وفي الجزء السابع هل برأيك سيكون هناك موقف غريب في الأحداث التي تجري داخل طيات الرواية ؟ أم ان الامور طبيعية تماماً ولا يوجد اي شكوك في الأمر ، كل ذلك واكثر سوف نعرفه في السطور التالية .
الجزء السابع من رواية هدوء ما قبل العاصفة
ناضت احلام بعد ماسمعت كلام امها وخشت لدار تفكر وتفكر وكل لحظه تفكر فيه تحس انها تنتطعن 2000 مره وتنهان بس << مجبران اخاك لا بطل >>
وفاتت ساعه ورا ساعه ويوم وراء يوم ومجدى لاحس ولاخبررررررر وكأنا ماصدق طلعت باش يفتكى منها وياخد راحته ….
وبعد مرور تلاته ايام جى اليوم الرابع ووكدلك لافى حس ولاخبر عليه وهيا كل يوم تموت وتموت وتفكر وتتألم وينتهى كل التفكير بالبكى على مخدة سريرها وفى يوم السادس من غيابها على حوشها ناضت ساعه 10 صبح وعيونها منفخات من الم ودموع الايام الا فاتت والا عنت لاحلااام هلبه اشياء وفسرتلها هلبه اشياء كانت تتوقع انها غير هكى ….
وقفت احلام على الغاز تطيب لروحها فى القهوه وفجأه سمعت بوها يقربع وخاش للمطبخ وهنا قاللها …..
االاب << فتحى >> ….. صباح الخير …
احلام …… صباح الخير بابا …
بوها ….. نبى نقولك حاجه حطيها فى بالك ..
احلام … نعم بابا ..
بوها …. ووتيلى الفطور وبعد الفطور وتى شنطتك باش نحطك فى حوش راجلك ….
وفجأه خشت امها …وقالت ….
امها … اى اى هدا الصح المرأه ماليها الا حوشها وراجلها وبيتها …. ونعرف المرأه المقومه هيا الا حتى تحرج تقعد فى وسط دارها .. ومادمك انتى مش فاهمه فااحنا اكبر منك فانفهموك ونوعوك …. وتبى تجى زياره اهلن وسهلا بيك اما حرجانه فااعرفى انا مكانك هوا حوش راجلك …
احلام …. عادى انتم مهم نفسكم صح مهم .. انت يابوى عمى يقعد راضى عليك … وانتى يام مهم ناس ماتاكلش وجهك … بس انى رجعت بكرامتى او مندله … انى مرتاحه او لا انى متهنيه او لا هدا اخر شى تفكرو فيه ….. لو انى فى درة حب ليا فى قلوبكم كنتم قدرتم قيمتى ومارديتونيش لراجل طلعت من حوشه 6 ايام ولافكر حتى يقيم تلفونه ويقولى شن حالك ولاامتى بتروحى … بس نقولكم شى لو رجعتونى توا غصبن عنى … فاانسونى ومعاش نبى حد يكلمنى او يقيم تلفون ويتطمن عليا لانى مش رح نشوف اكتر من الا شوفته منه ومنكم وليا رب كبير يوقف معاى وياخدلى حقى من ااااااااااااى حد ودموعى هيا رح تدكروها …. وتدكرو يوم ماانى استنجدت بيكم ومديت ايدى وانتم رخيتم بيا واعطيتونى بظهر ….. ومن توا نقولك صحه على الفطور الحلو الا فطرتوهولى … انى ماشيه نلم شنطتى من توا … ومش ضرورى تعب روحك وتروح بيا توا نكلم الا خدانى يحطنى …..<<و مشت بسرعه وطلعت من مطبخ >>
بوها ….. تعالى هنا يابنت تعالى نكلم فييييييييك
امها …. شفتها هالقليلة الادب هادى … تعامل فيك تقول عيل … بس هادى تربيتك والاخدينا منها ..
الاب فتحى …. تى ونبى اطلعى من دماغى انى طالع ومسيبلك المطبخ اقعدى فيها وانتى كل يوم تزنى فوق راسى لين صدعتيه .. صغارك صغارك بنتك بنتك ولدك بنتك ماتقوليش انتى امهم رفت …. اعود بالله صبح يافتاااااح …
طلع عمى فتحى من مطبخ ….. بينما احلام خشت لدار تلم فى حوايجها وهنا خشت عليها مرام وقالتلها …..
مرام ….. احلام بطلى بكى بالله عليك والله مايستاهل اى شى فى دنيا بكاك وكلى ربك وخلاص ..
احلام ….. انتى سمعتيهم شن قالولى …
مرام …. ايه … كيف كنت طالعه من تواليت وسمعتهم وماحبيتش ندخل لانا نعرف لسانى مش رح يهنينى وانتى عارفه انى شنى توا …. بس نقولك شى والله ربى يشوف فيك والاما يوقف معاك فاامسحى دموعك وبطلى بكى …
احلام …. يارب كون معاى انى بروحى يارب … اسمعى بالله هاتيلى تلفون تلقيه مرشوق فى شحن خلى نتصل بي محمد نقوله يروح بيا …
مرام ….. تعرفى امس وانى مقعمزه على فيس تدكرت الا صار معاك فاقررت نكتب بوست للبنات فى القروب نوعى فيه بنات قد الامكان مايتسرعوش فى قرارتهم وهكى … وننصح فى مدمات وهكى فالغريب مانلقلاكش الا تخش نفشك واختها لا وتقولك انى وانى وبالعكس ونحلف عليها قسما بالله كله كدب فى كدب ياوووووووخيتى عليهم وهما مافالحين الا فى كدب وتفشيك وطبعا مش كلهم باش مانظلم حد بس هيا فئه قليله مريضه وطبعا تى تعرفى لقيت وحده اليوم نزله بوست قالت الا ندمت انها تزوجت تقول وشن سبب … جيت بنقولهم دقيقه بس نضبحلكم على احلام ههههه وفجأه نلاقالك وحده ياسبحان الله تقيلة دددددددم قالتلهم بصراحه انى ماندمتش نهااااااااااائيا على زواج ونمووووت فيه يكفى كل يوم يجيبلى ورده ههههه كسررررتلى رقبتى ياسيدى لو حق فاراعى اقلها بنات الاخاشين ويبو يطلقو والا مضايقات والا يخونو فيهم رجالتهم علاش تزيدى تكرهى فيهم فى باقى الحياه والله حرام تى ينارى هما تلقيهم حتى الكلمه الطيبه مش ملحقينها ودورا تجيهم وحده تقولهم انى راجلى رومااااااانسى ويهبببببببل ويكفى كل يوم يجيبلى فى ورده وطبعا مافخيا كانا اعظم … ..
احلام ….. ووووووه يامرام مكتر دوتك سيبى الخلق للخالق والهى فى هم اختك وانتى زدتى طبقتى خلوقى ناقصنى انى توا نسمع مشاكل غيرى …. برى برى سلم وخيتى جيبى تلفونى خلى نكلم محمد يروح بيا لانى خلاص باين قاعده فوق قلوب اماليك وشويه تانيه ويكنسونى كنس
مرام …. انى فاضيه الا نغيرلك فى جوك بس انتى زى قطاطيس الا يااكلو وينكرو برى ملحى عاد وهك خيبوط نقال ها …..
احلام ….. ايوا محمد صبح الخير انتى وين ؟؟؟
محمد …. انى فى جامعه ؟؟ تبى شى ؟؟
احلام … اى نبيك تروح بيا لحوشى … ماليك قامو بالواجب واكتر … ولا عندك محاضره ؟؟
محمد …. لا لا كيف طلعت من محاضره وعندى محاضره تانيه لكن بعد ساعتين فانلحق نروح بيك ونرجع ..
احلام … اوك نستنى فيك ..
استنت احلام محمد ولما جى خدى شنطتها وحطها فى سياره وهيا طلعت عين تبكى وعين تمسح فى دموع واول ماوصلت لحوشها حست حاجه مقعمزه على قلبها بس استعودت بالله وخشت ظمت الحوش وبخارته بالوشق والعرضاوى وحطت الغدا على نار وتفكرت انها تغير شرشاف ومخدة سرير فاكيف خشت بتغير شرشاف وجبدت المخدة تلاقالك اكتر من عشره كورت مستعملات تحت مخدته وهنا قعدت تشبحلهم شويه ونزلت دمعه صخوووووونه من عينها وقلبها زاد قبضها وخدت الكروت على طول ايدها لوحتهم وقعمزة على سرير وبعدين ناضت غيرت شرشاف وقامت شرشاف المستعمل وطلعت بيجامتها وخشت للحمام وفتحت الميه سخونه وقعدت تحتها تفكر وتبكى ومافاقتش الا على صوت الباب الرئيسى تصكر وهنا قعدت شوى فى حمام وبعدين لبست حوايجها وطلعت ووهيا كيف طلعت من حمام قاللها ……..
<< شن ردت فعل مجدى؟؟ وشن بتقوله ؟؟ وكيف بترجع تتعامل احلام مع الوضع ؟؟وامتى نهاية كل شى مش حلو فى حياة احلام ؟؟ وشن قصة الكروت ؟؟
يتبع……….
لقراءة الجزء التالي : الجزء الثامن من رواية هدوء ما قبل العاصفة
لقراءة الجزء السابق : الجزء السادس من رواية هدوء ما قبل العاصفة
للإطلاع علي فهرس اجزاء الرواية : جميع اجزاء رواية هدوء ما قبل العاصفة كاملة للكاتبة كيندا
جميع الحقوق محفوظة للكاتبة كيندا من ليبيا .
