وفي الجزء الثالث من رواية رحلة الحب دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لين نزار .
الجزء الثالث من رواية رحلة الحب
كلكم عايزين تعرفو فارس دا منو 
فارس دا صاحب أمير من ايام الثانوي صاحبو شديد قرأ اداره اعمال ف السودان،، بعدين جاتو منحه وقرا ف الهند طب وعمل ماجستير في علم نفس 
اكتر واحد أنجز فيهم وجا السودان قريب 
من اكتر الناس القريبين لي أمير حتى اكتر من معتز
بعد ٣ يوم
فارس :مشكلتك شنو؟
هديل :ماعندي مشكله
فارس :انتي بت واحده؟
هديل :انا وأمير بس
فارس عندك صحبات؟
هديل :كلهم قالو انا منفسنه وخلوني 
فارس :طيب بتحبي الطعميه اكتر ولا الفول؟
هديل:دي شنو العواره دي؟
فارس :طيب ممكن نوقف ونواصل بكره ان شاء الله
هديل :تمام
فارس ودع هديل،، لاقي أمير برضو ومشى
امير:حاسه نفسك احسن؟
هديل:لا وخلاص م عايزه
أمير :رايك شنو طيب تسافري لأمي وابوي؟
هديل نططت عيونا وبسرعه مشت :لامستحيل
أمير شنو هو المستحيل تعالي 
هديل :أمير بليز يعني ماعايزه كلام ف الموضوع ده 
امير:انتي م عايزه ترجعي احسن؟ انتي بيدك ترجعي على فكره انتي شايفه معامله ناس بيتنا لي سمحه مثلا؟ امي لسه بتضربني قدام الناس زي الشافع وابوي م بضرب لي الا لمصالح الشركه وين المشكله عادي ياهو 
يمكن انا ولد وقدرتي على التحمل اكبر بس اعرفي تماما انو فارق معاي واجعني بس اعمل شنو دي قسمه ربنا،، قسم لينا نهله وعبد المولى ننتحر مثلا؟ انا شايف انو انتي كل المحتاجه صفحه جديده مع نفسك تراجعي علاقتك بي ربنا وبي نفسك كمان، م تعايني للحياه من منظور واحد،، ف جوانب تانيه احلى فكري ف كلامي دا
ومشى خلاني ،، عدت الكلام دا ف راسي ٣٠٠ مره وف المره الالف قررت اني خلاص ححاول ادي نفسي فرصه 
واقفل كل صفحه سببت لي وجع
بكره الصباح،، فارس جا لاقاو اميرر وهو طالع،،
أمير :دكتوري مالي العين 
فارس :قالي خبر مو زين،، حبيبي خبركك
أمير :الحمدلله فل الفل
فارس :على وين؟
أمير :الشركه اتأخرت شديد، هديل منتظراك من الصباح تمشي وتجي تقولي فارس اتأخر ليه عشان كده اجري حصل
فارس :تمام لي بعدين
فارس دق الباب فتحت ليو الشغاله مشى على غرفه هديل،، دق الباب،، قالت ليه خش..
فارس خشا واتفاجأ..
فارس:واو ماشاء الله الغرفه متغيره ١٨٠ درجه
هديل وهي مبتسمه وانا؟ رد ليها حتى انتي متغيره في شنو اكيد م ح تقولي انو اول جلسه امس عملت دا كلو
هديل : ماعارفه الحصل شنو بالضبط بس قررت اتغير،، مافي زول يستاهل اني أنفسن واكتئب واضيع احلى ايام حياتي
فارس : ب كده انا اطمنت عليك
هديل : الحمد لله شكرا ليك ولاهتمامك بموضوعي
فارس : ولو، بعد كذه انا خلاص شغلي انتهى ربنا يحفظك وحاولي قدر الإمكان م تنتكسي،، واثبتي لنفسك انك لو عايزه تتغيري حتتغيري
هديل :ان شاء الله
فارس مشى،،
بالمساء،،
أمير :مبسووووووووووووووط اختي اخيرا رجعت لي لاحولا دي كم سنه ٤ سنه الحمدلله على كل حال المهم رجعتي وحضنا
هديل :كلامك الأمس جا ف وقتو تماما واخد مفعولو امي زاتا م بتستاهل اننا نكون اولادا
أمير :للأسف بس ي زوله مجبورين قولي الحمد لله ع الاقل العز الأحنا فيهو دا بسببهم
هديل: ليه مرات الاهل بكونو أسوأ حاجه ف حياه الزول،، بالجد الاهل ممكن يدمروا وممكن يرفعوا
أمير :فعلا ياخ 
م مشكله لمن نعرس حنحب أولادنا شديد وحنعاملهم بالصوره الاتمنيناها لنفسنا
هديل :أمير انا بتك م تنسى
أمير :حبيبي انتي بتي الكبيره والسمحه والبحبها
هديل :بعد ٤ يوم ف شنو؟
أمير : ف شنو؟
هديل :أمير
أمير :في عيد الحب تقريبا
هديل:وتاني ي أمير
أمير :اهاا، في عيد ميلاد أظبط اخت عندي ف الحياهه
هديل:كنت هبكي والله،
أمير :جاهزه عارفك
انا بديت اتغير تماما،، صلحت من نفسي حاولت اتقرب من ربنا،، خشيت المطبخ مع الطباخه وبديت اتعلم معاها،، بديت اعمل لنفسي جو براي وعالم خاص بيي
.. في مكان تاني..
-بتآمن بالحب من اول نظره؟
-لا دا وهم ساي
-لا ما وهم انا حسيتو
-حسيت شنو انت بتعرف تحس ي مان اصلا
-م تستهتر ي معتز 
-فارس اخر مره شفتك بتحنك في بت واحنا ف ٣ – ثانوي وادتك شاكوش.. فارس انت م بتعرف يعني شنو حب انت زول دكتور ومركز مع شغلك..
-يا إلهي، تصدق انا غلطان الفتحت معاك الموضوع دا،
-غلطان والله اكضب عليك
-اكسر الحنك أمير جكس ي زول 
-احلف متين؟؟؟ م تكون ألفي بالي؟؟؟
…. نرجع
Happy birth day Hadeel
هديل :امييييير دا كلو عشاااني
أمير :تستاهلي اكتر من كدهه غمضي عيونك
هديل غمضت وفتحت لقت لينه ومعتز وفارس ومعاهم هدايا 
هديل:واااااااييييي انا مبسوطه شديد تسلمو بالجد يجماعه م قصرتو شكرا بالجد
معتز :معقوله ياخ انتي تستاهلي ي سمحه
عاينت لمعتز بانكسار كده وم رديت ليه،،
لينه:العمر كلو ليك حبيبتي
أمير :كل سنه وانتي اختي وحبيبتي ربنا يحفظك لي
هديل:تسلمو
فارس كان سرحان وماسك هديتو ومتامل ف هديل،،
معتز لوح ليو :مولانا العاشق؟؟
فارس :هديل، كل سنه وانتي سالمه يارب وامانيك محققه واشوفك احسن دكتوره صيدلانيه يارب
هديل كسرت عينها للارض بي يأس
فارس: م عايزك تزعلي ولاتيأسي مافي شي بعيد ان شاء الله ح ترجعي تواصلي..
هديل :ان شاء الله
بعد شويه عم الصمت لحدي ما فجأه الغرفه ضلمت
هديل صرخت..
فارس استهدي بالله
اسمعيني بسسس
☆يتبــــــــــــــــــــــــــــــــــــــــــــع☆☆
لقراءة الجزء التالي : الجزء الرابع من رواية رحلة الحب
لقراءة الجزء السابق : الجزء الثاني من رواية رحلة الحب
للإطلاع علي فهرس أجزاء الرواية : جميع روابط اجزاء رواية رحلة الحب للكاتبة لين نزار
جميع الحقوق محفوظة للكاتبة لين نزار
