وفي الجزء الرابع والعشرون من رواية عاصفة الصمت دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .
الجزء الرابع والعشرون من رواية عاصفة الصمت
نزار : ماتخافيش ضرسي في عيوني سومها من سوم خواتي صفاء ومروة
خ سميرة : ريحتني …. جيبلي ….جيبلي اميا عطشانة
نزار : ان شاء الله هي
* مشي نزار جابلها اميا ووقت
نزار : خالتي … خالتي رقدتي … خالتي جبتلك الميا …
* حط نزار الطاسة … وهزها مابتش تستجيب فعرفها اتوفت
دمعت عيون نزار …باس راس خالته و حط ايده على عيونه مسح دمعته وقال : ان لله وان اليه راجعون …
ﻻ حول وﻻ قوة اﻻ بالله …
ياناري يالبنى… كيف بنقولها وكيف بتتقبل هالخبر… اﻻم كل شي في حياة اﻻنسان والبنت بذات …
الصبر ياربي الصبر …
خ رقية : ئه نزار خيرك تدوي بروحك …. خلي خالتك ترتاح مدامها راقدة …
* خنقت العبرة نزار … وقرب من امه و اضبطها … وقالها : ﻻ اله اﻻ الله يمى …
خ رقية : شن اتقول ياولد
نزار : ربك خدي امانته ﻻ اعتراض وﻻاله اﻻ اله
* بعداته عليها وعيونها دمعوا وقالت : ﻻﻻ شن اتقول انتا ..
نزار : وحدي الله يمى … وحدي الله
خ رقية مشت لختها وتهز فيها وصيحت بأعلى صوتها وتخبط ع راسها : ياوووووووووووك اعلياااااا ووووووووه اوخيييتيييي
صفاء: شن صوت هدا من شارع ؟؟؟
لبنى: ﻻﻻ صوت خالتي واﻻه
مروة : نوضو نوضو
* وناضوا هما التﻻتة يتجارو لدار ولقوا خالتك رقية تبكي وشادها نزار
لبنى : شن فيه … خيركم
صفاء : خيرك يمى … وخيرها خالتي
خ رقية : خالتكم اتوفت ياوووه عليا
لبنى : ام امي … يمى
*ومشت جري لسرير امها وقعمزت ع ركابها واتهز ف امها وتبكي …
لبنى : يمى … نوضي نوضي يمى عارفتهم يكدبوا عليا … نوضي بالله عليك … كيف بنعيش من غيرك يمة نوووضي
* قربت منها صفاء و شدتها من كتفها و باستلها ع راسها وقتله : وحدي الله يالبنى
لينى : حولي امي ماماتتش امي قتلي بنتكى شوية بس بتتكى شوية وبتنوض ….
* تريش في شعرها وشادة هالكلمات امي شوية وبتنوض …
* قرب منها نزار ووقفها وقالها استهدي بالله يالبنى … استهدي بالله ..
لبنى تلفتت لنزار وتضرب فيه بيديها وقتله :امي ماماتتش خيرك هكي نزار
* وبدت اتنقز واتعيط شدها نزار وغمرها بين يديها وقاله : ﻻ اله اﻻ الله وحدي الله وحدي الله يابنت
لبنى : محمد ررسول الله
* و ساخت لبنى بين يدين نزار ..
طلعها لبنى حطها ف دار امه … ورجع ومازال لقي الكل يتعايط… يشد واحدة ويسكتها اتنوض التانية معش عرف كيف ايدير …
نزار : ياسروا خﻻص هياااا اطلعوا من الدار …اطلعوا هياااا
* بعد نص ساعة من هالموقف … خدي نزار خخالته للمستشفى من اجل انه ايتم اﻻجرائات …. وكان ثاني يوم الدفن … لبنى من كثر البكاء عيونها راحو زي طماطم …
*بعد مرور اسبوع ويومين
عن وفاة خ سميرة … نزار كيف مروح في الليل من العمل متعه … بيخش لدار يسمع في صوت جاي من دار خالته …
فمشي بيشوف …لقي لبنى متكية على فراش امها وتبكي
لبنى : عﻻش خليتيني ومشيتي من بيا يمى من بيا …. انتي بسمتي ونور عيني … لو نقدر نعطيك من عمري عمر راني عطيتك … ياربي ياريتك خديتني بدلها ياريت …
* خشلها نزار وقعمز جنبها عالسرير … وخدالها ايدها بين يديها وقاله : لبنة … معش تقولي هكي … ادعيلها بالرحمة
* غمرها نزار وقالها : بالله نعش تبكي والله اتفترشي فيا تفاريش لما ابكي … ادعيلها بالرحمة وان شاء الله ربي يصبرك …
لبنى : والله بنموت يانزار بنموت
نزار : بعيد السو معش تقولي هكي
لبنى : امي يانزار مشت وخلتني ششن اﻻنسان بدون ام
نزار : الله غالب ربي هكي كاتب ﻻ اعتراض …
لبنى : ﻻ اعتراض ع حكم الله بس والله نار … نار يانزار شابة فيا . هيا كانت امي وبوي كانت كل شي في حياتي … والله حتى النوم ليا سبوع مارقدتش … نسمع ف صوتها ف كل مكان …
* باسلها نزار راسها وقالها : غير اهدي وراس لبنى … والله بكيتيني معاك نقولك مانحملش نشوفك تبكي بس انتي شي ماتبيش تفهميني …
لبنى :مش مني يانزار مش مني
* مسح دمعته وقالها :نوضي نوضي من اهنا
لبنى : ﻻ نبي نقعد ف دار امي
نزار : هكي حتقعدي تبكي …
* رن تلفون نزار بنغمة رومنسية
طلع نزار تلفونه من جيب الجاكيت ولقي غدوش حبيبي تتصل بك ..
شافت لبنى اﻻسم … وزادت ف بكاها…. داره صامت نزار من الجنب ورد النقال لجيبه **
نزار : شن قلنا …. البكي مايفيدش قعمزي ادعيلها بالرحمة والغفران افضل
لبنى : الله يرحمها ويغفرلها …
نزار : ضرسي … امي امك وصفاء ومروة خواتك ونزار خوك … عيلة صغيرونة … صح ماتتعوش على اﻻم بس الله غالب … مافيش بإيدنا حيلة … لكل شخص عنده يوم يوقف فيه عمره … اصبري واحتسبي وان شاء الله ربي ايصبرك على قد غﻻها ….
لبنى : ان شاء الله يارب
نزار : نوضي هي …
* وقف نزار ومد ايده قالها : يﻻ نوضي ضرسي …
* وقفت لبنى وطلعت هيا ونزار من دار امها وسكروا الضي والباب ..
نزار : تصبحي ع خير … حاولي ترقدي باهي …
لبنى : ان شاء الله …
* مشتت لبنى لدارها مع صفاء ومروة وخشت لسريرها واتكت ونزار مشي للمربوعة … بش ايكلم غادة
مكرم يبعت في رسايل عبر النيمبز ل غادة ~ اسمعي غدوشتي
غادة ~ نعم ..
مكرم ~ تحبيني
غادة ~ ﻻ مانحبكش … خيرك هكي مكرم ~ فيه خبر امك حتقولك عليه غدوة
غادة ~ وشن هوا الخبر
مكرم ~ خلي اتقولك امك غدوة خير
* جاها اتصال غادة من نزار عبر تلفونها اللي دايرهولها هوا …
غادة : الو
نزار : اهلين …
غادة : اهلين بيك … وينك من بكري نتصل بيك
نزار : كنت مع بنت خالتي ياناري … لقيتها تبكي ف دار امها
غادة : باهي ناديلها واحدة من خواتك
مكرم ~ الووو وين مشيتي غدوشتي
نزار : شن الصوت هدا ؟؟؟
غادة : اه ﻻ شي هدا المنبه شوره .نزار : عندك تلفون تاني ؟؟؟
غادة : ﻻﻻ هدا تلفون حنين
نزار : وينها حنين
غادة : راقدة
نزار : عندها النيمبز
غادة : ايه
نزار : وانتي عندك او ؟؟
غادة : ﻻﻻﻻ ماعنديش
نزار : اه نحسابك … اديريه نهارك احرف
غادة : ﻻﻻ مش حنديره ششن بندير بيه ..
نزار : اممبه
غادة : وانت عندك منه
نزار : ماعنديش ومانفهمش فيهم الحجات هادي
غادة : اماﻻ كيف عرفت صوته
نزار : الشباب جماعتي عندهم منه
نسمع ف الصوت متعه
غادة : اه به …نحبك نيزوو
نزار : انموت عليك … كم مزالك سنة
غادة : هههه اياح مزالي هلبا.. ونفكرة نغير تخصصي
نزار : شن بتخشي
غادة : قانون زي ماتبي امي
نزار : وبه عﻻش اتعيطي من ارول وتبي طب … توا معش عجبك
غادة : توا اقتنعت صعب الطب .. بالله نيزو حولني للقانون
نزار : باهي ان شاء الله غدوة تو نمشي انحولك
* لبنى قاعدة تبكي ومش قادرة ترقد تسمع في صوت امها
لبنى : مروة … نوضي قعمزي معاي … وهدرزي عليا
مروة : امس الليل بطوله ماخليتنيش نرقد وسهرت معاك وفي النهار ناس ماشية جاية مارقدتش بكل … كلمي صفاء تنوض
* وتلفتت مروة وبدت تشخر
لبنى : صفاء… صفاء نوضي انهدرزوا
صفاء : والله مريضة يا لبنى عندي لوزتين وحرارة ونازل عليا النعاس بري ارقدي
*قعمزت على سريرها وضمت رجليها لبعض وحطت راسها ع ركبيها وتبكي …. وخدت نقال و
بعتت مسج لنزار >> نزار رقدت واﻻ قاعد فايق؟؟
غادة : شوية وانكلمك نيزو باهي
نزار : وين ماشية ياروحي
غادة : جعت ناخد حاجة ناكلها ونكلمك .
نزار : راك اتولي دبة هههه ..
غادة : ﻻﻻ اطمن … يﻻ باي
نزار : سﻻم
* سكر الخط وقري المسج فبعتلها مسج – ايه فايق شنو فيه ضرسي
لبنى – مش جايني نوم وصفاء ومروة ناعسات … عادي انجيك ؟؟
نزار – تعالي عادي …
* بمجرد ماقرت المسج فتحت لبنى الباب
نزار : هههههه شورك وراء الباب
لبنى : الحق ايه ﻻنك الشخص الوحيد الفايق فقعدت جنب المربوعة
نزار : خشي هي
لبنى : بالك ناعس
نزار : ﻻﻻ مش ناعس
{جيعان نوم من ساعة 6 الصبح مارقدتش }
لبنى : تعبانة يانزار
نزار : سﻻمتك من التعب
لبنى : انحس في روحي جسد بﻻ روح مضايقة فقدت اثمن ماعندي
نزار : مادايم اﻻ وجه الله يالبنة
مكرم ~ نسي ماضية نسي بسمته ورعشت ايديه في ايديا اه رعشت ايديه في ايديا
غادة ~ وووه عالماضي اﻻسود انسى خﻻص
مكرم ~ والله ماني ناسي احﻻ ايام اصﻻ … وانتي بتموتي عليا وتستني لمسة مني وباين عليك …غادة ~ شن اللي باين
مكرم ~ باين بدليل انك ماسكرتيش ومازال تبيني نسترسل في الدوة بش اتعيشي الشعور
غادة ~ مغباك ومغبى تفكيرك مكرم …
نزار : امسحي دموعك امسحي … وعندي حاجة ليك
لبنى : شن هيا
نزار : امسحي دموعك قبل
لبنى :هاه مسحت هي
* ناض نزار فتح المكتبة وقربج قربج وطلع بنك الحظ وحطه قدامها
لبنى : هههههه مقدمك نزار من ايام انا كنت ف العدادي
نزار : هههه ماه قعدت ندور اي حاجة بش تبتسمي
لبنى : تتدكر لما رفعتنا انا وصفاء ومروة لدكان وولد صاحب الدكان ضحك عليا انا ومروة ع خاطر شعرنا مشفشف وانت ضربته برشادة ع راسه
نزار : هههه ايه …ماشاء الله داكرتك والله
لبنى : بس مش خاطري نلعب نزار خاطري متكدر
نزار : عارف … ومافيش حاجة ﻻ بإيدي وﻻ بإيدك … هي العبي
لبنى : ماتجيش بنك الحظ ب زوز
نزار : بﻻ سبل حتى سلم وثعبان هي … هاه العبي هي
لبنى : لكن ﻻ ديما تغلب فيا ف سلم وثعبان ههههه اتغش فيا
نزار : هههه والله ﻻ … العبي هاه انتي اﻻولى
مكرم ~ مغباني صار … الوووو رددي …. المهم عارف انك بتهبلي عليا
غادة ~ برا ارقد مكانك مستشفى مجانين
مكرم ~ مكاني بحداك ….. تي والله بتهبلي عليا معش تكابري … تعالي نتﻻقوا ف السطح …
* سكرت غادة النت
وقعمزت اتفكر >> قلبي لشخص واحساسي لشخص تاني ! كيف هكي زعما انا طبيعية واﻻ ﻻ ؟؟!
لبنى : هاه غشاش ههههه قتلك انا بتغشني واﻻه
{الحمد لله واخيرا تغير جوها ولو شوي ربي يحفظك وخيتي …}
نزار : ماغشيتكش انتي حولة
لبنى : هههه عينك عينك الزهرة جت على 4 نقﻻت وانت درت ستة نقﻻت شن يقولوله هدا
نزار : تي اربعة ياودي هاه صفر واحد تﻻتة اربعة
لبنى : ههههههههههه والله الا غشاش
* مروة طلعت من الحمام وجتهم وقتلهم : تو هدا وقته بنك الحظ انت وياها ليل صواتكم تجلجل بالضحك
نزار : دايرتني غشاش
مروة : ياودي عندك فيه متع الغش ع السلم التعبان ديما راكب فوق وديما رابح
لبنى : شهد شااااهد من اهله ههههههه الحمد لله مش انا بس
نزار : به قعمزي يامروة العبي انتي وياها هي
مروة : ﻻﻻ نااااعسة بنولي نرقد العبوا بروحكم
* مشت مروة ولت رقدت كمل نزار لعب معها وتموا اللعبة وهدرزوا شوي . وهوا يستنى ف اتصال غادة … فطلع نقاله … ودارلها رنة
عاودتله برنة … وكتبتله مسج >> مانقدرش نتكلم حبيبي …غدوة لما نمشي لجامعة انكلمك … ليلة سعيدة ..
فرد عليها بمسج … انتي اسعد بيبي
نزار : صار هكي ياضرسي …
* شافلها لقاها راقدة عالمنادير*
{بريئة انتي يالبنى راقدة زي البيبي … المشكلة كان بنوضها بيطير عليها النوم … وهيا ع حسب كﻻمها قداش ليها مارقدتش … خلي انوض نجيبلها بطانية ونغطيها }
* مشي لدار الجلسة وفتح الدوﻻب طلع بطانية ورجع للمربوعة غطاها …
{زعما نرقد اهنا واﻻ نمشي لداري … تو كان ناضت ومالقت حد تو تنوض ويطير عليها النوم … احسن شي … نمشي نبدل حوايجي ونجي نرقد اهنا وخﻻص غير ان شاء الله امي هههه ماتفهمنيش غلط }
*طلع تاتي نزار من مربوعة ومسي لداره بدل ولبس توتة وجاب بطانيته ومخدة … ورقد بعيد على لبنى .. *
ثاني يوم … ناض نزار بكري قبل الشحاتة وبنتها قام بطانيته ومخدته ونقاله وكل شي وحطهم ف داره وخدي دوش ولبس وتأنق وتعطر … وطلع ماشي لجامعة بش يتﻻقى مع غادة وايحولها قانون
ساعة 8 صباحا
نزار : غادة انتي وين
غادة : قاعدة قدام مسجل القانون
نزار : مشيت لقيته مكاتب شؤن طلبة
غادة : ﻻﻻ غيروله مكانه
نزار : به اطلعيلي وخوديني ليه
غادة : هههه باهي هي
* بعد شوي جاته غادة …
نزار : والله استاحشتك … السبوع اللي فات كله مشالي زي الكابوس
غادة : حتى انا … حسيت بحاجة ناقصتني
نزار : هيا كملي هالقراية الغبرة هادي خلي نخطبك ونتجوزوا
غادة : والله ياريت
نزار : ياريت فعينك وانت تتنطنطي من كلية لكلية زي البرغوثة
غادة : ههههه ﻻﻻ خﻻص والله هادي اخر مرة و حنشد فيها بش نكمل فيسع
نزار : به هي قدامي عالمسجل …
*هدرزوا لين طقت ساعة 9:30بش جي المسجل…و سجلها نزار … في الكلية وعادلها مواد العامة اللي تحتاج تعادل وتم الموضوع عسريع بالواسطة والمحسوبية.. وقعمزوا برا … على الكراسي
ساعة 10:10 صباحا
نزار : مشناها القانون مكشوفة عشارع الرئيسي اللي ماشي واللي جاي ايفنص ههههه
غادة : ههههه بس اهناا احﻻ اقلها خير من الطب …
نزار : باهي يﻻ احﻻ احﻻ …
غادة : اتهبل حبيبي … محﻻها لحيتك …
نزار : وانتي كلك على بعضك اتهبلي
غادة : نيزو
نزار : ياعيون وقلب وروح نيزو
غادة : انحبك برشا برشا
خ رقية : ياصفاء زودي افتحي الباب
صفاء : هيا هي …
* فتحت صفاء الباب …
ع جمعة (بو لبنى ) : السﻻم عليكم
صفاء :وعليكم السﻻم … كيف حالك عمي جمعة
ع جمعة : ابخين … تره ضبحيلي على لبنا
صفاء : باهي هي … خش خش للمربوعة اهو تو اتجيك
ع جمعة : به هي يالله
خ رقية : منو ياصفاء
صفاء : عمي جمعة
خ رقية : من عمك جمعة
صفاء : بو لبنى يمى
خ رقية : وشن يبي
صفاء : يبي لبنى قال
خ رقية : تو مخليهم قريب ليه عشرة سنين واكثر خطرله توا يدورها
صفاء : ماندري عليه
خ رقية : خشي خشي نوضيها … اونيه راقدة ف المربوعة هالضويعة هادي غير ان شاء الله مايكونش نزار رقد معها امس ف المربوعة
صفاء : ﻻﻻ ماعتقدش شن يرقد معاها يمى
خ رقية : به بري نوضيها
صفاء : خششته توا للمربوعة عمي جمعة اكيدة نوضها
خ رقية : اخﻻص اماﻻ خليهم
ع جمعة : لبنى … بنتي نوضي
* فتحت عيونها لبنى وشبحتله وانخلعت وقعمزت … وقتله : منو ؟؟؟ بوي ؟؟؟
ع جمعة : ايه انا بوك
لبنى : شن تبي
ع جمعة : عظم الله اجرك في اميمتك
لبنى : لنا ولكم اﻻجر
ع جمعة : الحق كانت مراة كويسة
لبنى : وكيف كويسة ﻻش طلقتها ورميتني انا وياها
ع جمعة : مانبيش ندوي في القديم يابنت … وجاي اليوم بش ناخدك معاي
لبنى شبحتله بنظرة
استغراب وقتله : وين بتاخدني معاك
ع جمعة :اكيد لحوشي … شن بتقعدي اهنا بعد ما امك اتوفت
لبنى : انا اهنا كبرت واتربيت ومش حنمشي معاك لي ولى مكان
ع جمعة : نوضي فيسع قيمي حاجتك وهيا
لبنى : ﻻ مش حنوض
ع جمعة بصوت عالي : نوضي قلت انا !
لبنى : ﻻ مانيش نايضة يابوي
ع جمعة : تي كيف بتقعد في حوش فيه عزري …
لبنى : وين وكيف
ع جمعة : ولد خالتك ! شن تحسابيه اصغير او
لبنى : نزار زي خوي
ع جمعة : خويا في جنابك نوضي فيسع جيبي حاجتك فيسع
* وسمعت خ رقية طراطيش كﻻم لبست جبتها و وتستمال وطلعتله وعمك جمعة شخص سليط اللسان ومايعتبر في حد …وصار فيها الصياح والعياط وخ رقية عاركاته عاركاته ورقي عليها الضغط وساخت واستقوى عمك جمعة على التﻻتة بنات
نزار : قوليلي غدوش … انا نفكر بناخد سكن … تبيه دوبلكس واﻻ فيﻻ ؟؟؟
غادة : اممممم دبلكس خاطري فيه
نزار : يعني مش فيﻻ
غادة : ﻻﻻ دوبلكس احﻻ ….
* نقال نزار ايرن …
نزار : شوية بس خلي نرد ع وخيتي
غادة : ها بالك واحدة تانية
نزار : ههههه ايه موتي هي …. الو
مروة تبكي : نزار نزار بالله عليك تعالا توا ….
نزار وقف وقال : شن فيه شن فيه يامروة
مروة : بو لبنى جي ويصيح في الحوش …. وامي ساخت ……
ﻻﻻﻻﻻ ماتخليشي ياصفااااااء
صفاء : والله ماقدرته ياااا مروة زودي معاي
نزار : تي شنو كملي
مروة : تعال يانزار بو لبنى خداها غصب … خداها معاه وركبها سيارته ومشي
يتبع……….
لقراءة الجزء التالي : الجزء الخامس والعشرون من رواية عاصفة الصمت
لقراءة الجزء السابق : الجزء الثالث والعشرون من رواية عاصفة الصمت
للإطلاع علي فهرس اجزاء الرواية : رواية عاصفة الصمت ( جميع الاجزاء كاملة ) للكاتبة لوزة
جميع الحقوق محفوظة للكاتبة لوزة .
