وفي الجزء الثاني من رواية قد كفاني دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة آيه إبراهيم .
الجزء الثاني من رواية قد كفاني
قال ليهم اكيد بتكونوا متذكرين البت دي ،صاحبة الدراما واتلفت على وقال لي يأخ انا من ما امي ولدتني ما حصل لاقتني ممثلة شاطرة ذيك وكمان فوق دا كلو قال كاتبة في دفتر كلام عن ابوها، بالله ؟ ! الذيك ديل بعرفوا ابهاتهم على العموم اتشرفتا لمعرفت درامتك اقصد بحضرتك وعايز اقول ليك مهما كانت حالتك اوعاك تفكري يوم ترفعي صوتك على اسيادك وجدع فيني ربطة قروش وقال لي دي عالجي بيها امك واختك انا في اللحظة دي ما عرفت اعمل شنو خفت لو اتكلمتا يعمل حاجة اكبر ودا كلو عشان يهيني كالعادة دنقرت راسي وبكيت وقلت أرني عجائب قدرتك فيه يا الله ،وانا مدنقرة اسمع ليك صوت رفعت راسي شفت لي شاب كدا ضرب ياسر كف والغريبة ياسر ما رفع يدو عشان يردها ليهو وقال بنبرة حادة …ااي واحد على شغلوا وقال لي ياسر الحقني انت والانسة دي في المكتب
ياسر مشى وانا طلعتا من الشركة ما فاضية لمشاكل ثانية طلعتا وانا قلبي عايز يطلع من مكانوا من الألم، وجعانة شدييد من الواطة اصبحت ما اكلت حاجة مشيت وصلت محل المواصلات وزمن رجعتي جا والمفروض يكون معاي اكل بس يا خسارة اليوم كلو ضاع في الشركة من غير فائدة
في المواصلات فتحت الشنطة ودفعت القروش واتفقدت الدفتر لقيتو قاعد بس راحت مني ورقة كدا فيها بيانات عني ؛عشان لو مت أو حصل لي ااي حاجة يقدروا يصلوا لي اهلي، م اهتميت للموضوع كتيير وقلت م مشكلة بعمل ورقة غيرها وصلتا البيت وانا الطريق كلو بدعي ربنا يفرجها علي ولاول مرة ادخل البيت وما معاي حاجة آكل كنت مترددة شديد في اني ادخل مشيت الدكان وانا متأكدة انو ما ح يديني قلت ليهو يا عمي عليك الله اديني رطل لبن وعشتين ان شاء الله وقت القى بجيب ليك القروش، قال لي معقولة الأكل الجاكم داك كلو م كفاكم؟!قلت. ليهو أكل شنو هو في زول بجيب أكل غير في البيت دا قال لي والله دي حاجة بتعرفيها انتي، جاتكم عربية احتمال حلتنا دي كلها ما في زول عندو زيها ونزلت حاجات كتيرة بس ما قدرت اشوف سيدها منو وتاني م تجي تتديني مني طالما عندكم ناس غنية ذي دي متمسكنة لشنو؟!
م اهتميت للموضوع قلتا الحمد لله المهم اهلي يكونوا اكلوا، وعمو عبدالله دا طيب بس مرات كلامو جارح لكن احسن من اهلي من وفاة ابوي ماشفت منهم زول اخدتا نفس عمييق وقلت يا ربي احمد الحاصل عليهو شنو ؟ نزلت مني دمعة واكيد اول شي بستقبلها نقابي،عمرو م ظهر للناس اني ضعيفة بمسح دمعتي من غير ما ااي زول يحس بي
قلت بسم الله ودخلتا البيت وسلمت على ناس امي وقعدت امي وقعدت احكي ليهم نكات واضحك فيهم ،قعدتا جنب اختي رهف وبديت اضحك رهف وبديت اضحك فيها ضحكت وقالت لي مهجة انتي ليه يدك باردة كدا قولتا ليها برودة عادية م تشيلي هم وانا كان عندي مبادئ هبوط نسبة لانو من الصباح ما اكلت حاجة امي مشت المطبخ وجات شايلة عصير برتقال انا استغربتا عصير برتقال!! هو نحنا البصل ما عندنا قلتا لي امي يمة دا جاء من وين قالت لي من عند ربنا عندك شك في رزق ربنا قلتا ليها ابدا والله بس عايزة اعرف منو الرسلو لينا ربنا قالت لي قالت لي مهجة قولي بسم الله واشربي قلتا ليها مية انا شبعانة اكلت قبل شوية وشربت عصير اشربي انتي ،رهف قالت لي ما انتي كل مرة بتقولي كدا ونحنا بنعمل فيها صدقناك لانو مافي أكل بس المرة دي الاكل كتييير وانتي كان م اكلتي انا ذاتي ما باكل ،قعدنا اكلنا وشربنا العصير وقولتا في سري الحمد لله الذي اطعمني وسقاني من غير حول مني ولا قوة ،اللهم وفق من اطعم اسرتي وبارك له في عمله .
المهم دعيت ليهو شديد لانو ازال عني هم كبير وبقينا ونتونس مثاني “ودي اصغر مني بي سنتين ” قالت لي مهجة نحنا متين ح نعيش ذي الناس بالجد انا زهجتا من عيشت الفقر دي نفسي يكون عندنا بيت واختي القاعدة في الكرسي دي تقوم في اللحظة دي امي عايزة تضربها بس انا وقفت في النص واخدتا الكف بدلها والله وشي لمن حمر بس ما وجعني أكثر من الكلام وما وجعني أكثر من دموع اختي رهف وامي ، حضنتا امي علي شديد وقلتا لي مثاني اطلعي لو ممكن مثاني طلعت وشكلها اتاثرت شديد …
قلتا لي امي اهدي وانتي عنها هي صغيرة وما عارفة حاجة قالت لي صغيرة شنو هي عمرها 14 سنة وانتي وقت عمرك 13 سنة شلتي المسؤلية ،كنتي بتجيبي الاكل وبتنظفي البيت وبتحرسي اخواتك كنتي بتبيتي في المستشفى مع ابوك والليل كلوو بتقري قرآن كنتي بتنظفي المستشفى كلها بس عشان يخلو ابوك تحت العناية من غير ما يدفع معقولة بس عشان كانت مثاني مع عمتها وما شافت تعبك معقولة عشان انتي بتكذبي عليها وبتقولي ليها انو شغالة في شركة تطلع عندها كل الأحلام دي كفاية لحد هنا وقعدت تبكي ،مثاني جات وقعدت تحت رجول امي وبكت وقالت ليها يمة عليك الله اعفي لي انا والله ما كنت قايلة الوضع كدا انا ما استاهل يتقال عني انسانة انا يا مية رفضت اجي مع مهجة من بيت عمتي الإ بعد كذبت علي وقالت شغالة في شركة والبيت دا عن ما قريب ح ترحل منو ونمشي بيت سمح ما صديقتها الإ لمن بقت تجيب لي اغلى الشكولاتات ،في الوقت الكنتو محتاجين قروش لي علاج ابوي هي كانت بتقنع فيني انا بالقروش عشان اشوف ابوي واخد رضاهو انا بالجد قلبي واجعني 
مية والله م قادرة حاسة نفسي انسانة واطية شديد بتمنى تعفي لي ، امي رفعتها وقالت ليها يا بتي مافي ام بتقسى علي جناها ومافي ام بتزعل من جناها عافية وراضية عنك محل م تقبلي مثاني باست امي في راسها ومشت لي رهف وحضنتا عليها وقالت ليها حقك على يا قلبي وكانوا متماسكين شديد وانا كنت واقفة بعيد وبصور المشهد دا ودموعي م عايزة تقيف مثاني جاتني وما اتكلمت ولا كلمة بس رمت نفسها في حضني وبقت تبكي…..
————————————–
———————
*☆يتبــــــــــــــــــــــــــــــــــــــــــــع☆☆*
لقراءة الجزء التالي : الجزء الثالث من رواية قد كفاني
لقراءة الجزء السابق : الجزء الأول من رواية قد كفاني
للإطلاع علي فهرس اجزاء الرواية : رواية قد كفاني ( جميع الأجزاء كاملة ) للكاتبة آيه إبراهيم
جميع الحقوق محفوظة للكاتبة آيه إبراهيم .
