الجزء

الجزء السابع عشر من رواية قد كفاني

الجزء السابع عشر من رواية قد كفاني

وفي الجزء السابع عشر من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .

الجزء السابع عشر من رواية قد كفاني

عادي جدا تفرح شديد بس فجأة كل شئ يتغير😴 عشان كدا انا كرئبال ما بقيت افرح زي زمان😪 كنت قاعد مع احمد بنتونس كدا جاتني ريتال جارية قالت لي عمتي قالت لك تعال مشيت لي عمتي قالت لي يوم السبت ابوك ح يرجع وقال لازم تقابلو في المطار لانو في طريقكم ح تمشو لي ناس خالتكم فرحتا😍 وقولتا خلاص ح اقابل غيث وليث وجدي واهلي كلهم قولتا ليها خلاص تمام مشيت لي احمد وحكيت ليهو حسيت بيهو ما كان مرتاح بس حاول يكون طبيعي وقال لي أن شاء الله بمشي معاكم بس مرات الإنسان بقول كلام يدل على انو ما مرتاح قال لي هسي وقت تلقى ناس غيث ما بتتذكرني وضحك ضحكت زول موجوع🥺 قولتا ليهو يأخ ما تقول كدا كلكم اخواني قال لي صح كلامك وغير الموضوع تاني يوم مشينا مع عمتي بيتنا على اساس ننضفو بس لقينا خالتي مناسك نضفتو وقالت لينا الإ تفطرو معاي مشينا بيتهم لقيت مؤمن نايم جيت قعدتا جنبو في السرير وقولتا ليهو بصوت عالي مؤمن🙂 الولد قام مخلوع وبقى يقول اقسم بالله دا ما انا يا امي دا محمد انا ضحكتا فيهو😂 وقولتا ليهو شكلك جنيت شوية كدا صحصح وعاين لي وقال لي رئبال دا انت🙄 يأخ قربتا تقتلني من الخوف كنت قايلك امي😒 وجا سلم علي وقال لي اخيرا ح اشوف ليث الدايما بتحكي عنو😍 قولتا ليهو خليك من دا انت عملتا شنو؟ قال لي بنسبة لي شنو؟ قولتا ليهو مالك خايف من امك اكيد عامل مصيبة وقاعد هنا في الديوان🤨 قال لي ما عملتا حاجة غير جريت لي اختي صبا شعرا واديتا كف في وشها وهي المدلعة قعدت تبكي انا طوالي جريت وقعدتا هنا😁 وقولتا امي لو سألتني بقول دا محمد😂 انا عينتا ليهو كدا😟 وقولتا ليهو اكيد انت مجنون مفروض تكون مشتاق لي اخواتك لانو طول الفترة الفاتت دي ما كانو معاك وبعد بهدلتها ذي دا تقول هي مدلعة وفوق دا كلو كنت عاوز تكذب على امك يأخ انت مخلوق من شنو؟ متين ح تفهم انو ديل اهم ناس في حياتك متين ح تعرف انو من غير امك الدنيا ح تلعب بيك اقسم بالله دي آخر مرة اسمع انو ضربتا اختك عارف كويس بعمل لك شنو والله كلب حاج حسن بجيب خبرك 😂 قال لي اي شي ولا الكلب انا قولتا ليهو اي شي ولا زعل امك واختك المهم بعدو اتونسنا محمد جا مؤمن قال لي كشف وراك عمود كهرباء😂 محمد قال ليهو اعوذ بالله سحرتني عينتا ليهو لقيتو ما طويل يعني بكون طولي بس في العمر اكبر بكتير مني قومتا سلمتا عليهو وقولتا ليهو وين الفترة دي كلها ما شفتك قال لي انا واخواتي كنا مع حبوبة في القضارف عشان كدا ما إتلقينا جات بت كدا اول مره اشوفها دخلت وختت صنيتة الأكل محمد قال ليها صبا تعالي سلمي دا رئبال صاحب مؤمن قالت لي السلام عليكم كيف الحال!؟ رديت عليها وقلتا ليها تمام وطلعت طوالي محمد كان مستغرب ليه ما جات سلمت علي طوالي سألني وقال لي شيخ؟؟ قولتا ليهو كيف يعني ضحك وقال لي يعني ما بتصافح!؟ قولتا ليهو ما بصافح لكن ما شيخ قولتا في سري خالتي مناسك بتكون كلمت بتها اني ما بصافح فطرنا وبعدو مؤمن قال لي عندي لك مفاجأة قولتا ليهو اها بشر 🙂 قال لي انا وابوي ح نمشي معاكم المطار عشان نستقبل ناس ابوك قولتا ليهو عليك الله قال لي اااي والله انا قولتا لي ابوي الإ امشي معاكم وقال لي ما عندي مانع قولتا ليهو خلاص خليك جاهز عمتي بكرة بتتصل لكم في تلفون خالتي مناسك عاينت لي محمد وقولتا ليهو ما عندك نية تمشي معانا قال لي لالا والله عندي امتحان قولتا ليهو ربنا يوفقك وبعدو صلينا الظهر ناديت عمتي وطوالي طلعنا على البيت كنت متحمس شديد لي جيت ابوي لكن متوقع انو تحصل أي حاجة وما يجي وخايف من الحتة دي😴 المهم جهزنا كل حاجة في البيت والليل كلو ما نايم وبدعي ربنا يسهل علينا كل الأمر الصبح إذن من دون ما انوم وجسمي كان معرق وقلقنا شديد اتوضيت ومشيت الجامع صليت ورجعتا بعد الشمس طلعت عشان ناس البيت ما يلاحظو لي تعبي لقيت عمتي جهزت الشاي ولبست آمال فستان حلو شديد أول مره اركز واعرف انو آمال ما هي الإ نسخة مصغرة عن ابوي🥺 شلتها وحصنتها وعمتي قالت لي امشي استحمى عشان ما نتأخر طلعت على الحمام استحميت ولبستا جلابية بالرمادي وختيت الشال في كتفي ذي جدي عبدالله 😍 واحمد لبس جلابيه بالأبيض وكانت ما شاء الله جايه معاهو 🤩 بعد طلعتا عمتي قالت لي الليلة ما شاء الله ولدي ما يسحرو لي ضحكتا قولتا ليها من ذوقك ريتال كانت جاهزة جيت قولتا ليها اها رايك شنو؟ قالت لي يأخ مبالغة عديل كدا الليلة ابوي ما ح يعرفك ضحكتا وقولتا ليها برضو انتي اجمل حبوبة قالت لينا ما تتعبو نفسكم لانكم نسخة من بعض يعني كدا اي واحد بشكر في نفسو 😂 ريتال قالت ليها فعلا يا حبوبة بس ما تنسي انا عيوني سود وهو عيونو عسلية وانا قصيرة شديد وهو طويل 🙂 قالت ليها ما بعرف بس المهم بتتشابهو عمتي اتصلت لي خالتي مناسك قالت ليها عبدالكريم هسي طلع عليكم اجهزو بس
جهزنا وانتظرنا دقايق وبعدو عمو عبد الكريم جا بعربتو مؤمن دخل سلم على حبوبة ولمن جاني قال لي نبقى طوال عشان الجلابية تجي ظابطة فينا ولا شنو😉 ضحكتا وقولتا ليهو خلي التحريكات دي يأخ 😂😂 وطلعنا وسلمتا علي عمي عبد الكريم وقال لي انا كنت خارج السودان عشان كدا ما إتلقينا عملتا نفسي صدقتو وقلتا ليهو ايوااا كويس والله واتحركنا مؤمن طول الطريق شغال ونسة ونهائي ما سكت ومرات بنسى اني قولتا ليهو ما تتكلم مع ريتال وبتكلم معاها بحمر ليهو بسكت😂 عارف انو هو انسان بريئ شديد بس انا امي علمتني انو انا كراجل لازم يكون عندي غيرة على اهلي ولازم اخلي نفسي بعيد جدا عن حاجة اسمها بنات وما برضاهو لي اختي ما برضاهو لي بنات الناس👌 دا كلام امي الله يرحمها وصلنا بعد ساعة وانتظرنا في المطار نص ساعة عمتي اتصلت لي خالتي مثاني وقالت ليها تعالو المطار وغفلت منها انا ما مصدق انو فعلا وصلنا وانو خلاص ح اشوف ابوي واخواني اخدنا زمن بسيط وكنا بنتونس انا ومؤمن واحمد وبنضحك بصوت عالي ومن بعد لمحتا عربية عمي انس قولتا ما افرح ساي احتمال دي ما عربيتو😔 شويه كدا شوفتا غيث نزل منها وبعدو خالتي مهاد وعمي انس انا كنت بعاين ليهم في عتاب شديد وبقلبي فرحان اني شفتهم واصلتا ونستي مع مؤمن واحمد وعملتا نفسي ما شايفهم وكنت متعمد اني اضحك مع اني ما عندي نفس لي الضحك بس عشان اوري غيث اني ما محتاج ليهو وحياتي بقدر اواصلا من غير ما يكون فيها💔 بعد وصلونا عمي انس سلم علي وبعدو انا شلتا مهند وكان عمرو 5سنوات بقيت ألعب فيهو ودا كلو عشان ما اتلقى مع غيث طبعي غريب شديد امبارح كنت مشوق شديد اني اقابلو والليلة عامل فيها رايح جا عاوز يحضني وعاوز يسلم علي من كل قلبو وشكلو نسى أي حاجة جاي علي وبقول رئبال يأخ لك وحشة مالك بقيت طويل كدا 😂 مديت ليهو يدي وقلتا ليهو عبارة كدا كانت امي دايما بترددها قولتا ليهو من إفتقدناهم والنبض يرتجف لا مرحب بيهم والنبض منتظم💔 كان بعاين لي وتعابير وشو اتغيرت وإتخلع شديد وسكت ساي😟 انا اديت مهند لي عمي انس لاني شوفتا ليث جريت عليهو شديد وصلتو وساعات ونحنا بنسلم لي بعض ليث دا اكتر شخص مقرب لي افتقدو شديد في الفترة الفاتت دي هو كان ببكي عديل والشوق كان ظاهر في عيونو اصحاب الطفولة عمرهم ما بتغيرو😍 ومشيت على خالتي وسلمتا عليها وكانت بتبكي بحرقة وجسمها بقى نحيل شديد سلمت على ريتال وريتال برضو كانت بتبكي جا غيث سلم على ليث وكان زعلان شديد بعدو شوفتا عمي احمد سلمتا ليهو وكان متأثر شديد😪 وشفتا جدي عبدالله هنا دي ما قدرتا اسكت مسكتا جدي وقعدتا ابكي غيث وليث ومؤمن واحمد كلهم جوني كنت مشتاق شديد اني ابكي والقى حضن دافي يحتوني😭😭 جدي دا اكتر زول اشتقتا اني اشوفو🥺 كان ماسكني وانا بس كنت ببكي ما عارف هل الفترة طالت ولا الزمن القاسي غير ملامحهم💔 جدي دا كان طويل بس حاليا انا اطول منو وخالتي كانت عندها صحة بس حاليا صحتها انتهت مؤمن قال لي رئبال كفاك بكى يأخ غيث قال لي أسد الرمال يأخ الأسد ما ببكي اما ليث قال ليهم خليهو انا قلبي حاسي بي كمية الألم الماري بيهو خلوهو يأخد راحتو😴 كنت راقد لي جدي في رجولو شويه كدا سمعنا صوت عجلة طائرة بيحتك مع الأرض عمتي عاينت لي الساعة وقالت دي طيارة ياسر رفعتا راسي بعد زمن كنت خايف ما يكون رجع 😔 وشوفتا الركاب نازلين يالله داك ابوي احتمال بتخيل لالا يأخ ديك عمتي أريج وسمعتا ريتال صرخت وقالت ابوي وجرت عليهو وانا كنت ماشي وخطواتي تقيلة وحاسي نفسي بحلم وصلتا ليهو وكان حاضن ريتال وحضني معاها كنت حاسي بأمان شديد 😭 مهما الإنسان كبر بكون محتاج لي الوالد في حياتو ابوي دموعو ما جفت انا مشيت جبتا ليهو آمال كان عاوز يشيلا بس هي نهائي ما رضة تجيهو كيف تجيهو وهي اصلا ما حصل شافتو😔 كيف تجيهو وهي كلمة بابا ما إتعودت تقولا الإ لي انا🥺 ابوي دموعو ذادت وإتأثر شديد من الحركة دي بالجد حركة توجع القلب طفلك ما يتعرف عليك قولتا ليهو ابوي ما ترهق نفسك آمال بمرور الزمن بتتعود عليك…..

من جانب ياسر من وقت ما إتحركنا وانا بحسب في الدقايق وحاسي الفترة طالت شديد بعد وصلتا كنت جاري ومتلهف اشوف اولادي يأخ ديل روح مهجة حتى شبها فيهم ريتال اول ما شافتني جات جارية علي لكن رئبال كان راقد فى رجولو جدو بعد شافني جاني وسلم علي كنت فرحان شديد لانو خلاص لقيت اولادي رئبال جاب لي آمال بس نهائي ابت تجني بكيت شديد على حالي دي بتي الليلة ابت تجني انا بستاهل كدا لاني اخترت البعد عنهم لكن ح أحاول اعوضها كل الحنان الفقدتو 😔 بعدو رجعنا البيت …
انا احمد كنت بحس اني وحيد بس حياتي اتغيرت شديد في الفترة الكان فيها رئبال معانا انا من زمان بتكيف شديد لي رئبال ما كنت داير يرجعو غيث وليث لانو خايف رئبال يرجع ليهم وينساني خايف شديد من نظرات غيث وغيرتو على رئبال ظاهرة بس هسي أتضح انو خلاص تاني ما عندي مكان في قلب رئبال 😔
انا غيث قلبي واجعني شديد على تعامل رئبال معاي انا كنت مشتاق ليهو شديد بس شكلو رئبال خلاص لقى الأحسن مني لقى مؤمن واحمد وليث وانسى اخوهو 🥺
بلسان رئبال بعد رجعنا بيتنا غيث كان ساكت مني انا كنت بتونس مع اهلي ومبسوط شديد عمي عبدالكريم رحل في بيت في حلتنا وعمي احمد رجع في بيتو واخيرا حياتنا كانت سايرة في أمان ابوي حكى لي كل حاجة وبقيت عارف انو في زول قتل امي 😭 امي الطول عمرها ما زعلت زول ولا حتى اخدت في خاطرها من زول الليلة اعرف انو ماتت مقتولة😔انا خلاص بقيت ما منتظر من الدنيا غير خيبة الأمل 💔 وشويه شويه آمال إتعودت على ابوي وابوي واعمامي رجعونا لي مركز التحفيظ عمي احمد قال الحمد الله رهف بتي حفظت القرآن بس ليث لسه ما حفظ المهم انا وغيث وليث ومؤمن واحمد وصبا وإيمان وريتال نزلو في المركز الخاص بالبنات كلنا رجعنا نحفظ حياتنا اتغيرت وبقينا كل الوقت في حالة محاضرات وحصص ومناقشات دينية😍 يوم كنا قاعدين وشيخ بيدينا في الدرس في زول إستاذن الشيخ قال ليهو اتفضل كان شاب بدا يحكي لينا قصتو قال هو حفظ القرآن هنا في المركز دا وحاليا عامل رحلة دعوية لنشر التوحيد قال لينا انا عاوز منكم حاجة واحدة تدعو الناس للتوحيد ويكون همكم نشر الدعوة بالطريقة الصحيحة ما تخافو من أي شخص كان بتكلم وانا كنت حاسي الكلام موجه لي وختيت في بالي لازم ابقى زيو وربنا لمن يكون كاتب لك الهداية مافي شي بمنعك منها💪 واصل كلامو وطلع انا بس كنت سرحان في كلامو انتهينا من الدرس احمد قال لي الحاصل شنو!؟ قولتا ليهو مافي شي قال لي عليك الله يأخ قولتا ليهو والله يا احمد انا عاوز ابقى داعية اسلامي قال لي والله يا رئبال ما عشان الكلام قدامك لكن انت كل المؤهلات عندك شخصتك قوية بتدافع دايما عن الحق احتمال يكون مشكلتك بس انك لسه ما اكملتا حفظ القرآن وان شاء الله بتختمو سكتا منو ورجعنا لي الدرس ما عارف بس مكانة احمد كل يوم بتزداد احمد بفهمني من غير ما اتكلم احمد بحاول يكون قريب مني في الفترة الأنا رافض فيها دخول كل الناس في حياتي بس مرات بحس بيهو عاوز يبعد مني لكن لشنو الله اعلم!! عكس غيث تماما غيث من يوم جو ما إتونسنا مع بعض بس بنسلم على بعض واي زول بمشي في اتجاه حتى كل الشلة لاحظت بعد انتهينا احمد قال لي عاوزك في كلام قولتا ليهو جدا بس اول إتأكد من انو صبا وريتال وايمان رجعوا البيت وبعدو بجيك طلعنا انا ومؤمن وصلنا اخواتنا البيت وتاني رجعنا مشيت سألتا عن احمد قالوا لي قاعد جو المركز دخلتا ما لقيتو لقيت غيث قولتا ليهو احمد وين؟ قال لي قاعد بس ممكن دقيقة من وقتك جيت ليهو وقولتا ليهو احكي قال لي رئبال انت عاجبك نكون كدا صح!!؟ ما ممكن من جينا وانت رافض تتونس معاي معقولة لدرجة دي بقيت تكرهني 🥺 قولتا ليهو غيث ابو الشباب ما بنكر انو حركة زعلتني بس في النهاية انت اخوي غيث قال لي يعني صافية؟ قولتا ليهو اكيد يأخ سلمنا على بعض كان بضحك بصورة جميلة والله اصحابي ديل أي واحد احسن من التاني ربنا يحفظهم لي 💖
من جانب احمد انا مبسوط اني اصلحت بين غيث ورئبال كنت بعاين ليهم من بعيد الشي المخليني ابعد منهم اني عارف الحقيقة كلها وعارف انو امي هي القتلت خالتي مهجة أي والله ما تستغربو انا فاهم كل حاجة للأسف😔 بس خايف اتكلم وافقد اكتر ناس ارتحت معاهم انا ما حسيت بالأمان غير مع الجماعة دي رئبال بقى لي اخو وسند🥺
بس خلاص كفاية رئبال لازم يعرف كل حاجة لكن بطريقة ما تخليهو يكرهني 😔😔
————————————–
———————
*☆يتبــــــــــــــــــــــــــــــــــــــــــــع☆☆*

لقراءة الجزء التالي : الجزء الثامن عشر من رواية قد كفاني

لقراءة الجزء السابق : الجزء السادس عشر من رواية قد كفاني

للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم

جميع الحقوق محفوظة للكاتبة آيه إبراهيم .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى