الجزء

الجزء السابع من رواية قلبي ملكي ولكن أنت من

الجزء السابع من رواية قلبي ملكي ولكن أنت من

وفي الجزء السابع ماذا ينتظر أبطالنا من مواقف جديدة مشوقة وجميلة ؟ وهل سيحدث شيء غير متوقع معهم ؟ كل هذا وأكثر سوف نعرفه سوياً في السطور التالية بإذن الله .

الجزء السابع من رواية قلبي ملكي ولكن أنت من

فتحت رساله وبدت تقري فيها … خش ليت وشاف تلفون في ايدها … وفاقرب منها بسرعه وقاللها ….
ليت … لااعتقد اني عطيتك تصريح انك تفتحي تلفوني ؟؟
وهنا ريحانا هرب الضي عليها وقالتله ..
ريحانا .. اني اسفه .. وعلي عموم ماتخافش اني مازالت مقاريتش شي ..
وحطت تلفون وخشت لدار نوم باش تلبس وشاحها ..
وهوا فتح تلفون ونصدم برساله الا كانت ريحانا فاتحتها وعلي وشك بتقراها …
واول ماقري رساله اتصل بس معتصم وطلع بسرعه من الجناح باش يتكلم معاه براحته .. واول مابدي يضبح تلفون ورد معتصم …قاله ليت…
ليت … انت بكامل قواك العقليه يامعتصم وانت تبعت في رساله هيا ؟؟
معتصم .. عادي شن مشكله ياليت .. غير خيرك تعيط انت بس .. يعني شني متلا طب زن من اول اسبوع بتفتشح تلفونك ؟؟
ليت .. ايه يا دكي .. اني طلعت ونسيت تلفوني ولما خشيت لقيتها كيف فتحت رساله وبتقراها …
معتصم .. اهم شي ماقرتهاش صح ؟؟
ليت … لو قرتها اساسا كنت ضعت … انت متوقع رح ترضي انها تكون تزوجت مني بناء علي خطه رسمتها اني وصاحبي …
معتصم … باهي ستر ربي معناها وماقرتش الرساله .. بس قولي شن درت معاها … اهم شي مادرتش العرعوري معاها .. حاول تكسبها وتخليها توقف معاك وتطلعلك من موضوع زواجكم وانت مش خاسر اي شي ..
ليت … عارف … ونحاول قدر الامكان اني نعاملها كويس ونتقرب منها .. ونفهم فيها في الوضع الا اني فيه .. بس الباين هيا مازال مش طايقه تتعامل معاي او تتكلم معاي يعني نسحب منها في الكلام سحب .. واني خايف اول مانروحو تحكي لاهلها واهلي كل شي ..
معتصم ..انتم امتي مروحين ؟؟
ليت … توا مروحين … فا بنسكر منك توا باش ماتحسش ان في شي .. .. ماشي .. هي سلام ..
معتصم .. دورني بس .. سلام
وسكر ليت تلفون ورجع للجناح … واوال ماخش لقاها تستني فيه فم الباب …
فاخدي منها شناطي وركبو لسياره بدون اي نظرات او اي كلمه بينهم … واستمر هالصمت هوا بينهم لحد ماقربو من حوشهم … ولما خلاص قريب يوصلو … شبحلها وكان بيحاول يتكلم معاها .. لكن ملامحها الحاده وعبوس وجهها خلاه يكتفي بصمت والانتظار لحد وين بيوصل بيه الموضوع … … واول ماوصلو لحوشهم خدي شناطي منها وخلها خشت هيا قبله … وهوا قعد فس سياره شوي .. لانه كان خايف لو خش معاها وشافو ملامحها هكي .. الكل رح يعرف ان في شي … فا استني خمسه دقياق وبعدين قرر يخش … واول ماخش … لقي العيله كلهم ملتمين علي ريحانا .. وريحانا مبتسمه وتهدرز عادي جداااا وكانها بني ادمه تانيه ❤ .. وكل واحد يبصر معاها بشكل والا يلوحلها كلمه بضحكه والا يتسهوك عليها .. وهيا عاديه جداااا زي ريحانا الا يعرفوها قبل … ومن الضدمه قعد واقف مبحلقلها .. ومش مصدق .. لحد ما قاطع تفكيره صوت مرة عمها وام ريحانه لما قالتله …
حميده … شن وليدي استاحشت ريحان في دقيايق هما ولا شني ههههه غير تعالي سلم علينا ياعريس بس ❤ ❤
ليت … هههههه لا لا والله
وسلم علي الكل وقعمز جنب ريحانه .. وبدو يحكو ويهدرزو … وريحانا كانت تتجنب توجه ليه كلام بشكل مباشر وفي نفس الوقت تحاول تحسس اهلها انها سعيده ومافيش اي مشاكل ❤ … وطول اليوم وهما كل واحد منهم يحاول يتظاهر ان الامور تمام وفات اليوم بسرعه لحد ماجت سهرية الليل وووالكل مجتمع ويهدرزو حناهم قالت …
حناهم وريده … اه واخيرااااا ربك بيكتبلي بحفيد مني وفيا .. يعني حفيد ومن وليداتي زوز ❤ ❤
مريم … ياررررب والله نستني امتي نشوف عويل لوليدي بريق اليابس ❤
ليت … ان شالله خير … اني بنركب حاسس نفسي تعبان .. نستادن منكم …
حناه … اي عندك الحق ياوليدي اركب ارتاح …
ليت … ههههههه ماشي خلاص وصلت توزيعه ياحناي …
وخدي بعضه ومشي .. وعيون ريحانا فيه … ووهيا في داخلها .. كانت تتمني لو كان ملكها هيا بقلبه ومشاعره وكل شي فيه … وكانت تتمني لو كانت بالفعل عايشه اللحظه هيا …
وناض ليت من دار … واول ماقدم خطوتين وقف وتلفت وقال ….
ليت .. ريحانا .. تعالي معاي شويه نبيك…
وهنا ريحانا تحمر وجهها لما الكل قعد بشيحلها وقالتله ..
ريحانا … تمام شوي ونلحقك …
ليت … تمام …
وركب ليت … وريحانا لحقاته لشقة حوش بوه الا مفروض بيقعدو فيها معاهم في غرفته لين يسافرو … واول ماوصلت لدار .. طقت طقتين وبعدين خشت عليه وقالتله …
ريحانا … في شي ؟؟
ليت … شكرا … بجد شكرا ..
ريحانا .. تمام .. اني نازاله …
ليت … خليك .. قصدي انتي عارفه هما يحسابونا عرسان جدد .. يعني مافيش وحده تسيب راجلها وتنزل تهدرز …
ريحانا … تمام … وخشت وسكرت الباب ووهيا قلبها يدق وخايفه … واول مالقاته متكي علي سرير قالتله …
ريحانه … مش رح ينفع نرقدو مع بعضنا علي نفس السرير … لهدا واحد منا رح يفرش علي الارض …
ليت … واكيد اني صح ؟؟
وهنا ليت وبرغم كم النكد الا حاسه بيه .. الا انها لقت روحها لاارديا ابتسمت لطريقة شبحاته ليها وقالتله ..
ريحانا .. الا يريحك … شوف نفسك .. تفرش هنا او في بلكونه .. هدا شي مايخصنيش …
ليت … تمام .. هوا سريري عليه زوز منادير موله …. فا ساعديني نزل الفوقي علي الارض …
وبالفعل قامو المنادر ولانه كان تقيل بلطوه بلط علي الارض وحط محده وتكي عليه ….
وريحانا خشت للحمام بدلت ولبست بيجامتها وفتحت باب البلكونه وخدت كرسي وقعمزة عليه … وقعدة تتفرج علي منظر الشارع الرئيسي من دور تالت والقمر الا كان يشع بهلال رمضان ❤
وليت كان شاد تلفونه ويقلب فيه … وفجاه طق باب الدار .. وفجاه نفتح الباب .. وهنا مالقتش روحها ريحان الا نقزت بجانب ليت وتتكي علي كتفه … واول مانفتح الباب .. سكرة الباب ملاك بسرعه وهيا تضحك وقالتلهم ..
ملاك .. متاسفه جداااا هههه ❤ ❤ باب ماكانش مسكر كويس اني طقيت الباب من هنا وهوا نفتح بروحها من هنا ..
ليت .. ولا يهمك .. خشي ❤
واول ماخشت ملاك وشافت سرير علي الارض قعدة تشبح ومش فاهمه شي … بينما ريحانا وجهها تحمر وناضت بسرعه وخدت ملاك من ايدها وطلعت … واول ماطلعت قالتلها …
ملاك … هههههههههه ماما قالتلكم بكرا صيام لو بتنزلو تاكلو شي قبل ماترقدو هههههههه
ريحانا … علاش تضحكي يامهبوله ❤ ..
ملاك … نخاف نقول نطلع متطفله ❤ بس علاش المندار في الارض ❤ ههههههه
ريحانا … مش عارفه والله خوك قرر هكي .. قالي بروده قدام الباكونه اكتر …
ملاك … هوا صح بدات ان المكيف فاسد نو هلبا … بس عقبالي يارررررب ❤ خلاص بري لراجلك .. وتوا نقوللهم يركبولكم العشي فوق .. بصراحه الاجواء رومانسيه عندكم هلبا .. احتمال نجي معاكم بعد شوي هههههه سفهني الجو بصراحه عداب تهدريزه ❤
ريحانا … مبردك هههههه لالا احني مش جعانين ورح ننو صيام علي طول … انزلي خلاص …
ملاك … اهو نزلت خدو راحتكم ❤ ❤ ❤
وخشت ريحانا … بدون اي تعليق ❤ لحد ماقاللها ليت …
ليت … والله سؤال بري ممكن ؟؟؟
ريحانا .. اها ؟؟
ليت … شن نوع البرفيوم الا بخاتيه ❤ ريحانا … << بوجه معصب >> … هوا انت مش مرتبط ؟؟ فاشن هامك في برفاني ؟؟
ليت … اني نسال فيك بحكم احنا اصدقاء يعني …
ريحانا … اااااااااه … اسم برفاني ليلتك سوده ارتحت ؟؟
ليت … هههههههههه ❤ بصراحه عجبني …
وناض ولحقها وقاللها ….
ليت … لامتي يتقعدي تعاملي فيا هكي ؟؟ اني مش كارهك لانك نحطيتي في وضع هوا زيني … وانتي نفس الشي … فاخلينا اقلها نتعاملو كااصدقاء تمام ؟؟
ريحانا .. ان شالله خير …………
ورجعت فتحت كتابها تقرا فيه …
ليت … شن تقري ؟؟
ريحانا … روايه بوليسيه للكاتبه اجاتا كريستي …
ليت … تعرفي شي .. اني هالكاتبه مافيش ولا روايه ماقريتهاش ليها .. بالفعل مبدعه .. تحس انك معاهم في قصه …
ريحانا … اي ويقولو ان الكتب الا مش معربه فيها نكهه احلي وادق من المعربه …
ليت .. اكيد انتي عندك شك .. اصلا اي كتاب يتعرب يفقد الكتير من الاتاره الا فيه .. بس تعرفي شي .. عندي روايه ليها بالانجلش والله ممكن قاعده في دار لو حابه تقريها .. تقريبا اسمها تما لم يبقي احد … لو حابه تستعيرها …
ريحانا … لا لا ماتعبش نفسك .. لاني مش شاطره هلبا في الانجلش لدرجة نقرا كتاب …
ليت … لو حابه عادي نقرالك منها كل يوم جزء …
ريحانا .. لا لا مافيش داعي تعب نفسك … وناضت من كرسيها … وخشت للحمام … وفي اللحظه الا خشت فيها للحمام .. حست انها ردت عليه بطريقه مش حلوه .. وماكانش في داعي انها ترد عليه بشكل هوا وتنوض وانها ماتربتش تكلم شخص هكي مهما كان هوا شني او ادها في شي … ولهدا قررت تطلع من الحمام وتعتدرله .. ولكن في اللحظه الا طلعت فيها من الحمام .. كان هوا شاد تلفون وماحسش بيها … فا قعدة واقفه تسمع فيه وهوا يقول …
ليت .. اي حبيبتي ❤ … هانت … خلاص … اي اهلي مرحبين بالفكره جداااا .. وهيا مسألة وقت بس وبعدها نرجع غادي ونتزجو طول ونديرو المشروع الا حلما بيه طول الوقت … اي خلاص .. حتي اني .. نحبك .. ردي بالك علي روحك ❤ .. باي ❤ ❤
وهيا هنا رجعت للحمام بسرعه قبل مايحس انها شافاته … وقعمزة علي حاشية البانيو وقعدة تبكي بحرقه علي نار الا ركبت فيها اول ماسمعت الكلام الا كان يقول فيها .. والا كانت تتمني تسمعه ليها وبس …
واول ماطلعت من الحمام بعد ماغسلت وجهها كويس باش ماتبانش انها باكيه … فتحت الباب وطلعت … وخشت لسرير طول …
واول ماتكت علي سريرها … وسرحت في افكارها … وفجأه حست بمشاعر غريبه … وافكار مجنونه … فابدت تحكي مع نفسها وقالت …
ريحانا .. مستحيل … علاش مستحيل .. مرات نقدر … نخليه يحبني ومايبعدش عليا … بس في حد مالك قلبه غيري …
لا تقدري وحتي لو ماقدرتيش تبدي اقلها حاولتي … ماتخليشي يضيع منك وانتي تتفرجي … وبعدين هدا راجلك .. شن بيجامات هما الا لابستيهم .. انتي صدقتي انه خوك ؟؟؟ هدا راجلك .. وحبيبك .. ماتخليشي يضيع منك …
وبين كل هالمجادلات بين عقلها وكرامتها وقلبها … حست ريحانا ان كلام قلبها وعقلها حاسه معاه براحه اكتر … وقررت انها تجرب … لعلها تقدر وماتخليش الشخص الا حباته يضيع منها بساهل …
