الجزء

الجزء السابع من رواية أنت عدوي

الجزء السابع من رواية أنت عدوي

وفي الجزء السابع من رواية أنت عدوي للكاتبة الموهوبة كيندا دعونا نري جميل الأحداث والمواقف الخيالية المميزة من الكاتبة الموهوبة التي نسجت الرواية بكل إتقان وروعة لا مثيل لها ، لذلك هيا بنا لنبدأ قراءة أحداث الجزء في السطور التالية بإذن الله .

الجزء السابع من رواية أنت عدوي

وفي اللحظه الا بيرد فيها عليها أيهم … سمعو تبرزيمة حد طاح في حوش … وبعدين صوت زيد يقول …
زيد …. (( بصوت حاد )) ااااااااااااااايهم هااااات مفتاح سيارررتك بسررررررررعه وتعاااالي …
وناضو بسرعه يتجارو ….
وهنا ناض ايهم وكنزي يتجارو بسرعه واول ماخشو من باب بلكونه لقو ورده طايحه وزيد يقيم فيها … فا جي زيد بسرعه وقعد يقيم في امه ويقوله …
أيهم (( بصوت كله رهبه وخوف )) .. خيرها يابوي شن في ؟؟
زيد … نزلها معاي توا وبعدين نقولك قيم فوق شوي ايوااا .. افتحي كنزي باب بسررعه ..
وفتحت الباب ونزلو منه وهما في دروج وقفت كنزي وقالت .
كنزي … بابا نلبس جبتي بس ونازاله وراكم ..
زيد … لا خليك مع خوتك ياكنزي ..
وفتحو الباب الخاريجي وطلعو وحطوها في سياره وفي لحظه الا بيركب فيها ايهم شبحله زيد وقاله …
زيد … خليك انت هنا … علي الاغلب نضطرو نباتو في مستشفي فاماتخليش خواتك بروحهم في حوش …
وولع سياره ومشي بسرعه عاليه …
وهنا أيهم قعمز علي مرشبيدي وحط ايديه علي راسه وقعد يفكر … بينما كنزي كانت تراقب فيه من بلكونه .. وهوا انشلو رجليه لا عرف يركب لشقه ولا يلحق امه ويشوفها خيرها …
وقعد مقعمز ودقايق تفوت ..لحد مافاتت ساعه كامله … وهنا سمع تلفونه الا كان في جيب التوب متع توته متعه يشرين … فاطلع تلفونه بسرعه وفتح الخط …
أيهم (( بصوت خايف )) ايوااا بابا خيرها امي شن في ؟؟
زيد …. اهدي ولدي .. امك مافيهاش شي مجرد تعب وارهاق فقط وهبطلها سكر لدلك ماتخافش عليها … تقعد الليله تحت الملاحظه وبكرا بعون الله تكون عندكم مهم ماتخليش خوتك بروحهم تمام ؟؟
أيهم … حاضر يابابا .. بس اعطيني نكلمها ونسمع صوتها ..
زيد .. (( سكت شوي وبعدين قاله )) .. لا توا دكاتره معاها وياخدو منها في شوية تحليلات خليها ترتاح وبكرا كلمها تمام ؟؟
أيهم … خيره صوتك انت في شي صاير معاكم ؟؟ قولي بالله عليك يابابا ..
زيد … مافي شي ياولدي ممكن شميت تراب مبكري بس فا نزكمت شوي وتغير صوتي … تعرف انت الجيوب الانفيه معاي .. مهم طمنت انت وطمن كنزي ماشي … اني توا بنسكر ليلتكم سعيده ..
أيهم … ليلتك سعيده …
وسكر ايهم وقعد واقف شوي وبعدين حط ايديه علي وجهه ونفخ ومسح وجهه وتلفت وركب فوق لحوشهم …
وبمجرد مافتح الباب شبحتله كنزي وقالتله …
كنزي … في حد في كلمك ايهم ؟؟
أيهم … ايه كلمني توا … قالي مافيها شي مجرد اجهاد وضغط وهبوط في سكر وخلاص وتوا بيدرولها شوية كشوفات وبكرا بيروح بيها ..
كنزي … (( نفخت وكأن هم ونزاح وقالتله )) .. اووووف الحمد لله خلاص معناها ارتاح ومعاش تحرق اعصابك اكتر (( وقعمزة علي كنبه )) …
يينما هوا قعمز علي كنبه شوي وبعدين ناض وقاللها ..
أيهم … اني مخنوق شوي بنقعمز في بلكونه .
. وطلع للبلكونه وقعمز علي كرسي … فاقعدة هيا مقعمزه شوي وبعدين مشت لباب البلكونه وقعدة تشبحله من ورا المرش فا شبحاته كيف يبكي واول ماتنزل دموعه يمسح فيهم طول … وواضح انه كان خايف علي امه ومتأتر هلباااا … فا قعدة تشبحله شوي وبعدين فتحت الباب وطلعت وقعمزة علي كرسي وقالتله ..
كنزي … ماتخافش عليها ياايهم صدقني مافيها شي احساسي هكي يقول .. خاف علي نفسك انت وشن بيصيرلك مني لو اني طولت معاكم اكتر هههههه
وهنا ايهم شبحلها وضحك ضحكه مهمومه وبعدين قاللها …
ايهم … زعمك اني مش انتي ؟؟ (( مع ابتسامة علي جنب ))
كنزي … مرات احنا زوز نجلطو بعض ههههه ماهو مبروم ومبروم مايلفش ..
أيهم … بس اهو طلع فيك فايده شوي … ماكنتش متوقع امي في مستشفي واني نبتسم لمجرد وجودها في مستشفي ووجودك معاي …
كنزي …. اكيييببد ياحبيبي لان اني ليا سحر خاص ههههههه ❤ ❤
أيهم …(( وهنا قام عيونه وقعد يشبح لعيونها لتواني بدون كلام لدرجة وجهها ولي احمر وتلكمست وبعدين ابتسم ونزل عيونه لوطه وسكت شوي وبعدين قاللها …
أيهم …. اها كويس حبيبك صار .. من بعد العدواه الا محبه ❤ علاقتنا الاخويه في تطور ..
كنزي … (( وجهه احمر زياده وقالتله )) … شن تقصد ؟؟ بصراحه انت بارد هلبا ..
أيهم … اني ماجبتش حاجه من عندي … انتي قولتي …
كنزي … انت بجد بارد … بنوض نرقد اني خير (( ووخرت الكرسي ))
وهنا شد في ايدها وقاللها …
أيهم … خليييك .. نبصر عليك والله … خلاص معاش نضايقك تاني بس خليك …
كنزي … ومعاش تشبح لعيوني تاني ؟؟
أيهم … (( مع ابتسامه علي جنب ومسحت لحيه )) .. تمام
وكنزي … ومعاش تبتسم زي توا ..
أيهم … (( شبحله وفي عيونه ابتسامه وقاللها )) .. حاضر
كنزي … تمام … وقعمزة تاني وقعدة تشبح قدامها بدون اي تعليق وبعدين شبحتله وقالتله … مش جايك نوم ؟؟ صح ؟؟
أيهم … اكييد ومش رح نرقد لين نشوفها صبح هنا ..
كنزي … ولا اني … مش عارفه نرقد وبابا مش في حوش اكيد .. (( سكتت شوي وقالتله )) .. نلعبك لعبه ؟؟
أيهم …. ااااااه اني عمري 32 سنه يابنتي مش 22 … انتي من اي كوكب بزبط …
كنزي … تلقح صح هههههه تمام اني عيل ورح تلعبها معاي ماااااشي ؟؟
أيهم … والله ماعندي رغبه في شي صدقيني ..
كتزي … معليشي علي خاطري خير مانتفرجو علي بعض .. انت اعرفها بعدين احكي …
أيهم … تمام رح نعتبر روحي مجبر نعرفها تفضلي مايك ليك ..
كنزي … تمام ههههه اسمها الصراحه او هل تجرؤ علي فعل هدا ؟؟ (( الصراحه او تحدي )) ..رح نجيب شيشة ميه تكون نصها مليانه فقط ونحطوها بينا علي طاوله ونلفوها والا تجي راسها عليه رح ينسأل سؤال يجوابه بصراحه او يتنفد فيه تحدي ومجبررر يديره ..
أيهم … اها معناها الليله رح نتجرسو علي قولت اخواتنا مصريين .. تمام … ديرلي فنجان قهوه علي طريقك وانتي ماشيه بتجيبي شيشه بس
كنزي …. اه هدا ابتزاااااز من تواااا .. بس رح نديرلك نسكافيه زي مش قهوه ممنوع …
أيهم . . ماشي تمام …
ومشت كنزي وأيهم طلع سبسي وولعه وقعد يدخن فيه … لحد ما جت كنزي … واول ماجت كنزي وحطت نسكافيه … خدت منه دخان وطفاته وقالتله ..
كنزي …. دخان وقهوه غلط .. انت بتولي عصبي هكي وتضر في نفسك ..
أيهم …. (( شبحلها وفتح عيونه وابتسم وقاللها )) .. اها من امتي الخوف هدا ان شالله ..
كنزي (( شبحتله شبحت مكابره وقالتله )) … طبيعي بنخاف بس علي نفسي .. مرات بعد دخان والقهوه واول شوط من لعبه نلقاك حادفني من بلكونه صح ؟؟
أيهم …. هههههههههه في هادي صح .. اني مش ضامن روحي معاك …
كنزي …. باهي خلاص … خلينا نبدو توا … من يبدا يلفها الاول … استني … هات صبعك صغير … قول وعد نقول صدق او نقبل تحدي ومانغشش ولو غشيت رح نصب عليك شيشه الا في ميه كلهاااااااا ها هادي قوانين لعبه ♡♡
أيهم … هههههههههه تمام وعد وهدا صبعي ها … ابدي انتي هي …
كنزي … تمام ههههههههه ..
ولفت الشيشه وبصدفه جت راسها عليه … فاهنا سألته وقالتله …
كنزي …. ااااااام … شن بنسالك شن بنسالك … تمام … امتي اول علاقه جديه كانت ليك ؟؟
أيهم … هههه بصراحه مره بس
كتزي … شن قصتها ومن هيا ؟؟
ايهم … لا خلاص … انتي قولتي بس سؤال والباقي مش اصلا مش حاب نحكيه .. وتوا خليني اني نلف … اها .. تمام … سؤال ليكي … ااااااام … هل تحسي انك ممكن تكوني من نصيب شخص كنتي رافضتيه ؟؟ (( وشبحلها وهوا مستني الاجابه ..
كنزي … اااام … مش عارفه .. الحق مش عارفه ..
أيهم … كيف مش عارفه ايه او لا اعطي اجابه دغري ..
كنزي … تمام … ممكن ايه وخلاص مش حابه نفسر اكتر .. هههه
أيهم … بصراحه اجابتك ماقنعتنيش ..
كنزي .. مش ظروري تقنعك مهم اجابه مباشره .. وخليني اني توا …
أيهم …. تمام بس لو لفيتيها وجت عليك ؟؟
كنزي … تسألني انت تمام .. هي نرجعو لشوط .. (( ولفت )) … اااااااانت هييييييي ههههههه تمام … اول ماشفتني وبعد مافقت من الخبطه شن حسيت بعد ماشفت الا خبطاتك … نحس اغنية مسلسل ريا وسكينه ههههههه …
أيهم … لا مش هيا اطمني … وبعدين خدي تلفونه وقعد يفركس شوي وبعدين فتح أغنيه وقربها ووجهلها شاشه ومايك باش تسمع … واول كلمه نطقت بيها الاغنيه …
(( بتعرف شعور لما …
تلتقي صدفه بحدا ❤ ..
مابيشبه حدا ❤ ..
لما فجاءه تموت العجقه … وحدك تشوفا هدا ❤
مش عم بقدر افهم احساسي شو عم بيعمل … كل مابقرر وقف عم لاقي حالي مكمل …
حالة ضياع احساسي بدو يرحل ومافيني قلو ارجع لاني بحبا …
كل شي قرار الا … الحب غصبن عنك ❤ … مابياخد ادنك … بي لحظه وحده بيغيرك ❤ … وبينسيك حتي اسمك ❤ .. مش عم افهم احساسي شو عم بيعمل .. كل مابقرر وقف عم لاقي حالي مكمل … ))
(( ادهم نابلسي … بتعرف شعور )) ..
وهنا طول ماهيا تسمع في الاغنيه مانطقتش ولاكلمه .. قعدو يشبحو لبعض بس لحد ماكملت الاغنيه … والكل انشل .. ومافيش فيهم حد وقف الاغنيه لحد ماكملت ووقف بروحها … واهنا بعد ماكملت طفي تلفونه وهيا قعدة ساكته وبعدين قاللها قام راسه وضحك ضحكه يحاول يخفي بيها الا كان حاسس بيه للحظه وقاللها …
أيهم … باهي … شن رأيك فيها الاغنيه ؟؟ حلوه صح هههههه كنت نبي ناخد رأيك فيها بس قبل مانجاوبك علي سؤألك …
وهنا كنزي قالتله … (( وهنا وجهه الاحمر وصدمه تلاشت ونحط بدلهم علامات الارتبالك وقالتله )) اها تمام فهمت …
أيهم … ماتبيش تعرفي الاجابه ؟؟ نخاف تقتليني ههههه تمام .. شن تحدي لو ماجاوبتش علي سؤال برغم اني جاوبت (( وشبحلها شوي وبعدين ابتسم )) ..
كنزي … (( شبحتله بنظره مرتبكه وتحاول ترجع عاديه وتجاهلت كلامه الا مش مفهوم وقالتله … خمسين ضغط قدامي توا …
أيهم ……. وووووووه لهدرجه كرهتيني ههههههه ماشي تمام واني قد التحدي ونعجبك هههههه
ونحي توب متعه وقعد بي بدي توته وسروال وبدي في تمارين … وهيا تعد في الرقم مرتين باش تنتقم منه …
كنزي … واحد … اتنين …. تلاته … تلاته …. اربعه …. خمسه … تلاته … اربعه …
وهنا وقف أيهم وقنصلها وناض نط بسرعه وقاللهاا …
أيهم …. ياغشاااااااااااااشه …. تعالي هنا تو نوريك …
وهيا نطت تجري من كرس وهربت وهوا خدي شيشة ميه وفتحها وهيا تجري وميته بضحك
كنزي ….. هههههههههههههه ورقتلي ههههههههههه تستااااااتتهل
وقعدو يتجارو في الحوش لحد ماشدها وكيف بيصب عليها شيشة الميه كاملهوهياو تعيط وتضحك ولكن فجاءه صوت اختهم صغيره بدت تبكي فاحط ايده علي فمها وهيا نفلجو عيونها فيه من صدمه وقاللها …
أيهم ….. اااااااااص …
وقعد يشبحلها وهيا تشبحله وخدودها ولو حمر بدون اي تعليق او مقاومه لحد ماسكتت اخته وهنا رن تلفونها
فافاق لروحه ونحي ايده بسرعه وهيا طلعت تجري للبلكونه متسبله بتلفونها … وهوا قعد واقف من بعيد يشوف مني يتصل …
واول ماشدت تلفون لقت رقم مازال يرن … فانزلت تلفونها وتلفتت … شبحت أيهم يشبحلها من بعيد …. فاهنا فتحت الخط ومشت بااتجاه أيهم وقالت ..
كنزي … ايوا … اهلين شعبان … لحظه بس نخش لداري ونكلمك … تمام خليك …
وجت عينها في عيون أيهم الا قعد يشبحلها وبعدين نزلت عينها وخشت لدارها وسكرتها عليها طقه وقالت …
كنزي … الو ايوا ياغبيه اني خالتك من شعبان هدا ..
كنزي …. هههههههه مش عارفه تلفوني يخرط عطاني رقم شعبان يتصل مافهمتش كيف خطوط هادي تخش في بعض ..
خالتها ميسون … رح ندير في روحي صدقتك هههه لان موضوع فيه بشاره خير لموضوعنا ههه
كنزي …. اوووووف انتي وين واني وين … بالله خليني ياخالتي في همي …
ميسون …. شن في خيرك ؟؟ في حاجه صارت ؟؟
كتزي … مرة بابا فجاءه طاحت وكلهم رفعوها للمستشفي … ياناري بابا من رعشه لرعشه والله خايفه عليه ..
ميسون … نحساب بوك فيه شي .. باهي كويس بالك تموت هالعقربان ونفتكو منها ..
كنزي … حرام عليك ياخالتي خيرك تتكلمي هكي ..
ميسون … بجد حرام عليا ؟؟ بعد الا دارته حرام ؟؟
كنزي .. خالتي الا فات مات … بس توا هيا ام وخواتي صغيرونات محتاجينها وولدها نفس الشي .. محتاجها صح ..
ميسون … اها ولدها صار .. ايه بالله علي سيرة ولدها من قاعد معاك في حوش ؟؟ ولدها ؟؟
كنزي (( شبحت للباب شوي وقالتلها )) … لا اكيد مشي معاهم … وقعدت اني وخواتي وبابا توا كلمني قالي ساعه ونوصلو … بس انتي كيف عرفتي اني نايضه لتوا والوقت متأخر (( غيرت موضوع )) ..
ميسون .. طلعلي انك نشط علي فايبر والفيسبوك فاعرفت انك نايضه واني مش جايني نوم قولت نتصل بيك ..
كنزي … اها تمام … اي حتي اني مارقدتش ممكن لان مافي حد في حوش الا خواتي صغار فاهرب عليا نوم وبدات بعد هجوم شعبان عليا هنا بديت خايفه اكتر ..
ميسون … والله شعبان في الاخير من دمك ولحمك ومش رح يرضي فيك شي … بس الخوف والخونه كلها من براني …
كنزي … رجعنا ميسون لنفس تلميحات .. الولد ماطقش فيك في شي علاش علي كل سيره جايبتيه …
ميسون … ماطقش فيا بس امه طقت في امك ومانبيش نقولك ان الا انتي فيه توا وامك فيه بسبب اللفعه امه لفت عليه لين خداته من امك وخلتها مقهوره العمر كله علي بوك … وتوا ولدها مش بعيد زي امه يلف عليك وامك يدل القهره اتنين وتكونو سبب في جلطتها وموتها ..
كنزي … علاش تتكلمي هكي … انتي تعرفي اني مستحيل ندير في امي هكي او نسبب في حصرتها عليا .. وأيهم خووووي مش اكتر … ونزيد نطمنك ان هوا بيخطب بنت جيرانهم … ولا اني ولا هوا نشوفو في بعض الا خوت بس والولد محترم وبالله عليك خلاص ..
ميسون … حبيبتي اني معاك مش ضدك بس في نفس الوقت هادي اختي … والله لو تشوف اي شي بينك وبينه ممكن تهبل …
كنزي … باهي انتي شفتي شي ملموس باش تقولي هكي ؟؟
ميسون … لا ماشفتش .. اني حسيت لمعة العيون ونبرة صوت … وان شالله نكون متوهمه … ونحدر فيك باش تعرفي كل خطوه تخطيها قداش مقابلها تطيح ناس من حياتك بس ومش رح تقدري تقيميهم تاني … يعني في حكايه بسيطه للحكيم جحي قال في مره عطي لي ولده جره وقاله اعطيها لفلان وهدده انه مايكسرهاش وضربه معاها .. فاصديقه الاعربي قاله علاش ضربته قبل مايكسرها ؟؟ رد عليه جحي وقاله اني ضربته باش يخاف ومايكسرهاش لكن لو هوا كسرها اني شن بنستفيد من ضربه بعدين ؟؟ ولهدا اني نبه فيك قبل ماتغلطي وتسمحلك نفسك برغم اني نعرف بنت اختي دكيه ومستحيل تبدل امها براجل مهما كان … وتوا بري خلاص قولت خلي نطمن عليك وبنرقد … وكان في شي كلميني تمام ❤
كنزي … تمام … ليلتك سعيده …
وسكرت تلفون وحطاته جنبها علي سريرونحت الوشاح وطلقت شعرها ونفضاته وكأنها تحاول تنفض من رأسها كل الكلام الا كان تقيل عليها … وبعدين قعمزة علي سرير بشكل قرفصي وقعدة تفكر شوي .. وفجأءه خدت تلفونها وقعدة تحاول تدكر وتبحت علي كلمات الا علقت في راسها لين لقت الاغنيه … فاشغلتها وناضت فتحت باب البلكونه متع دارها الا كانت بجانب بلكونة صاله … ووقفت قدام السياج تضرب فيها ريح وتسمع في الاغنيه وهيا مغمضه عيونها … واول ماكملت الاغنيه تلفتت باش ترجع لدار تشغلها … ولكن صدمه لما لقت أيهم واقف يشبحلها وهيا تسمع للاغنيه ومستمخه معاها والريح تضرب في شعرها …. وهنا قعدو يشبحو لبعض وهوا ابتسملها لما ابتسامه فيها رساله واضحه … وقام حاجب ونزل حاجب وغمزلها باابتسامه … وولع دخانه وقعد يشبحلها … لحد ماهيا هربت بسرعه وخشت وسيبت البلكونه وتلوحت في سرير وغمت راسها في مخده من الموقف المحرج الا نحطت فيه بدون قصد وخاصة انها نست للحظه ان بلكونة صالة ودار نومها في نفس صف ومايفصلش بينهم الا مسافه بسيطه جدا .. بحكم ان الحوش جديد عليها … ومن بعد ماغمت راسها … مشت في عالم تاني من نوم مافاقتش منه الا علي طقت بوها صبح …
زيد … كنزي … بنتي … شن مازالتي راقده ساعه 11 الفطور واتي .. ونستنو فيك علي طاوله ..
وهنا ناضت كنزي بسرعه ولفت الوشاح عليها وقالتله …
كنزي … حاضر بابا …وفتحت الباب … وحضت بوها وبعدين سالت علي مرة بوها وقاللها …
زيد … الحمد لله اهي توا رقدتها في فراشها بسيف حتي فطور جبته لعندها … ومعاش نبيها تنوض يومين هما لين تولي افضل ..
كنزي … تمام ماما واطمن اني ندير بدلها كل شي ..
زيد …. ورح نخلي أيهم يساعدك ماتخافيش واني نفس الشي رح نديرو الا نقدرو عليه … بس توا يالله فطور بوك الاحترافي علي طاوله ويستني فيك …
كنزي …. تمام شوي نخش حمام ونلحقك …
ومشت كنزي للحمام فرشت اسنانها وغسلت وجهها وتوضت وصلت الصبح الا فاتها وبعدين قعمزة علي طاوله وحاولت تتجاهل أيهم وماتحاولش تشبح الا لبوها … وعم الهدوء علي طاوله وماينسمعش الا صوت طاوسي الشاهي علي طاوله تنقام وتنحط فقط … لحد مارن تلفون أيهم اتصال علي نغمة …
(( تعرف شعور لما… تلقتي صدفه بحدا … مابيشبه حدا … لمافجاءه تموت العجقه … وحدا تشوفا هدا … مش عم بقدر افهم احساسي شو عم بيعمل … كل مابقرر وقف عم لاقي حالي مكمل ))
زيد ….. اااااوف رد ياايهم فكنا من دوشه علي صبح ياديره صامت …
أيهم … ماهو مانبيش نرد … وتلفوني يخرط لما نرص علي صامت اتناء الاتصال ينفتح خط …
وهنا شبحت بدون قصد كنزب لي ايهم … فاشبحلها بنفس ابتسامة الليله الماضيه مع غمزة العين ونزل عينه طول …
وهنا زيد قام عينه لقي ايهم مبتسم فاقاله …
زيد … ان شالله خير ياولدي فرحان شكلك الا مارديتش علي الاتصال او كيف ..
ايهم … والله يابابا اي جي في وقته هوا الحق باش مانردش عليه ويفهم لاني غبي ومايفهمش بروحها الواحد قريب يخرفله ..
زيد … لهدرجه لاحول ولاقوة الا بالله ديرله بلوك وخلاص ..
أيهم … (( شاد ضحكته بسيف علي ملامح كنزي )) ياريت يابابا قريب نديرها باش يفهم هالغبي هدا ..
وهنا قطعت حديتهم اختهم صغيره وقالت ..
ميرا … بابا اني زعلانه منك يابابا … امس حلمت بكابوست سمعت فيه ناس تجري في حوش وتضحك .. خفت يابابا قعدة نبكي ماجتنيش علاش ؟؟
وهنا لقمة تسقفت في رقبت كنزي ووجها احمر اصفر الالوان طيف وأيهم الابتسامه تبدلت لصدمه مع شفطت شاهي سخون شرقاته … خلت الكل تطريق عليه بضحك … الا بعدها زيد قاللها …
زيد … هدا كابوس يابنتي واكيد حلمتي انك تنادي فيا .. بس تعالي هنا … اني الا بنزعل منك …
ميرا … علاش يابابا شن درت اني ،؟
زيد … انتي قريتي اية الكرسي والمعودتين قبل ماترقدي ورقدتي علي جنبك الايمن زي موصانا رسولنا الكريم ؟؟
ميرا … لا يابابا الحق نسيت ..
زيد … اها لهدا جاتك كوابيس في الليل واحلام سيئه … واحنا اتفقنا كل ليله تديري زي ماقتلك … لهدا اني زعلت ..
ميرا … صح يابابا عندك الحق من اليوم رح ندير كل الا طلبته مني ♡♡
زيدا … تمام هكي انتي بنتي وتوا كملي فطورك باشةبعدين نلعبو مع بعض زي ماوعدتك من قبل وقوتلك اول مانحصل عطله رح نلعبو مع بعض لليل ..
لار … بليستيشن هاااااااا هههههههه
زيد … هيا افطرو توا ووروني قوتكم بعدين ♡♡
كنزي … اني رح نضم بابا الحوش ونوتي الغدا ♡♡
أيهم … اني رح نساعدك … ههههه خيرها تشبح هكي هادي … ماتخافيش يابنتي اني شيف كبير راهو مالا كيف كنت ناكل برا … اليوم الاكل عليا تمام ♡♡
زيد … يالله وروني مهارتكم اليوم ♡♡
كنزي … تمام ♡
وكملو فطورهم .. وبعدين ناض كل واحد منهم لمكان كنزي بدت في ديار وبعدين للبلكونات وصاله … وزيد بين ورده شوي وبين صغار شوي … وأيهم غطس في مطبخ معاش بان … لحد ماجت ساعه اربعه بزبط … وهنا خشت كنزي … والصدمه الصدمه … المعايين الا في دولاي كلهم براااا .. مطبخ وأيهم مع المطبخ متفجر فيهم لغم … وهنا احمر وجهها من العصبيه وقالتله …
كنزززززي … (( بنبره حاده )) اوووول واخرررر مره تخش للمطبخ تمااااام ؟؟
أيهم … (( وهنا قرب منها ولوالها صبعها وقاللها )) … صبع هوا بلاش منه خير مش من قبل نبهتك او لا (( وشبحلها بنظرة لؤم ))
وهنا تنهدت وبعدين قالتله …
كنزي … اطلع برا لو سمحت … خليني نظم زباله وراك …
أيهم … والغدي ؟؟ مش بنحط الغدي ؟؟
كتزي … (( بصوت غصبي )) انت خليت يامفتري صونيه او كاشيك نظيف نتغدو بيه اساسا .. اطلع برا من فضلك ..
ايهم … برغم ان الالفاظك سوقيه بس تمام معاك حق .. بس مش رح نطلع … وعلي فكره اني سي سيد الحوش وكلمتي تمشي عليك تماااااام .. اغسلي معايين واني نظف رخامه بسرررررعه بسرررررعه بديت نتعصب اني ..
