وفي الجزء الثامن يا تري برأيك ماذا ينتظرنا من أحداث جميلة فيه ورائعة ومدهشة ؟ وهل سيكون هناك مفاجآة حلوة فيه ؟ كل هذا وأكثر سوف نعرفه في السطور التالية بإذن الله .
الجزء الثامن من رواية قلبي ملكي ولكن أنت من
دكتور … نزلة برد قويه والحمد لله عطيناها خافظ حراره ونزلت حرارتها … ولكن وبصدفه واحنا نديرولها في تحاليل وكشوفات ..هنا قطع عليه ليت بسرعه وقال …
ليت … احكي طول .. شن في دكتور ؟
دكتور … ماتخافش مافيش حاجه كبيره بس ضغطها وسكرها هابطين جدااا … والواضح ان مرضها نتيجة لضعف مناعتها بسبب قلة اكلها المده الاخيره علي حسب مافهمت منها فاياريت تهتمو بصحتها شوي .. وتبعدوها علي اي ضغوطات لان الباين هيا من ناس الا نفسيتها تاتر جدااا علي مناعتها وصحتها …
ليت … … والله يادكتور احنا عرسان جدد بس برغم هدا لاحظت ان في الايام الا تزوجنا فيها شبه ماتاكلش … ولكن بعون الله من اليوم رح يتغير كل شي …
دكتور … البرده الا مخصلتها قويه جدااا لهدا ياريت تلتزم بالمضاد وكل والخافظ ولو في شي هدا رقمي وتقدر ترجعلي..
دكتور ويفضل تقعد هنا في عياده لان بردتها هيا تاتر علي شهيتها وتفقدها فالازم من التغديه باش ضغطها وسكرها يتعدل شوي ..
ليت … ماتخافش دكتور اني دكتور وبعون الله رح نركبلها تغديه وندير تشيك اب علي ضغطها وسكرها ونعطيها ادويتها …
دكتور … تمام معناها ساعه تانيه ام شكارة تغديه الا طلبت يركبهولها وتقدر تروح بيها …
ليت … تمام …
وهنا مشي دكتور … وهوا خش لريحانا … فالقاها فايقه … واول ماشبحتله قالتله …
ريحانا … قوللهم ينحوها من ايدي مانحبهاش .
ليت … اسمعي ياسرك من دلع زايد … هادي بتقعد وبنركبلك زيها في حوش وبنوكلك غصبن عنك …
ريحانا … قصدك انتم فطرتوني في رمضان ؟ علاش هكي ياليت …
ليت … يابنتي كنتي حرارتك قريب 41 يعني بتخشي في صدمه … كان لازم من خافظ ينعطي في الوريد باش تنزل الحراره … وبتاخدي زيها في حوش لو قعدة حرارتك هكي …
ريحانا … (( بعصبيه ))هوا انت علاش محسسني انك تخاف عليا وكاني شي يخصك .
ليت … اكيد … انتي زي اختي … واني ولد عمك يعني كيف تبيني مانخافش عليك … يعني وائل خوك لو كان مكاني رح يسيبك …
ريحانا …. (( بااستفزاز )) اي اكييد انت زي اختي يخي مش حتي خوي .
ليت …. اختتتتك ؟ قوليلي زي امك وخلاص انتي … قسما بالله طاح القدر خلاص … بس تعرفي شي يابنت … اني خاسره اني عرفتك توا بس …
ريحانا … علاش ؟
ليت … مش عارف علاش حاس اني نرتاح لما نحكي معاك … بعكس اول يوم شفتك فيه … ماكنتش متوقع اني اصلا نقدر نبص في وجهك ..
ريحانا … شن تقصد ؟
ليت … مانكدبش عليك .. كنت في الاول متوقع انك متفاهمه مع اهلي باش نتزوجك وهكي وكرهتك … لحد ماهدرزة اني واختي قبل ليلة دخولنا … وحكتلي ان اهلي قالولك ان اني الا نبيك وهكي … لا والكارته ملاك تحسابنه صح …
ريحانا …. كارته ؟ هوا زواجك مني اصبح كارته ؟
ليت … بالعكس تصوري شي … اني اكتشفت في الاسبوع هوا بس كأني نعرفك من قبل … ومرتاح جدااا واني معاك …
ريحانا … اكيييد .. زي ملاك ..
ليت … صح جبتي فيها …
ريحانا … تمام يعطيك صحه … باهي اني ضغطي هابط صح ؟ معناها ياريت نرتاح شوي ممكن …
ليت … توزعي فيا … اسف جدددا اني بنقعد وبنرقب تغديه بس فاارتاحي …
ريحانا …
وسكتت ريحانا … وليت ساكت وهوا يشبحلها بصمت وبس … لحد مانطقت ريحانا وقالتله …
ريحانا … تحبها انت ؟
ليت … من هيا ؟
ريحانا … حبيبتك … الا كلماتك …
وهنا سكت ليت وهوا يشبحلها وقاللها ..
ليت … ايه …
ريحانا … احكيلي عليها …
اهنا سرح وتدكر كلامها لما تلهوس بااسمه وبااعترفها انه تحبه وبعدين قاللها …
ليت … مافيش داعي مش مهم ..
ريحانا … علاش بالعكس اني حابه نعرف كل شي يخصها … اقلها بصفتي زي اختك يعني حابه نطمن علي ولد عمي ههههه يالله احكيلي اسمها وكيف تعرفتو علي بعض وكيف حبيتها …
وهنا كانت ريحانا تحاول تضحك بس واضح من عيونها انها متألمه … وحتي لما سألاته فكانت غريزه انتاويه زي اي غريزة اي بنت تحاول تعرف هوا البنت هيا الا يحبها … شن فيها وماعنديش اني … شن الا يميزها عليا …
وهنا رد عليها ليت وقاللها …
ليت … اسمها لارا … كيف عرفتها اني اول مامشيت لهولندا ماسكنتش بروحي … سكنت مع عزوزه كانت تأجر لطلبه وبحكم انها كانت قريبه من الجامعه الا كنت اني نقرا فيها فا اجرت عندها غرفه … ولارا كانت مأجره غرفه عند نفس السيده هيا وبصدفه كنا نقرو في نفس الجامعه واني وياها نفس التخصص والصف …
ريحانا …. الله شن صدفه الحلوه هيا ..
ليت … اي وهدا الا شدنا لبعض … كنا في الاول مجرد زملاء بس ونقرو مع بعضنا بعد مانروحو … ولكن يوم علي يوم كنا نتقربو من بعض اكتر وكنا تقريبا الوقت كله مقضينه مع بعض سواء في جامعه او بعد الجامعه ونقرو مع بعض … وهكي يوم علي يوم تحولت علاقتنا من صداقه الا حب وقررنا نتزجو اول مانكملو ماستر … ووهيا بحكم بوها كان مدير مستشفي كبير في هولندا كنا متفاهمين ان بوي بيعطيني مبلغ بعد تخصص ياخدلي شقه محترمه في هولندا … وهيا بتحاول تكلم بوها يخلينا نوقعو عقد في داخل المستشفي عنده ونتزوجو ونستقر غادي … وبالفعل تخرجت وكنت مروح يعني شهر وراجع باش نتزوج لارا … ولكن صار الا صار …
ريحانا … (( مع تنهيده )) اني مش عارفه نلوم مني في الوضع الا احنا فيه … ولا عارفه نعزي نفسي او نلوم عليك او نلوم نفسي ..
ليت … ماتحمليش نفسك اكتر من طاقتها … اني في الاول لمت ظروف الا خلت بوي يساومني ولمت نفسي لاني خليتهم ينفدو كلامهم بدون ما ناخد موقف صارم … ولكن بعدين اقتنعت ان ربك اكيد حطني في تجربه هيا لسبب يعلمه هوا اكييد ..
وبعد هالكلمه ساد الصمت بينهم وبعدين قاللها …
ليت … هوا انتي كان في حد في حياتك قبل مانخش لحياتك …
ريحانا … لا …
ليت … متأكده ؟
ريحانا … اني مش مضطره نكدب عليك …
وهنا تدكر كلام اخته الا قاطعها عليه تلفون يومها … وبعدين تدكر كلام ريحانا وهيا تهلوس بااسمه وانها تحبه واكتفي بصمت للنه مش حاب يعرف ويتورط في الدنب اكتر واكتفي بااجابتها …. وساد صمت بينهم لحد ماخش دكتور للغرفه وقال …
دكتور … شني ريحانا توا حاسه روحك افضل ؟
ريحانا … الحمد لله دكتور افضل بهلبااا … نقدر نروح توا لاني قلقت …
دكتور … اي بس ياريت تلتزمي باادويتك …
ليت … من غير ماتوصي … رح نوقف علي راسها في الاكل والادويه …
دكتور … وياريت ماتصيميش لين تاخدي كورس مضادك في وقته وتستمري علي خوافظ لو ارتفعت الحراره تانيه وتغديه يفضل اليوم وبكرا تخليها لين يتعدل سكرك وضغطك وتحافظي علي اكلك … وتوا تقدرو تطلعو اكيد ..
ليت … صحيت دكتور بارك الله فيك …
وشد ريحانا من ايدها باش ينوضها … ولكن اول ماناضت لفت بيها دنيا وحست بدوخه تاني اختل بيها توازنها … فاخدها ليت في غمره وهيا تعيط وتقوله …
ريحانا … نزززلني … ناس يتفرجو علينا ياليت نززززلني …
ليت … تي انتي مش قادره توقفي ولسانك اطول منك ومازال يقاوم … اسكتي لين نوصلو لسياره وماعندناش عند ناس شي …
ريحانا …. انت مجنون اقسم بالله … شكلك تاترة بالاجانب هلبااا ومافيش حشم …
ليت … انتي داعشيه يابنت … تي محسستيني اني اشبح شن درت اني .. اسكتي خلاص وصلنا ها اركبي سياره درتي العار يحسابوني ناس خاطفك ااااص ..
ريحانا … انفلقت بضحك من ملامحه هههههههههه .
ليت … تضحكي والله جبتلي شبهه ويحسابوني خاطفك ههههه ومشكله مع طولك هوا يحسابوك طفله قاصر … اطولي شويه يافرخه
ريحانا … اني مش فرخه معاش تقولهالي … ومش دنبي لو اني قصيره …
ليت … كولي كولي بالك تكبري شوي هههههههه .
وهنا فنصت فيه بجديه وقالتله …
ريحانا …. معلش تتكلم معاي هكي .. اني مش فرخه ولا قاصر .. ولا اختك تمااااااااام اني بنت عمك وبس وياريت معاش ضحك لانه يستفز فيا
ليت …. هههههههههههههههههههههه تمام .
ووقعدة ريحانا ساكته طول الطريق لان حست ليت متهزي عليها ويعتبر فيها عيل … ومستنقص منها وهدا شي عفلقها هلبااا لهدا خدت موقف معاه وقعدة ساكته طول طريق … لحد ماوصلو … وحتي لما حاول يساعدها قالتله …
ريحانا … مش محتاجه مساعده من حد .. نقدر نمشي بروحي مانشليتش … ودفت ايده وركبت بروحها … وكانت وقتها ساعه 4 عشيه قريب … فااول ماوصلو لشقه فوق لقي امه وبوه كيف بيطلعو … فا امه اول ماشافاته قالتله …
مريم … وينكم ؟ تلفوناتكم في الحوش وطالعين …
ليت … ريحانا تعبت شوي ورفعتها للمستشفي ..
مريم … الف لاباس علي بنيتي … احنا كيف كنا طالعين لان كنا بنفطرو عند امك بس مادمك مريضه خلاص خلينا مافيش داعي …
ريحانا … لا لا مافيش داعي مرة عمي والله اني كويسه توا برو وماتدورنيش رح نولي احسن ..
مريم … باهي تعالي معانا هيا اصلا امك تدور فيك من صبح …
ليت … لا لا خلوها ريحانا معاي وانتم برو … لازم ترتاح في غرفتنا وتاخد ادويتها …
امه … باهي شن بتفطرو هنا بروحكم قصدي العماره حتي سهيله وحناك فاطره معانا عند حميده …
ليت … خلاص يما بري وماتخمميش فينا اني نحلها … خلاص بري سلاااام …
مريم … خلاص في اي شي كلمني تمام ؟
ليت …. تمام
وطلعت امه وسكر الباب وراها وخشت ريحانا لدار نوم واتكت علي سريرها للنها حست روحها فاشله … فا اول ماقعمز علي حاشية سرير حط ايده علي جبهتها وبعدين شد معصم يدها وبعدين مشي لدولابه وطلع جهاز ضغط الا كانو عنده من ايام كان طالب في سنه خامسه بشري … وقاسلها ضغطها وبعدين قاللها … لازم تاكلي والله مافيها كيف … وجي وقت مضادك … نمشي نوتيلك اكلك …
ريحانا … لا لا خليك انت صايم واكيد تعبان … رح نمشي بروحي وناخد شي …
ليت … (( بوجه متعصب علي اساس )) … هوا اني لين نعيط يابنت باش تهدي .. قعمزي في مكانك وارقدي علي مرضك … نطلع شوي ونجي ماتنوضيش …
وطلع وهيا تشبحله وعيونها ملينات بدموع … لانها بجد ماتتمناش يعاملها هكي … تتمني يكون ندل وعصبي وحقير وكل العيوب فيه .. تبي تكرهه وتكون اكتر منه تبي طلاق … بس مع كل ساعه تكون فيها معاه تحس انها تغرق في حبه وحنيته وخفت دمه اكتر … والا يعدب اكتر … انك لما تغرق اكتر في شي انت عارف نهايته شني ..
ومافاتتش عشره دقايق لقاته خاشلها بصفره فيها بان كيك بالعسل وطاسة عصير برتقال … وحطهم عليها وقاللها …
ليت … (( بوجه مبتسم )) شن رايك شيف ولا لا ؟ اني مش عارف شن خلاني نقرا طب .. الله يسامح الا ورطني في طب بس .. كان هدا راني توا نطهبج وبمطبخي وماحد يمن عليا بشي …
ريحانا … ولا يغصبك تتزوج مني ؟
وهنا حاول ليت يغير موضوع وقاللها … تعرفي لو كملتي اكلك هوا … عندي روايه انجليزيه ابداع … رح نقرالك منها شن رايك … في رشوه اكتر من هكي هههه
ريحانا … شديتني من ايدي الا توجعني للاني محتاجه اني نسمع بس لنت اقري وقولي خلاصة صفحه شن رايك …
ليت …. ههههههههه ماشي غير كولي هي ….
ريحانا … تعرف شي (( نظرة حب )) تدكر فيا بشخصيه كنت نحبها من أيام طفوله …
ليت … من هيا ؟
ريحانا …. اب فلونه في رسوم فلونه 
لطالما كان الشخص متالي في نظري من ايام طفوله … ومن اني صغيره كانو كل الاطفال يتفرجو علي رسوم فلونه علي مغامرات فلونه … بس اني كان بوها وطريقة حنيته ومعاملته لعيلته وخوفه عليهم كانت مخليتني نحب نتفرج علي فلونه بااستمرار وبدون ملل .
لطالما كان الشخص متالي في نظري من ايام طفوله … ومن اني صغيره كانو كل الاطفال يتفرجو علي رسوم فلونه علي مغامرات فلونه … بس اني كان بوها وطريقة حنيته ومعاملته لعيلته وخوفه عليهم كانت مخليتني نحب نتفرج علي فلونه بااستمرار وبدون ملل .وهنا اسكت ليت شوي وبعدين قاللها …
ليت … واهو تحقق حلمك وتدبستي في دكتور .
.ريحانا … (( بوجه مرتبك )). لا مانقصدش هكي انت فهمتني غلط … اني بس .
وهنا ليت حط ايده علي فمها وقاللها …
ليت … انتي مش محتاجه تقولي شي ..اني فاهم كل شي … (( مع غمزة عين وضحكه )) .
ريحانا … (( بوجه متعصب )). لا ماتعرف شي … وبعدين انت علاش تتصرف معاي هكي انت كيف تفكر … انت الا يشوفك كيف تعامل فيا هكي توا مايقولش انت نفسك اول يوم لينا مع بعض … انت علاش تحاول تتقرب مني وتعرف عليا كل شي علاش تخاول تلعب معاي جميع الادوار طالما انت في الاخير ضيف شرف وماليكش مكان هني … انت مش فاهم شي ولا رح تفهم شي …
ليت …. (( سكت شوي وبعدين قاللها … علاش تتكلمي هكي ريحانا )) ..
وهنا ريحانا جن جنونها ولوحت صفره علي طول ايدها وناضت وقالتله بعد ماتفجرت بدموع …
ريحانا …. قولتلي تعرف … شن تعرف انت عليا … تعرف ان شخص الا حبيته طول عمري وحلمت بيه يعتبر فيا اخته .. تعرف شن معني انك تحب شخص وتكون قريب منه ومش قادر حتي تحس انه ليك وملكلك برغم انه معاك … تعرف شن معني انك تبي تكرهه لكن هوا يخلي فيك تغرق وتحبه اكتر … وكل يوم تحبه اكتر وكل يوم تغرق اكتر وكل يوم العد تنازالي لوجوده معاك يتحرك بدون توقف …. وبعد هدا كله تقولي نعرف … اني مش مظطره اني نتكلم اكتر بس ارجوك .. ماتحاولش تقرب مني اكتر ارجوووك ..
وفجأه فاقت ريحانا من سرحاناها علي صوت ليت يقوللها …
ليت … ريحانا وين سرحتي … كملي اكلك موعد مضادك تاخرتي عليه ..
ريحانا … (( مع تنهيده )) تمام …
وبدات تاكل بتنبيش وهوا يغصب عليها وبعد دعاك كلت فام وبعدها خدت مضاد وقالتله ..
ريحانا ّ.. شن اسم القصه ؟
ليت … اسمها حب مع النجوم …
هاتي صفره منك … وهيا نبدو فيها …
وحط صفره علي جنب وبدي يقرالها فيه ويترجم وهيا تشبحله ومنسجمعه معاه ومركزه مع كل حرف ينطقه ومع كل حركه بعيونه او شفايفه او حتي ابتساماته وغمزاته وهوا منسجم في شرح …. ومافاقتش من انسجامها معه الا علي جمله منه …
ليت … يعني من الاخير كان يحب وحده او كان معتقد انه يحبها … وتحدي دنيا كلها علي خاطرها وكان الا ليه كله ملكها … وتحدي اهله علي خاطرها …. وتوا وتوا هكي بيخش في تفاصيل حبهم لبعض من اول يوم تعرف فيه عليها …
واستمر ليت في سرد القصه وهيا منسجمه معاه اكتر وبدو كل واحد متهم يعطي رايه ويتناقش مع تاني فيراي جمله يتوقفو عليها … لحد ماادن المغرب … وهنا ريحانا قالتله …
ريحانا …. ادن مغرب وماعندكش شي تفطره … متأسفه جدا بسببي قعدة بدون فطور …
ليت … ولا يهمك … نوضي انتي توضي وصلي … واني رح نطلع حاجات خفيفه من تلاجه وناكلو مع بعض ..
ريحانا … ماتبيش تصلي معاي ؟
ليت …. ااااااه ادعيلي ربي يهديني ونرجع نصلي بس …
ريحانا … بس ريك مايغيرش بقوم الا لو هما غيرو من انقسهم …
ليت …. اااااه واني ماقدرتش نغير من نفسي …
ريحانا … انت شايف انك عندك هلبا غلطات في حياتك مش راضي عليها ؟
ليت … اكييييد وهيا هادي الا مخليتني مش مرتاح في حياتي … وولطالما كنت ندعي اني نحصل بنت نحبها تقربني من ربي اكتر وتخليني نبعد علي دخان وشرب ونصلي …
ريحانا … انت تشرب قصدك ؟
ليت … مش ادمان لكن مره مره مع صحابي لما نسهرو ايه ناخد معاهم …
وهنا ابتسمت ريحانا باابتسامة استهزاء فا قاللها …
ليت … علاش ابتسمتي هكي ؟
ريحانا … تصور اني عمري ماتوقعت اني نتزوج راجل حتي يدخن بس … وعلي قد العرسان الا تقدمولي كنت نرفض بس اول مانعرف انه كانت عنده علاقه قبلي او يدخن او ياخد في اي شي … تصور اني احد العرسان الا رفضتهم لانه مكانش يصلي …
ليت … وشوفي نهايتك سوده وين حطاتك مع افسق راجل في دنيا هيا ههههه نصيبك اسود يصراحه … بس ربي رح يرحمك منه بعد شهر وان شالله تحصلي الشخص الافضل مني والا يستهالك لانك بجد جوهره وماتستهليش اي حد …
بس ريحانا تنهدة واكتفت انها تقوله ..
ريحانا … ويرزقك انت ببنت الحلال الا ترتاح معاها … بنخش نتوضي ونصلي اني …
وناضت ريحانا وغيونها ملينات بالحزن وكسرة القلب … وخشت للحمام توضت وبعدين لبست عباية صلاه وسجدة لربها وهيا تدعي وتبكي … ان لو كان فيه خير لحياته يقرب منها ويزرع حبها في قلبه ويكون من نصيبها يارب ويهديه … لانها لا حبت ولا رح تحب حد غيره ….
وفاتت ساعات بسرعه وليت كان طول الليل معاها يقيس في حرارتها وضغطها … ولما ترقد يقعمز في الكرسي الهزاز بجانبها ويقرا … واول ماتفيق يكملو وين وصلو في روايه … لحد مانعسهم نوم مع بعض ومافاقوش الا عليرصوت الباب يطق …
وهنا فاق ليت وقال …
ليت … لحظه بس … وحوس جيهة سرير الا بجانب ريحانا وبعدين مشي للباب فتحه فالقي امه واقفه وقالتله …
امه … امس بتنا في حوش عمك عبد السلام والله كرش فينا بعد السحور وقال شن مازال علي صبح … واول ماروحنا ظهر طقيت عليكم باش نطمن علي ريحانه بس باين كنتم راقدين مازال …
ليت … علاش ساعه كم توا ؟
مريم … توا ساعه 4 عصر وبصراحه قلبي عصرني علي ريحانه قولت خلي نركب نطمن عليها … وجدك وحناك يسألو عليكم ..
ليت … امس سهرنا ورقدنا بعد الفجر فامحسيناش بروحنا لتوا والله … هي شوي وننزل بس ريحانه تعبانه شوي مش ظروري تنزل ..
وهنا ناضت ريحانا وقالت …
ريحانا … ماما … الحمد لله اني احسن اليوم واهو شوي وننزل …
وهنا خشت مريم وقالتلها ..
مريم … الف لاباس عليك بنيتي كيف صار فيك هكي ؟
ريحانا … مش عارفه والله ممكن الاوتيل كان جناحنا عالي هلبااا وبلكونه علي البحر فاممكن من نسمة الليل كليته بس
مريم … الف لاباس عليك بنيتي .. كانا تعبانه خليك وارتاحي ..
ريحانا … لا لا قلقت خليني ننزل معاكم حتي نحسه رمضان ونساعدكم …
مريم … الا يريحك بنيتي خلاص معناها نستنو فيكم لوطه ..
ليت … تمام …
ونزلت امه وليت رجع لدار وقاللها …
ليت … مافيش داعي تنزلي …
ريحانا … لا لا خليني ننزل قلقت واستاحشت العيله ..
ليت … تمام معناها اني نازال ونخليك تبدلي براحتك
ريحانا … تمام ..
ونزل ليت وقعمز مع جدها وعمه وبوه … وريحانا لبست ونزلت لوطه وخشت للمطبخ معاهم …
ريحانا … في شي نديره معاكم ؟
ملاك … لا لا ارتاحي انتي حبيبتي سمعت انك تعبانه … الف لاباس عليك ..
ريحانا … برده خفيفه غير ليت تعرفيه يبالغ ..
ملاك … دكاتره كلهم يحبو يبالغو يحسسوك فيك مرض خطير …
ريحانا …. اي والله وطلب يديرولي تحاليل ودوشه لين خفت اني ههههه هاتي نلف منك ظولمه عاد مانحبش نقعد واقفه …
ملاك … خلاص ماما معناها انتي ساعدي مرة عمي سهيله فوق في الحلو وشربه واني وريحانا توا نكملو بيتزا ومحشي ونقلو مبطن والبوريك ..
مريم … تمام غير بطلو تلكليك وقت علي مغرب … اني عارفتكم لما تتلاقو …
ريحانا …. ولا يهمك مرة عمي
مريم …. قوتلك قوليلي ماما اني زيك زي ملاك توا بديتو واحد .
ريحانا … حاضر ههههههه
واول ماطلعت مريم .نطت ملاك في اللحظه الا طلعت امها فيها وقالتلها …
ملاك … احكيلي شن جوك انتي وليتوووو بليززززز احكييييييي
ريحانا …. تحشمي علي وجهك شن تقولي انتي …
ملاك …. هيا هيا … والله نمشيله هوا راهو هههههه. باهي قوليلي شن اول ماروحتو مع بعض …
وفي اللحظه الا كانت تسأل ملاك فيها ريحانه كان ليت خاش للمطبخ باش يعطي لريحانا دواء ولكن وقفه الحديت الا كان بينهم والا كانت فيه ملاك تقول …
ملاك … خيرك بديتي كزمه … قوليلي باهي حاسه نفسك تحبيه اكتر توا بعد ماقربتي منه في الايامات هوا اكتر ؟
ريحانا …. وهنا ريحانه قامت عينها في عين ملاك وتحاول تبتسم وماتحسسهاش بشي … ولكن فجأه طاح من ايدها موس وانهارات بالبكي …
ملاك … حبيبتي خيرك تبكي شن في احكي شن فيييي خوفتيني ؟
ريحانا …. اني نحبه ياملاك … نحبه ومانقدرش نعيش من غيره يوم … هوا الهواء الاونتنفس فيه ….
ملاك … باهي وشن مشكله اك تزوجتيه توا ومعاك … من بيخطفه منك يعني …
ريحانا … عارفه عارفه بس بس …
وبعدين اترردت وخفت تقول لملاك وملاك تمشي تحكي لاهله وتسببله مشاكل وتسبب لنفسها مشاكل مع اهلها … فاقالتلها …
ريحانا …. لا لا مافي شي خلاص اني بديت حساسه بس .
ملاك … خلاص حبيبتي معاش تبكي وربي يدومكم لبعض يارررب .
وهنا وخر ليت بسرعه بعد مانقر حواجبه ببعض وطلع بسرعه وسيب الحوش …. وركب سيارته ولبس نظارته شمسيه وولع سيارته بسرعه وطلع وهوا معصب…
بينما ريحانا مسحت دموعها ورجعت تطيب عادي وحاولت ترخي روحها وكان مافي شي … لحد ماقالتلها ملاك ..
ملاك …. خزي عليك والله طيحتلي قلبي … متاكده مافي شي بينكم ؟
ريحانا …. لا لا حبيبتي ماتخافيش ليت مخليني اسعد انسانه في دنيا … حي تصوري هدا وقت دوا متعي .. غريبه ليت كيف ماجاش عطاهولي وهوا مداير فيها دكتور عليا …. خلي نركب ناخده ونجيك …
وطلعت ريحانه دور في ليت بعيونها وبعدين ركبت فوق مالقتاش … ولا لقت الدوا … فاخدت تلفونها وقعدة تتصل بيه باش تساله وين حط الدوا … بس هوا ماباش يرد عليها برغم انها اتصلت بيه اكتر من عشره مرات …. ولما ماباش يرد لوحت تلفون وقالت ….
ريحانا …. مابيتش ترد … وبعدين تعالي قولي كيف ماخديتيش دوااااك اااااه انت تكلم بس ….
ونزلت ورجعت للمطبخ تطيب وقلبها مع ليت لانه اختفي بدون مايقوللها اي. شي …. وفاتت ساعه ورا ساعه لحد ماقرب المغرب وهنا مريم قالت لنلاك وريحانا …
مريم …. ملاك حطي حتي لقمة قاضي وحطي تمر المحشي بالشاميه ماتنسيشي ليت يحبه ..
ملاك … حاضر ماما …
سهيله …. ريحانا مغرب بيدن شوفي راجلك وين .
ريحانا …. نتصل بيه مايردش مانعرفش خيره …
مريم … ريحانا حطي فنجاين شربه هنا وعاوديله من تلفوني ترا …
ريحانا … حاضر ماما … وفي داخلها … يعني ماردش من تلفوني بيرد من تلفونك ياماما ….
ولكن خدت تلفون مرة عمها وبالفعل اتصلت بيه … وضبح المره الاوله … والمره التانيه …. وتالته نفتح الخط وقال …
ليت …. أيوا ؟
وهنا ريحانا انصدمت ومعاش عرفت ترد او تسكت ووصلتها رساله وبعدين …
يتبع……..
لقراءة الجزء التالي : الجزء التاسع من رواية قلبي ملكي ولكن أنت من
لقراءة الجزء السابق : الجزء السابع من رواية قلبي ملكي ولكن أنت من
للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا
جميع الحقوق محفوظة للكاتبة كيندا .