ومع هالافكار الا كان فيها شوية امل تسلل لقلب ريحانا .. واخيرا زارها نوم ورقدة .. ومافاقتش الا علي صوت منبه الا كانت معدلاته قبل الفجر بربع ساعه … وهنا ناضت .. خشت للحمام وتوضت ولبست عباية الصلاه وجت جنب ليت وقالتله ….
ريحانا … ليت .. ليت .. لو حاب تنوض تشرب الفجر قريب يأدن …
ليت … اه اي .. تمام صحيتي ❤
ومدتله طاسة الميه ومشت تصلي .. بينما هوا ناض للحمام ودار دوش علي سريع وطلع … وقعمز بجانبها وقاللها …
ليت … تقبل الله ❤
ريحانا … مني ومنك صالح الاعمال …
وبعدين سكتت شوي وقالتله …
ريحانا … ممكن نسالك سؤال … انت كيف تعامل فيا كويس هكي وكان اني مش سبب تفركيشة حياتك لما اهلك غصبوك تتزوجني ؟؟
ليت … ببساطه لانك انتي ماليكش علاقه واني متاكد انهم وصلولك اني نبيك صح ؟؟
ريحانا .. ايه … ولهدا اني وافقت ..
ليت … عارف .. لهدا انتي ماليكش دنب ومش رح نحملك فوق طاقتك … ولانك انتي بنت عمي .. وكنتي زي اختي ❤
ريحانا … كنت ؟؟ هههه
ليت … حاليا زوجه مع وقف تنفيد ❤
ريحانا … اني مستغربه علي كم الهم الا عندك ومشاكل الا انك تضحك وتبصر وتحكي وكأن مافي شي … كيف عندك القدره هكي ؟؟؟
ليت … نفس القدره الا عندك انتي لما حطيتي الوجه الخشب في سياره وحطيتي وجه الجوكر في وسط اهلنا ههههههه .
ريحانا … اني مضطره نمتل …. بس انت مش مضطر تمتل …
ليت … ومن قالك اني نمتل … انب بس مخليها علي ربي … ومش عارف برغم كم المصائب الا اني حاسه براحه في وسط الكومه هيا ..
ريحانا … تمام .. تصبح علي خير … << مع عطسه من ريحانا >>
ليت .. ليلتك سعيده ❤ ❤ .. كاني من بكري نسمع فيك تعطشي …
وقرب منها وحط ايده علي جبهتها … واول مامسها لقاها حراره …
ليت …. اعتقد عندك نزلت برد ياريحانا … خليني نعطيك خافظ حراره …
ريحانا لا لا مافيش داعي توا تطلع وتزعج حد … مافي شي .. شوية حراره وتمشي …
ليت … علاش تحبي تسكري دماغك انتي ؟؟ خليني نطلع نشوفلك خافظ حراره في اقرب صيدليه ونجي ..
ريحانا .. لا ارجوك خليني براحتي .. تصبح علي خير …
ورقدة ريحانا بعد ماخشت تحت اليرغان كلها … وبعد اقل من ساعتين … ناض ليت علي صوت ريحانا تهتري في دوا وكلام … وهنا ناض بسرعه وقعمز جنبها وقاللها …
ليت .. ريحانا … فيقي ريحانا …
ولكن ريحانا كانت مازالت في اللا وعي وقعدة تقول …
ريحانا … ملاك .. ملاك ماتقوليش لليت شي .. ماتقوليلاش اني نحبه باهي .. احن خوت خوت بس …
وهنا ليت قعد مصدوم وهوا يسمعلها … وهيا تهلوس وتحكي بااسمه بس … وهنا ناض بسرعه .. وجاب عباية صلاه ولبسهالها وخداها في غمره ونزل بيها بسرعه للمصحه …. وولع سياره وطلع … وفجاه مالقاش نفسه الا قدام العياده … وخش بسرعه ودخلها … وخدوها منه وهوا قعمز في كراسي الانتظار وهوا يفكر فيها وفي كلامها … وحاس نار شعلت في قلبها كل ماتتردد نفس الكلمه الا كانت تقول فيها في داخله … وفاتت دقايق ورا دقايق وليت ولاول مره يحس بيهم كانهم سنه لحد ماطلع دكتور وقاله …
دكتور … نزلة برد قويه والحمد لله عطيناها خافظ حراره ونزلت حرارتها … ولكن وبصدفه واحنا نديرولها في تحاليل ..هنا قطع عليه ليت بسرعه وقاله …
ليت … احكي طول .. شن في دكتور ؟؟؟
يتبع……..

لقراءة الجزء التالي : الجزء الثامن من رواية قلبي ملكي ولكن أنت من

لقراءة الجزء السابق : الجزء السادس من رواية قلبي ملكي ولكن أنت من

للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا

جميع الحقوق محفوظة للكاتبة كيندا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى