الجزء

الجزء العاشر من رواية قلبي ملكي ولكن أنت من

الجزء العاشر من رواية قلبي ملكي ولكن أنت من

وفي الجزء العاشر من رواية قلبي ملكي ولكن أنت من للموهوبة كيندا دعونا نقرأ جميل الكلمات والخيال الواسع داخل أحداث الجزء ونستمتع بالمواقف التي ستحدث مع أبطالها ، فهيا بنا دون تضييع الكثير من الوقت في المقدمات .

الجزء العاشر من رواية قلبي ملكي ولكن أنت من

واول ماوصلت لشقه فتحت الباب وقلبها يدق وايديها يرعشو وخشت لشقه وقعمزة علي صالون … بس هوا سكر الباب وخدها من ايدهل لدار نوم وايدها قريب فككها وخش لدار نوم وسكر الباب وقاللها ….
ليت …. (( بوجه متعصب مع توليعة دخانه )) … تعرفي شخص اسمه رامي ؟
ريحانه … (( بوجه مرتبك مع دموع )) ماليكش علاقه بيا … مش من حققققك تدخل في حياتي … خلااااااص .
ليت … (( وعيونه نار )). لا دخلننننننني … دخلي اني طلعت طرطور و نضحك عليا وتلبستلي العمه … فهممممممتي ؟
ريحانا … (( وهنا انهارات بالبكي وقالتله )). انت اخر واحد تدوي علي شرف … انت سكرجي ومدخن ومتع زنا ونساوين ااااااااي وجاي توا تحسابني توا علي شي اني مالياش فيه اي دنب … خلاص اني بجد تعبت تعبت … انت مريض نفسي انت عندك شخصيتين اني مش عارفه نحدد انت مين منهم … انت تبيني ولا تبيها ؟ انت تغار عليا ولا تغار عليها ؟ انت هامك من كنت نعرف قبلك او هامك ماتطلعش مع حبيبها … انتي من مننننننننن ؟
ليت …. اني الشخص الا كنت معاك صريح … (( رد عليها بوجه يقدح شرار وعيون نار وطفي دخانه علي زليز وقاللها )) وقولتلك علي كل عيوبي … وقولتلك اني مرتبط بغيرك ونبيها … اني الا مادسيت عليك شي وقولتلك اني واحد واتنين وتلاتاء … اني الا تايه بين قلبي وبين عقلي … بس انتي ياتري من ؟ انت الملاك الا عكسي … الل تصلي وتصيم وماتسلمش علي رجاله … ولا عرفت قبلي راجل … ولكن بقدرة قادر تجيني اتصالات ورسايل من شخص مش معروف انك لبست في حيط … وكلام ماليشي معني ولا عطيته اي قيمه اساسا ولا اخطر في بالي ان الكلام عليك … ومن يشكك في الشيخه اساسا … ولهدا مستحيل كنت نصدق عليك اي شي ينقال لانك في نظري ملاك برغم ان كل يوم توصلني رسايل من نفس الرقم واول مانعاودله نبي نفجره هوا ورسايله بس … نلقي تلفون مقفل … لحد اليوم وقبل مانركبلك لشقه فوق اهنا وانتي تطيبي … تجيني رسائل حسستني بجد اني اني لبست في حيط كلام واتباتات تي هدا عارف عيلتنا نفرا نفرا وعارف تفاصيل حياتنا كلللللللها ومعاهم دليل صورك معاه وانتم مقعمزين مع بعض … وبرغم هدا مازالت نعطي لنفسي مبرر ونقول اكيد في حاجه غلط … اكيد رح تقولي … وانتي بكل واقحه اليوم تقوليلي اي في شخص في حياتي نحبه … لا والا زاد كمل بعد الفطور اليوم وصلتني صورك معاه وصورك وانتي بقفطان حفله … اهو طلعت البرنسيسه تخش لصاله وتمشي للحفلات … (( وفجاه فتح تلفون وطلعلها صور … وهيا من صدمه عيونها تفتحو فتح ومعاش عرفت شن تقول …
ريحانا …. (( انهارات بالبكي )) بس اني مانعرفش كيف نحكيلك … ومش عارفه نحكيلك … اني اني كنت نحب شخص من طرف واحد … وشخص هوا بعد علي حياتي بدون اسباب واختفي … وكانت عندي صديقه في جامعه كانت ديما تقولي باش تقدري تنسي شخص لازم ما تشوفي نصيبك مع غيره … وبعد زن وزن منها قالتلي خوها كان يبيني … واني نعطيه فرصه ونقعمز معاه مرتين بس لعل نغير رائي … وكانت هيا مقغمزه معانا وقعمزة معاه في وجودها مرتين هما بس … ومارتحتلاش ولا حسيت انه شخص الا رح ينسني … واعتدرت منها …
ليت …. (( بوجه متهزي مع توليعة دخان بعصبيه )) … شلاه ياشيخه انتي … قبل حبيبك الاول هدا الا مفروض نتغاظي وندير روحي طبيعي واني تدكريلي فيه عادي جدااا ماهو واحد من العيله … شخص هوا قالي انتي طالعه معاه في سياره … وصوركم واضح كنتم مقعمزين مع بعض ورافعك للاستراحه … ويعرف تفاصيل عليك اني الا راجلك ماشفتهااااااااش كيف هيااااااا …
ريحانا …. (( ودموع ينزلو وبملامح مظلومه )) اني والله كنت معاها ومعاه ومرتين … وماسيبتناش في مرتين اكتر من لما كان يجيها اتصال بس وماطولتش تقعميزتنا اكتر من ساعه … وبعد المره تانيه حسيت اني ندير في شي غلط … وقولتلها اني رافضه خوها … وتعاركت اني وياها وبدت تقولي في كلام شوارعي لاني رفضت خوها وتقولي رح تندمي وخوي مش رح يخليك. ….لان ا هوا كان يحبني زي ماهيا تقول … وبدو يشوهولي في سمعتي في كليه هما زوز لحد ماوقفت قيدي في اول سنه … وهنا حاولت نتقرب لربي اكتر ….
ليت …. اه وصورك في صاله وبنسبه لي علامات الا قالي عليها شن قصتها …
ريحانا … مانعرفش والله … بس ممكن هيا قالتله للان حضرنا مع بعض عرس زميله لينا وكنا نحكو اني وياها زي اي زوز بنات يهدرزو وخدينا صور مع بعض … بس ماتوقعتش انها بتحكي لي خوها باش يستخدمهم ضدي … ووالله حتي صور اني مش عارفه كيف خداهم بس قسما بالله كانت معانا واني مش مضطره اني نكدب عليك طالما ان احنا بنطلقو عاجلا ام اجلا …
ليت …. (( بنظرة تشكيك )) يعني انتي مارضتيش تتزوجيني بطريقه السريعه هيا باش تداري غلطتك معاه … ووافقتي علي طلاق وعلي كلامي ليك لان كان في صالحك … تزوجتك وسترتك ورح تطلقي ..
ريحانا (( بوجه متعصب ونار مع الدموع تضربه كف علي وجهه وتقوله )) …. مش رح نسمحلك تتكلم معاي هكي … اني اشرف منككككك …
وهالكف خلي ليت فجاه يولي خارج سيطره وينوض الوحش الا فيه ويخرج علي سيطره …
ليت …. (( بوجه متعصب )) ايددددددك معاش تمتد عليااااا سمعتتتتتي … وبدي يهز فيها زي مجنون وبعدين لوحها علي سرير …. ومن صدمه ريحانا مالقتش نفسها الا اغمي عليها وطاحت … اول ماقرب منها بعد ماطاحت علي سرير وعيونها تغمضو … نزل علي سرير بسرعه وقعد يضرب فيها علي خدها ويقوللها …
ليت … ريحانا …. فيقي .. ريحانا نوضي ماكنتش نبي نديرلك شي فيييييييقي …. ومس نبض متعها لقاه ضعيف جددددددا … وقلبها نبضاته سريعه … فا ناض بسرعه خدي الكولونيا من فوق شكماجه ورشها عليها وجابلها ميه وغسل بيها وجهها … لحد مافاقت … وفي اللحظه الا فتحت عيونها فيها ودموع يصبو شبحتله وقالتله ..ّ
ريحانا .ّ… اني مش هكي صدقني (( وانهمرت بالبكي ))
وفي اللحظه الا بيرد فيها عليها … جاه تلفون فا طلع تلفون من جيبه وشاف نفس الرقم …. فارد وقال …
ليت …. تعطيني الميموري الا فيها كل صور الا عندك ..
رامي … والمقابل … نبي 20 الف
ليت …تمام … بس صور ناخدهم اليوم ساعه قداش نتلاقو ….
رامي … بعد ساعه من توا … نتلاقو ورح نبعتلك المكان وين …
وهنا ليت سكر تلفون وبعدين جاب كرسي وركب فوق دولاب ونزل سلاح صغير كان مقيوم فوق دولاب وخدي باكو حط وعباه طلقات وبعدين خداه وحطه في شنطه … وبعدين فتح الخزنه الا في داره … وحط فيها كل المبلغ الا عنده في شنطه وسكر شنطه وقاللها ….
ليت …. اني طالع توا … بعدين نكملو كلامنا … ورح نسالك علي حبيبك الاول … ومن اللحظه هيا … لحد ماتاخدي كلمتك .ّّ… فا الا يخصك يخصني … فهممتي . .. وماتطلعيش من دار ولا تكلمي حد لين نجي … خودي دواك
ريحانا … ليتتتتت استني … استتتتتتني …
وسكر ليت الباب بسرعه وطلع … ووهيا قعدت تخبط وتعيط … لان تعرفه رح يقتله … لان قبل ماتكون زوجته هيا بنت عمه … ومستحيل دم يولي ميه … ورح تكون سبب في تدمير حياه بالكامل … علي موضوع مايندريش عليه اي حد … وعلي شخص ماكانتش معاه حتي في علاقه … يعني غلطه بسيطه … احيانا تدفع عليها تمن غاااااالي جداااا واحتمال تدفع عليها حياتك كلها ….
فاتت دقايق في اللحظات هيا بنسبه لريحانا ساعات … وساعه كانت سنوات … وناكانتش عارفه كيف تتصرف … هل تنزل تكلم امه وبوه وتفضح روحها ولا تسكت وتستني … ومن خوفها وقلقها ماكانش قدامها الا حل واحد تقعمز في بلكونه وتستناه علي امل انها تشوفه درس … وفااتت ساعه ورا ساعه والكل الا في عماره خش رقد … ماعادا هيا الا كانت تستني فيه امتي يوصل … ولما حست انها صقعت ناضت ولفت عليها شال وسكرت باب البلكونه وخشت .. وفي اللحظه الا بتخش فيها لسرير نفتح باب الدار … وخش لدار ليت وتيشرته كله دم … وهنا ريحانا جاته تجري وهيا مصدومه وتعيط …
ريحانا … ((بصوت خايف ويرعش )) خيرا هكي تيشرتك شن في تكللللم ليت حرررام عليك … قتلتتتتتته رد علياااااا …
وهنا ليت لوح شنطه ومسدس الا كان في جيبه من تالي وحط ايده علي فمها وقاللها …
ليت …. ااااااص خلااااص ماتفيقي حد … شن تشوفي فيا محمد رمضان اني …
وقعمز علي سرير وقاللها … اسمعيني توا لاني مش قادر نتكلم … مزقيلي تيشرتي … بسررررعه …
ريحاانا … شن بدير قووولي …
ليت …. (( بصوت متعصب )) … قولتلك نقصي صوتك وديري الا قتلك عليه … هاتي ميه سخونه ومن الصيدليه هاتي شاش معقم وهاتي اي شي تلقيه اسبيرتو او نتنوره وافتحي شنطي تلقي شيشة شرب صغيره هاتيها … وهاتي شنطة المعدات والاسعافات طبيه تلقيها في دولاب .. تمااااام … توا خودي الملقاط هوا والموس وصونيه هيا وحطيهم يغلو في الميه مغليه لمدة خمسه دقايق وجيبيهم بميتهم بسرررعه …
ريحانا … تمام …
ومشت ريحانا دارت الا قاللها عليه … بعدين رجعتلها وايديها يرعشو … وقالتله
ريحانا …. تمااام …
ليت … (( يتلكم وواضح عليه الالم بس يكابر )) البسي القلافز … وصبي شوي اسبيرتو علي طاوله وحطي عليها صونيه وحطي ملاقط والموس فيهم وصبي عليهم اسبيرتو بسرعه … تمام … توا خودي شاش معقم ونظفي مكان بسرررعه … ااااااااه بشوي ريحانا … باه باه توا شوفي طلقه باينه مكانها ؟
ريحانا … ليت مستحيل … افرض درت فيك شي لا مستحيل …
ليت … ريحااااانا فيقي … اند دكتور جراح ماتخافيش مش رح نخليك تديري شي غلط … ديري الا قوتلك عليه وتبتي ايدك بس لان ابسط غبطه تنوشي وريد او شريان … ..
ريحانا … (( خدت شهيق قوي … وبعدين قالتله … توا نجبدها ؟
ليت … اي هيا سطحيه ماخشتش هلبا … خودي مشرط يساعدك … واجبديها بسرعه ….
ريحانا … تمام … تبت كتفك … .
ليت …. ااااااااااااااااااااااااه …
وبعد لحظات جبدت طلقه من كتفها … وبعد مانحي المخده الا كان كاتم بيها صوته قاللها ….
ليت … خودي شيشة شرب … صبيها علي جرح بسرررررعه …
ريحانا … تمااام ..
ليت … ااااااااااااااه … تمام .. صبي تنتوره اي تمااااام افتحي شنطه توا … تلقي يبره وخيط مع بعض في كيسه مسكره جديده … افتحيها … شديلي كتفي بس حتي تالمت تبتيه … اااه وبدي يخيط وهيا تساعد فيه … وبعد ماكملو … عقمتله الجرح من برا … وحطت شاش ولصقه عليه … ونظفتله الدم المتناتر علي ايديه وصدره وساعدته يمتد ويرقد …. ونظفت كل شي وجت جنبه … وقالتله …
ريحانا … شن حاس نفسك توا ؟
ليت … الحمد لله افضل …
ريحانا … تتألم هلبااا ؟ (( بصوت زعلان )) ..
ليت … مش مشكله … بس ماتقوليش لحد علي اي صار …
ريحانا .. عادي تحكيلي شن صار معاك
ليت … (( بصوت شبه حاد )) عندي صديق نعرفه رائد .. حكيتله القصه وقالي نمشي معاك … واول ماتلقيت مع الولد وخديت منه المموري وماكنتش متاكد انه مش رح يخلي عنده نسخ … وفي اللحظه الا خديت منه الفلوس .. طلع صاحبي وجايب معاه دوريه وقبضو عليه … وفجاه طلع سلاح وبدي يرمي .. وجتني طلقه في كتفي زي ماتشوفي …
ريحانا … وهوا ؟
ليت … علاش يهمك هلبااا (( بصوت عصبي ))
ريحانا … لا بس خايفه تكون انت درت فيه اي شي …
ليت … (( بصوت متعصب )) لا ماتخافيش اني قبل مانتزوجك كنت دكتور … بس الباين بعد ماخديتك علي ادارج اني نكون قتال قتله … وماتخافيش المره هادي الشرطه رمو عليه كدفاع علي نفس لما بدي يرمي بشكل عشوائي علينا … المره الجايه ياخوفي نلعب مكانهم اني … فالو عندك شي تاني ياريت تحكيه وبلاش دور شيخه الا لاعبتيه ..
ريحانا … (( بصوت متعصب )) تعرف لو ماكنتش في الوضع هوا كنت قولتلك كلام غير … بس انت حاليا في وضع معاق فامش رح نستغل عجزك ونرد عليك …
ليت …. الله الله عجز ومعاق … شن رايك تجي تصبي عليا الكناسه وخلاص انتي ولا نقولك حطيني في دار العجزه …
ريحانا …. علاش اني مش امك ولا بوك وبينا شهر وانت تمشي تتزوج فتاة احلامك … فا ياريت تحترمني زي مااني نحترم فيك …
وهنا حاول ينوض ليت وهوا متعصب وقاللها …
ليت …. (( بوجه متعصب ومتاألم )). ااااه انتي تحسابيني خلاص ماعنديش جهد متلا خلااااص …
ريحانا … ليت ارجوووك خلاص … اقسم بالله لو تدير اي شي غلط رح نلم عليك اهلك … خلاص ..
ليت …. ربي يحبك اني تضربت في كتفي تصوري …
ريحانا … تصبح علي خير …
وهنا ليت سكت شوي وبعدين قاللها …
ليت …. من هوا الا كنتي تحبيه من طرف واحد ؟
ريحانا …(( سكتت شوي وبعدين قالتله )) … مش حابه نحكي في موضوع طالما هوا مش رح يضرك بشي نتمني نحتفظ بيه لنفسي …
ليت … نعرفه اني ؟
ريحانا …. (( سكتت شوي وقالتله )) … لا ماتعرفاش ..
وبعد لحظات صمت قالتله …
ليت … علاش خبيتي موضوع علي اهلك وعليا ؟
ريحانا … ((تنهدة وسكتت شوي وبعدين قالتله )) ماقولتش لاهلي لاني كنت خايفه يفهموني غلط … خفت ان بابا تصيرله حاجه … ولما زاد ضغط عليا اكتفيت اني نوقف قيدي ونبعد عليه ونقعمز في حوش لحد ماينسوني … وبالفعل قعمزة في حوش وكانت هادي احلي سنه بنسبه ليا … لاني تقربت من ربي هلباااا وعرفت انك مستحيل اي حد يقدر يساعدك انك تتزواجي اي شي في حياتك سئ الا ربك فقط … وهالشي خلاني نتقرب من ربي ونقوي اكتر … وبشوي اكتشفت ان في حياتي هلباا حاجات ممكن عند اغلب ناس عاديه … بس عند ربي اتمها كبير … وهالحاجات ممكن هيا الا تخليك بعيد علي ربي اكتر … بس الا قريب من ربي عمره مايخاف من شي … لان الله رح يكون في ظهره وحمايته … ولو اني بعقلي هوا ماكنتش سكتت وخفت وكنت قلبت دنيا فوق راسه … وعلاش ماقولتلكش لان موضوع قديم ووتوقعت انه خلاص نسي ومشي في حاله وحتي تزوج فامحبيتش نفتح موضيع هيا اساسا مش مستاهله .. بس ماتوقعتش ان ولد الحرام زي كلب مسعور يدور عليك لين يلقاك وينتشك وماتبردش فيه ..
ليت …(( سكت شوي لما حس صدق في كلامها وبعدين قاللها )) اني اسف لو جرحتك بااي كلمه او تصرفت معاك بشكل وحشي … بس اني كنت زي اي راجل نجرحت في رجولته بس … تصرفت بطريقه حماره وخلاص …
ريحانا … ولا يهمك … بس انت كيف صار معاك هدا كله واني ماحسيت بشي منك ..
ليت … تاني يوم صبح وصلتني رساله ماهتميتش .. توقعت شخص غالط … بعدين وصلت رساله رابع يوم نفس الشي وفيها شرح اكتر .. وماصدقتش بس خش شك … لحد اليوم الخامس … شفتك تحكي لملاك وتقوليلها اني نحبه وحاجه زي هكي واهنا شيطان ركب اكتر في عقلي … وبعدها بعتلي رساله انك كنتم في علاقه وانك كنتي تحبيه وتموتي فيه وانك طلعتي معاه وغلطتي وبعتلي صور زي ماحيتلك مبكري … ولما رفض يتزوجك سيبتيه … وفي اللحظه هيا حاولت نفتح معاك موضوع ونبان طبيعي ومافي شي وسالتك وقوتلك داسه عليا شي … علي امل نسمع منك هالكلام … بس انتي اكتفيتي انك تعترفي انك اي تحبي شخص واهنا هبلت اكتر وصار الا صار …
ريحانا … يعني انت كنت تبي تغامر بحياتك ومستقبلك وتغلط معاي غلطه رح تدفع تمنها مع حبيبتك تمن للوفاء بس باش تعرف انت نضحك عليك او لا … رد خيرك ساكت … انت كنت تقدر ببساطه ترفعني لااي دكتور … انت علاش تصرفت هكي ؟
ليت …. اني قوتلك اني عقلي طار مني ومعاش عارفت شن نقول او نتصرف …
ريحانا … (( مع تنهيده )) تمااام … بس مفروض اني زي ماانت تقول اني اختك … كيف قدرة تصدق كلامه … لو ملاك كنت صدقت عليها شي …
ليت … اني قوتلك تصرفت بدون عقل بس اول مافكرت معاك بعقلي صدقت .. وبدليل اني نحكي معاك توا ومافرغتش الصف فيك …
ريحانا … انت مجرم وتخوف اني مش رح نرقد معاك في دار بببببعد …
ليت …. ههههههه تعالي هنا نبصر معاك … اني اصلا بفضلك وليت قتال قتله وشدها باايده وقال … اااااه
ريحانا …(( رجعت قعمزة جنبه بخوف وقالتله )) اسفه … تألمت …
ليت … (( مع شبحه لعيونها )) … عادي … مش مهم الالم … مهم انتي بخير … (( وقاملها الخصله من قدام وجهها وهوا يشبح لعيونها ومبتسم …
ولكن ريحانا تلكمست وقالتله …
ريحانا … (( بصوت مرتبك )) … انت تحبها ؟ …
ليت …. (( وهوا غارق في عيونها رد وقاللها … لو سألتيني قبل مانعرفك كنت قولت ايه … بس توا …
ريحانا … توا شني ؟
ليت …. مش عارف … مش عارف اي شي … حاسه نفسي مغيب ومش عارف اني وين ..
وهنا ناضت ريحانا من جنبه فاشدها وقاللها …
ليت … خليك جنبي شوي … اني محتاج بالامان معاك …
ريحانا …. هههههه بطل .. هوا انت بيبي …
ليت …. ههههههههه ممكن ّ.ّ.
تعرفي شي … مش عارف علاش ارتحت لما سمعت منك كل شي … وحسيت بصدق منك … وزدت تاكدت لما شفته اساسا … ادا كانا اني ماقدرتش نبلعه وهوا منظره زي سهلبيسه علي البعاليصه الا في مسرحية عادل الامام … مافيشي اصلا مكان بينحب ..
ريحانا …. ههههههههههههه الحمد لله تاكدت ..
ليت …. بنقولك شي …
ريحانا … اها ..
ليت (( مع تنهيده )) … بوي اليوم حول لحسابي كل المبلغ الا كنت نبيه ..
وهنا ريحانا حاولت تبتسم بس عيونها تعبو بدموع وقالتله …
ريحانا … الله .. معناها علاش بتستني اكتر .. انت هدا مطلوب … مافيش داعي نستنو اكتر ونورطك في حياتي ومشاكلي اكتر …
ليت …. انتي هدا رأيك ؟
ريحانا … عطاته بالقفي ومسحت دموعها ودارت روحها عاديه وقالتله …
ريحانا … اكييييد … انت عندك حبيبتك وحياتك ومستقبلك وعييادتك تستني فيك … علاش تضيع معاي شعر تاني …
ليت … اني ماتوقعتش انك تكوني متلهفه لطلاق هكي …
ريحانا … لاني مش حابه نلعب اكتر ونعشم اهلي اكتر من هكي …
ليت … شمس زرقت خلاص و اني تعبان وبنرقد … تصبحي علي الف خير ….
وطفي سهاره من جنبه وغمض عيونه ورقد …. بينما هيا خشت للحمام توضت وبعدين طرحت صلايه وبدت تصلي في الفجر وتدعي لربي ودموع يصبو منها لانها كانت تتمني تقوله كل شي … بس نفسها عازتها انها تفرض نفسها عليه طالما ماطلعتش مشاعر منه بدون اي ضغوطات منها … وبعد ماكملت صلاتها خشت رقدة … وفاتت الليله ورا الليله وكانو الايام يفتو علي ريحانه وكأنهم سنه … وحاولت قدر الامكان ماتحتكش بيه وتبعد عليه وترقد قبله لانها حست ان قلبها ومشاعرها في خطر … وحست ان ليت كان بين صد ورد … وبين يوخر ويقدم … ولهدا ماكانتش حابه تعشم نفسها اكتر … لحد مافات اسبوع وجي اليوم الا كانت فيه مع العيله مع العصريات … ويطيبو في فطور وفجأه سمعت ملاك تحكي علي قصة صاحبتها الا تقريبا كانت نفس قصة. ليت وريحانا … واول ماكملت حكي القصه قالتلها …
ريحانا … وكمل معاها ؟
ملاك … اكييييد هوا اصلا قاللها اني كنت خايف اني ان يطلع حبي ليك من طرف واحد …
ريحانا … بس مش شرط كل شخص يعترفله حد بحبه ويطلع يحبه ..
ملاك … ياغبيه … الحب يستاهل ان الانسان يضحي … ويجرب انه يكون صريح مع الانسان الا يحبه … لان اعترافك ليه رح يقرب مسافات حتي ولو.كانت بعيده … يبدا يفكر ويركز معاك اكتر …
ريحانا … شن تقوليلي اني … درتيها تمره هادي مع وائل …
ملاك … وهادي اكبر غلطه درتها لاني اكتشفترالكلام هوا متأخر … واهو دفعت تمن وخطب … لو اعترفتله ممكن كان يعطي فرصه ليا وليه …
وبينما ملاك كانت تشرح … غسلت ايديها ريحانا شوي وقالتلها … شوي ونجيك …
وركبت تجري فوق لي ليت … واول ماوصلت لي باب شقه خدت شهيق وزفير وبعدين فتحت الباب بشوي ومشت لدار وهيا مبتسمه ومساويه روحها. … واول مافتحت الباب سمعت ليت يقول …
ليت …. انت من سمحلك تقوللها اني تزوجت … وتحكيلها حتي اني درت خطه اني وياك باش نقنع ريحانا انها توافق … ياغبببببي انت هكي ماسعادتنيش … انت شن دخلك اني مانحبش ريحانا وحب لارا …. معقوله قوتلها بتفصيلي حتي علي الا صار في ليلة دخوووول … سكر فممممك خلاص سكرررررر … انت هكي ورطتني يااااغبي … سكرررررر .
ولوح تلفون علي الارض كسره … وحط ايديه علي راسه … في لحظه الا كانت فيها ريحانا واقفه مصدومه … وهنا مالقتش نفسها ريحانا الا فتحت الباب وقربت منه وقعدة تشبحله شوي وهوا مصدوم وبعدين قالتله …
ريحانا …
يتبع………

لقراءة الجزء التالي : الجزء الحادي عشر من رواية قلبي ملكي ولكن أنت من

لقراءة الجزء السابق : الجزء التاسع من رواية قلبي ملكي ولكن أنت من

للإطلاع علي فهرس أجزاء الرواية : جميع اجزاء رواية قلبي ملكي ولكن أنت من للكاتبة كيندا

جميع الحقوق محفوظة للكاتبة كيندا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى