الجزء الرابع من رواية خط احمر

ايهاب فنص فها ضغط ع سنونه:بتحكيلي قصة حياتك ناقص اني بنرفعك لشقتي وتتصلي ب بوك او براجلك المهم تنتلفي من عليا

غزل ضحكت ف داخلها: شن معنها تنتلفي ?!

ايهاب متعصب :تقلبي خنفورتك معنها

غزل: قصدي بنت نخطفت عاادي ياخدو فلوس من بابا وتمت القصه علاش مكبرهاا

ايهاب: يابنتي لخطفوك دعاره

غزل: شنو دعاره ?!

ايهاب تعصب بعياط : ششششييييي

غزل: للعلم هدا رابع يوم ليا ف ليبيا

ايهاب يسوق

غزل: نتعرف بيك ?!

ايهاب يسوق

غزل ابتسمت: تمام نسميك سنفور غضبآ حلو

ووصلو خشو لصالة طول

ايهاب وقف السيارة ونزلها لشقته الخاصه عطاها هاتف: اتصلي ببوك

غزل خدت الهاتف: بوي متوفي

ايهاب يكشخ :قبللل شوية تحكي ف قصص بطولاتك اتصللي

غزل: بوي متوفي لكنت نحكي عليه هو جوز ماما او بالاحراى عمي نقوله بابا

ايهاب تنهد: اتصلي بعمك

غزل وقفت حولت القامجو ولبسة كبوس التوتة وقعمزت: توا الساعه كم

ايهاب شافله واشر ع الهاتف لـ ع طاولة: اتصلللي ب عمممك

غزل وقفت وقامت كم توتتها: من الساعه هادي عمي يوصلي بروحه فهمت عليا

ايهاب وقف يشوف من الشباك

غزل قربتله: ف منو تستنى ?! متقوليش عمي ياولدي ربي يهديك الموقع يبي يومين او يوم

ايهاب تلفتت:اسمعي يابنت الناس اني شخص منتعاملش بلهزوه وتسهويك

غزل: اسفه عدم فهمي وع مضيقتي ليك ف حوشك بس اهو نفهمك اني غزل تمام جايه مع عمي وبس يعني امي ف برلين تمام المهم اني جايه عشان اوراق وهكي لاني ليبيه طبعاا وبنرجع مع عمي بعد يومين لبرلين

ايهاب: ميهنيش جهنم لترفعك انتي وعمك ليهمني تلمي نفسك وتطلعي

غزل: هدىء من روعك ياهادا

ايهاب صكر الشباك:اني بنطلع وانتي تقعدي هني

غزل وقفت: لالا بلله خودني لمرتك او لامك او اي حد نبي نتعرف ع ناس ليبيه بليييز

ايهاب: ولله ولم يشوفوك معاي الجيران نازله من سيارتي شن يقولو

غزل: شن يقولو عادي وين المشكله

ايهاب قرب لوي ايدها وراها وشافلها بنظره تعصب وشرار: بتقعمزي هني وز البنت العاقله او تشوفي مني شي عمرك ماشفتيه بنطلع دقايق وجاي

غزل تشوف لعيونه وكيف يتنفس قدامها: ايدي شوية

ايهاب دفها ع الصالون :راسك من الشباك مايطلعش

طلع ايهاب وقربع الباب

غزل دارت دوره ف الشقه وقربت صكرت الباب من داخل وخشت للحمام طلعت هاتف من ملابسها واتصلت: انت لمني باعتني ع اساس بتهربني

فيصل:انتي وين ?!

غزل: منعرفش عند واحد غبي يصدق اي شي ينقال قتله اني بنت وزير سابق

فيصل: انت وييين ?!

غزل: منعرررفش افهم

فيصل: تقنعيه العيل لمعاك اقنعيه يهربك لتونس وتخشي لفندق غادي ونتلاقو غادي

غزل: يخوف يافيصل نظراته نهار احرف

فيصل بتكشيخ:اسمعي حاولي تكوني كويسه معاه مع اني منعرفاش المهم وتسخفي قدامه عشان يساعدك

غزل صكرت الخط عليه: الله يلعنكم، ،ورجعت الهاتف ف ملابسها كان هاتف بيله صغير وطلعت هاتفها الايفون من جيب التوتة حاولة تشغله بس مباش يشتغل فتحت شباك الحمام وحدفاته ف الشارع ورجعت لشقه فتحت الباب من برا وقعمزت تفكر

غزل: معقولا ز مقال الشاب يكونو دعاره لواخديني ?! معقولا فيصل يسلمني لدعاره !! كله صار بسبب شباني النحس جدي كله منه كله منهههه ،، ونهارت تبكي ع الارض

،،

ايهاب خش المركز: فادي وين

شرطي:يحقق معاهم داخل

ايهاب قعمز ف الانتظار

طلع فادي شافه

فادي قرب ل ايهاب: شن قصة الصندوق قالو بنت خوهم ف الصندوق

ايهاب: بنت خوهم شني تي اجنبيه لفي الصندوق

فادي: اجنبية كيف وين الصندوق

ايهاب: اسمع البنت عندي نرجعوها بدون فضايح المهم،، قاطعه

فادي بصوت عالي: البنت هادرين دمها حلال اي شخص يشوفها ويدبحها وين ماهي

ايهاب عقد حواجبه: شن ش تقول ?! علاش !!

فادي:البنت هاربه من عرسها لا مش هكي وبس لانها هربت سترو ع روحهم وكان العرس عائلي دارو عرس اختها مع خطيبها يعني صار تبادل ف العروس عشان الفضيحه واستنى،،قاطعه

ايهاب بعياط: بشوووويةةة نفهم نستوعب بشوية شن هدا فادي علاش المصايب تتكدس عليا

فادي شد مرفق ايهاب وطلعو: اسمع البنت رح يدرو علها اجتماع واني رح نكون موجود

ايهاب سحب ايده بعنف ركب سيارة وحرق العجلة ورجع لشقه

كلها تواني ووصل بسبب سرعته

نزل وخش وقربع الباب بقوة

ايهاب خش لصالة شاف غزل راقده ولابسه كبوس متع التوتة تخفي ف شعرها

ايهاب: المنظر منظر ملاك وداخلها هلاك،،، عشان ميلمسهاش قرب من ودنها وصفق بقوة

غزل فاقت جت مقعمزه: هدا انت

،،

الكاتبة:ميشوو محمد

رسل غيرت ملابسها وقعدت مقعمزه تتفرج ع اسلام وكان الحوش فاضي كلهم طالعين

باسم فتح الباب وخش مشي اسلام يجري لبوه

باسم قامه: يابطل

رسل: بديت ز القمر معاش نشوفوك الا ف ليل ?!

باسم نزل اسلام: بلا جو نفخك امي وين ?!

فجاة الباب نفتح

سعاد خشت شافتلهم عطول هربت لغرفتها وقفها كلام باسم

باسم بعصبيه: شنو امتى بتقوليلي انك خطبتيلي

سعاد تلفتت شافتله

باسم: شنو يام معزوم ع عرسي ولا بدسها عليا العروس

سعاد بتتكلم وعيونها تعبو دموع قاطعها

باسم: ورحمت مرتي سما كان ماتتصليش توووا وتفسخي من النم نمشي اني لباب حوش البنت ونفسخ ونطلعك كدابه قدامهم

سعاد دموعها نزلو: تكلمت فها بس ومشالله قالولك اني خطبت البنت

باسم بعياط لدرجه اسلام خاف بدي يبكي وهرب ل رسل: مررررراة واحددد تخش قلبي ومستحيل يام ولو تنقلب الدنيا فوقي لوطي،، قطعاته

سعاد بتكشيخ: مييتتته مرتك ماااتتت ريحها وطمنها ع ولدهااا

باسم بعصبيه شد ايد اسلام وقامه بعنف من حضن رسل: مثقل عليك وله رسل جيبيلي ملابسه

رسل وقفت: لا باسم ماتخداش اني نبيه

باسم: رسسسلللل

رسل تبكي: مش رح نجيب شي سلومه بيقعد معاي تبي تهبله الولد

سعاد: اسمعني تربح

باسم حط ولده وقرب لمه: مستعد يام نتزوج تلاته بعدها عادي شي ساهل بس حرااام عليا ياام حرام افهمي منقدرش اني مع وحده تانيه ربي بيحاسبني

رسل قامت اسلام لكان يعيط وخشت لغرفتها معاه

سعاد تلامست لحية ولدها: سما ماعمري ننساها كنتي الاوله هادي لقريب هبلة ف موتها زيك واكثر اني واجعني حالك وحال ولدك بس وبعدين اني منديرش شي من وراك لبنت لخطبتها ل خوك يزن

باسم: يام مضايقك اسلام ?! ك،،قاطعاته

سعاد: ملايكه هداولدك وولد الغاليه شن تقول انت

باسم: باركي ل يزن ربي يتممله ع خير،،، وطلع روح

سعاد قعمزت بعبايتها تبكي ع حال ولدها

باسم يسوق ونار والعه فيه مستاحشها روح توضى وصلة ورقد ونفس الشي غرفتها مظلمه وكل شي ع حطت ايدها متغير شي

،،

رسل طلعت ل امها: يام تبي الحل ?!

سعاد تبكي:وينه الحل وينه

رسل: ولدك يبي دكتور نفسي او بالاحراى نقولو دكتورة

سعاد ساكته وتشوفلها

رسل: يام تدكري ف حوشنا القديم تدكري ف جارتنا كانت عندها بنت قصيرة شوية هي اكبر مني بتلاته سنين عمرها توا 32 يام هديكا ادكرتها

سعاد: مش مدكرتها ونبي توا وقت الكلام هدا

رسل: ياام نور دكتورة نفسيه وصديقني مجرد متقعمزي معاها دواء لجرح هي معاي ف المستشفى

سعاد: خوك شن بيوصله لها

رسل: خليه عليا

،،

ايهاب يشوفلها مش مصدق انها كدابه: بوك سيادة الوزير مش فاضي تواصلنا معاه وقال انه بعد مايتم اجتماعه ياخدك

غزل وقفت وترجف بس مبينه انها قوية: يعني انت شرطي وعرفت كل شي ?!

ايهاب: تصدقي يااني غبي يا ام اني بديت طيب هلباا

غزل: اني كدبت بشي واحد انه بوي وزير بس الباقي حق صدقني

ايهاب قرب وقف قدامها بزبط بعصبيه وتكشيخ: كدبه انك هربتي من عرسك وكدبة وحده انه بوك وزير وكدبه وحده ،،،قطعاته

غزل شافتله وعيونها حمر: كان جدي بيجوزني لخو صاحبه(تعبو عيونها دموع قدامه وحمر) كان ميبوش يدرولي عرس تعرف علاش لاني صفقه لجدي (وهي تتكلم دموعها نزلو) ايه هربت من عرسي تعرف بسبب ظلم جدي وانه بيجوزني خو صاحبه لعمره 52 سنه (علت صوتها ودموعها ينزلو) اني لجدي وعمامي لعبو وخسرو ف القمار وبسبب ديونهم باعو ورتي من بوي المتوفي وباعو دهب امي الميتتته وماخلولي شي ولانه الديون تسددت ع الكل ومزال عليهم ديون ل صاحب جدي كان رح يجوزووني اني مقابل 27 الف

ايهاب يشوف ف عيونها الكبار كيف تتكلم وعيونها حمر ودموعها ينزلو بدون ماترمش عيونها

غزل قعمزت تبكي

ايهاب بعد وقعمز مقابلها

غزل مسحت دموعها وطلعت هاتف من ملابسها وحدفاته ع الطاولة لبينهم

ايهاب شافلها وشاف الهاتف البيله:شن هدا?!

غزل: اني هربت مع سوداني وماتقولش انه سوداني كويس لا مش كويس لانه هربني معاه بمقابل عطيته حدايد دهب يعني الكل مصلحه يالله بارك الله فيه اسمه فيصل اتفقت نهرب معاه بلفلوس وهربني بس لحقني عمي وولاده،،،قاطعها

ايهاب: فيصل متثل بعمك ومتفق معاهم انه بينزلك ف طريق ال،،،،،

غزل: واني فكرتهم لحقوني حاولت نتصل باختي بس،،، قاطعها

ايهاب :اختك هي كانت العروس ف مكانك يعني انتي هربتي واختك كلتها

غزل: مستحيل انت شن تقول ،،قاطعها

ايهاب بصوت عالي وبنبرة غضب:هربتي واختك الظسكينه ادبست مكانك

غزل قامت ايدها صكرت ودانها: لالالا انت شن تقول مستحيل

ايهاب طلع هاتفه واتصل ب فادي: ايوواه فادي اسمع

فادي: شني

ايهاب:شن اسمها البنت لتجوزت مكان اختها وكم عمرها

فادي: قالو اسمها رناد عمرها 21 سنه مسالتش شي تاني هدا لقدرت نعرفه

ايهاب: تمام، ، وصكر الخط

غزل تشوفله بترجي:مستحيل مش اختي

ايهاب:اختك رناد تجوزت امبارح

غزل قربتله: رجعني لحوشي الله يخليك رجعني

ايهاب بصوت عالي: كيف ترخي بختك ،،قاطعاته

غزل تبكي: م ماتوقعتش يجوزها رناد عميه ماتشوفش كيف هكي (شافتله) صدقني حاولت نقنعها تهرب معاي بس هي رفضت وهي عطتني الحدايد متع امي اختي عميه مقدرتش نهرب بها

ايهاب: عميه ?!

غزل قعمزت وهي تفكر وتبكي

يتبع………

لقراءة الجزء التالي : الجزء الخامس من رواية خط احمر

لقراءة الجزء السابق : الجزء الثالث من رواية خط احمر

للإطلاع علي فهرس اجزاء الرواية : جميع اجزاء رواية خط احمر للكاتبة ميشو محمد

جميع الحقوق محفوظة للكاتبة ميشو محمد .