كنزي (( شدت ضحكتها من ملامحه الكوميديه وقالتله )) انت مهبول بجد والله مهبول … او عندكم حد اهبل في العيله … بجد عندكم حد اهبل في العيله ؟؟
أيهم …. (( ضحكة تعجيب وتعويجة فم )) ه ه ه ه لا لا عندنا خاله سمينه شوي .. ينفع ؟؟
كنزي …. ههههههههههههه والله مهبول رسمي
أيهم (( مع تكويشه مصطنعه )) ضميييي انتهي الضحك .. وبدي يغسل في معايين وقاللها ..
أيهم … حناي ديما تقول .. الضحك مره والبكي مشوار .. ااااه ياحناي انتي حكم ♡
كنزي …. هههههههه وشن خطر عليك متل توا …
ايهم … ههههه تبي الحق ماليشي علاقه بموضوعنا غير حسيته ماشي مع المريقه متع المعايين و ترغي صواني … يعني تقدري تقولي طلعت الحني الا فيا هههههه
كنزي …. هههههه٧ والله الا مهبول رسمي مابعد الا بتطيح فيك بجد ؟؟
وهنا زيد نفض المعايين وقاللها …
ايهم …. هيا تطول ؟؟ تي هيا غبيه .. وبلاهاء … وتضرب في رجاله .. ووجهه زي الطماطمه ديما احمر … وغشاشه .. يعني من الاخير سوابق البنت ههههه فاهيا تطول تاخد جنتل مان زي ؟؟
كنزي … (( بوجه متعصب )) وياتاري من هيا سوابق هادي ؟؟ اكييييد بنت جيرانكم صح ؟؟
أيهم …. اكييد هوا يعنيةفيةغيرها واني قولت لا … اغسلي معاينك واسكتي …
وتلفت هيا لجيهتها وهوا لجيهته …
وكل واحد فيهم لاهي لحد ماجت جنبه باش تحطله صونيه … وهنا انصدمت لما لقت غسله مش كويس …
كنزي …. اني بجد مصدووووومه يع يع يع شن هدا كله مش نظيف ؟؟
أيهم …(( وهنا لوح صونيه وقاللها )) لااااااا خلاص الكدب هوا مايتسكتش عليه … ييييع اني صح … باهي تعالي نوريك اليع كيف شكله …. وخدي طلية صابون صبها عليها كلها بدهانها …
كنزي ….. لاااااااااااااااا يامهبووووول يامقرررررف … والله لما تشوووف .. وخدت كاتشب فتحاته وكله…
أيهم …. لا الموضوع كبر ياتربس والعين بالعين والبادي اظلم … وخدي قردل الدقيق وصبه عليها …
وهنا ولعت اكتر كنزي وفتحت باب درج تلاجه وحدفاته بدحي الا علي رف … فاخدي طماطم الا كان علي دولاب وكمل حدف عليها
وكيف يتقادفو الا في مطبخ علي بعض … سمعو صوت يضحك … تلفتو … لقو بوهم وخواتهم وامهم المريضه يتفرجو عليهن ومصدومين … فاطاح الطماطم والدحي من ايدهم ووقفو مصدومين بدون ولا كلمه …. وبوهم واقف يتفرج ويصفق …
زيد …. الله الله علي صغاري الا علي اساس سند لبعض … انتم لو عدوان مش رح تديرو في بعضكم هكي … لو كفار قريش مش رح تديرو للمطبخ هكي … كيف الواحد بيعاقبكم ترا … تماااااام … عندكم نصف ساعه … نبي المطبخ فيها نضيف بدون مايدوي معاكم حد مع حد … وبعدها تدوشو وتلحقوني لصاله عندي معاكن تفاهم تاني …
كنزي …. والله يابابا هوا الا بدي … مش اني … اني كنت ندافع علي روحي بس ..
وهنا شبحلها أيهم شووي علي بلعطتها ويعدين سكت ونزل راسه …
زيد …. وان شن رأيك يا أخ أيهم … ياعاقل يالي عمرك 32 سنه .. يالي بتاخد دكتواره مفروض وبتولي مربي اجيال .. هل ياتاري بتقعد تتحادف انت وياهم في القاعه بدحي هكي ؟؟ تكلم دافع علي نفسك ؟؟
أيهم … اني غالط عندك الحق … اني اسف ..
زيد … تمام … تضم مطبخ بروحك وتغسل البساط بروحك ومافيش اي حد رح يساعدك … تمام وانتي لدوش ودارك طول …
وطلع وسيبهم … وكنزي طلعت من مطبخ بدون ماتزيد اي حرف … دارت دوش وخشت لدارها طول … بيننا ايهم قعد في مطبخ لحد ساعه عشره في الليل … واول ماكمل بعد ماانهد حيله طلع حوايجه وخش للحمام وقعد تحت دوش اكتر من ساعه … وماطلعش من الحمام لين سمع تقربيعة بابا الحوش … فا لبس حوايجه وطلع … وهنا قربع مشي بيكبه علي خواته لقاهم كيف بيرقدو … فاكبه علي امه بوه باش يعرف شن في مالقي حد في دار ولقي دار كنزي مقتوحه وواضح مافيها حد فافتح الضي وشاف شنطتها ماهناكش الا كانت محطوطه بجانب دولاب فاضيه …
وهنا ركبت فيه نار … فااتصل بي بوه طول …
أيهم … بابا وينكم … ووين كنزي ؟؟ علاش دارها فاضيه انت لزيتها ؟؟
زيد … انت ليك وجه تسأل يااايهم بعد المعركه متع مبكري ؟؟ ..
أيهم … انت مش فاهم … اني سبب اني الا حدفت كل شي بروحي واني الا درت في مطبخ وفيها هكي هيا قعدة واقفه وماليهاش دنب … علاش لزيتها يابوي ..
زيد … أيهم خلاص انساه موضوع كنزي … اني نهيته من بكري …
أيهم … (( رد يعصبيه )) … ماتقووووووليش انسااااااه … اني مش عيل … ولو مارجعتش كنزي اليوم اني رح ناخد شنطتي وطالعه …
زيد …. اني وصلت للحوش… سكر وتوا نتفاهمو …
وسكر زيد علي ولده … وهنا ورده قالتله …
ورده … خيره أيهم شن في ؟؟
زيد … (( سكت شوي وقاللها )) .. مافيه شي حس اني ضلمته مبكري بس ويبررلي في موقفه ..
ورده …. ااااه ياهمي اسكت ماتدكرنيش بي مبكري والله قريب طحت من طولي الله … ياقهرتي هدا الولد الا طحت بيه بدنيا يحدف في دحي هوا وياها تقول زوز سلغات يتعاركو …
زيد …. ههههههههههه ماتزيدهاش انتي زوز خوت وتعاركو عادي جدااا اعتبريهم ميرا ولار … مهم شن حالك توا بعد الجلسه صبح ؟؟
ورده ..بالله غيره موضوع .. قولي كنزي هيا خيرها خطرلها تبات الليله بس عند خالتها… شني واخده علي خاطرها ولا شني ؟؟ ..
كنزي … لا لا اعقل من هكي … بس من صبح كلمتني قالتلي الليله بنمشي نبات ليلتين تلاته عند خالتي لان الباين راجلها تزوج عليها وقاعده بروحها اليومين هما فا تبي توقف جنبها شوي ..
ورده … باهي ماتخافش امها تجي لخالتها او حد من عيله ..
زيد … قالتلي كلهم مشو لمدينتهم مافي حد في طرابلس وهيا بكرا او بعدو بتروح …
وفتحو شقه وخشو … وهنا لقو زيد علي نار يستني فيهم ..
أيهم … نبي نعرف شن صاير بزبط … ماتحسش انك كبرت موضوع شوي … كبرتها يابوي وهيا صغيره .. مافيش راجل يلز بنته في نص الليل … علي موضوع تافه
وهنا ماتحملش لهجت ايهم الا كان مستحيل يرفع عينه حتي فيه ولاارديا لقي روحه ضرب أيهم كف ريحاي … ومشي وسيبه وخش لدار …
وهنا امه قربت وقعدة تضرب فيه علي صدره وقالتله …
ورده … من توا هكي يامدهول … عليت صوتك علي بوك ياراجل … فقدت عصابك خلااااص لما مالقيتهاش … ارتحتتتتت … مالا خلي نطمنك اكتر … البنت من صبح كلمت بوها وقالتله بتبات عند خالتها يومين تغير جوي وطلعتها توا ماليهاش علاقه بموضعكم … ارتحت توا … وريني كيف بتقيم عينك في بوك ماشي …
وهنا أيهم … جاته صدمه مافاقش منها الا علي الكف الا عطتهوله امه بالجمله هيا … وحس انه فاق علي تصرفه الا ماكانش ليه الا مبرر واحد … لما الانسان يولي مش عقلاني … ومشاعره وعواطفه تقوده وتخلي ريح والموج تلطم فيه يمين ويسار معناها ماليهاش الا معني واحد … بس هل هالمعني و هالموجه هادي رح يتمسكو بيها و توصلهم لبر الامان او رح تغرقهم وتغرق السفينه بيهم … او يختار كل واحد منهم الريح الا توصله لبر امانه ويختار الاصح والمنطقي ليه بعيد عين اي مشاعر …
يتبع……..

لقراءة الجزء التالي : الجزء الثامن من رواية أنت عدوي

لقراءة الجزء السابق : الجزء السادس من رواية أنت عدوي

للإطلاع علي فهرس الأجزاء : جميع اجزاء رواية أنت عدوي للكاتبة كيندا

جميع الحقوق محفوظة للكاتبة كيندا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى