الجزء

الجزء الثامن من رواية كنت للروح سقيا

الجزء الثامن من رواية كنت للروح سقيا

وفي الجزء الثامن من رواية كنت للروح سقيا دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة شهد محمد .

الجزء الثامن من رواية كنت للروح سقيا

عند شهد
همس :يعني اقنعيني انك لسه ما حبيتي؟
أنا : طبعا حبيتو
همس : طيب ما تقولي لود الناس وتريحي بعد ده خلاص
انا : ح اقول بس انا خايفه خايفه يبعد فجأه خايفه اتعلق بيهو اكتر واكتر وإذا حصل ومشا م اقدر اتجاوزو همس انا فقدت أهم ناس في حياتي تفتكري ح اقدر على جرح جديد؟
همس: بس لؤي عمرو م ح يسيبك برضاهو صدقيني
انا: ما عارفه والله خليها على الله بس
همس: أن شاء الله ♥️

عند لؤي :
ما كنت عارف ح اعمل شنو ولا ح امشي على وين ولا الح يقدر يتفهم مرضي منو وانا لنفسي ما مستوعب شي خفت على ردة فعل امي وشهد واخواتي واصحابي كنت خايف عليهم اكتر مني حقيقي انا اكتر انسان مقتنع بانو ربنا قادر على أي شي وما بشيل هم اي حاجه بس كيف اقدر على المرض ده؛؟ كيف اقدر على مرض وانا لما كنت صغير بشوف جدي بموت قدامي بسببو كيف ح اقدر وانا بشوف جدي كل يوم بتعذب بسببو
طيب وامي؟ امي ح تعمل شنو لو عرفت؟ امي مجرد ما تسمع بالمرض ح تنهار
استغفرت وحوقلت كتير بعدها سقت العربيه واتجهت على بيت صحبي خالد بعد ما قعدنا وجاب لي مويه
خالد : مالك قالب كده؟ أوعى يكون خطبو شهد 😭😂💙
لؤي :لا الموضوع اكبر من كده
خالد :طيب مالك احكي
لؤي :ي خالد من غير لف ودوران تتذكر لما حكيت ليك عن جدي وعن مرضو
خالد : طبعا متذكر
لؤي :اا.. حاليا المرض ده جاني
خالد :…………..
لؤي :عارفك مصدوم ونفس صدمتي والله بس ما عرفت امشي على وين خالد انا بموت بالبطئ فاهمني؟
خالد : تموت كيف يعني انت بتهظر؟ كيف يعني بس ابدا بالعلاج طوالي مهما كلفك انا معاك ي صحبي ماف شي بجيك بس ما تخت فكره الموت في راسك
لؤي :انت فاهم ماف علاج
خالد :كيف يعني في مرض ما ليهو علاج ؟ 💔… لؤي أوعى تكون بتهظر لانو دي ما حاجه بهظرو فيها اياك ي صحبي والله ما اخليك 💔
لؤي :ياريت ياريت لو هظار

عند شهد :

بتصل على لؤي كتير وم رد وصراحة ما من عوايدو انو يعمل كده مهما كان مشغول ما بعمل كده أقل شي برسل رساله انو مشغول بديت اقلق. بس حاولت اطمن نفسي ب ح يرجع لي شويه كده
عدت ساعه واتنين وتلاته وأربعه ويوم ويومين ونفس الشي وانا خوفي كل يوم بزيد أو كل ساعه ما عرفت ح اعمل شنو كل الخفت منو اني افقدو هو كمان ما ح اقدر على جرح جديد و الله 💔

عند لؤي :
قعدت مع خالد يومين وكنا بنحاول نفتش على حل وح أعمل شنو ونهايتي ح تكون شنو بالضبط مع المرض ده خالد طمن ناس البيت انو انا معاهو وكده وما كنت قادر اتواصل مع أي زول ما ندمت لما حكيت لخالد اول واحد لانو خالد بطبعو بحب يفتش على حلول طوالي ف بحث اكتر واكتر واتواصل مع اكتر من دكتور وخطط لي طريقة علاجي و ح اسافر وين كان مخطط لكل شي من أصغر شي ل أكبر شي
في اليومين دي قدرت اجمع نفسي واقنع نفسي انو خلاص كل العلي اعرف كيف أتعامل مع المرض ده قررت انو ما يأثر على ابدا ولازم أظهر انو قوي على الأقل عشان اهلي وشهد
شهد؟ انا كيف نسيت شهد؟ كيف نسيت اطمن عليها كيف نسيت اتصل عليها؟
طوالي فتحت تلفوني واتصلت عليها اول ما ردت
شهد :انت كويس؟ فيك حاجه؟ لي اختفيت كده؟ خفت. عليك يخ ما عرفت اعمل شنو لي عملت كده
لؤي :شهد انا كويس الحمد لله واسف جدا اني عملت كده بس كنت في حاجه شاغله بالي
شهد :حتى ولو ياخ ما عندك خمسه دقائق بس تطمني
لؤي:شهد اهدي انا والله كويس حقك علي
شهد :………..
لؤي :شهدد!
شهد :ما شهد ولا شي
لؤي :شهدي خلاص ولا شهودتي؟
شهد :ولا دي ولا دي خلاص أقفل زاتو
لؤي :بحبك وانتي جايطه
شهد :حبك برص يلا
لؤي :عايني خليك معاي عايز اقفل الباب طالع مشوار قريب
شهد :هه بتحلم ولا بنتظرك ولا شي
لؤي :خلاص برجع ليك بس
…( خلصت وركبت العربيه قلت ارجع ليها بس لقيت الخط لسه فاتح) انتظرتيني ي حلوه 😉♥️
شهد :لؤي يخ جاده معاك والله خفت عليك ما ممكن معاك
لؤي :و الله يا شهد أول مره واخر مره أن شاء الله بعدين طلعتي بتخافي على يعني 😆♥️…. انا حصل ليك شنو في اليومين دي
شهد :كل الحصل انو عرفت شي جديد
لؤي :شنو؟
شهد :مستعد؟
لؤى: طبعا
شهد :اكتشفت اني بحبك وشديد اكتشفت انو انا من غيرك ما بقدر والله
لؤي : (وقفت العربيه على جنب بسرعه) كيف كيف! كدي قوليها تاني؟ جد ي شهد ولا بتهظري؟
شهد: ما بهظر والله بحبك جد جد
لؤي : الحمد لله عشت وشفت اليوم ده… انا ح اجيك اسي ده ي شهد طيب
شهد: تجي لي وتعمل شنو ي ولد؟
لؤي:اتكلم مع أمك ي شهد خلاص اعترفتي ماف شي بمنع ناخد خطوه جاده
شهد؛ :ويت ويت امي لسه محبوسه فضل ليها اسبوعين بعدين ده ما الوقت المناسب
لؤي :اسف والله اتحمست ونسيت… ااا أمم طيب ي شهد انا عايز اقول ليك حاجه طيب
….. أو ما اسي بكره طيب نتلاقى بكره؟
شهد :صعبه و الله
لؤي :ما اخد من وقتك كتير أن شاء الله
شهد : طيب ان شاء الله ♥️
لؤي :بحبك ي بت الناس😂😭💙
شهد :خلاص اسي بتراجع 😆
لؤي : خلاص خلاص
بعد قفلت من شهد مشيت على البيت سلمت على امي واخواتي ومشيت غرفتي أثناء ما انا بغير في ملابسي اتصل على خالد
لؤي :ايوه ي خالد
خالد :وين انت ياخ؟
لؤي :مشيت البيت و الله قلت اجيب لي شويه ملابس ومحتاج لورق
خالد :ح تكلم الوالده؟
لؤي :ما اعتقد اقدر حاليا انا ما قادر اتخيل ردة فعلها امي خوافه وشديد ف كيف ح تكون رده فعلها كيف ح أوقف قدامها انا عندي نفس مرض جدي صعبه و الله
مع كلمتي دي سمعت صوت حاجه قويه وقعت والصوت كان قريب شديد أتلفت
وكانت امي 💔

” لم تعد الحافة مرعبة، لقد سقطنا منها عدة مرات”

يتبع ………

لقراءة الجزء التالي : الجزء التاسع من رواية كنت للروح سقيا

لقراءة الجزء السابق : الجزء السابع من رواية كنت للروح سقيا

للإطلاع علي فهرس اجزاء الرواية : جميع روابط اجزاء رواية كنت للروح سقيا للكاتبة شهد محمد

جميع الحقوق محفوظة للكاتبة شهد محمد .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى