الجزء الخامس من رواية الزوجة التائهة بين الأحلام والواقع

ولنبدأ الآن متابعة أحداث الجزء الخامس من رواية الزوجة التائهة بين الأحلام والواقع من المبدعة المتألقة كيندا، هيا بنا سريعاً لنبدأ بالقراءة لنعرف ماذا سيحدث مع أبطال حكايتنا ؟

الجزء الخامس من رواية الزوجة التائهة بين الأحلام والواقع

. وصلت لحوشها وقررت اول قرار انها مش رح تفكر تحمل بى بيبى الاما تتاكد انا هوا يحبها زى ماهى تحبه بس كيف رح تتصرف وخاصة انا هوا يبى بيبى ومفكر فى صغار هلبه وخاصة ايضا انا امه تزن عليه فاقعدت هديكا الليله تفكر وتقلب فى الموضوع فى راسها كيف بتدير وهالموضوع خلها طول الليل ماترقدش برغم انهم اول ماوصلو دارت روحها تعبانه وبترقد على قد ما كرش فيها احمد ويبيها تسهر معاه بس هيا وقتها كان كل تفكيرها انها كيف بتأجل موضوع البيبى شوى لحد ماتتاكد انها رح تقدر تملك قلب احمد ليها وتنسيه فى اى حب عاشه قبلها او انها تخسر احمد للابد بدون مايكون فى شخص ضحيه بيناتهم فى الموضوع وقعدت تفكر وتخمم لحد ماغلب عليها نوووووووم…….
وتانى يوم ناضت كالمعتاد بس اليوم هدا كان يوم مميز شوى فا فى اليوم هدا بتشوف البنت الا قدرت تملك قلب راجلها والا قدرت تحول قلبه الا قطعه من حجر الصوان والا هوا طبعا يوم <<العزومه>> ….. بس اليوم من اول ماناضت سمعت وشافت الغير متوقع ……..
ليلى…. صباح الخير ماما
ام احمد …. صباح الورد بنيتى شن حالك اليوم باهى وش حال امك وبوك امس اهم شى انك سلمتيلى عليهم بس ..
ليلى …. ايه ماما اكيد وكلهم ينشدو عليك .
ام احمد… باهى باهى يابنيتى مالا نقولك شى برى اركبى لدارك ووتى روحك من توا لانهم جايين بعد العصر وانى كلمتلك المزينه الا جنبنا مع الظهر بتجيك لحد هنا
ليلى …. علاش ياماما متعبه روحك انى كنت ناويه نكلم احمد يرفعنى بعد الظهر للمزين ..
ام احمد … لا يابنيتى انتى برى اركبى دوشى وكان بتديرى حاجه على عمرك وبعد الظهر تكون عندك وقوليلها شن تبى وتديرهولك راهى بنيه فالحه ماشالله عليها وزباينها ديما ماليين المحل ولولا عندى خاطر عندها وديما تلقى فيا واللهى مارح نحصلهالك اليوم بسهوله لدا برى توا لدويرتك وديرى حوسه على عمرك لين يجى ظهر ..
ليلى … باهى خلاص مالا انى راكبه وكانا سال عليا احمد قوليله انى فوق
ام احمد….. حاظر بنيتى …… وفى داخلها تقول خوووووووووودى راحتك اهم شى تفقصى عين اختى مريموه وتطلعى احلى من بنتها باش نوريها انى منى الا شدت عليا بنتها وتزعبنت عليا لين ماسد تحسابه ماجابت الا هيا خلى نوريها انى بين يوم وليلى جبتها احلى من بنتها واصغر منها غير اشر وليدى بصبعه بس وهيا خلى هوينا تمشى تدلل بى بنتها فى سوق التلاتاء وتدور من ياخدها …..تتشرط عليا ماتحسباش البنت زى العصيده كانا بردت معاش فيها بنه ايووووووووووووووا…….

وطبعا وهيا تتمتم على خشت ولدها عصام
عصام … يماااااااااا حووووويجه يماااااااااااااااااااااااااااااااااااااااا .
ام احمد …. خيرك وه عليك طرشطلى ودنى شن تشوف فيا طرشه
عصام …. عاد وين نندرى عليك من بكرى وانى نخرفو ونقولو صباحو؛؛ صباح الورد؛؛ صبح صبح ياعم الحج ؛؛ وانتى ولا اهنى سارحه فى عالم تانى شنى مالا الحويج امس مسهرك ؟؟؟
ام احمد …. تحشم ياقليل الادب والله مانحدفك الا بالموس الا فى ايدى .,… شن تبى اختصر ؟؟؟ ..
عصام …. غير خيرك علينا عاد خاشه فيها اماس وحدف شنى مالا حدفتى بوى قبل ههههههههه
ام احمد …. تى بتتطلع برا ولا نحدفك من هنا وغادى انت خلاص لاحشمه لا سو والله انتو جيل توا ماعاد تتحشمو … وتوا اختصر شن تبى ؟؟؟
عصام …. جعاااااااااااااان من الاخير نبى نتسمسو ولانطلع للمحل ؟؟؟
ام احمد ….. لا لا شوى ونكمل حطان فطور غير اطلع بس ؟؟؟
عصام …. باهى اخر سوال ….. امس الحويج شن وضعه معاك بزبط ؟؟؟؟
ام احمد ….. تى برا يا <<< كف كرفخ لأ؛÷لألألإ)%لألإ[÷[×)ـ/×)>>>

وبعد شوى ام احمد حطت الفطور وقعمزو واللتمو كلهم على الفطور الا ليلى…. فااحمد سال امه ..
احمد …. خيرها ليلى ماجتش على الفطور وانى لما نضت لقيتها نازله ونزلت وراها
ام احمد …. ركبت فوق انى قوتلها اليوم جاينا ناس بعد العصر وهوا هدكا كان بتشوف روحه قبل ماتجىها المزينه
احمد…. من توا خلى حتى عوناتك شوى بعدين ركبت ..
ام احمد … لا لامافيش داعى وليدى اصلا اليوم البنات مامشوش و تو يساعدونى لكن هيا عريسه خلى تشوف روحها وتلود على عمرها ..

احمد …. باهى توا ناديها تفطر ولا فطرت قبل ماتركب؟؟؟؟
ام احمد …. لالا عاد ناديها يانارى البنيه قوتلها اركبى ركبت طول برا ناديها سلم وليدى برا
طبعا احمد نادها وفطرو مع بعض كالعادة مع شوية احديت عائليه وكانت ليلى تسمع فيهم بس والا قطع سمع ليلى وخلها تنتبه سوال ام احمد لى احمد
ام احمد … حميدا وليدى خالتك مريومه كلمتنى وقالتلى انى ماعنديش من يجيبنى تقدرى تبعتلى واحد من ولادك … وانى والله ماعرفت شن نقولها لانا عصام فى المحل ونبيل هالمنجوه طالع مع صحباه زرده تعرفه انت تقول راكبه فىه دوده مايقعدش فى حوش وانى والله تحشمت معاها وانت شن رايك ؟؟؟
طبعا .. ليلى لما سمعت الكلام نغصت بالخبزه قريب ماتت واحمد حس بالسبب بس دار روحه عادى وكمل .
احمد … ليلى خيرك
ليلى .. لا لا شى احمد مادورش كمل دوتك كمل
احمد … وخالتى بس جايه .
ام احمد .. لا لا وبناويتها كلهم … اه شن وليدى نرد عليهم ونقوللهم …. وطبعا ليلى شبحت لاحمد وتستنى فى رده ودمعتها بتنزل من عينها وشادتها بسيف ..
احمد …. شاف لى ليلى وقالها لالا حتى انى عندى ماندير وبرى كلمى ولدك عصام يطلع من المحل 5 دقايق يجيبهم ويجى اما انى عندى ماندير..
طبعا ليلى فرحت وحست بالااحترام لنفسها وكرامتها لما هوا احترمها واحترم مشاعرها وماباش يمشى فا قامت عينها وسالت ام احمد
ليلى .. ماما تبى حاجه منى انى الحمد لله شبعت
ام احمد …. لا بنيتى سلامتك برى برى كم بتلودى على روحك
وطبعا ليلى ركبت وخشت لدولابها وبدت تطلع لبسه تدخل لبسه تطلع بدله تخشش بدله وقاست تقريبا حوايجها كلهم لين فى الاخير استقرت على لبسه بسيطه على لون بنك وابيض لانا حست انا هادى الالون ماشيه معاها
وبعدها خشت دارت مسك وكريمات لشعرها ومن هنا وهنا لحد ماجت المزينه وبدتلها وطبعا خدت المزينه حوالى 3 ساعات بين شعرها وظوافرها ومكياجها وبعد مالبست وتكمت وهيا كيف طالعه من دار وخشت للمطبخ بتجيب طاسة ميه لللمزينه ولما تلفتت لقيت احمد فى وضع صدمه وكانه يشوفها لاول مره ولاول مره تطلع من فمه كلمات لا ارديا وقاللها ….

يتبع ………..

لقراءة الجزء التالي : الجزء السادس من رواية الزوجة التائهة بين الأحلام والواقع

لقراءة الجزء السابق : الجزء الرابع من رواية الزوجة التائهة بين الأحلام والواقع

للإطلاع علي فهرس اجزاء الرواية : جميع الأجزاء كاملة لرواية الزوجة التائهة بين الأحلام والواقع

جميع الحقوق محفوظة للكاتبة كيندا من ليبيا .