الجزء

الجزء الحادي عشر من رواية الحلال والحرام

الجزء الحادي عشر من رواية الحلال والحرام

وفي الجزء الحادي عشر من رواية الحلال والحرام للكاتبة سلطانة كوكي ماذا سيحدث مع ابطالنا من مواقف جميلة ومميزة ؟ دعونا نعرف إجابة ذلك في السطور التالية بإذن الله ونتمني لكم قراءة ممتعة ومبهجة .

الجزء الحادي عشر من رواية الحلال والحرام

البنات ال4 ملتهيات في امتحانتهم يلي كانت عالأبواب وملك حايسه بكل من جهه الامتحانات ومن جهه خايفه ومتوتره من تجهيزات عرسها يلي بعد الامتحانات هالشي شاغلها واجد ومش عارفه شنو ادير بحتت في نور خشت عليها توا وهي تبتسم : خيرات كيف حالك يا ملوكاا
ملك انصدمت : انتي كنك جيتي مش عروس 😒
نور ضحكت : سلمي بالاول وبعدين ليا 10 ايام متزوجه
ملك : عادي بس دغري طلبتي يشيلك لعند خالك
نور : شنو فيها وبعدين ماما جات معايا تعالي سلمي
ملك : حانسلم بسرعه وانجي نكمل قرايتي جننتني
نور ضحكت : باهي لو تبي مساعده انساعدك تمام
ملك : لا سلامتك مانبيش نتعبك معايا عشان عريسك
نور قرستها : راه نزعل منك مش نحنا زي الخوات
ملك : صح بس انتي عروس لاحقه عالمعاناه معايا
نور : استغفر الله العظيم منك بجديات عنيده ومتعبه
ملك ضحكت وصبت سلمت علي عمتها غزاله وردت لغرفتها مره تانيه ونور شيرتلها : باي يا مهبوله بباي 😂
ملك : توا نوريك وبعد نتزوج انقولها لك وبباي يا عروس
نور ضحكت وطلعت وكانت فرحانه واجد خاصة ان هيثم وعيلته لطيفين معاها واجد ويحبوها وهي حبتهم كلهم
اسلام ركب لشقته يلي موجوده فوق حوش عيلته ويدور بعيونه علي رغد لقاها توكل في تيلا 🐈 والبسمه علي وجها ابتسم : علي فكره بديت نغار من تيلا امتعك هذي
رغد بحتت فيه : تيلا الهديه الاولى من باتي ونحبها واجد
اسلام بغيره : وانا ؟ لنا 10 ايام متزوجين ما قلتي نحبك
رغد وجها احمر قعد وماقدرتش تبحت فيه ولا تقولهاا
اسلام يبتسم : شنو للدرجه هذي صعبه يعني قوليهاا
رغد : والله متحشمه بس توا ندزها لكي مسج 🙈
اسلام مصدوم : هذي اخرتها مسج معقوله زوجتي اتقولي انحبك عن طريق مسج لا حول ولا قوة الا بالله يا عوينك يا تيلا ميته فيك واكتر مني ( اه يا حظي المتفترش )
رغد ضحكت ومنفجره ضحك علي كلامه وهو يبحت فيها ويبتسم : عشاني قوليها نبي نسمعها منك وردي روحي ليا
رغد : انت كل يوم تبي تقعد اتزن عليا عشان انقولها لك
اسلام : طبعا نبي نسمعها وانتي بخيله في قولتهااا
رغد : باهي حانقولها بس حانغمض اعيوني 🙈 نحبك
اسلام ضحك : عاوديها اخرا بس بحتي فيااا 😒
رغد : لا صعبه هكي مستحيل نقولها وانا نبحت فيك
اسلام : لا حاتقوليها انا زوجك يا بنت مش غريب عليك
رغد ببراءه : توا بعد نتعود عليك توا نقولها لكي ديما
اسلام : يعني في امل اني نسمعها وديما ديمااا 😂
رغد : اها ديما وشالت تيلا بين ايديها وباستهااا
اسلام : ماعمريش حسدت حاجه في هالدنيا الا تيلا 🐈 قطوستك يلي طول الوقت مهتمه بيها وانا راقد ريح
رغد ضحكت عليه : ريتي يا تيلا يغار منك خبشيه
اسلام : لو اتخبشني نشيلها تحت عند نسرين وديماا
رغد 😢 : نهون عليك تحرمني منها والله نحبها
اسلام ضحك : لا ما تهوني عليا وبالعكس فرحتك من فرحتي ويلي انشوف فيه ديما انحبه فيكي واجد ومستحيل نحرمك منها ولا من كتاكيتها بعد تتزوج
رغد ضحكت : ومن حاتتزوج مانعرفش قط ذكر
اسلام : لما يجي وقتها ساهل توا نحصلو بأذن الله
رغد فرحت واجد : شكرا وربي مايحرمنيش منك
اسلام بأبتسامه : ولا يحرمني منك يا بنيتي الغاليه
رغد شيرت علي نفسها : انا بنيتك بس انا زوجتك 😂
اسلام : انتي كل شي بنتي وزوجتي وامي وكل حاجه وغلاوتك كبيره عندي واليوم حانتعشو تحت مع عيلتي
رغد : انا كنت حانقولها بس القلوب عند بعضهاا 🙈
اسلام : انتي شاطره تقولي هكي بس مافيش نحبك
رغد ضربت راسها بخفه بيدها : مستحيل تنساهاا انت
اسلام : ولا حاننسى ان زوجتي تعبر عن حبها لقطوستها اكتر من زوجها والله عيب ولكن حانتحمل صدقيني
رغد أبتسمت : باهي انا أنحبك يا اجمل زوج في الدنيا
اسلام شير علي اعيونه : ريتي الحب في اعيوني لما قلتيها وبرضاك اخرا وانتي تبتسمي ربي يحفظك ليا ❤
رغد وجها احمر قعد وعدت سيباته واسلام مجننها واجد لكن هو كل شي بالنسبه لها قعد وحايقعد علي طول ❤
بعد ساعتين اتصل هيثم بنور : انا في الطريق وتي روحك
نور : تمام وخالي قاعد لو تبي تسلم عليه قبل مانمشو
هيثم : اكيده هذي حانسلم عيب وانا مانحبش العيب
نور ابتسمت وبحب : تمام نراجي فيك ما اطولش
هيثم : يكفيني هالصوت يلي خلاني نبتسم وفرحت
نور : ربي يدوم بسمتك وفرحتك هيا لازم نسكر توا
هيثم : اه منك خلاص سكري توا وقريب قاعد انا 😎
نور ضحكت : توا قلت انك في الطريق وبحتت في الباب يلي رن زادت ضحكتها وعدت فتحت لقاته هو : جيت
هيثم نزل التليفون من وذنه وبأبتسامه : طبعا انا سوبر مان اصلا ورايفت عليكي واجد خليتك ساعتين ومعاها ساد صح وبعدين بنت خالك عندها امتحانات وتبي تقرا
نور : ههه اه منك والله عارفه ومش مطوله انا بروحي
هيثم قدم اكتر منهاااا : ماتبيش اتقولي اتفضل يعني
نور وخرت لما قدم وبأبتسامه : تفضل يمينك ههههه
هيثم كر خدها : لا يساري يلي هو انتي وغمزلها وخش وهي تضحك ووجها احمر عدت جوا لخالها : هيثم جاه
مفتاح صبا : توا نقعد معاه اشويه وعدا وهو يبتسم
امها غزاله : خالك رافض مشيتنا ويبينا نقعدو للعشاء
نور : والله هالكلام بين الرجاله لو وافق هيثم حاضر
فاطمه : لا حايوافق وحاتقعدو للعشاء ونورتونا والله
نور ابتسمت : تسلمي يا خالتي والنور نورك ❤
بعد فتره اليوم هو عرس ملك وأحمد يلي فرحان وطاير عقله كان يرجا في اليوم هضا بفارغ الصبر اول ما شافها بفستان العرس ما شال أعيونه من عليها ولا طلق يدها وكل اشويه يقول : ما شاء الله عليك انتي فعلا ملاك ❤
ابتسمت بخجل : لو قعدت كل اشويه تقول هكي نموت
احمد : بعيد الشر عليكي فيا ولا فيك شنو رايك نمشو توا
ملك : نودع عيلتي قبل وخاصة امي وصديقاتي 🙈❤
احمد ابتسم : تمام هيا تأخرنا واجد ومزال زحمة الطريق
ملك هزت راسها وصبو مع بعضهم وكلهم يصفقولهم طالعين يجننو مع بعضهم وملك ودعت عيلتها واحمد باس يد امه وراسها : ربي يطول بعمرك ويعطيك الصحه يارب
امه ابتسمت : ربي يحفظك ويسعدك يارب انت وملك
احمد قعد يبتسم وطلع يراجي فيها عند الباب برا وكان فرحان بعد وقت انفتح الباب وكانت ماسكه يد امه يلي سلمتها له ابتسم : هيا تعالي معانا للمزرعه تأخر الوقت
امه رفضت : لالا اليوم عزموني عيت عمك نقعد عندهم
احمد : لا والله ما صارت حاتقعدي في حوشك ومش حاتطلعي منه وحتى ملك حاتزعل كيفي وهيا معانا
ملك : كلام احمد صح وانتي امي التانيه هيا تعالي
الحاجه استسلمت : براحتكم وعدت معاهم وكانو فرحانين واجد بمشيتها اول ما وصلو للمزرعه هي عدت لغرفتها وأحمد ورا ملك الجناح امتعهم وعجبهاا واجد
ملك ابتسمت : حلو وخيال واجد حتى الجو يهبل برا
احمد غمزلها : بس انتي الاحلى والاساس وكل شي والله
ملك وجها احمر قعد وهو باس جبهتها بحب : انا حانطلع توا نخليك تاخدي راحتك تمام يا قمر وطلع وهو يبتسم وهي خلاص راحت فيها وكانت فرحانه واجد معاااه ❤
هيثم فتح باب شقته واشرلها اتخش : تفضلي يا عمري
نور خشت وهي تبتسم : اليوم فرحانه واجد لبنت خالي
هيثم : ربي يدوم الفرح في حياتك يا دنيتي كلهااا ❤
نور وجها احمر قعد وعدت للغرفه وهيثم ما خلاها لحظه كانت اميرة الأميرات بفستان العرس يلي لبساته اليوم وهيثم طاير عقله فيها وكل يوم يزيد حبه لهاا اكتر من الأول ومجنون فيهااا وهي واجد اتحبه وحنونه وكريمه حتى مع عيلته يلي يحبوها وما يتحملو فيها حااجه ❤
اما لجين ترجا في مصيرها ومش عارفه نفسها حاتعيش او لا والأيام تجري جري وجاه موعد الجرعه التانيه تألمت واجد من الابره ورقدت ودموعها علي خدهاا تمنت لو اختها معاها وما عاودت غلطها ولا كانت معنده عالغلط ومتشائمه عالموت هي خايفه انها تموت واجد واستمرت في غلطهاا يلي كان سبب موتها كانت لجين هاديه واجد وباتها مستمر في شغله عشان الابره غاليه واجد وموعد كل ابره 6 شهور والشهور يجرو بسرعه ودارت الجرعه ال3 وال4 كرهت روحها واجد لان لها سنتين في اميركا بعيده عن وطنها وعن حبايبها وكل شي وطول هالمده كانت تحفظ في كتاب ربي وحفضاته كله صفحه صفحه علي روح مايا وطول الوقت تدعيلها وما نستهاا لحظه بحتت في تليفونها جاها اشعار عالماسنجر من ملك ورتها بنتها الصغيره لها اسبوع جايبتهاا وسمتها مايا نزلو دموعها وقعدت تبكي مستغربه ان ملك اتسمي علي اختها يلي ما اطيقها ولزتها حتى من الحوش زادت بكت وهي تبحت فيها كانت ملاك سبحان الله وامها ملك فرحانه واجد ببنتها الاولى مايا فرحه لا توصف بس ماتوقعت ان لجين حاتنهار لما اتشوفها بعتتلها : وينك لجين كنك ماترديش الوووو لجين انتي كويسه ؟ ردي عليا انشغلت عليك
لجين قرت المسج ومسحت دموعها وكتبت : اول شي الحمدلله علي سلامتك وتتربى بعزك وربي يحفظها وتاني شي والله ماتوقعت اتسمي عليها ابداا 😢 مستغربه
ملك : الله يسلمك وعيب هالكلام ومايا زي اختي
لجين : بس هي ما تحبك ولا تحب حد الا نفسهاا
ملك : ماعش اتقولي هكي وقولي الله يرحمها وبسسس
لجين مسحت دموعها : والله ديما انقول فيها بس هذي الحقيقه مايا ماتحبش حد من هي صغيره هضا طبعها
ملك : انسي عيوبها كلهم طلعيهم من راسك مفهووم ونحنا واجد رايفنا عليكي مزالك سنه ويكمل العلاج
لجين : والله الابره واعره بكل ومحافظه علي صحتي وكل شي يطلبو فيه مني وان شاء الله خير والله تعبت
ملك : هانت ما تخافيش وحاتتحسني وتقعدي احسن من الاول وربي كريم ومش حايخليك ابداا هو معانا ديماا
لجين ابتسمت : شكرا يا ملك وبوسيلي مايا الصغيره
ملك : حاضر تأمري ولما اتجي امسكيها ولعبيهااا ❤
لجين : بأذن الله وحايكون عمرها سنه وقتها ربي يحفظها
ملك : ويحفظك وينور طريقك وترديلنا بألف خير ونبي انقولك حاجه بصراحه الطالب هشام سألنا عليك واجد خلال هالسنتين ونحنا ما حكينا ولا حرف غير انك مسافره مع عيلتك لأمريكا لفتره وحاتجي بأذن الله
لجين : من هشام هضا وشنو يبي مني عليش يسأل
ملك : يلي معانا في الكليه ديما يقرا ومتفوق بكل في دراسته اكيد تعرفيه بس شكلك نسيتيه وهو فقدك
لجين اذكراته : وليش فقدني اصلا مافيش شي بيناااا
ملك : الواضح انه معجب بيك واجد كل فتره يسأل ويقول كلمتوها وحكيتو معاها وطمنوني عليهااا بس نحنا ترددنا نحكوله شي وقلنا هضا شي خاص بيك انتي وبنفسك تحكيله مش نحنا ولا حقنا نحكوله اصلا
لجين : احسن ما درتو اكيد حايتقزز مني ويكرهني
ملك : يلي يحب مستحيل يكره وهالشي يقرره هو مش انتي ولما اتجي امشي للجامعه لان هو يبي يقعد معيد فيها عشانك لان اكيد لما اتجي حاتكملي دراستك فيهاا
لجين : انا همي مش في الدراسه همي في الوضع يلي انا فيه وواجعني حال بابا تعب واجد عشاني يشتغل لليل ونهار ومش منقص عليا اي شي وهضا يزعل فياا
ملك مسحت دموعها : ما تزعليش وان شاء الله تكوني انتي وعيلتك احسن من قبل واتجو وتكملو حياتكم عادي جدا بدون مشاكل وتعب وتكملي دراستك كلهااا 🥺
لجين قعدت تبكي وكتبتلها : ان شاء الله وانا لازم نمشي توا نبي انصلي وندعي لربي وعدت قعدت تبكي وحالتها حاله جات امها وهدتها بالايش هدت وعدت توضت وصلت صلاتهااا كان واضح التعب والمرض فيهاا ورغم هضا كله تحاول اتقوي نفسها وتكون صبوره 💔😢
بعد سنه غمضت اعيونها من الم اخر ابره يلي هي السادسه توجعت واجد منهاا بس كان وضعها متحسن واجد والفايروس في مراحله الاخيره جداا وفرحة الاب والام لا توصف من كلام الدكتور بعد بحت فيهم وقال
This is very good and the last dose will kill the virus once and for all and I am very happy for the strength of your belief in healing for your daughter
هذه جيد جدا والجرعه الاخيره ستقضي عالفايروس بشكل نهائي وانا سعيد جدا لقوة ايمانكم بالشفاء لأبنتكم
يوسف الاب :
Thank you doctor and may God bless you
شكرا لك يا دكتور وبارك الله فيك
الدكتور ستيفن : No thanks for my duty and her health is very good
لا شكر علي واجب وصحتها جيده جداا
يوسف : I’m very happy with what I heard and now we’re going back to our country ?
انا سعيد جدا بما سمعت والان سنعود لبلادنا ؟
الدكتور : Of course you can go back, but you must maintain her diet and be very careful of everything around her and do not approach anyone who has the AIDS virus, this will affect her greatly
بالطبع تستطيعو العوده ولكن يجب المحافظه علي نظامها الغدائي وتكون حذره جدا من كل شي حولها ولا تقترب من احد لديه فايروس الأيدز هذه سيأثر عليها كثيرااا
يوسف : ❤ No, my daughter will be anxious and well always
لا أبنتي ستكون حريصه وبخير دومااا
الدكتور أبتسم : Now I’m going, thank God I’m safe
الأن سأذهب والحمدلله علي سلامتهاا
يوسف : God bless you and thank you once again
الله يسلمك وشكرا مره تانيه
يتبع …….

لقراءة الجزء التالي : الجزء الثاني عشر من رواية الحلال والحرام

لقراءة الجزء السابق : الجزء العاشر من رواية الحلال والحرام

للإطلاع علي فهرس اجزاء الرواية : جميع روابط اجزاء رواية الحلال والحرام للكاتبة سلطانة كوكي

جميع الحقوق محفوظة للكاتبة سلطانة كوكي

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى