وفي الجزء الأول من رواية قد كفاني دعونا نبدأ في معرفة كيف ستبدأ الأحداث وعن شخصيات ابطالنا ؟ وكل ذلك في السطور التالية بإذن الله مع الكاتبة آيه إبراهيم ، قراءة سعيدة بإذن الله للجزء علي موقعنا .
الجزء الأول من رواية قد كفاني
*لمن الحياة تعاكس وكل الأبواب تتقفل في وشك وما تلقى سبب واحد للعيش في سلام وأمان وما عندك شي في الحالة دي ح ترجع للخلقك، ح ترجع لربك ؛ لانو هو الوحيد الذي بذكره تطمئن القلوب ودا الحاصل في قصتي*
انا مهجة محمد من أسرة فقيرة عندي ثلاثة اخوات وانا أكبرهم ابوي اتوفى ليهو ثلاثة سنوات وامي عندها مشكلة في الكلى وعندي اختي مقعدة نتيجة للحادث البسببو اتوفى والدي حاليا انا عمري 16 سنة والحياة ضاقت بعائلتي وكنت انا الضحية اتخليت عن اكبر وأسمى حلمي هي اني اشتغل واعمل شغل خاص بي وبديت افتش في عمل عشان اقدر اعالج امي واختي واقدر اخلي عائلتي متعففة وما تمد يدها لي زول لقيت اشغال كتييرة واشتغلت بس ما منتظمة والقروش قليلة مرات حق الاكل إلا بدين من الدكان مرت الايام علي الحال دا وانا شايلة هموم اكبر مني وبفتش في الشغل بالصدفة لقيت شركة عاملين ليها اقتراح، جديدة ، كنت مترددة ادخل ولا لا واقول ليهم شنو مثلا ؟! …انا م عندي شهادة و عاوزة اشتغل معاكم اعمل ليكم الشاي والقهوة ،اتوكلتا على الله ودخلت والشركة دي جميلة بطريقة كدا تحير والناس الفيها الملابس حقتهم سااي انا لو قعدت سنة كاملة اشتغل ما بقدر اشتري ذيها عاينت لي نفسي في تحسر وقلت في سري ياريتني لو كنت ذيهم أو عندي شهادة ،يأخ انا ملابسي دي لي ثلاتة سنوات م اشتريت غيرهم تاني استغفرت ربي وقلت في سري مهجة انتي من متين بتعايني لحق الناس؟ اصحي واحمدي ربك على العندك دا في ناس بتمنهو ما لاقينو ،في اثناء تفكيري كدا لاقاني واحد قال لي عايزة شنو هنا ؟ وكان بعاين لي بي افتراء كدا قلت ليهو عايزة شغل ضحك ضحكة كدا انا لمن استغربت وقال اول مرة اشوف لي حرامية عايزة شغل ،قلت ليهم الله يسامحك انا حرامية 
عرفت عني شنو عشان تقول عني حرامية قال لي اخجلي يأخ كان ما حرامية لابسة النقاب لشنو ؟ ! انا بعرفكم تتمسكنو عشان تدسوا كل الحرام البتعملهو والنقاب بقا مخصص للحاجات دي عشان كدا امشي شوفي مكانها وين نحنا هنا شركة محترمة جدا وأمثالك ما بنقبلهم…
انا في اللحظة دي دنقرت راسي ونزلت مني دمعة حرقت خدي وقلت معقولة بس ؟ مافي شغل دخلت عليهو الإ وانطردتا بسبب النقاب والراجل واصل في كلامو الجارح وقال لي تتفضلي تطلعي ولا اطلعك بطريقتي والناس كلها كانت بتعاين وشايفين الحق مع الراجل انا عمري كلو ما حصل رفعت صوتي على راجل ولا حصل رديت الإساءة بالإساءة قولت ليهو ممكن اقابل مدير الشركة قال لي انتي ما عندك كرامة يأخ انا من قبيل بنبز فيك اقسم بالله كان دا انا كان زمان طلعت …رددت بوراهو جملة( كان دا انا كان زمان طلعت ) …انت بتطلع عارف ليه ؟ ! لانو آكل وشارب ،لانو م عندك دين بتطلع لانو امك ما قاعدة تساهر من الألم الشديد في كليتها ،بتطلع لانو اختك م معاقة وم محتاجة لعلاج وبعدها ما قدرت اقيف وجسمي كلوو هبط وطلعتا وانا ببكي بي كل حرقة من غير م اشوف المدير ،بعد طلعتا من الشركة لقيت لي طوبة كدا قعدتا فيها واتذكرتا كل المواقف المرت على بالشكل دا واتذكر كمية الناس الاشترطت على اخلي النقاب عشان اشتغل معاهم وبكيت قدرتي وانا ببكي ومدنقرة راسي اتذكرتا ابوي طلعتا دفتر صغير ودا الوحيد البكتب فيهو ااي شي بيوجع قلبي كتبت فيهو( من بعدك يا ابي اصبحت طفلة في شكل مسنة وفي المسئولية رجل وفي المحنة ام ،عشت كل الأدوار ،اخبرني متى يأتي دور المدللة بعد ؟! ) كتبت التاريخ ونزلت كذا دمعة بلت الدفتر قفلتو ودخلتو الشنطة عايزة امشي سمعت صوت قال لي انا اسف التفت ورأي لقيت دا الولد القبيل قلت ليهو اسف على شنو ؟ مش انا حرامية مش انا بعمل كل الجرائم مش انا بعمل كل حاجة حرام و لابسة النقاب عشان استر على نفسي لشنو واقف معاي كرامتك مش اهم من كل شي لشنو عايز تعتزر ؟ قال لي ممكن تديني فرصة اشرح ليك والله انا ما بالسوء الشفتيهو مني قبل شوية انا ما افتكرتك عندك كل المصائب دي انا والله كنت قايلك ذي الناس الفارغة البتلبس النقاب للجرائم قلت ليهو هسي الاتغير شنو قال لي عايزة تشتغلي ولا لا قلت ليهو ايوه عايزة قال لي اقبلي الاعتزار قلت ليهو طيب …وفي سري قلت ليهو سبحان الله وهو في ناس اغنياء بتعتزر، هم غير فالحين انو يشمتو فينا نحنا الفقراء عندهم شنو ؟!
لكن دا مالو ياربي مالقا ليهو زول يظبط قهوة وشاي قال احسن اشغل البت دي ولا شنو ، سرحت بعيد ،طقطق لي وقال انتي طبيعي كدا ما ممكن انا من قبيل بتكلم وانتي سرحانة ارح عشان اوريك شغلك دخلت معاهو الشركة وانا ما مصدقة اني لقيت شغل لا وكمان من غير ما يشترط على اني اقلع النقاب والله عايزة اطير من الفرح قال لي اسمك منو قلت ليهو مهجة محمد قال لي ياسر عبدالله معاوية البربر قلت في سري ماشاء الله دا حفيد معاوية البرير الله اداهو، المهم دخلنا الشركة نادى على أفرادها كلهم انا استغربت مش مفروض يوريني مكان شغلي عشان ابدا لانو الزمن اتأخر وانا لازم اقبض لي قرش قرشين عشان اطلع حق الاكل لامي واخواتي قلت م علينا نشوف نهايتو شنو أفراد الشركة كلهم جو قال ليهم اكيد بتكونوا متذكرين البت دي…..
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الثاني من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
