الجزء

الجزء الرابع من رواية ضوء في آخر النفق

الجزء الرابع من رواية ضوء في آخر النفق

وفي الجزء الرابع ما رأيك بالأحداث التي جرت سابقاً وهل سنري المفاجآت في الأحداث القادمة ؟ كل هذا وأكثر سنعرفه سوياً في السطور القادمة بإذن الله .

الجزء الرابع من رواية ضوء في آخر النفق

مؤيد …. خلاص وانتى زدتى رقيتلى ضغطى زياااااده اسمعى من الا خير كلمى صاحبتك قولها انى نبيك بالحلال ومن الاخير تدخلى انتى نهدلك سنونك الا مادتيهم توا زى سيراميك ماشى وبعون الله هدى هيا الا ماتخلينى شيخ توا تشوفى ..
سهيلللله …. اااااااااااااااااص حسه امى و بابا جو اااااص سكرو موضوع ..

امهم ….. شن لم شامى على مغربى ؟؟؟ انى عارفه مالمكم كل واحد على تانى الا فى موضوع ؟؟ شن فى ان شالله خير ؟؟
مؤيد …. هههههههههه انى بنخش ندوش وبعدين نبيك على انفراد ياوحويجه .. يعنى بنستفرة بيك شويه ياشاااابه ❤ ❤
امه … تحشم ياقليل الادب بوك قدامك وانتم لا عاد فى لاحشمه ولاسو
سهيله ومنى …. هههههههههههههههههه ماما ماتوخديشى اليوم الكوره لحسة دماغه
عمى جمعه …. منى ديرلى فنجان قهوه وتعالى نبيك فى صالون بنتى ..
منى … حاضر بابا ..
امهم …. سهيله وانتى خشى للمطبخ ديرى لخوك حاجه يتعشها لبين مابدلت حوايجى وتوضيت وصليت باش ندخلهوله لداره ونشوفه شن يبى نوضى وديرلى فنجان قهوه يامنى مع بوك ..
عمى جمعه … لا لا انتى برى شوفى ولدك شن يبيك وانى نبى منى فى موضوع بروحها ..
وريده … شنى توا انى انى برانيه عليكم ولا فى موضيع جديده وانى مانعرفها ..
عمى جمعه << بوهم …. لا لا انتى الكل والخير والبركه بس اليوم فوتيهالنا ياسيدى نبى نهدرز مع بنتى ونفضفض بروحنا عييييب وحقك عليا نشرب القهوه معاك ماشى ههههههه هيا وريدى برى استهدى برحمان وصلى وشوفى ولدك ..
خشت امهم للحمام وتبى تعرف شنى الا بيحكوه مع بعض وخشت منى للمطبخ بسرعه وحطت القهوه على نار واتتها وخشت بيها وخشت بيها للصالون وحطتها على طاوله وشبحتله ووجها ماعاش يتفسر وهنا قالتله ..
منى … نعم بابا فى شى ؟؟
جمعه … والله شن بنقولك يابنتى .. انى راهو اليوم كلمنى حسام قيس ظهر ووزعته وكلمنى توا وانى فى سوق مع امك وقالى انى نبى نرجع بنتك ولما قتله لا وخلاص وبنت معاش تبيك .. قالى انى اتفاهمت انى وهيا وحلينا كل شى واتفاهمنا انا نرجعو … وانى الحق بعد الكلام الا سمعته معاش عرفت شن نقول لانى نحطيت فى موقف مش حلو … فايا بنتى انى نصيحتى ليك مادما وصل الموضوع انا يضرب ويهين فيك ويعامل فيك معاملة كلاب فاحوش بوك اشرفلك وحوشى مفتوح ليك ولخوتك وانى مازال مامتت ولو متت انى خلتلكم ظهرى مؤيد فاعمرك ماتخافى لا من امك ولامن كلام ناس وتتحملى … وخلاصة الكلام انى مانبيش نسمع منك شى توا لانا مانبيش نحس فى يوم انى ماصدقت سمعتها منه ولدلك فكرى مره واتنين وتلاته وردى عليا ونبى الجواب منك انتى مش منه ولو انتى رضيتى لنفسك ترجعيله فاانتى مش صغيره شوفى الاحسن ليك واعرفى انا بوك وخوتك ديما ظهرك وكانا على امك فاماتخافيش منها فى وجودى والله مارح تقدر تديرلك شى وكلمتى فى الحوش هيا الا رح تنسمع بس … باهى بنيتى ؟؟ وخلاص معاش تبكى .. انى قداش عندى منو وسهيله فى دنيا .. هما زوز نجمات ربى عطاهملى كانا ماحافضتش عليهم لاش عايش انى ❤ ❤ ❤ امسحى دموعك بنتى امسحى وماتخافى من شى مادما بوك عايش ..
منى … بابا ربى يخليك ليا يابابا والله والله انى من غيرك مش عارفه شن ندير والله انت لو تطلب عيونى نعطيهملك يااحلى واحن بابا فى دنيا ..
وفى الوقت نفسه الا كانت تتكلم منى فيه مع بوها خشت ام مؤيد على مؤيد وقالتله ؟؟
مؤيد … طق طق طق
مؤيد … خشى ياعيون مؤيد انتى خشى ؟؟
امه … شن هالكلام الحلو شنى مالا فى مصلحه ؟؟
مؤيد … ههههههههههههه الحق الحق ايه
امه … شن فى ياسبع البرمبخ احكى احكى اخر مره كلمتنى هكى كانت قبل 7 سنين لما درت بسيارة بوك حادت ؟؟ شن فى
مؤيد … امى من الاخير من الاخير ؟؟ نبى نتزوج ؟؟ انى فديت خلاص نبى نكمل نصى تانى ؟؟
امه … ومنى هالبنت الا حاط عينك عليه ان شالله ؟؟ بدااااااك جيبلى وحده هكى ولاهكى والله والله نجوم سمى اقربلك … كانا مانفصفص اصلها من فصلها قبل ..
مؤيد .. غير بشوى ياحويجه بس تعرفيها .. من الاخير من الاخير هدى صاحبت منى ؟؟ خيرك تضحكى شنى ماتقوليش لا … تى والله من الاخير لو كان نمشى نتم فيها بنت بروحى مارح ياخدها حد غيرى ؟؟
امه … والله ماتتحشم بتم فيها بروحك ؟؟ اما بالفعل الضنى ضناى والفعل مش فعلى .. على عموم غير يهدى موضوع اختك منى ويصير خير ان شالله توا نفتح مع بوك الموضوع ..
مؤيد … تى شنى تقولى انتى تى انى نبى الاسبوع جاى تمشولها البنت فى اى لحظه ياخدوها منى شن تقولى انتى ماتخلنيش نولع فى روحى نار
امه … نعطيك حل انت صب على روحك بنزينه وانى خود منى نولع فيك … تى بتمشى ولا لا نوض ركياه واحد مشنوق وتانى باله فى حلوه ..
مؤيد .. الحق هيا مش حلوه هيا موزه ❤ ❤
امه .. شن تقوووووول ؟؟
مؤيد .. لا لا نقول خاطرى فى موز فى فى الحوش ولاننزل نشرى هههههههههههههه وريدتى وراس جمعه حطى موضوع فى راسك وراهو اعرفى لوووووو لو ماخديتهاش رح نعنس ررررسمى ونظمى وفهمى لو تحب اهو قتلك ..
امه … تصور اختك قالتلى عقليه وماصدقتش بس توا تأكدت انك مهبول .. بجد بجد ربى يلطف بيك ياوليدى .. شكلنا بنحجزولك دار فى قرقارش ..
مؤيد … اسمعى وريدتى حدديلى سروالى الا سود بنمشى بيه بكرا للخدمه واقتلى الكسره عاد مش معقوله ولدك مدير قسم ويمشى حوايجه تقول مادغهم جمل ❤
امه .. باهى باهى غير لما ينزل معاشك احسبنى فى حاجه بس ؟؟
سهيله …. حتى انى مؤيد حبيبى باش نمشى نتملك فيها ..
مؤيد .. تعررررفى على خاطر الكلمه الخطيره هيا افتحى جيزدان خودى منه ورقة عشرين حلال عليك اهو الكلام الايفتح نفس وجيزدن مش انتى ياما …
سهيله …. روووووووووووووووووووووووووووووووى واعتبرنى توا نزغرط فى حمامك قداش تعطى ؟؟
مؤيد …. ياحيواااانه شن رايك ونلبس بودرى ؟؟ والقصه نطلعها من اليمين ولا الايسر ؟؟ اقلببببى وجهك حتى عشرين مافيش .. هدا ماناقص بتلبسنى البودرى ونخش حماما دروغت يخى .. والله عيله فليت امتى نتزوج هدى بس ❤ ❤
خشت منى وسهيله لدارهم وسكروها وكل وحده فيهم تحكى لتانيه شن صار معاها ..
وخش لداره وطلع الحديد وقعد يحدد فى سرواله زىه زى راجل طيب ..
وخش عمى جمعه لداره هوا وخالتى وريده ودخلو معاهم صفرة القهووه وسكرو دار وراهم ومرة ساعه ورا ساعه وراه ساعه ويوم وراء يوم لحد ماجى اليوم الا كان حسام واقف فيه فى محكمه بعد تهديدات سهيله بفضحه وبعد جهد جهيد قدرت تقنعه يطلق منى بعد تنازال على كل حقوقها ويكتبلها ورقه انا مايحاولش يتعارضلها فى اى مكاااان واليوم هوا كان اسعد يوم فى حياة منى لانا فى اليوم هوا حسة انا حياتها رجعت ملكها من اول وجديد وانا واخيررررا قدرت تتطلع من العالم الوسخ الا عاشت فيه سنه كامله وتانى يوم من اتمام اوراق طلاق بشكل رسمى وقانونى وتحديدا على سفرة الغدى اجتمعت العيله كلها وهنا مؤيد قال …
مؤيد …. توا تميتو كل موضيعكم ولا لا وتحمدتو وتشكرتم ولا لا امتى بتفضو بموضوعى بصراحه انتى قداش ليك مسكته ياما وانى بنت نبيها ..
امه …. سكر فمك بوك يطلع من الحمام ويسمعك قسما بالله يهدلك سنونك تحشم مرض يرفعك …. ااااااى على اياااااامنا حنا …
سهيله ومنى ومؤؤؤيد …… اااااااااااااااااااااااااااامى خلاص حفضناااهم ايامكم بالله عليه خلاص ..
سهيله … ضم فمك انت ضرورى يعنى ماتخلينا نسمعو هتافت امك كل يوم ..
منى …. هههههههه بابا جى خلاص ااااااااص ..
وريده …. جمعه شن بنقولك ..
جمعه … لاااله الا الله شن فى ؟؟
وريده … سهيله منى نوضو لمو معايين عندى كلمتين بنقولهم لبوكم وحطيلى شاى على نار يامنى ..
جمعه … مؤيد برا جيبلى باكو دخان من محل نوض ..
مؤيد …. بووووى نهااار مزقح … خاف عليا من الانحراف شوى زفت ..
جمعه …. اى والله عندك الحق ياولدى باين كبرت وخرفت … باهى باهى خلاص نوض امك بتقولى كلمتين ..
مؤيد …. شنى بوى تبو ترجعو ايام شباب مالا نولعلكم لامبه الحمره …
جمعه ….. منى هاتى مغرف هاتى كان مانمرش بيها على ظهرك مانبدا جمعه انى .. شنى مالا كانا ولا عمرك فى تلاتين معاش نفدرك تى والله نقدرك ونقدر 10 زيك ايوووووووا
وريده ….. اكيد اكيد ياحاج غير كون فى روحك لايرتفع ضغطك بس ..
مؤيد … ههههههههههههههههههههههههه خلاص خلاص طالع بنلعب كوره تبو شى .. هيا سلام عليكم
جمعه …. ايوا وريده فى شى ؟؟ بنوض نشرب شاى وبنكتى شوى ..
وريده ….. تتفكر فى موضوع الا قتلك عليه ..
جمعه … باه ..
وريده …… راهو اليوم بعد ادنك بنكلمو اهل بنت وبكرا بنديرولهم زياره ..
جمعه … ومن بترفعى كان بنتك فى عدة ؟؟ خلو لين بنت تم عدتها وبعدين يومن عاش ..
وريده …. والله شن بنقولك … هوا بكرا انى بنمشى نديرو زياره خفيفه والولد بيقعمز مع بوها شوى وع البنت باش يعرف شروطها وشن تبى وهكى وكانا تفاهمو بعدين نبدو فى موضوع رسمى بعد عدة منى ان شالله .. شن رايك نكلمها توا المراه ونحدد موعد بكرا ؟؟
جمعه …. وريده الاتشوفيه مناسب ديريه مهم ديرو صح والواجب بس …
وهنا كلمت منى ناس وتفاهمو معاهم وروح مؤيد وطار من الفرح وفات اليوم على مؤيد وكأنا سنه وتانى يوم طلع شرى البكلاوه والعصير وشكلاته وباقة الورد وحطهم فى سياره وخش للمحل وشرى سروال جينز ازرق وبدى على الاشهب ولقى طرحه ناقصه فاقعد يلود من محل لمحل لين كملها وروح طبق للحوش دوش وواسى لحيته ولبس ودار كولنيه وبرفان وطلع وهنا لقى امه ومنى فاقاللهم ….
مؤيد ….. شنى مش حلوه ؟؟
امه …. ماشااااااااااااااااااااااااالله وليدى عريس ولا روووووووووووووووووووووووووووووووووى
منى …. انضربت فيك من توا هههههههه كانا مانعرفكش راهو قولت برد بيت هههههههه
مؤيد … تى كانا صار موضوع منى ليك حااااااااااااااااااااااجه بعدها تقتلى روحك طووووول ههههههههه … هيا شنى حوايجه ماشيه ؟؟ هيا اطلعى لسياره هيا … سهيله حنا طالعين هيا الحقينا فى سياره وبتعطلى اقعدى فى الحوش ..
سهيله …. باهى باهى وانت تقول العروسه زفت ارزن شوى …
مؤؤؤيد … شنى قووووووووولتى ؟؟
سهيله …..لا لا شى لحقاتكم خلاص هيا نلبس فى كندرتى بس … منو حبيبتى ونبى المعاين الا فى لودنيو اغسليهم بالله عليك .. يالا سلام حبيبتى ❤

يتبع………

لقراءة الجزء التالي : الجزء الخامس من رواية ضوء في آخر النفق

لقراءة الجزء السابق : الجزء الثالث من رواية ضوء في آخر النفق

للإطلاع علي فهرس اجزاء الرواية : جميع اجزاء رواية ضوء في آخر النفق للكاتبة كيندا

جميع الحقوق محفوظة للكاتبة كيندا من ليبيا .

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى