وفي الجزء الخامس هل سنري أحداث سعيدة مع أبطال روايتنا أم سيحدث شيء ينشر الغم والهم عليهم ؟ كل هذا وأكثر سوف نعرفه سوياً داخل طيات الجزء الخامس في السطور التالية بإذن الله .
الجزء الخامس من رواية تزوجنا ولكن هل يبقي الحب
وبعدها روحو واول ماوصلو للحوش وركبو من دروج واول ماوصلو لفم شقتهم وفتح الباب قامها فى غمره وقاللها ..
مؤيد … نووووورتى سور بيتك ياشابه هههههه << وسكر باب الشقه برجله >>
هدى .. نزلللللللنى مؤيد والله نعيط ونلم عليك ناس ..
مؤيد … تلمى على منى ياروح الماما هههههه مانبداش انى مؤيد كان هدا هههههههه
هدى … باهى خلاص وصلنا نزلنى ..
مؤيد … انى نعرف وين نحطك اصبرى انتى بس ههههههههههه ..
وفاتت الليله على مؤيد وهدى وكانت كاكل الليالى برغم المنوشات الا تصير بينهم الا انا الحب مدفئ قلوبهم …
فاتت ساعه وراء ساعه لحد ماجى صبح .. وهنا ناضت هدى ببتسامة رضى وفتحت رواشن وبدت تظم فى الحوش وحطت الغدى على نار وكانت مقويه راديو وتسمع لاخر مستجدات البلاد ومانقصتش الراديو الا على صوت كان يضبح من بعيد ويقول ..
سهيله … هددددددددى … ردى يابلوه هههههه حرب فوق مدايرتيها مكنسة كهربائيه وردايو ومكينة الصابون ..
هدى … ههههههه اركبى اركبى والله ماسمعتك هههههههه
سهيله … لا لا بس بنقولك انزلى منى على الخط وتبيك ..
هدى … دقيقه بس حبيبتى .. ونلحقك ..
ولت هدى لشقه وطفت الغدى من نار ولبست سروال وتيشرت وخدت مفتاح شقتها وسكرت الباب وراها ونزلت بسرعه .. واول ماخاش قالت ..
هدى .. صباح الخير خالتى ..
عزوزتها … قولى مساء الخير توا << وفى قلبها تقول شورا هادى نوضه ياعروسه >> هونى منى تستنى فيك على خط فى صالون بريلها ..
خشت هدى وقامت تلفون وقالت …
هدى … ايواااااااا ياسموووووحه استاحشتك وين كنتى فى العسل هدا كله … صحه على ناس .. ناس شهر وناس بشهور العسل عندهم ههههه..
منى … ااااااااااه ياربى العسل مكتح بعضه عندى ههههه لين بيتبزع تعرفى ههههههههه
هدى … شن فى يادعوه خيرك ؟؟
منى … عزوزتى عزوزة الهنى والسعد
هههههههه راجلى مشى للمطار بيجيبها وقريب توصل هههه قولت نكلمك توا قبل ماتعلق على اربيزى ..<< اكيد سهيله احكتلك تفاصيل ؟؟
هدى … اى بس ماتقوليلش بتقعد من توا 3 شهور معاكم هههههههه
منى .. هدا كان ماعجبهاش جو اما كان عجبها قالت مرات نقعد لصيف عندكم حتى نغير جوى
هدى … ووائل شن كانت ردة فعله ؟؟
منى … هدا الا مجننى انى … يقولى لا انى عارف امى صعبه ووعره بس معليش وتحمليها وهكى ..
هدى … اصلا ماعندكش الا الحل هوا صدقينى ..هما تلاته شهور تحمليهم كيف مايجى واعصرى على روحك ليمه وخلاص ..
منى … هدا الا بيصير بس قوليلى شن اخبارك انتى ومؤيد … والله استاحشتك هلبه يامعفنه ؟؟
هدى …. بدينااااااااا فى دموع من توا ههههه نخاف هالبكى مش عليا .. على خاطر جايه عزوزتك بس هههههه
منى … الحق الحق الاتنين ههههههههههه
هدى … والله انى الحمد لله بس مره مره لاتخلى يومنا من المنوشات مره مره ها ههههههه .. بس انتى تعرفى مؤيد والله مستعد ينسيك فى لحظه … وبدات لما نبدا متعفلقه شاده روحى على ضحك بسيف ههه..
منى … انتى هاتقوليلى هههههه خوى ونعرفه … تعرفى حسه باب شقه نفتح شكله وائل وعزوزتى وصلو هيا سلام نكلمك وقت تانى ..
هدى … اوك سلام
منى … واااااائل انت جيت …
عزوزتها … لااااااا لااااااا انى جيت ههههههه << ضحكة الخبت من اولها >>
وائل << بكل برأه >> ههههههههههههههه .
منى …. اهلين اللاى .. مرحبتين بيك تفضلى … وين بابا مالا خيرا ماجى معاكم …
عزوزتها … سقدنى فى مطار وغير رأيه .. صارتله حالة وفاه عند اهله .. اااااااه ياربى ااااااه يارجلى ااااه ياقلة ولاى اااه ..
منى … تفضلى اللاى هاتى منك شنطتك وخشى …
عزوزتها … انى مادبيا نخش نرتاح فى مكانى طول رجلى معاش نقدر نوقف عليها …
رفعتها منى لدار تانيه والوحيده اصلا من غير دار نوم وهيا تعتبر دار ضيوف وفى نفس الوقت غرفة معيشه وكل الا فيها كنبه تنفرد سرير وبساط وتلفزيون وشويت رفوف عليهم كتب وتحف وسهرات واول ماخشت عزوزتها لغرفة المعيشه وحطتلها منى شنطتها قالتلها عزوزتها ..
عزوزتها …. منى بالله ترا بنيتى جيبلى طاسه مياه وطويسه عصير نشربها قبل ماناخد حبة سكر متعى ..
منى … اى حاضر من عيونى …
طلعت منى من دار بينما الام طبست على ودن ولدها وقالتله ..
امه … وليدى انى مانتحملش نرقد عليه الكرسى هوا راهو ..
وائل … امى راهو ينطرح يولى سرير راهو ومايفرقش على سرير فى شى ..
امه .. لا لا مهما كان انى مانتحملش نرقد الا على سرير ..
وائل … خلاص مالا ارقدى انتى فى دار نومنا وحنا توا نرقدو هنا انى ومنى ..
وهنا على خشت منى واول ماسمعت الخبر انصدمت ومعاش عرفت تنطق ولا كلمه وقربت جيهة عزوزتها وقالتلها ..
منى … تفضلى اللاى ..
عزوزتها …. بكل استفزاز …زيد فضلك ياحنا لكن انى والله مانبى نطلعكم من دار نومكم فى الاخير انتم مازال عرسان ..
وائل … عادى عادى ولايهمك … منى … خودى شناطة امى بالله وحطيها فى دار نوم وفضيلها جيهه حطيلها فيها حوايجها ..
منى… خدت شنطه من غير ماتقول ولاكلمه وللحظه حست انها بتبكى .. لانا راجلها حطها فى الامر الواقع من غير حتى مايستشيرها ..
واول ماحطتلها حاجتها وخشت العزوزه لدار نوم وردتها عليها باش ترقد شوى .. خشت منى للمطبخ وهيا مش طايقه دبان وجهها وحاولت تلهى نفسها بطيب الغدى .. واول ما طلعت وحطت طنجره على نار جى وراها وقاللها ..
وائل … علاش مارحبتيش باامى ؟؟
منى … شنى يعنى تبنى نرقصلها ؟؟؟
وائل … لا نبيك تبتسمى فى وجهها ..
منى … وانى ابتسمت ولا شن تبينى نبين 32 سن
وائل … شن طريقه هيا الا تكلمى فيا بيها ؟؟
منى … اما طريقه ؟؟ قوووووول ؟؟؟ بالله عليك اطلع من مطبخ وخلينى ..
وائل …. شن فى ؟؟ علاش تتصرفى هكى ..
منى … يعنى انت مش حاسس انى فى اى شى صح .. الا يصير كله طبيعى ..
وائل … احكى دغرى وقولى الا فى خاطرك ؟؟
منى … الا فى خاطرى يادكتور انا امك تحاول تدمر حياتى وخلاص بس لانك خديتنى وباقى قالت مريضه وبنجى نعالج على عينى وراسى كل مره نتصل بيها وتعير فيا انى مطلقه وقولت مش عيب عادى … وتوا معقوله كيف سكرة شهر متزوجه .. نطلع من دار نومى ونرقد فى صاله 3 شهور .. فهمنى حنا كيف حتى بيصير بينا اى شى والحمام مقابل صاله وانت عارف انا امك فيها سكر يعنى كل دقيقه بتخش الحمام وبعدين بلاش ابسط شى ياسيدى كيف بناخد راحتى وبنلبس وبنتحرك وبنرقص وبنهبل ادا كنت راقده فى غرفه اساسا باب مافيها … ووالله لو تعامل فيا امك كويس على عينى وراسى بس هيا تتعامل كانا احنا فى معركه وانى خطفتك منها وهيا تبى تردك بالحرب بارده ..
وائل … حاليا انتى شن تبى عندك واحد من الحلين … اما انى نلزها او انى نمشى نحجزلها فندق تلاته شهور .. انتى هدا الايرضيك ؟؟
منى .. << نهارت بالبكى وقالتله >> الا يريحنى انك توا تطلع وتخلينى فى مطبخ بس لو سمحت ..
طلع وائل من مطبخ ولبس كندرته وخدى مفتاح شقه وطلع ودنيا كلها ضايقه بيه وولاول مره يحس انه بجد مخنوق ..
قعدت منى فى مطبخ تطيب ولاهيه لحد ماسمعت باب شرين واول ماشرين باب فتحت منى باب وقالت …
منى …. اهلين سوسن شن اخبارك 
سوسن .. اهلين حبيبتى .. مانبيش نعطل عليك .. ماما قالتلك عازمه الجارت كلهم اليوم وقالتلك باش تتفضلى باش تتعرفى عليهم ويتعرفو عليك ..
منى …. والله شن بنقولك عزوزتى اليوم كيف وصلت من سفر وصعب نجى ..
وفجأه طلعت عزوزتها من دار وقالتلها …
عزوزتها … لا بنيتى مافيها شى برى انتى وانى توا نقعد نستناك لين تروحى << ابتسامة صفراء >>..
سوسن …. لا خالتى والله مايجى حتى انتى تعالى معها ..
عزوزتها … والله يابنتى مش عارفه شن نقولك شوارى منى قبل ..
سوسن … هههههههه خالتى اكيد منى مش رح تقول شى << خلاص نستنو فيكم مع ساعه 7 عشيه ومرحبتين بيك >>
منى طبعا كانت مصدومه ولا كلمه من الجمله الاخيره الا قالتها عزوزتها وخاصة انا عزوزتها عطت صورة لسوسن انا منى هيا متحكمه وكلامها يمشى على الكل …
سقدة منى سوسن وسكرت باب شقه وخشت للمطبخ بينما خشت عزوزتها للحما م ولحقتها للمطبخ وقعمزة على الكرسى وقالتلها …
عزوزتها ….. شن حال امك وخوتك يامنى ؟؟
منى .. تمام الحمد لله كلهم يبسو يديك ..
عزوزتها … وشن حال اختك الكبيره جاها نصيبها ولامازال ؟؟
منى عطتها بالقفى وخدت شهيق وزفير مع تقريض الطماطم وقالتها …
منى … لا مازال والله …
عزوزتها … لا لا مانخافش عليها ماشالله انتم سعدكم قوى ماشالله .. تاخده حتى اصغر منها بى 10 سنين ..
سكتت منى وماقالتش ولاكلمه وساد الهدوء فى مطبه للحظات لحد ما خش وائل وهنا قاللها ..\
منى … ساعه 4 شنى الغدى واتى ؟؟
منى … اى اى واتى تعالى قعمز هيا ..
حطو الغدا وتغدو وغسلت معايين وبعدين خشت دوشت وجبدت شعرها لوطه ولبست لبسه على فوشيا والابيض قونه
وبلوزه رقبتها مربعه ودارت مكياج على الهادى ولبست عبيتها ووشحها ولقت عزوزتها قبلها على الباب … خدت باقة الورد وشكلاته الا وصت عليهم وائل وجابهملها بعد ماتغدى ….. ومشت عزوزتها معها وكانت وقتها ساعه 8 بزبط ,,,
سكرت منى الباب وركبو الاسنسيل لدور الا فوقها حوش سوسن واول ماوصلو طقطقو باب واستقبلتهم ام سوسن وخشو واول ماخشو غرفة الاستقبال لقت كل الجارات وصلو ويستنو فيها على نار بعتبرها عروس جديده سلمت على الكل وقعمزت وعزوتها نفس شى واول ما ام سوسن قالتلها ….
يتبع …….
لقراءة الجزء التالي : الجزء السادس من رواية تزوجنا ولكن هل يبقي الحب
لقراءة الجزء السابق : الجزء الرابع من رواية تزوجنا ولكن هل يبقي الحب
للإطلاع علي فهرس الرواية : جميع اجزاء رواية تزوجنا ولكن هل يبقي الحب للكاتبة كيندا
جميع الحقوق محفوظة للكاتبة كيندا من ليبيا .
