الجزء

الجزء الثاني من رواية تزوجنا ولكن هل يبقي الحب

الجزء الثاني من رواية تزوجنا ولكن هل يبقي الحب

وفي الجزء الثاني من رواية تزوجنا ولكن هل يبقي الحب ماذا يا تري تتوقع أن يحدث مع أبطال حكايتنا ؟ هل يا تري سيكون هناك مواقف جميلة فيما بينهم ؟ أم سيكون هناك رأي آخر للكاتبة كيندا ؟ كل هذا وأكثر سوف نعرفه في السطور القادمة بإذن الله .

الجزء الثاني من رواية تزوجنا ولكن هل يبقي الحب

سهيله … دقيقه بس الارضى يضرب نرد ونجى نسيق السحنتى اوووووف امتى بنقلب وجهى بس ان شاله حتى مع بنغلاديشى ياهمى انى كل عام نقول السنه ..
سهيله << بعدين قامت الارضى وقالت …الووووو
منى …. اهلين سهيلله شن اخبارك ..
سهيله .. خيره صوتك هكى كنتى تبكى ؟؟
منى … لا لا مافى شى غير بنسالك هدى لانى بكرى اتصلت وامى قالتلى العشيه بتنزلنا قاعده ؟؟
سهيله … لا لا مشت لحوش بوها شن فى ولا توا ماينفعش الا تحكى لهدى ؟؟
منى …. سهيله انى مضايقه بالله ماتزيدها عليااااا ..
سهيله …. شن فى اححححححححكى ؟؟
منى … عزوزتى من اسبوع وهيا تدورلى فى شر ..
سهيله .. امتى لقيتيها كانك من تانى يوم سافرتم ..
منى …. بتلفون … كل مانتصل باش نطمن علي ….
سهيله … غير دقيقه بس فهمينى كل شى من الاول هيا خيرها عزوزتك علاش تطمنى ؟؟
منى …. اتصلت بى ولدها من اول اسبوع وقالتله تانى يوم نظم فى عولة العرس نزلقت طحت فى حمام ومابيتش نقولك باش مانرعشكش من تالت يوم على اساس مهتمه هيا مهم بديت كل فتره وتانيه نتصلو نطمنو عليها وبعد مايكلمها يعطينى سماعه ويمشى ….. فااليوم وهىاا بتسكر قالتلى <<هيا مالا بسلامه خلى نمشى نبارك لجارتى سميره ربى يحبها بنتها مطلقه تزوجت عزابى والله بدت موضه هاليومين زواج مطلقين بعزابيه عشنا وشفنا .>>.. انى طبعا نصدمت سكرت وقعدت نبكى لانا مش اول مره تلمحلى انى مطلقه وولدها عزابى وانى نحمد ربى انه شافلى وانى اكيد ساحرتها وياريت تقولى فيه مباشر لا لا تلوح فى دوا من تحت لتحت تخايلى من اول شهر وتوا بس تاكدت انا وافقت غصبن عنها وماتبنييييش بكلللل لا والالعن من هكى قالت لولدها دكتور طلب عليا علاج طبيعى لمدة 3 شهور فابنجى وبنديره عندكم … معقوله انى عروسه وكيف سكرت شهر بتقعد معاى فى شقه ميترو فى ميترو … والله ماهى حتى كبيره فيها دارين ومطبخ وحمام وبتقعد عندى تلاته شهور هيا وشبانيا … ولما قتله باهى نكبرو شقه ولاناخدولهم شقه جنبنا قالى لا ومالى وكيف تقولى هكى وماناقص غير نلزهم … علاش انى نصيبى هكى .. وياريت حتى كويسه معاى .. والله الا ماتكرهنى فى عيشتى ..
سهيله ….. اااااااااه ياربى الباين انا الا صابلنا مكترلنا حنا من عين الهم واختها … الكارته انا ماليكش الا انك ترضى بالامر والواقع وخلاص واعصرى على روحك ليمه وماترديش مهما قالتلك لانا والله فى الاخير تطلعى انتى الاماتنفعيش وطويلة لسان وامه هيا الباهيه
منى …. تعرفى قلبببببى مليان وبنطربق نحس فى روحى قسما بالله قريب نروح ونخليهاله هوا وامه
سهيله …. منى خير دعاويك ماكنتيش هكى .. مالا كانا تشوفى البلوه الا عندى شن تقولى …
منى …. اى والله بنسالك من يومها ونسيت … شن صار معاكم ؟؟
سهيله … قاعدين نفس النغمه قالى اول مانصب سقف نجى ونتقدملك …
منى …. وعلاش مش توا ؟؟؟
سهيله …. قالى معقوله لينا فاسخين 4 سنين وتوا نجيك ونفس شى قاعد ماصبت حتى سقف …
منى …. وهوا صح مش لما فسختو خلينه كيف بيبدا فى صب سقف ؟؟ شن صار ؟؟
سهيله …. اااااااااااااااااااه ياربى قالى لما سيبنا بعض كرهت كل شى ونسدت نيتى فا سيبت البنى وكرهت حتى سيرته وسيرة الجواز وتوا لما رجعنا قالى بنكمل الا وقفت فيه واهو نستنى .. اسمعى .. امى حسها سكرت باب جنان سكرى مووووضع مازال ماقلتلهاش ..
امهم ….. هداااااااا كله ترغى ؟؟ من الا فى تلفون ؟؟
سهيله … هادى منى تدور فى هدى تبيها ..
امها … هاتيها هاتيها وبرى ديرى الا قتلك عليه … ايواااااا خيره صوتك
منى …. لا لا محصلتها زكمه بس تعرفى انت هنا جو صقع فاتغير عليا جو .
امها … شفتى مرة خوك ؟؟؟
منى ….. خيرها ؟؟؟
امها …… روحت دابك مدت ايدها وركبت وبعدها ناضت ومشت لحوش بوها طول … ولا حتى قالت ننزل نقعمز مع عزوزتى نهدرز عليها وهوا هدكا زى طرررطور تحرك فيه من ودنه … مش منه ولدى ونعررررفه لاحسه دماغها ..
منى ….. ماما علاش تدوى هكى ؟؟ والله انتى الا ظالمتيهم … انى هدى نعرفها ومؤيد كدلك نعرفه واكيد ماطلعو الا مافى شى … وعلى عموم توا تروح ونكلمها ورح يطلع كلامى صح …
امها …. باهى باه شكارة العروس امها وخالتها وشوى من قبيلتها .. خلاص برى برى سليمتك وتوا لما تروح كلميها هونى هيا سلام ..
منى … سلام
طلعت سهيله سيقة جنان وسقت الغرس وقعمزت فى جنان وشدت تلفونها وفات ساعه وراء ساعه لحد ماسمعت الحوش يشرين وهنا فتحت الباب ولقت هدى حطها مؤيد وطلع وهنا قالتلها ..
سهيله … دودى راهو منى اتصلت بيك مبكرى وتدور فيك ..
هدى … هههههه الكلبه هيا والله حتى انى استاحشتها هلببببه اشبح شن صار معاها ..
سهيله … هههههه غير حصلى زرقه من امى وتوا نحكيلك ..
خشت هدى للحوش ولقت عزوزتها مطنشه وقايمه خشمها عليها وبينما هدى قالتلها …
هدى … خالتى نركب نبدل حوايجى ونازله ..
عزوزتها …. براحتك ديرى زى ماتبى ..
ركبت هدى ولبست لبسه مريحه ونزلت واول ماخشت للحوش لقت عزوزتها واخده مندار ومتكيه فاتحه على شيخ ومقويه تلفزيون << متع مانبى حد يحكى انى نتفرج >> … فاغمزتلها سهيله وقالتلها ..
سهيله … هدى انى بنخش مطبخ نطيب العشى تعالى جنبى ..
هدى .. اوك ..
وهنا خشت هدى للمطبخ وسهيله بدت تحط فى المكرونه المبكبه على نار بينما هدى طلعت سلاطه وبدت تدير فيها وقالتلها ..
هدى …. ماقالتلكش منى اى اخبار عليها ؟؟؟
سهيله … ااااااه قالتلى يانارى وزادت ضايقتنى عليها ..
هدى … خيرها ؟؟
سهيله … عزوتها .. باين انا بتشدها ورا منى لين تفددها فى عمرها وربك يستر فى عقابها ..
هدى …. هيا باين عليها امه صعبه شوى .. انى من لما شفتها فى خطوبه كيف تغز لى منى من تحت لتحت عرفتها ..
سهيله … اااااااااه ياربى باين لااانى ولاهيا مكتوبنا الراحه ..
هدى … علاش خيرك ؟؟
سهيله … توا نكملو حوسة مطبخ ونحكيلك اصلا انى بجد محتاجه نفضفض لحد …
طيبو العشى وكيف بيحطو العشى على خشت مؤيد وهنا قالتله امه ….
امه …. طيب فييييييك << وطرمت شوربها >> فاقعمز جنبها وقاللها ..
مؤيد … نوتيلا خيرك قلبتيها عسل اسود شن فى خيرك ؟؟
امه … لاانت ولامرتك مديرلى قدر ؟ انت طلعت ومرتك حتى جت لابت تكلمنى ولا تعبرنى خشت للمطبخ طول ومن بكرى وانى نسمع فى ضحك وتلوقين ..
مؤيد … اكيد شافاتك قمتى خشمك عليها .. انى نعرفك شن بتقوليلى توا ههههه ..
امه … باهى باهى .. اصلا .. ولابلاش
مؤيد … توا معقوله انتى تتوقعى انا هدى بتاخدك منى ؟؟ تى انتى الكل فى الكل ياست الحبايت ههههه نقولك شى انى الليله بنرقد جنبك وبتخرفيلى زى قبل هياااااا تى منى هدى هادى ..
امه …. اى اى صدقتك …
مؤيد … مادمك انتى هكى واللله الليل الا مانبات جنبك بس هيااااا وبعدين قولى مؤيد مش معدل ..
وهنا امه بس ابتسمت وعطت وجه لمرته وليه وانقلبت 180 درجه وكان الا فات كله كدب … وحطو سفرة العشى وتعشو ومن هنا بين غسل معايين وتهدريز طقت ساعه 12 فى الليل والكل خش يبى يرقد وهدى كيف جت بتقول لمؤيد …
هدى … مؤيد .. انى بنركب .. هيا شنى بتركب ؟؟
مؤيد … والله مانى عارف شن بنقولك .. بس بنختخ امى شوى حرجانه منى فامرات بنقعد شوى هنا اركبى انتى ..
هدى … شنى يعنى … قصدك الليله بايت هنا ؟؟
مؤيد … ماقولتش هكى قولت اهو نتختخها شوى وبعدين نركب ..
هدى … مؤيد انتى تحكى على امك ولا مرت تانيه ؟؟ قصدى على شن بتختختها بزبط ؟؟
مؤيد …. خلاااص بالله خلاص توا اركبى قولنالك وبعدين توا نتفاهمو ..
ركبت هدى وحست حاجه مقعمزه على قلبها .. سكرت باب شقتها وخشت للحمام دوشت ولبست لبسة نوم وبعدها رقدت على سرير وفتحت سهره وقعدت تتقلب يمين يسار ومش جايها نوم … وحارقتها تصرفات عزوزتها .. وفاتت ساعه ورا ساعه لحد ماجت ساعه اتنين فى الليل … ووهيا كيف طقت ساعه 2 فى الليل ناضت من الفراش تبى تخش الحمام بس اول ماسمعت الباب ولت تجرى وخشت لسرير وعطت بالقفى … بينما هوا سكر الحوش بالشوى وخش لدار ووقف شوووى بدون اى صوت وهنا هيا حاولت تظهر بالنوم بس فجأه سمعت حد قرب منها وقعمز على حاشية سرير و…..

يتبع ……..

لقراءة الجزء التالي : الجزء الثالث من رواية تزوجنا ولكن هل يبقي الحب

لقراءة الجزء السابق : الجزء الأول من رواية تزوجنا ولكن هل يبقي الحب

للإطلاع علي فهرس الرواية : جميع اجزاء رواية تزوجنا ولكن هل يبقي الحب للكاتبة كيندا

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى