الجزء الثاني من رواية هدوء ما قبل العاصفة

وفي الجزء الثاني ماذا يا تري سوف يحدث مع ابطال الحكاية ؟ هل سيكون هناك الجديد من الأمور الشيقة ام ستسير الأمور بشكل طبيعي تماماً ؟ سنعرف ذلك سوياً في السطور التالية .

الجزء الثاني من رواية هدوء ما قبل العاصفة

احلام ….. باهى حبيبى ان شالله ربى يوفقك ياررررررب ويعطيك الا فى بالك فى امان الله …

طلع مجدى وهوا يتنفخ وبدون مايرد عليها ولا كلمه وقربع الباب وراه بينما خشت احلام للمطبخ وقعمزت على صونية الغدا وتفكر فى الا قالهولها دكتور ….. وهيا كيف سرحانه سمعت الباب يطق بالقوه فا مشت تبى تفتح واول مافتحت الباب لقت فى وجهها اختها …
احلام ……. خلعتنى يابلى خيرك تقولى بترفعى باب فوق راسك ….
مرام ….. فرحانه هلبببببببببه بنطير   ..
احلام ….. باهى غير خشى خشى ولتطيرى ومعاش نلحقك …. ارمى كندرتك والحقنى على مطبخ … كيف حطيت الغدا …… قووووليلى شن هالريح الا جابتك ؟؟
مرام ….. كيف مروحه من الكليه قولت للباص يحطنى عندك هههههه نهار ابيض تبنى ندخل الباقه هادى قدام محمد تبيه يقتلنى مالا تعرفيه انتى ويبدا يضرب فى الايبر لبوى …
احلام ……. نهار ابيض والله جايك يوم اسود على هالهدايا هادم ….. مش كانا خطيبك ديرى العار …
مرام ……. ياوخيتى نموت فيه يااحلام نمووووووت فيه انتى ماتتصوريش قداش يحبنى تعرفى لما طلع من جيبه الخاتم دهب ولبسهولى جتنى صدمه صدمممممممممممه ….
احلام ….. باهى ربى يهنيك ان شالله اهم شى ردى بالك من كلام ناس وخيتى راهم ناس مايحرموش … وردى بالك منه قبل كل شى راهو رجاله مافيهمش امان اسالينى انى …
مرام ….. اسمعى على سيرة الامان …. كأنى اللتمحة راجلك اليوم فى قهوة الجلد …. انى ماقدرتش نركز لانا القهوه زحمه هلبه وهوا عاطى بالقفى وانى وقتها كنت طالعه انى ومهاب وانتى تعرفيه كانا يلقانى نشبح يحسابه غير فى شى ….
احلام …. << سكتت شوى >> لا لا شن تقولى انتى مستحيل شن بيدير غادى تحاسبيه مالا فرخ …. واحد مواليد سبعينات شن بيدير غادى …..
مرام …… ههههههه ضحكى انتى تى هما شادين الخط اكتر ما احنا الا نقرو غادى ….
احلام …….. سكتت شوى بعدين غيرت موضوع اسمعى بتتغدى ولا نقيم معاين …… سديتلى نيتى سد الله نفسك ….
مرام ….. قيمى قيمى ….. ياوخيتى والله مانقصك سمن …. رحتى زى برميل والله نحس فيك فوتى 100 نهارك ابيض هوا محافظ على جسمه وانتى شورك ماتطلعى من مطبخ …..
احلام …… ؛؛؛؛؛؛؛ << فجأه قعدت تبكى >>
مرام ….. خيرك ….. نبصر عليك انى خيرك بجد خيرك فى شى صار ومخبيتيه .. ؟؟
باهى غير تعالى فى صاله قعمزى واحكيلى كل شى ….
احلام …. اوك
مرام …… شن فى قوليلى ؟؟؟
احلام …… حاسه نفسى بقايا مراه …… والله حاسه نفسى حطام ….. خلاص معاش عندى شن نعطى تعبت ….
مرام ….. شن فى يابنتى ….. تى انتى كله كله عمرك 27 سنه ….. تى العفو الا يسمعك يقول عمرك 77 سنه …
احلام …… حاسه فى شى مش طبيعى فى حياتى معاه …. حاسه انى عايشه على الرف ….
مرام ….. كيف ؟؟
احلام …… شن بنقولك …… من اول ما ينوض من صبح مانشوفاش بكل ومانلحقش منه الا على ريحة برفانه بس …. ولما نجى نكلمه نحس انه يكلم فيا من ورا خاطره ونفسه … وحتى لما نجى نعبرله على مشاعرى نحس انا يحاول يصكر موضوع معاى … تصورى مرات نبدا نحكى معاه برومانسيه …. يبدا يقوى صوت تلفزيون … او يقلب نقاله … او يفتح تاب او لاب توب …… تصورى معاش ندكر اخر مره حط عينه فى عينى …. نشوف فى بنات الا فى مدرسه يتجكترو برجالتهم وانى ساكته مش عارفه شن نقول ….. نبدا نتمنى نسكر موضوع ولا نقولهم انى بنطلع او اى شى مهم مانسمعش شى ….. وفوق من هدا كله بديت لما نضايق تفتح تلاجه نقعد ناكل ….. بديت معاش حاسه بنفسى اصلا ونتجنب حتى نوقف على مرايه ….. ولما نوقف على مرايه نقعد نبكى نحس انا الا قدام المرايه مش انى …. وحده تانيه غيرى ….. تعبت من انى نلعب غير موجوده فى حوش ….. وفوق من هدا كله حتى مشاكلى او اى شى يصيرلى نخاف نقوله عليه …… لانا اى شى فى دنيا انى سبب فيه …. اى شى ممكن انتى تتصوريه ….. والكارته انى حاسه انا فى شى غلط فى حياته …. بس خايفه مش عارفه كيف نتصرف …. انى نخاف انى نكتشف شى يخلينى نضطر انا نلم حوايجى ونطلع ….. وانتى عارفه نظرة المجتمع وبوك وخوك قبل كل شى …..
والالعن من هكى هكى الا قالهولى دكتور …… احتمال كبير البيبى يطلع منقولى ….. تصورى ماقدرتش نقوله ….. ماقدرتش خفت ماعرفتش علاش …..
تعرفى انى شن مفتقده اهم شى الحنان والتقه والامان حاسه نفسى فى اى لحظه برا حياته ….. والكارته انى مش عارفه ندير شى ……
مرام …… اطلبى طلاق وانى نوقف معاك …… والله صدقينى تتحملى مدلت الناس ولاتتحملى واحد زيه …… على شنى شايف نفسه عليك …… تى طز فيه …
احلام ….. سهله دوا …… انى لو بنطلق شن بنقولهم ترا …… وبيقولولى ….. شن منقص عليك اصلا كل شى موفرهولك وحتى من خدمه تخدمى ….. وياسر كان راضى بيك وانتى ليك اكتر من سنه ماقدرتى تجيبيله نص عيل …..
مرام …… تعرفى كانا نطيح فيها نمادج هيا انى قسما بالله نوريه النجوم فى عز القايله ….. انتى الا مسكسكسه بس هدا اصلا يبى وحده تربيه وتوريه جو الا يدير فيه ….
احلام …… اسكتى اسكتى حسه جى …… اشبح علاش روح بكرى اصصصصص
مرام …… حاجه والله بلكه انى طالعه ومسيبتهاله مره وحده …… ينوض ركايه ولا ااتنين ….
مجدى …… اهن اهلن …… مرومه شن الا خبار …… عاااااااش من شافك وينك وين الغيبه ….
مرام …… اهليييييييييييييي ……. ههههههههه انى الحق مالياش هلبه كيف شفتك ….
مجدى …… امتى شفتينى ؟
مرام …. بكرى فى جامعه فى قهوة الجلد ويخى حتى جيت حتى بنسلم عليك ؟؟؟
مجدى …… يتهيالك هههههههه وراسك ماهو انى ….
احلام ….. قوتلها انى اكيد تلخبطى ولا فى حد يشبهله …
مرام … <<< فى حاطرها >> اى اى فوته على موشم …. ماهو لاقى مغفله تفوت عليها فى طروحاتك …
مجدى ……. ههههههه تى غير شن هالطرحات والرشاقه بس بالله سلفى اختك شوى منها ههههههه …
مرام ….. اه اه اه اه لولا همك اختى كانت هكى ينشو عليها زى دبان ويحلفو براسها مايحنتو …. غير الله غالب النصيب    ….. هيا مالا بنمشى انى توا …..
احلام …. خليك …. هوا اصلا ماشى للاستراحه وبى يبات الليله …. وقالى نادى وحده من خوتك ….
مرام ….. ماجبت شى معاى انى …..
احلام ……. توا نعطيك بيجامه منى البسيها …..
مجدى …… هههههههه تى بيجاماتك تلبسها وتلبس 10 زيها هههههههه توا نخطمك توا على حوشكم هاتى حاجتك وتعالى ….
مرام ….. لا لا صحيت توا نلبس اى شى ….. برا انت سلامتك وقلت سوك ……
مجدى …… وتيتلى مانلبس ؟؟؟؟
…. احلام …… واتيات من امس تلقاهم فى دولاب ….
مشى مجدى لدار وبدل حوايجه وطلع وخشت احلام ومرام للمطبخ يغسلو فى معايين الا ليهم اكتر من تلاته ساعات فى مطبخ
وهنا قعدت مرام تهدرز مع احلام وقالتلها …..
مرام ……. انتى تحبيه ؟؟؟؟
احلام …… ايه ….
مرام …… باهى هوا علاش يتصرف معاك هكى ؟؟؟
احلام ….. مش عارفه …. وهدا الا مخلى نفسيتى زى زفت ….
مرام …. تعالى هنا شن قصة انا البيبى متعك مش سليم انى نحس انا دكتور مش فاهم برى شوفى وحد تانى ….
احلام …… وانى هدا الا بنديره ….. بس كارته لو طلع زى ماقالى دكتور …..
مجدى …….. وشن قالك دكتور يافالحه ؟؟؟؟؟؟ ……..

يتبع……..

لقراءة الجزء التالي : الجزء الثالث من رواية هدوء ما قبل العاصفة

لقراءة الجزء السابق : الجزء الاول من رواية هدوء ما قبل العاصفة

للإطلاع علي فهرس اجزاء الرواية : جميع اجزاء رواية هدوء ما قبل العاصفة كاملة للكاتبة كيندا

جميع الحقوق محفوظة للكاتبة كيندا من ليبيا .