هل أحببت الأحداث السابقة من الرواية ؟ مازال هناك الكثير من الجمال في الأجزاء القادمة لذلك جهز نفسك للكثير من التشويق والروعة من المبدعة كيندا .
الجزء الحادي عشر من رواية حبيبتي لا تنسيني
ملاك .. نبى نطلب منك طلب لكن يقعد بينى وبينك .. بس بعدين نقولهولك …
فرح .. شن فى ؟؟ خوفتينى ؟؟
ملاك .. توا نقولك بعدين .. توا هيا نطلعو لا امى تحس بينا ..
فرح … هيا نوضى هي …
طلعت فرح وملاك لصاله وقعمزو ونفتحت موضيع المعتاده … ومرت ساعه ورا ساعه … وتبدل جو فرح بسبب ملاك وامها … وقدرت تجتاز احساسها الا كان ينبئها بشى سيئ … وومع ساعه 8 تحديدا … جى لامها اتصال خوها الوحيد والعازب الا مهاجر فى فرنسا .. فامشت تجرى فى دار عربيه تكلم فيه وقعدت فرح وملاك بروحهم .. وهنا فرح قالت لاملاك …
فرح .. شن فى شوقتينى ؟؟
ملاك .. تعالى نغسلو معابين هالشاهى .. ونقولك ..
فرح .. هيا قدامى ههههههه 
خشت فرح وملاك للمطبخ .. وبدت وحده تغسل وتانيه تمسح وترد … وهنا ملاك قالتلها ..
ملاك .. احمد عيد ميلاده بعد بكرا … وحابه نديرله مفاجاه حلوه جداااا بس ماعرفتش كيف تقدمهاله ..
فرح .. هههههههه ياعطيهالك شن هيا ؟؟
ملاك … قررت نقوله يجيب اهله اسبوع الجاى ويتقدملى رسمى
فرح .. واخيرااااا هههههه رووووووووووووووووى
ملاك .. هههههههه اسكتى يامعفنه فضحتينى
فرح … مالا خلى نمشى نقول لى ماما ..
ملاك .. لا لا انى رح نقولها قبل موضوع بيوم .. انى مانعرفش شن يصير .. مرات يتاجل موضوع .. مانبيش تنكتب عليا انها عرفت …
فرح .. اوك خلاص بس والله بجد احلى مفاجأه لاحمد …
ملاك .. باهى كيف نقدمهاله ؟؟
فرح .. خوديله متلا برفان .. واكتبيله رساله بطريقتك وخلاص ..
ملاك .. مافيش طريقه احلى من هكى …
فرح .. حلاوة شى فى بساطته ..
ملاك … اوك خلاص باهى كيف بنجيبهاله ؟؟
فرح .. لما تتلاق وفى الجامعه اعطيهاله … افضل شى صدقينى
ملاك … خلاص تم باهى بكرا تخلى صغارك لعزوزتك وتطلعى معاى ؟؟
فرح … ماشى خلاص بس اهم شى مانطعتلوش
ملاك …. تم خلاص
وهنا خشت امهم وقالتلهم
امهم … شوقكم .. شنى قصة تزغريط الا نسمع فيه ؟؟
فرح … ههههههه << شبحت لملاك وضحكت >> … ياسيدى جاين عرسان لى ملاك ههههههه
امها .. بجد ولا تزغرطى ؟؟
ملاك .. تبصر تبصر ياماما … هادى تعرفيها غالى عليها بصاره < وشبحت لاختها شبحت سكرى فمك >>
وهنا امهم شبحتلهم شوى وبعدين قالتلهم …
امهم … احساسى يقول فى شى .. بس يالله ياخبر بفلوس بكرا بى بلاش …
فرح … حى .. حسه تلفونى يرن .. هدا اكيد محمد لوطه .. خلى نطلع نلبس جبتى ..
وطلعت فرح بسرعه ولبست جبتها ولمت صغارها ونزلت … بينما ملاك قعدت تهدرز مع امها شوى وبعدين خشت لدارها .. واول ماسكرت دارها سمعت تلفونها يهز فا طفت ضى دارها وخشت تحت يرغان وقالت ..
ملاك … ايوااااااااااااااااا
احمد … بجد انتى صوتك رايق ؟؟؟ خيرررررك ؟؟
ملاك .. خيرك تعيط حبيبى ؟ شن فى ؟؟
احمد … شوفى قداش مره كلمتك ؟؟ انتى عارفه انى مانحباش جو هوا ؟؟
ملاك … احمد انت خيرك هكى تتكلم ؟؟
احمد … خيرنى نتكلم هكى ؟؟ اكتر من 50 مكالمه وفى الاخير طلعتى تتجكترى عليا .. قسما بالله انى مهبول الا خايف عليك ..
ملاك .. شوف لما تعرف تتكلم بااحترام .. وبى ادب بعدين كلمنى ماشى ؟؟ نستادن منك توا ..
احمد … اوك سلام ..
ملاك .. سلام ..
سكرت ملاك تلفون وقعدة ساكته مصدومه لانا اول مره يتعامله معاها هكى … وبعدين قفلت نقالها من غيظ وبدو دموع ينزلو … وغطت وجهها وحاولت ترقد … بس فجأه كل الافكار بدت تخطم عليها .. وفى لحظه هيا بس بدى قلبها مقبوض .. علاش مش عارفه … ودموع الا كانو مدسوسين من قبل نزلو … وماغمضتش عيونها الا ماطلعت الا فى قلبها كله .. حتى ولو كانو هالدموع لسبب معلوم والاخر مجهول …
وكالعاده مافاقتش الا على صوت امها ..
امها … ملااااااااااااااااااااااااك .. نوضى يابلوه انتى .. ساعه 1 .. شنى ماعندمش جامعه ؟؟ اى ماهو انى فى مدرسه فاخديتى راحتك لظهر ..
ملاك .. اااااااه صبااااح الخير عندى لكن راسى مصدعوحاسه روحى مريضه فا ماقدرتش نوض ولا حتى قدرة نمشى للجامعه ومانبيش نمشى .. اسمعى ماما … بنمشى بعدين لى فرح كانا تحسنت حالتى .. امس قالتلى تعاليلى عشيه نبى نطلع ناخد حاجات ناقصينى
امها .. باهى باهى .. غير ماتعطليش … قبل مغرب تكونى هنا …
ملاك .. باهى انى رأسى يوجع فيا .. نساعد فى شى ؟؟
امها .. لا لا انتى برى اقرى بس الحوش نظيف والغدى توا نخش نحطه توا ..
ملاك .. ماشى خلاص …
خش لدارها .. وفتحت روشن .. وفتحت لاب توب وشغلت اغنية << انغام . مابتعلمش >> وبعدين وقفت على روشن شوى وغمضت عيونها مع نسمات روشن الا تضرب فى وجهها .. وكلمات الاغنيه الا تغدى فى روحها … واول ماسمعت الاغنيه … جت صورة احمد بكل مواقفهم مع بعض … الكلب .. والطنجره .. وشقة اختها .. وتلفون وتدريست سياره .. وهنا ابتسمت ابتسامه وجت لسريرها وفتحت نقالها .. واول مافتحت نقالها .. لقت احمد مكالمها وباعتلها رساله ..
احمد .. حبيبتى انى اسف .. عارف انى تعصبت عليك . بس انتى ماتعرفيش اول ماتغيبى قداش نخاف عليك .. انتى بنتى وحبيتى وقطوستى ياشفشه . كيف تبينى مانخافش عليك على عموم .. لو انك سامحتينى .. اول ماتفتحى نقالك ترنيلى ..
وهنا ملاك ابتسمت .. وبعدين اتصلت بيه واول مافتح الخط .. شغلت اغنية انغام << سانده عليك >> وقربت سبيكره تلفون منه …
<< فى جوه فى قلبى مكان مفتحتوش يوم غير ليك، وحاجات حصلتلى معاك ومحصلتليش قبليك، مبقتش بخاف ولا عاملة حبيبى لبكره حساب، وإن خفت فى لحظة بيبقى الخوف يا حبيبى عليك.
أنا سانده عليك، لو يوم الدنيا بتيجى عليا انا بتحامى فيك، وفى عز البرد بلاقى دفايا فى حضن عينيك، ده ساعات يا حبيبى انا ببقى لوحدى وبحتاج ليك، قبل مبندهلك بفتح عينى قصادى ألاقيك.
مكدبش عليك.. أنا قبل ما أقابلك ياما قاسيت، انا تهت سنين قبلك فى حياتى ورحت وجيت، أنا كنت وحيدة وعايشة فى غربة ومش برتاح ولقيت يا حبيبى فى حبك ضهر وقلب وبيت…>>
ووهنا قطعت الاغنيه وقامت تلفون وسكت .. وال ماسمع انفاسها قاللها ..
احمد … نحبك
ملاك … حتى انى << وقعدة تبكى >>
احمد .. حبيبى علاش تبكى .. والله والله انى مانقدر نعيش من غيرك .. او حتى نفكر مجرد تفكير انك تبعدى عليا او حد تانى ياخدك منى ..
ملاك .. << مسحت دموعه وقالتله >> حتى انى احمد … انى مانتخيلش انى نكون لى راجل الا انت .. وبالنسبه ليا راجل يعنى احمد وبس ..
احمد .. هوا يسترجى حد يقرب منك .. انى نقتله والله .. ونقتلك معاه لو فكرتى ..
ملاك .. مهبول
احمد … ههههههههه بيك اكيد .. شنى مانبيش نسمع ضحكت امورتى الحلوه الا كانها مازالت زعلانه منى ؟؟
ملاك .. لا لانك كشخت عليا
احمد .. على خاطرى
ملاك .. لا
احمد … متأكد ؟؟ وكانا تندمى ؟؟
ملاك … مش رح نندم .. باااااااى اى نبى نطلب منك طلب بكرا نبو نتلاقو فى الجامعه عادى ؟ مع ساعه 9 صبح
احمد .. مش سكرتى دماغك ؟؟ لا لا اسف مشغول
ملاك .. هيا حموووودى راهو والله تندم ؟؟
احمد .. ههههههههه ماشى خلاص 9 نكون عندك
ملاك .. باهى خلاص برا توا .. بنقرا شوى قبل مانجى عندكم ..
احمد .. اها اها . صار جايه .. وماتبيش تقولى ؟؟
ملاك . مش نشوفك انت وكلبك ؟؟ لا ياريت تاخدو بعضكم وتغيبو اليوم
احمد … ماشى خلاص تم .. برى هيا سلااااام
ملاك … هههههههه زعلت ؟؟
احمد … باااااااااااااى سلام ..
ملاك … سلام هههههههههه
وهنا ملاك سكرت تلفون وقعدت تنقز على سرير زى مهبوله … بعدين فتحت دولا واختارت احلى لبسه عندها فى دولا ب … سروال بونته جينز + جاكيت وردى .. وتحته تيشرت ابيض مرسوم عليه ميكى على االوردى … وركبت عليه وشاح وكندره … وبعدين اتكت على سرير وقامت رجليها على الحيط وخدت شيت وحطاته قدامها وقعدت تشبحله وعقل مش معاه بكل وكل تفكيرها كيف بتكون هديته ..
وكالعاده ماقطعش تفكيرها الا على صوت امها …
امها … ملااااااااااااااااااك… الغدى واتى تعالى تغدى …
ملاك … هيا هيا جيت ماما ..
طلعت ملاك من دار وقعمزة على صفره تتغدى وبعدين شبحت لامها وقالتلها …
ملاك … ماما حبيبتى ممكن طلب ؟؟
امها … حبيبتى ؟؟؟ اكيد مصلحه … يانعم ؟؟
ملاك … ماما انى قداش ليا معاش شريت حوايج … والله خاطرى نشرى لبسه اليوم طالما طالعه طالعه … اعطينى نشرى لبسه للجامعه … والله البنات كلهم يلبسو .. تقول عندهم محل ليهم ..
امها … يناررررى غلباااانه .. الا يسمع يقول تشحتى على رصيف … هما 200 .. بتاخديهم خودى بس اعتبريهم فلوس العيد يعنى ماتجيش تقوليلى نبى فى العيد …
ملاك .. تم خلاص يانبع الحنان انتى هههههههه الحمد لله .. شبعت .. ماما ماما اغسليهم انتى معايين ونببببببى خلى نلحق نطلع بكرى ونروح بكرى
امها … خودينى باللسان خودينى … ماشى خلاص .. بس خفى روحك قبل مايشوفك خوك وليد .. وماتحطيش مكياج .. مش ناقصنى انى ..
ملاك .. بودره ومسكره بس سلااااااااااااااام
لبست ملاك حوايجها وطلعت وهيا فى قمت سعاده … ومن كتر فرحتها لين ماحستش بطريق ومالقتش روحها الا فى حوش اختها مدرسه .. وهنا اتصلت بى اختها وقالتلها ..
ملاك … هياااااااااااااا انزلى ..
فرح … هيا .. خمسه دقايق بس .. اسمعى انزلى ساعدينى فى تنزيل صغار ..
ملاك … لازم تشحورينى ؟؟ اهو جايه شوى بس ..
وهنا طلعت شيشة برفانها وبخت منها ونزلت .. واول ماوصلت لدروج الداخلى الا يركب لحوش فرح .. لقت ضى مطفى مش كالعاده … فاردت باب وحطت رجلها على دورج .. وهيا كيف بتركب .. حست باايد شدتها داخل دروج …
احمد … استاحشتك
ملاك … بعد يامهبول … بشوفنا حد بعدددددد
احمد … لا مانبيش نبعد …
ملاك … تلفون يرن بععععععععد
احمد نحببببببببببببببببببببببببببببببببببك امتى تكونى مرتى بس .. انى بنهبل خلاص
ملاك … احمد بجد بعد .. احممممممممممممد .. تلفونى يرن .. حى فرح فرح ااااص … الو .. اى خلاص اهو كيف بنركب ..
وهنا دفاته وركبت وهوا قعد واقف وشبحله ويضحك … وهنا قعد يقولها بصوووت عالى شوووى ..
احمد … نحببببببببببببببببببك
ملاك … << وهيا راكبه وتتلفتله >> ههههههههه اص اص يامهبووووول حتى انى
وهنا فرح كانت واقفه تشوفلهم بدرقه من فوق وبعدين طلعت راسها وقالت ..
فرح … احم احم … احمد خيررررررررر
احمد … << مع طزريطة وجه >> اه اهلين فرح كيف حالك .. بالك تبى شى ؟؟
فرح .. اى خود منها هالقطاطيس زوز واعطيهم لعزوزتى وقولها مش رح نتعطل ساعه ونجى
احمد … خلاص تم فى الحفظ وصون ..
واول مانزلو .. مدتهمله زوز وخدت ايد اختها وطلعت وهيا مبتسمه وملاك قعدت تتلفتله وتبتسمله وتأشرله باايدها مع ضحكه ..
وهوا يشبحلها مع ابتسامه كانت تدل كم الحب الا يحملهولها ..
ركبو لسياره وطلعو … وهنا فرح قالتلها ..
فرح .. شن كنتى تديرى لوطه مبكرى ههههههه ؟
ملاك .. والله شى هههههههه خيرك تشبحى هكى والله حرام عليك ..
فرح .. وراس الريحه الا تفحفح .. بالله شن اسمها ؟؟
ملاك … ههههه هادى صاحبتى جبتهالى فى عيد ميلادى اورقانزا جيفنشى
فرح .. مفلحك والله تعرفى كيف تتصرفى تهنى هههههههههه
ملاك .. شن تقصدى يابارده مبرررررردك مهم مهم .. بنمشى لى اسلنطه بناخدله برفان قنين وباقى كانا لحقت على حاجه من فوق بوى باشا ..
فرح … انى جبتلك معاى 150 واعتبريهم هدية نجاحك منى
ملاك .. فروحتى
فرح .. يانعم
ملاك .. نحبببببببببببببببببببببببك انتى احلى اخت وصاحبه فى دنيا كلها والله نحبك نحبك نحبك
فرح .. حتى انى ياكلبه .. معاش تبكى .. والله مانتخايل حياتى بدونك ونستنى فى اليوم الا تسكنى فيه مقابلى .. وتجينى لحوشى وتهدرزى وتشكى من دوشة صغارك
ملاك .. ياررررب يافروحه ااااااه ربى يسمع منك ياررررب
فرح … كأنا قلبنها دراما صح هههههههههه برى برى وافتحيلنا موسيقه خلى نغيرو جونا بدل النكد الا فتحنه واهم شى مش انغام ههههههههه
ملاك .. والله تهبل .. تى انتى شن تفهمى انتى .. انغام ام دوق
فرح .. عندك نانسى … افتحى نانسى ولا اليسا وفكينا لااانغام لاشعبولا ..
ملاك .. هههههههههههههههه شتان بين هدا وداك مصحك ياشلافطيه انتى … بتقرانى انغام بى اليسا مجلوطه هادى ههههههههههه
وكالعاده استمر الحديت بين ملاك وفرح بين تجادل وتهكم وبصاره وضحك وكان هاليوم احلى يوم عليهم .. ودارو كل الا مادروشى من زواج فرح .. ضحكو وشرو جيلاطى ووشرو . وعجبو .. وعلقو على طروف الا مقعمزين فى شارع ههههه بس اكيد بيناتهم طبعا ومع ساعه 9 فى الليل .. حطت فرح فى حوشها وروحت .. واول ماوصلت للحوش لقت امها تستقبل فيها …
امها … هداااااااااااااا كله فى شارع ياماتستحى على وجهك ؟؟؟ العيب والله ماهو فيك .. العيب فى الا وتقت فيك بس …
ملاك .. علاش تتكلمى هكى .. قسما بالله ماحسينا بالوقت .. ولهدرجه انتى ماعندك فيا تقه ؟؟
امها .. هاااااااااااااتى مفاتيح سياره هااااااااااااااااتى .. قسما بالله ماك شيافتيهم الله الا مايطيب مافى خاطرى ..
ملاك .. شن تقولى انتى بكرا عندى جامعه ..
امها .. قسما بالله على الا درتيه فيا ماك طاقتيها بكرا خطوه .. وورينى بكرا لى منى بتستعرضى ..
ملاك .. قسما بالله كرهته هالحوش … وحق ربى قريب نهرب منه حتى مع مصرى ..
امها .. ديريها هالتمره وبرى .. بس الا زيك يدير عار بس … اقلببببببببببببببى وجهك لدار اقلبببببببببببببى
ملاك … انى كرهته الحوش هوا كرهتتتتته .. وخشت وقربعت دار عليها وقعدت تبكى .. وهنا اتصلت بى فرح وقالتلها ..ز
ملاك .. نطلب منك طلب ؟؟
فرح … خيرك تبكى ؟؟
ملاك .. هديه الا خليتها عندك وقتلك توا بكرا نخطم وناخدها منك .. تقدرى تعطيها انتى لى احمد ؟؟
ملاك .. علاش ؟؟
فرح … تعاركت انى وامى وحلفتلى على مشى ..
ملاك .. اعطيهاله توا … ماشى ؟؟
فرح .. باهى حاضر بس احكيلى شن فى ؟؟
ملاك . توا بنسكر حسها تعيط مرات خوى يخش عليا مهم قولى لاحمد مايتصلش بيا واعطيهاله اليوم الهديه ماشى .. وقوليله قالتلك ملاك ماتفتحاش الا بعد ساعه 12 .. ونبى وراس فرح ..
فرح .. باهى خلاص ..
ملاك .. بنسكر توا سلام ..
سكرت ملاك وسكرت تلفونها لما سمعت خوها خش وسكرت دار وخشت لفراشها ورقدت … وقعدو دموع ينزلو زى المطر لحد مانعسها نوم ورقدت … وفاتت ساعه ورا ساعه … واحمد كان مقعمز ويستنى امتى طق ساعه 12 باش يفتح الهديه ويشوف واول ما قرى رساله طار من فرح لدرجة دموعه نزلو … ولانه ماجاشى نوم وكان يستنى امتى يصبح صبح باش يفتح مع امه موضوع الخطبه ويقوللها … قرر انا يطلع زى مهبول ويلود فى شوارع ويحتفل ويضحك لحد صبح … وبالفعل … فاتت ساعه ورا ساعه واحمد فى شارع … واخر مكان درس فيه وقعد فيه لصبح هوا بحر … ونعسه نوم فى سيارته ومافاقش الا على صوت منبه نقاله مع ساعه 10 صبح .. وهنا ولع سيارته وانطلق للحوش … واول ماوصل .. لقى فرح لابسه عباية صلاه وعبيه حوض ميه ووركينه وتصب فى ميه فى دروج باش تسيقه .. وهنا قاللها ..
احمد … صباح الورد
فرح … صباح الورد
احمد … امى نايضه ؟؟
فرح .. اى نايضه وتلعب فى صغار كيف نزلتهم
خش احمد زى مهبول للحوش وهوا يضحك وقعد يقول …
احمد … ياماااااااااااااااا حااااااااااجه نبع حناااااااااااااااان .. نبيك فى موضوع حياه او موت
امه … سمله عليك ياولدى خيرك شن فى غير قول صباح الخير؟؟
احمد … صباح الورد صباح الخير مش انتى قتيلى تزوج ؟؟؟ انى توا بنقولك ……. << وماكملش جملته لين سمع اخته سميه تعيط وتخبط على طول بطنها فى جنان …
سميه … وووووووووووووووه اااااااااااااااااااااااااااااااااااااه تعااااااااااااااااااااااااااااااااااااالووووولى … فررررررررررررررررررررح … ياماااااااااااااااااااااااا .. محممممممممممممممممممممممممد … فررررررررررررررررررررررررررررررررررررررررررررح …
وهنا طلعو العيله كلم يتجارو وماشافوش الا صدمه الكبيره قدامهم ودم فى كل مكان ..
يتبع………
لقراءة الجزء التالي : الجزء الثاني عشر من رواية حبيبتي لا تنسيني
لقراءة الجزء السابق : الجزء العاشر من رواية حبيبتي لا تنسيني
للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا
جميع الحقوق محفوظة للكاتبة كيندا من ليبيا .
