إن الروعة لا يختلف عليها إثنان وفي الجزء الثالث من رواية صغيرة علي الحب حيث المتعة في القراءة والخيال الواسع هو ما يجعلنا جميعاً نود قراءة جميل الروايات من الكاتبة الموهوبة كيندا لذلك دعونا نري كل جديد سيحدث داخل احداث الجزء هيا بنا دون تضييع الكثير من الوقت لنبدأ فورا بالقراءة .
الجزء الثالث من رواية صغيرة علي الحب
رنا …. خلاص اطفى ضى وسكرى الباب وراك ..
امها … تصبحى على خير …
وهنا رنا تلفتت جيهت روشن وتجاهلت كلام نظارت امها ليها … واول ماطلعت امها من دار انهارت بالبكى لاحساسها ان اكل شى انتهى بالنسبه ليها ….
فاتت الليله عليهم زى اى عيله تفكر وتفكر شن الخطوه الجايه ؟ وهل ربى هايهديها ويرجعها على الا فى راسها … او رح يجرفها قلبها فى الاتجاه الغلط …
احلام … سالم .. رقدة ؟ نووووض نبى نتكلم معاك ..
سالم .. اى راقد يا احلام .. شن فى خيرك ؟ ااااااوووووف الواحد مايعرفش يرقد فى هالحوش ..
احلام … انى خايفه على بنتك .. نحس فيها مش رح تتقبل فكرة زوجها ورح تفضحنا …
سالم … لاحول ولاقوة الا بالله …. بكرا توا نتكلم فيها … خلاص طفى ظى سهره وخلينا نرقدو …
احلام … ماتنساش تخليلى 100 دينار باش نطلع انى ومحمد صبح وناخد حاجات ضيافه متع بعد بكرا …
سالم … حااااااااضر غ ير طفى ضى وخلينى نرقد بس لان بكرا وراى ستين الف حاجه …
احلام … انت ارقد وخلى الهم فوووق راسى انى بس .. ارقد ارقد مادما عندك قلب مريح …. اااااااه ياقلبى اااااه امتى نرتاح ……
……..
رنا … صباح الخير .. تقبل الله بابا .
بوها … صباح الخير يابنتى .. شن نوضك ؟
رنا … صليت فجر وبنقرا قرأن خلوقى شوى ضايقات ..
بوها … تقبل الله يابنتى ايواااا ديما نبيك هكى تتقربى لربى وهوا الوحيد الا قادر يفرج همك بس .. تعالى قعمزى جنبى نبيك ..
رنا … ) قعمزة جنبه ( … نعم بابا ..
بوها … توا انى نبى نتكلم معاك يابنتى بهدوء ماشى ؟
رنا … تفضل يابوى …
بوها … انتى علاش رافضه شخص الا متقدملك ؟ اعطينى اسبابك ولو حسيت انها مقنعه انى رح نلغى الموضوع كله برماته ماشى ؟
رنا …. بابا انى عدة اسباب … اولها نحس انه مريض نفسى ؟ يابابا اخته لطالما تقول هوا يكره نساوين ؟ معقوله تبونى انى نعيش معاه 24 /24 ..
بوها …. هههههههههه هوا هدا سبب ؟ يابنتى … انتى طالما ماقعمزتى معاه وعرفتى اسبابه ماتقدريش تحكمى عليه … وكل مافى موضوع ان راجل باين عليه كان انسان خلوق ومحترم ومش متع ضحك زى هلبه ناس نعرفوهم انى وانتى .. ) وهنا رنا نزلت عينها وتحشمت لان عرفاته يلمح عليها ( … فااكيد يابنتىىحصل صدمه قويه فى حياته خلاته ياخد موقف … يعنى باختصار شفتى القصه الا كنتى ديما تقوليلى يابابا اقرهالى . .. ايواااااا الحسناء والوحش … شخص هوا تعرض لى صدمه فى حياته زى لعنه .. حولت منه لشخص تانى … ولكن بمجرد انه يلقى بنت خلوقه والمحترمه الا تفهمه وتحبه وتصونه صدقينى رح يتغير ويرجع احسن من قبل … وصدقينى الا زى هوا مستحيل تخافى وانتى معاه ان عينه تزوغ هنى او هنى .. لان هوا يعرف الاحساس هوا ومجربه …
رنا … بس يابابا انى مش قادره نتقبله ولا رح نقدر نتقبله مهما تغير .. الله غالب مشاعرنا مش باايدنا …
بوها …. ااه انتى معناها هوا هدا سبب وراء موضوعك ؟ انتى مازالتى عندك امل فى الولد البلطجى هدكا ؟
رنا … بابا انت مش فاهمنى … الولد كويس وهوا مسأله وقت بس ورح يجى يتقدملى ..
بوها …. وانتى شن عرفك ؟
رنا … انى نعرف .. يابابا هوا شارينى ويبنى واهله ضاغطين عليه و …
بوها … ياسيدى انى عندى ليك حل يرضى طرفين … بس تعطينى وعد انك تلتزمى بيه لاخر لحظه ..
رنا … شن هوا ؟
بوها … لو جى هوا من الباب وتقدملك وجى وقف وقفة رجاله وقالى ياعمى انى نبيها ونبيكم تعطونى شوية وقت بس …. انى مستعد ننهى كل شى ولو كان يوم فاتحتك … ولو انه ماجاش ؟ وماتكلمش ومابينش ؟ رح تكملى موضوع بدون اى اعتراض وشوشره … وانتى مش واتقه منه … خلاص احنا نستنو ونشوفو …. شنى موافقه ؟
رنا … تمام بابا انى وعد منى نفد الا تقولى عليه بس لو ان يوسف جى ووقف عليك ان شالله اليوم الا بتنقرا فيه فاتحتى … توقف كل شى وتنهيه ؟
بوها …. خلاص تم …. بس اول ماتنقرا فاتحتك تنسيه نهائى وتقتنعى انه ماكانش شاريك ولايبيك …؟
رنا … اوك بابا …
بوها … خلاص تم الكلام توا خودى مصحفك وبرى لدارك وارتاحى لبين مانوضت امك تصلى فجر ..
رنا …. اوك بابا … ت ع خ
ناضت رنا مشت لدارها وفتحت تلفونها بعد مامدهولها بوها من سكوت ومعاه ابتسامه … واتصلت بيوسف واول ماضغطت على الاتصال .. ردة الاسطوانه عليها طول … رقم الدى طلبته غير مستعمل .. وهنا سكرت تلفون وتكت على الفراش وقعدة تفكر ودموع ينزلو منها بصمت ..
بينما عمى سالم اول ماخش باش ينوض احلام لقاها مقعمزه وناقرتهم … واول ماشافته قالتله ؟
احلام … شن الكلام الا كنت تقول فيه ياسالم للبنت ؟ انى قولت بوها بيعقلها وبيخليها تشيل موضوع من راسها وانت تقوللها نفركس كل شى ؟ شن تبى تحشمنا مع ناس ؟
سالم …. هههههههههه علاش نحشمك ..ن
احلام … شن رايك انتى ؟
سالم … قصدك انتى لو جى وخطبها ؟ ماتخافيش ماتخافيش … انى قولتلها الكلام هوا لانا الولد مش رح يجى ولا حتى يتجرأ يوقف فم الباب .. فامتخافيش .. الا وى هوا .. وقت مايخشو فى الجد يشدوها على دراع … يخافو من مجرد احساسهم بالمسؤليه … هدا ولد امه وبوه شن تقولى انتى ..
احلام …شن ظمنك انت ؟
سالم … بعون الله مارح يمشى الموضوع الا ما نبو حنا … انتى خاوى بنت بس وماتوقفيش ضدها وخوديها باللسان .. نخلو بنتنا تحت دراعنا خير ماتهرب معاه وتديرلنا العار … ونوضى كم بتصلى وخلينى نلبس خواجى ونطلع باش نلحق ..
احلام …. ان شالله ربى يصلح الحال ياررررب ويهدى نفوس .. نوتيلك فطورك ؟
عمى سالم … لا لا بنطلع بكرى اليوم عندى بضاعه بتوصل للمخازن ضرورى مانجى قبلهم ونحصر الا داخل كله …
احلام … ربى يوفقك يارب .. ماتنساش تحطلى على ابانترى فلوس وخف على ولدك هوا مش ناقصه
عمى سالم .. يصير خير .. تبو شى تانى ؟
احلام … سلامتك …
طلع عمى سالم لخدمته واحلام كملت صلاتها ورجعت رقدة …
واول ماشق عليهم صبح ومع ساعه 10 … ناضت احلام ولقت بنتها فى دارها على نفس الوضع … فاوتت الفطور وخشت عليها بصفرتها وقالتلها …
احلام … بعد ظهر بنطلع ناخد حاجات ضيافه … كانا ناقصه علبك حاجه لبكرا اطلعى خوديها معاى ..
رنا … مانبيش نطلع … لبعدين ولا بكرا …
امها … يعنى شنى مازلتى ناويه شر ؟
رنا …. شن دخل شر ؟ انى تكلمت مع بوى .. انتم مش تبو موافقتى ؟ خلاص تمام انى موافقه خودوها وانقولهاله … ولانبى نشوفه ولانسمع صوته … ماااشى ؟
امها …. هدا اخر كلام ليك ؟
رنا … اى اخر كلام ليا … عادى انى مش اول وحده نتزوج قطوس فى شكاره …
امها … ولو هما سألو على سبب ؟
رنا … قوليلهم بنتى ملتزمه ماتبيش تكلمه ولاتشوفه قبل زواج ويفضل حتى بعد زواج مانشوفش خلقته …
امها … والله والله انتى ماك طبيعيه ومختله وينارى الا بيطيح فى وحده زيك ..
رنا … خلاص اك ارتحتى منى ياامى … حطى بطيخه صيفى فى مكانى
امها … انى مش رح نجادلك ولاعاد نتكلم معاك … ماندعى الا ربى يهديك ويصلح بالك بس …
وطلعت وسكرة دار وراها … وبدت فى ضمانها وكملته .. وحطت الغدى على نار فاصوليا من اول ماناضت باش يوتى الغدى بكرى … وبمجرد ماكملت ضمانها وطفت على الغدى … بدلت حوايجها وطلعت … ومن محل لى محل وقضت كل حاجات ومن هالحظه بدى العد التنازلى … ورنا ماوقفتش اتصال كل يوم … بدون عد كم مكالمه لانا لو عديناهم ممكن يتجاوزو 100 مكالمه فى اليوم … وفاتت هالليل وجى اليوم الموعود والا بيجى قصى واهله باش يتمو فى رنا بشكل نهائى ويحددو موعد العرس …
امها …. تربحى يابنتى نوضى البسى ناس على وصول ..
رنا …. امى ماتخلنيش نلبس شبشبى ونطلع … ولا نقولك .. انى ماشيه لهدى … قسما بالله لو نقعد هنا ننخنق …
امها …. برى يابنتى شووووقك يارررربى زى مابتفضحينا مع ناس … ووالله فى الليل الا لينا تفاهم تانى …
رنا …. انى فى حوش هدى سلام …
لبست هدى عبايتها ولفت وشاحها وطلعت … واول ماوصلت لحوش هدى بنت جيرانهم وخشت لجنان درست سياره فم حوشهم … ورن الجرس …
فاطلعت احلام تجرى وفتحت ..
احلام … اهلن اهلن … تفضلو مرحبتين بيكم انستم ونورتم ..
خالتى مريم … الله يانسك يابنتى بوجودك ..
وهنا خششتهم لصالون ومشت للمطبخ باش تحط العصير و اتصلت براجلها الا كان فى المحل ماشى بيجيب دخان لروحه ..
احلام … اه سالم .. وينك الراجل برا يستنى ياسر بنتك دارت العار وبتكمل انت ؟
سالم … خلاص سكرى اهو وصلت انى وبنسلم عليه سكرى ..
احلام … خششه للمربوعه خاريجيه واهو اتصلت بولدك محمد وقالى خمسه ونكون فى الحوش …
سالم … ماشى ماشى سلام ..
وهنا خدت صفرة العصير وسمت بالله وطلعتها وخشت بيها لصالون …
خالتى مريم … مالا وين رنا ؟
احلام … رنا مرضت فجأه ورفعتها خالتها توا للمستشفى باين جايتها برده قويه .. وانتم مش برانيه .. نهى .. لا لا على قولتك احنا بنت مربينها وزى بنتى وحافضتها بشبر .
احلام … ان شالله غير قصى يفهم العدر مرات يبى يشوفها ؟
نهى … لا لا هوا بروحه تعرفيه حشومى قال مادما انتم شفتوه وعجبتكم خلاص
خالتى مريم … يابنتيى خلى مالا نخشو فى موضوع على طول … احنا اليوم جاين بنتمو فى بنت … والفاتحه على توا قصى مستعجل .. يعنى مادبينا من هنا لنهاية شهر نكونو حددنا الفاتحه وبعدها بيوم دخول .. الا لو انتم تبو عرس كامل ؟
احلام … لا لا احنا من الاول قولنا بنديرو يوم الحنه وهيا نفسها سهريه ويوم دخول وتم .. وقبلها بيوم الفاتحه وتكون سهريه حتى هيا … نبوه خفيف خفيف .
خالى مريم … . خلاص معناها متفاهمين … وبالنسبه لدهب ومقدم ومؤخر انتم خيطو واحنا نلبسو الا تبوه ولدنا مستعد عليه والحمد لله … وحجز صاله نهى بنتى قالتلى .. صالة المعلمين قنينه … وانى هكى ولا هكى بنديرو فيها دخول تبوها مشتركه الله مابارك وماحصلتوش حجز خلاص تم .. انا فى حالة حصلتم حجز فاخلاص يكون خير وبركه … وانى قولت لى نهى ومن بكرا رح تطلع معاكم بعون الله … وتاخدى للبنت الا خاطرها فيه كله … وتمو كل شى … وهوا صح بيجى مفركس بس الله غالب ولدنا بيسافر ومستعجل وانى مانبى نربط البنت معنا بخطوبه وبعدين ولدنا يمشى ومش عارفين امتى يروح ..
احلام …لا عندك الحق …
خالتى مريم … وانى قبل نحسابه رنا بتطلعلنا وبنلبسولها دبله باش يبدا موضوع رسمى قدام اهلكم وناس بس طالما هيا مش موجوده .. هااادى دبلتها وان شالله تكون فاتحة خير عليها …
نهى … اما تفاصيل فلوس ومقدم ومؤخر اكيد تفاهمو فيه الرجاله داخل ..
احلام …. الله ياررررب غير يتهنو وينكتبلهم عتبة خير والباقى كله سهل …
نهى …. ياررررررب … قبل ماننسى ياريت تعطينى جواز نهى … باش يقدملها من توا على تأشيره …
احلام … اى حاضر من عيونى لحظه بس …
خالتى مريم …. زغرطو اللطف خيركم تقول فى عزى
نهى .. ههههههههههههه ….. رووووووووووووووووو وووووووووووووووووووووووووووى
احلام… روووووووووووووووووووووووووووووووووووووووووى .
هدى … رنا … تسمعى فى تزغريط فى حوشكم شكلهم تمو كل شى سعدوووووودك ؟
رنا …. هدى انى نار راكبه فيا ودموعى على خدى وانتى ولا حاسه بيا …
هدى …. انتى غبيه … تى يابنتى اشرى الا شاريك … بتاخدى راجل مصنع منع بسيارته بحوشه بشركته بتستقرى فى المانيا ونازال حتى بتتشرطى ؟ تى والله انتى وجه فقر …
رنا …. يوسف الا عنده اكتر من هدا وانتى تعرفى ..
هدى …. الا عند بوه قصدك ؟
رنا … ايكتى اسكتى بالله عليك …
هدى …. انى ساكته زيدى نولى دموعك وتبكى وهوا مسكر نقله واشبح وين يهيج …
فاتت ساعه ورا ساعه ورنا قلبها على نار لحد ساعه 9 فى الليل وهنا شبحت لى هدى وقالتلها
رنا … شكلهم روحو … خلاص سقدينى بنروح …
هدى … وووووووه ضى هارب وشارع كله ظلام كيف بتطلعى يابنتى
رنا … ماتخافيش عليا ضلمت قلبى اكتر … يالله باى
هدى … باى …
طلعت رنا لشارع وفتحت نقالها وقعدة تفتش فى نقالها على برنامج الفلاش باش تفتحه وتشوف شن قدامها … ولكن فجأه تقبت فى شى طول فى عرض … وحست انها كانها خشت فى فى حاجه ناعمه ماتفوحش من قماشها الا ريحة channel n5 ومن قوة ريحه والخبطة لين طاحت جت مبزوقه علي شى فى ظلام …
يتبع………
لقراءة الجزء التالي : الجزء الرابع من رواية صغيرة علي الحب
لقراءة الجزء السابق : الجزء الثاني من رواية صغيرة علي الحب
للإطلاع علي فهرس اجزاء الرواية : جميع اجزاء رواية صغيرة علي الحب كاملة للكاتبة كيندا
جميع الحقوق محفوظة للكاتبة كيندا من ليبيا .
