الجزء السابع عشر من رواية همس العيون للكاتبة لوزة ليبية

في سطور الجزء سوف نري جميل الخيال الواسع من المؤلفة المبدعة لوزة ، لذلك حضر نفسك جيداً للجميل من الاحداث وهيا بنا لنبدأ القراءة سوياً ونتعرف علي كل جديد في الجزء السابع عشر .

الجزء السابع عشر من رواية همس العيون للكاتبة لوزة ليبية

اياد:قول من طلع ولد عمها
صلاح:منو
اياد:وسيم
صلاح:وسيم ماغيره
اياد:ايه هوا
صلاح:اها وكيف بدير
اياد:بنمشي نكلمه توا
صلاح:وشن بتقوله
اياد:يستر الله ان شاء الله ما يسكرش راسه بس
صلاح:ان شاء الله

نورس .. زعما اياد شن بيقول ل وسيم اممم ان شاء الله مايقوﻻش علاقة…حييي غبرت كنهدا … ياااودي عادي حتى كان قاله مش مهم المهم نكون مع اياد حتى كان وسيم جي وقال ل رياض عالموضوع عادي يبو يضربوني خلي يضربو وجع ساعة وﻻ وجع كل ساعة ياكبدي …

رتاج:ماتقوليلش خيرك فاتحة عيونك زي الحوتة وسارحة …… انتي يابلي
نورس:هااه هاه ماتخليش حتى من يفكر !
رتاج:قتلني الفضول نبي نعرف في شنو اتفكري
نورس:وشن عندي نفكر من غير خطبة الهم
رتاج:به عطيهولي ولد عمك كان ماتبيشي …
نورس:ههههه كان عليا خوديه من توا وعليا كل تكاليف العرس

صلاح…زعما نمشي نوقف قدام حوشهم ونشوفها سرور لكن بطريقة اهياه نعتبر نخون ف اياد اممم شن اندير ياربي ….ان شاء الله توافق

اياد علق ف زحمة الطريق .. وبدل مايكمل مشواره ل وسيم …درس سيارته وبدي يسرح ف الطريق
لين جت ساعة 1
على اتصال صلاح
صلاح:وين انت ؟
اياد:ف عرادة
صلاح:شن ادير غادي
اياد:الطريق زحمة نسرح فيها
صلاح:اسمع فيه مجموعة مسلحة اقتحمت مبنى وفيه قتلى وجرحى تعال فيسع
اياد:مش وقتهم بكل امشي انت و وائل
صلاح:وائل طالع ونقاله خارج تغطية
اياد:تي اتصرف برا انت وايمن انا مازال مامشيتش ل وسيم
صلاح:والله ربي يهديك طالع من ساعة 12 بش اتسرح الطريق !
اياد:غير برا انت للمكان وكان اطر اﻻمر تو نلحق عليك
صلاح:باهي به

اياد…والله ماوقتها الخدمة الغبرا هادي ..
ركب سيارته اياد وحس بتشوش ف الرؤيا … دوخة ﻻدت عليه الصفرا خدي شيشة الميا شرب منها والدوخة مستمرة ….
ولعع سيارته ومتجه ل وسيم

نورس:اها هديل … اكيدة قتلك امي عالخبر واﻻه
هديل:ايه قتلي … وقتلها وسيم و نورس مش لبعض بس مابتش تقتنع قتلي انتي شن فهمك … ايه حق شن قلتي ل اياد؟؟
نورس:ﻻﻻ سمع بروحه
هديل :كيف ؟
نورس: بابا جاني اليوم لجيهة العمل واياد كان بعيد شوية علينا فسمع الخبر
هديل:اهااااا
نورس:اسمعي تو نكلمك بعدين شحن بيفصل
هديل:اوك

وصل اياد عند مركز وسيم والدوخة مازال مئثرة فيه
درس سيارته ونزل وخش للمركز
علي:اوووووو زارتنا البركة
اياد:مرحبا علي كيف حالك
علي:تمام كيف حالك انت ياحضرة الظابط عاش من شافك
اياد:تعيش وتشوف شن امورك
علي:كويس الله ايعزك
اياد:تمام بكل ….اماﻻ وين وسيم
علي:وسيم طالع لكن استناه مش حيعطل
اياد :اوكي …
قعمز اياد مع علي وهدرز معاه ليييين جي عمك وسيم مع ساعة 2:25
وسيم:ﻻ عاد مش معقولة فيه خطأ ف الموضوع الظابط عندنا !
اياد:ههههه علاش خطأ قلنا نديرولكم زيارة
علي:تي اما زيارة والله جاي ع خاطرك مخصوص ياوسيم ليه ساعة اﻻ ربع يستنى فيك
اياد:تي رزرز النهار المبارك هههه
وسيم:هههههه ان شاء الله خير
اياد:خير ان شاء الله
علي:باهي اماﻻ نستاذنكم تو
اياد:تفضل
وسيم:هئ احم باين عليك معبي دوة اياد:نوعا ما
وسيم:اوك هات ماعندك
اياد:احيييه
وسيم:خيرك شنو فيه
اياد:صداع ودوخة
وسيم :بالك مافطرتش
ااياد:خديت قهوة بس …
هدرزو وضحكو مع بعض وبعد شوي
اياد:عموما شن داير
وسيم :اهو ماشي الحال
اياد:شنو مازال مافكرتش تخطب
وسيم:والله شن بنقولك … كنت نبي واحدة ومعش حصلتها ف امي قررت تخطبلي بنت عمي وخلاص
فرح اياد لهلكلام اللي سمعه
ورد عليه: معناها انت خديت بنت عمك بش تتجوز وخلاص وفبالك اتحب واحدة تانية
وسيم:مش حب حب فيه بنت عاجبتني قداش ليا نجري ف جرتها لكن مابتش تعطيني وجه
اياد:ههههه صحة ليها
وسيم:تي شن صحة ليها مئة مرة قتلها مانبيش نلعب بيك مابتش تعدل عليا …
اياد:به عرفت وين حوشها
وسيم:ﻻﻻ قصقصت عليها من بعيد ل بعيد قالولي تسكن ف منطقة كدا وين الله اعلم
اياد فكر انه يساعد وسيم بش وسيم يتقبل موضوع اياد ومايهبش ف وجهه او يديرله شوشرة فقاله :اها هادي منطقتي … شن اسمها البنت بالك تطلع بنت جيرانة واﻻ حاجة
وسيم:سرور
اياد:طويلة شوية
وسيم:ايه
اياد:عيونها زرق 
وسيم: ايه تعرفها اياد 
اياد:تبي تخطب واﻻ بتلعب 
وسيم:تي بنخطب شن نلعب هادي
اياد:ايه ﻻن لو كان بتلعب بنقتلك ف مكانك  ﻻن البنت اللي تتكلم عليها اختي 
وسيم:بجديات ؟؟ بجديات اختك اياد قصدي الظابط اياد
اياد:ايه
وسيم:الحمدلله ياربي الحمدلله …. باهي في الحالة هادي انا طالب القرب
اياد:تو نكلم العويلة وان شاء الله خير …. مش عيلتك يلعبو براسك تمشي تخطب نورس !
وسيم:كيف عرفت اسمها بنت عمي
اياد:اه شنو …ايه ايه ماه انت قلتهولي امبكري
وسيم:ﻻ ماقلتاش
اياد:من اﻻخير بكل بكل بنت عمك ونبيها ونبي نخطبها
وسيم:اهااااااا وانا نقول من بكري غريبة ماقالي شي وقت حكيتله ع اخته
اياد:قتلك انا لو انك بتلعب كنت حنعرف شغلي معاك
وسيم:به حلو حلو والله فرحتني ربي يتمملك ع خير مع نورس غير كلملي عيلتك بنجوكم العشية
اياد:العشية صعب شوي خليها غدوة
وسيم:خلاص تم
اياد:تم … هي نستاذنك توا عندي عمل
وسيم:اوكي ربي ايعاون
طلع اياد وركب سيارته وولعها واذكر صلاح طول …
اياد..حيه ع راسك يااياد صلاح يبي يخطب سرور وانا نسيت الموضوع مرة واحدة عليك عملة علييييك عملة مبردني كيف ننسى حاجة زي هادي …صاحبي راس كيف ندير نرجع ل وسيم نقوله مخطوبة ؟؟لكن حيديرني نجري بيه غير بش نسهل موضوعي … وكان قلت ل صلاح عاللي صار بيقولي بعتني ع خاطر مصلحتك … وووه والله مابعتك ياصﻻح الدوخة مئثرة فيا لين نسيت كل شي …. يارب سهل سهل اﻻمور ..

طلعت نورس من العمل وخطمت ع حلويات بلقيس خدت حلويات وروحت للحوش ..

وسيم يفكر…شن بنقول لحوش عمي ماصارش من خطبتي لبنتكم اه واﻻ اكتشفت اني مانبيهاش هههه وااااك عليك حصلة حصلتها كله من تزربيز امي نبي نجوزك نبي نجوزك ..كيف الراي والله كان قلت لامي عالموضوع تاكلني تقولي تلعب بحوش عمك بنخطبو وبعدين ﻻ مانبوش نخطبو امممم ايه خطرت عليا فكرة …صح صح ياوسيم ماعندك اﻻ هالفكرة

رجع اياد للمقر وخش المكتب وقعمز يفكر ف المشكلة متعه …
بعد نص ساعة خشله صلاح
صلاح:هدا غير بتلحقنا … خليتنا انا وايمن بروحنا نجرو ماندرو … ياناري بنية صغيرة عمرها خمسة سنين واﻻ اقل مقتولة والله شي يقطع القلب ياراجل ….تي وين سارح…اياد
اياد:اه نعم
صلاح:من بكري نهبهب بروحي وين سارح….شنو تعاركت انت و وسيم؟؟
اياد:ﻻ ما …
صلاح:خيرك كلمات متقاطعة
اياد:اسمع انا مروح توا تو نهدرزو بعدين
صلاح:تي ﻻش مروح قعمز هدرز
اياد:ﻻﻻ عندي شوي مواضيع نبي انتمها
صلاح:به غير ادرجلي موضوعي من ضمن مواضيعك ^^
تلفت اياد ل صلاح وشافله شبحت حزن ): …ويفكر عليك عملة ياصلاح باين عليك متأمل هلبا استعفر الله ياربي كيف الحل كيف
صلاح:خيرك تشوفلي هكي ب بؤس
اياد:اها ﻻ شي هي نتلاقو بعدين
صلاح :اوكي يابرو

اياد..احسن شي نمشي نقول لأمي ع الزوز عرسان وخلاص وان شاء الله خير

نورس:رقم غريب ياهديل زعما منو
هديل:ردي
نورس:بالك اياد يجرب فيا
هديل:به ماترديش
نورس:به
رن الرقم مرة واتنين زتلاتة
هديل:تي ردي
نورس:كان طلع اياد والله نقتلك
…. الو

يتبع ……..

لقراءة الجزء التالي : الجزء الثامن عشر من رواية همس العيون للكاتبة لوزة ليبية

لقراءة الجزء السابق : الجزء السادس عشر من رواية همس العيون للكاتبة لوزة ليبية

لقراءة فهرس الاجزاء كاملة : جميع اجزاء رواية همس العيون كاملة للكاتبة لوزة ليبية

جميع الحقوق محفوظة للكاتبة لوزة .