ومشى النهار وكملت الفضانيه على خير واتفقو الرجاله على كل شى وعلى انا العرس بعد شهر بزبط ووتعشو و روحو وبعدها احمد قال لامه انى تعبان هلبه وبنركب بينما ليلى ماقالتش ولاحرف قعدت تشبحله وهوا مباش يشبحلها بكل وهوا طبعا ركب للحوش وبدل ولبس بيجامته وقعمز على كنبه وهيا قعدت لوطه لحد ما كملو المعايين وضمو كل شى وساعه 12 بزبط ركبت وقبل ماتفتح الباب سمعت صوت التلفزيون مقوى فا غمضت عيونها للحظات وتنهدت وفتحت باب ولقت ……..

يتبع …….

لقراءة الجزء التالي : الجزء الحادي والعشرون من رواية الزوجة التائهة بين الأحلام والواقع

لقراءة الجزء السابق : الجزء التاسع عشر من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى