الجزء السابع من رواية محظوظ ولكن

وفي الجزء السابع من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء السابع من رواية محظوظ ولكن

ساعة 11 مساء
ندى : الو هالة…قتلك تتفكري ف العمل اللي جاباته ليا وردة ؟؟
هالة : ايه ايه ندكر
ندى : شنو قاعد قائم عرض العمل ؟؟
هالة : تقريبا المدير قاعد ايدور ستني نسئلهالك
ندى :اسئليلي حتى وين مكان العمل و كم المرتب
هالة :باه شوية نسألها ونعاودلك
ندى : اوكي به ..

بعد ربع ساعة …
نقال ندى يرن >>>> يامرايتي من كم سنة لليوم قديش اتغيرت
ندى : الوو
هالة : اها ندو شن جو
ندى :باهية ها شنو صار
هالة : قالتلك وردة المرتب 850
ومكان العمل ف النوفليين
ندى : نوفليين اممم بعيد شوي علينا هالة : خودي افيكو من شارعنا يحطك ف سيمافرو وﻻد الحاج ومنه بري نوفلين
ندى : باهي باه خﻻص ساعة كم نمشي ؟؟
هالة : مع تسعة
ندى : لكن اسمعي … عﻻش ماجابش ممرضة حتكون ادرى يعني بعملها
هالة : سكري سكري محمد خاشلي انتظار
ندى : باي باي ..

عمر : تعرف يافرج …. استحشت صوتها … زعما شن ادير توا … تاكل …تشرب … راقدة … متكية …تسمع ف اغاني …
فرج : وراس امك هني روحك وراس وداد … تي انت كيف عرفتها ليك شهر و بديت اتكبد عليها !
عمر : قلت استحشت صوتها ماقلتش انحبها ديما تفهم فيا مشقعب هي بنرقد انحس ف روحي تاعب
فرج : مازال بكري …
عمر : ﻻﻻ بنرقد …

يوم اﻻتنين الساعة 9 صباحا ..

فرج : عمر بناخد التوب متاعك
عمر :خوده اصﻻ ديما واخده انت ..فرج : شنو ماتبيش تمشي للعمل اليوم ؟؟
عمر :مش عارف برا تو نلحقك
فرج : اوكي
خدي نقاله عمر … بيشوف الساعة
واتصل ب ندى
عمر : ياصباح الورد
ندى : صباح الفل
زاد ه تكمكم ف البطانيية وخدي نفس عميق وقالها : شن اخبارك اليوم
ندى : الحمدلله وانت شن اخبارك
عمر : الحمدلله …كويس
ندى : عمر شوية بس ونكلمك عندي مقابلة عمل
عمر : اها كويس وين حصلتي
ندى : موظفة ف شركة
عمر : اوكي موفقة…سﻻم
ندى : سﻻم
تون تون …. توون تون
عبر المايك … صوت شيباني
>>>منو
ندى : انا من طرف وردة … الباحثة عن عمل
>>انفتح الباب
رجل ستيني فما فوق ذو شعر ابيض كث …
تفضلي ياانسة
ندى : انا جيت للعمل اهنا …
رجل : انتي ندى ؟؟
ندى : ايه
رجل : تفضلي خشي …
خشت ندى وهيا تتمرعش … نوعا ما خافت فيلا كبيرة بجنان كبير .. وتفكر . . هوا هدا بو البنت … شيباني بو عكرة حالة وخلاص الشيابين سخفاء كما ايدير فيا حاجة …
الراجل : خشي من الباب هدا وحتلقي ابلة حسنة…
ندى : اوكي
خشت ندى … من باب الفيلا وفتحت عيونها علاخر …
واسعة من تﻻتة ادوار الثرية نازلة من الدور التالث ل الدور اﻻرضي
وفيه حوض اسماك كبير و حلو وكأنها فيلا من فيلات الخليج
واﻻتاث والنظام اللي فيه … ندى اتشوف حاجة تنسى التانية من كثر ما الفيلا تاخد العقل …
حسنة (اخت ادم المدير ) : يا انسة .
تلفتت ندى وتنحنحت وقالت :مساء الخير
حسنة : مساء النور …
ندى : انا جيت للعمل اهنا ..
حسنة : اها تمام … شن اسمك
ندى : اسمي ندى
حسنة : عاشت اﻻسامي … وانا حسنة …
ندى : تشرفنا …
حسنة : تفضلي قعمزي
ندى : اوكي…
حسنة : يا مليكة … مليكة
جت مليكة : انعم انيسة حسناء (مغربية )
حسنة : جيبي ضيافة
مليكة : ان شاء الله
حسنة : خوي ايدور على واحدة تلعب بنته وتقعد معاها وطلعها للحديقة تلعب
ندى : بس انا نحساب ان ماعندكم حد بس عندكم هادي مليكة قادرة اطلعها وتالعبها
حسنة : مايببش مغربية اتقرب منها
ندى : ان شاء الله خير
حسنة : تقدري تشتغلي عمل يوم تام او جزئي
ندى : جزئي
حسنة : اممم خﻻص من 8 الى 4 عشية
ندى : ان شاء الله …
جابت مليكة العصير وشوكﻻتة
ندى : تعرفي وردة ؟؟
حسنة : عرفتها عن طريق ادم عطاني رقمها بش نتواصل معاها لو حصلت بنت للشغل
نندى : اها اوكي …
كملت ندى عصير وشوكﻻتة وحطت الطاسة
حسنة : صحتين
ندى : سلمك
حسنة : انا بنخش نرتاح شوي امشي ف الممر المفابل تو تلقي دار رهف خشياها وتعرفي عليها
ندى : ان شاء الله

خشت ندى ل رهف… الفتاة المدللة عمرها 5 سنوات … وتعرفت عليها وتوالفت معاها..
في يوم ما …
رهف : ندى شوفي الرسمة هادي حلوة واﻻه
ندى : الله حلوة هلبا
رهف : شن ندير لون قفطان البنية
ندى : اممم ديريه احمر
رهف : جيبيلي ميا عطشانة
ناضت رهف للمطبخ … ولقت شخص نهاية التﻻتينات طويل و عريض… حنطي البشرة لحيته خفيفة … ﻻبس تيشيرت اسود امبين عضلاته وسروال توتة …
ندى تتسأل فبالها منو هدا اكيدة جايبينه اشبح شن يصلح … ايه ايه …
ندى : السﻻم عليكم
ادم : وعليكم السﻻم اهلين ..
شبحاته ندى عجبها حساته نوعها المفضل ومالاحظتش انه كبير ﻻنه اللي يشوفه يحط فباله انه شبوب وفي عز عز شبابه …
خدت طاسة ندى من الدوﻻب وعبتها اميا …
ادم شبحها حسها قنينة وطرف فقالها: ممكن نعرف من انتي ؟؟
ندى : مافيش داعي تعرف
ادم :كيف مافيش داعي نعرف … اكيد فيه داعي …
ندى : ﻻ مافيش اخطاني وخليك ف حالك خير ما اناديلك انسة حسنة تتصرف معاك
ادم : به ناديها هي
ندى : به استنى هي راك تتحرك
ادم : ماعندي وين بنمشي اهو قاعد …
جبد الكرسي ادم وقعمز … وقال وهادي قعدة
مشت ندى لدار حسنة وطقطقت عليها …
ندى : انسة حسنة انسة حسنة
حسنة : خشي خشي ياندى
خشت ندى …
حسنة : معش تقوليلي انسة حسنة ناديني حسنة طول
ندى : به … فيه واحد ف المطبخ مانعرفش منين خشلكم مناديين عليه يصلح حاجة اهنا ؟؟
حسنة : ﻻﻻ
ندى : اماﻻ اشبح منين نقز
حسنة : مليكة وين ؟؟؟
ندى : مليكة طلعت من القايلة ماجتش
حسنة : حسك خوفتيني … خدت نقالها واتصلت بخوها بس مايردش فكملت كﻻمها …جيبيلي الكرسي جيبي وساعديني
جابتلها الكرسي وساعدتها ندى انها تنوض ..
حسنة : خودي رهف من الدار قيميها ف غمرك واطلعو
ومشوا هما التﻻتة بيطلعوا متسللين شافهم ادم … وقالهم على وين ياعيلة
حسنة تلفتت لقت خوها ف المطبخ … مشتله ولحقتها ندى
حسنة ؛ هوا هدا الواحد اللي قلتي عليه
ندى : ايه
رهف : بااابااااا
حسنة : خلعتيني و نزلتيلي قلبي ف ركابي
ادم : رهوفتي بنوتي
ندى : قصدك اااا
حسنة : ايه خوي
ادم : قتلها ممكن نعرف من انتي قتلي مافيش داعي تعرف وبناديلك انسة حسنة ههههههههه قتلها بري هي نادي انسة حسنة
تحشمت ندى وخدودها ولو حمر من الموقف وقالت : اسفة .. ماحسبتكش انت استاذ ادم
ادم : مدام حد قالك باحترام ممكن نعرف من انتي جاوبيه
ندى : مشكلة كان كل حد بيقولي من انتي بنجاوبه
ادم : انتي قاعدة في عقر بيتي مش حد سئلك من الشارع
ندى : ماه قتلك ماكنتش نحساب انك استاذ ادم
ادم : هههههه باهي يا استاذة
حسنة : امتى جيت ادم ؟؟
ادم : مالياش ساعة
رهف : بابا رسمت رسمة انا وابلو ندى …
ادم : اكيد رسمة حلوة زي عيونها .. ((مع ترقيصة حواجب ))

عمر …{خيرها مارنتش عليا ندوو .من الصبح ونستنى في رنتها … خلي نرن عليها}

نقال ندى يرن >>> يامرايتي من كم سنة
فغنى ادم مع اﻻغنية : اديش تغيرت يامرايتي يلي بتعرفي حكايتي زهئان من كل البشر
فصلت ندى ع عمر بالحمراء
حسنة : ماغﻻ عليك اﻻغاني ياادم ماتصدق تسمع اغنية
ادم : ههههه بندير فرقة اصﻻ
ندى سارحة ف صوت ادم محﻻه مع اﻻغنية … برغم خشونه صوته
حسنة :امان منك امان بنمشي نكمل مسلسل متاعي…
طلعت ندى وحسنة من المطبخ
ادم : رهوفتي شنو اﻻبلة باهية معاك
رهف : ايه نرسمو ونلونو وغنوو ونرقثو
ادم : تعرف ترقص هيا
رهف : ايه تعرف قتلها علميني مصري …حي اماﻻ كان سفت عيونها يابابا زي البنبلة اللي جبتهالي ف عيد ميﻻدي
ادم : صح عيونها حلوات
رهف : هههه سنووو سن قلت يابابا
ادم : قلت البنبلة متاعك عيونها حلوات …
سرح ادم في جمال وعيون وشعر ندى …
وحظ عمك عمر بدي يشتغل …

{عمر .. عﻻش فصلت عليا زعما امها جنبها … اي ممكن يﻻ خليها تو تكلمني ف العشية واﻻ في الليل }

ندى : ياكلبة ياهالة
هالة : خيرك شنو فيه
ندى : ادم مدير اختك
هالة : خيره
ندى : نحسابه شيباني
هالة : ﻻﻻ تقريبا اشبيب
ندى : ماه فيه واحد فتحلي الباب قبل تﻻتة ايام نحسابه هوا ومنها معش ريته
هالة : بالك حد قريبهم واﻻ البواب
ندى : لحقي عليا بنسيخ معقولة فيه حد ف ليبيا بهالجسم هدا طول عرض عضﻻت
هالة : عجبك اماﻻ
ندى : كشخص ﻻ انحس في دمه رزين … لكن كشكل خارجي ماشاء الله
هالة : حقا عصام يندري عليك تشتغلي في حوش
ندى : اسمعي اسمه عمر مش عصام
هالة : اها به يندري عليك
ندى : ﻻﻻ ماقتﻻش
هالة : وامتى بتقوليله ليك تﻻتة ايام تشتغلي
ندى : مش حنقوله نخاف يسيبني يقول هادي تشتغل ف حوش والجو هدا تعرفي انتي العقليات متع الشباب الله الله عليهم والخنس لما يركبهم مايحزها شي
هالة : هو انتي حتئوليلي … اسمعي محمد خلشلي انتظار باي باي
ندى : باهي به باي

سكرت الخط ندى وقعمزت على الكنبة … مريحة للغاية وغمضت عيونها
ادم : هئ حم …
فتحت عيونها ندى وتلفتتله
ادم : رهف ادور عليك وانتي راقدة
ندى : ﻻ مش راقدة غير عندي صداع ادم : سﻻمات سﻻمات … فيه صندوق اسعافات اولية ف المطبخ … تلقي فيه بانادول 
ندى : مشكور
ادم : العفو …
طلع ادم وخﻻها ركب لداره وسكر الباب وعقله طبعا يرفع ويجيب ويفصل ويخيط بنت حلوة وامورة عنده في الفيﻻ …

مروا اسابيع و عمر زاد اتعلق ب ندى … بس ندى معادش تتصل بيه زي قبل وﻻ تراسل فيه …
{ خير بﻻها الشفشة هادي معش تكلم فيا … من اول ماتعارفنا المكالمات كانو معش يوقفوا ديما هكي البنات لما يعرفوك اتعلقت بيهم يطنشوا هداكا الخشم وتبدى الجكترا على اوصولها ..يﻻ مانبيش نظلما مرات ﻻهية ف ظروفها }

حسنة : تعرفي ياندى … كل ليلة ندكر ف امي و بوي وخوتي اﻻتنين
ندى : الله يرحمهم
حسنة : خوي اسمه انور … قداش مايعز عليا … المهم انقعد وعمر 20 عام معش اتحمل فانتحر
ندى : ﻻ حول وﻻ قوة اﻻ بالله
حسنة : وانا الناس اتنق عليا باهي ماجاش فيك الوراثة وانقعدتي … المهم مرة ركبت سيارة خوي تجوان و سقتها طلعت بيها وندهور يلحقو فيا زوز بسيارة عالية يمين يسار لين انقلبت بيا سيارة من فوق الكوبري
واهو انقعدت
ندى : ﻻ حول وﻻ قوة اﻻ بالله
ادم : احم احم
حسنة : تعال خش
ادم : شن الجووو
حسنة : باهي … شنو اﻻيام هادي نشوفو فيك هلبا ف الحوش ان شاء الله خير (تلقح عليه )
ادم : مافيش هلبا شغل
حسنة : زي اللي حق وصالة الحديد ؟؟
ادم : اهو نتمرن ف الحوش
حسنة : سبحان الله قبل ماتقعدش ف الحوش بكل
ندى : نستاذنكم بنشوف رهف
ادم : تفضلي تفضلي
مشت ندى خشت ل المطبخ شربت اميا.. ووقت هيا طالعة انضربت ف ادم كان بيخش للمطبخ او باﻻحرى خشت ف حضنه بالغلط..للحظات هيا تشوفله وهوا يشوفلها ..

…يتبع …

لقراءة الجزء التالي : الجزء الثامن من رواية محظوظ ولكن

لقراءة الجزء السابق : الجزء السادس من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .