وفي الجزء السادس من رواية طبيبة قلبي دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة اسماء محمد .
الجزء السادس من رواية طبيبة قلبي
بعد طلعتا من عملية المريض العندي مشيت خلصتا كل المرضى العندي قريب للعصر كدا لأنو ما كانوا كتار الليلة ومشيت أشيل تقارير حالة مريض العملية سألتا الممرضة هدى منها قالت لي هسا أديتها لسوسن حتجيبا ليك لكن فاتت غرفة العناية الفاضية قلتا ليها تمام مشيت والباب كان فاتح أصلا شفتا نفس البت ال..سووومة وكانت واقفة قدام الجهاز وسوسن مشت عليها بعد نادتها بس هم ما إنتبهوا لي او أنا الما قلتا حاجة من التفاجؤ لسا سمعتا كلامها كلو وكانت بتسأل إنو صاح وفعلا هو صاح لقيت نفسي بمشي وبقول ليها ايوا صاح مية بالمية عاينت لي عشان تشوف دا منو؟ ويا ريييتا لو ما عاينت حسيت بنظرة عيونها سهام جات جوا قلبي بس شجعتا نفسي وواصلتا ليها كلامي (شلتا الملفات من الممرضة سوسن بعد مدتها لي) قلتا ليها دي أهم الحاحات علي شاشة المونيتور الخاصة بالمريض مع إختلاف الترتيب لكن المصطلحات والمعطيات ثابتة ما بتتغيىر قالت لي بإبتسامة وفرحة وفضول طيب والأكسجين؟؟ ، قلتا ليها نسبة تشبع الأكسجين في الدم رمزها علي الشاشة SPO2 والنسبة الطبيعية بتكون فوق ال95% ، ، ، قاطعنا صوت دكتور علي الجا داخل بقول لي دكتور (أكررررم) من قبيل بفتش فيك و.. سكت لمن شافا قال ليها كيفك وعمتك الليلة بقت كيف صحصحت كويس!؟؟ قالت ليهو ايوا لكن أصرت قالت عاوزة تمشي البيت ، قال ليها أنا حأمشي عليها هسا لسا يومين تلاتة كدا حنطلعها لسلامتها ، قالت ليهو إن شاء الله وإتحركت طلعت وسوسن برضو معاها بعد طلعوا دكتور علي قال لي علي فكرة دي نفس الشابة القلتا ليك أنقذت المريضة أمس وهي عمتها ، قلتا ليهو يا زول!!! قال لي والله هسا بمشي أشوف الحاصل وبجي إنتظرني برا وطوالي نمشي قلتا ليهو خلاص وطلع فات ، وأنا قبلتا علي الجهاز وبقيت بعاين فيهو ومبتسم ومتفاجيء برضو
سووومة ، ، ، إسمها سومة طيب
لا ممرضة لا دكتورة اوكي
لكن معلوماتها الطبية هايلة عديل ومعلومات دايرة تركيز !!!
وتاني!!؟؟ أخدت كل تفكيري لمن أكون فاضي ومشغول حتى بعد أخلص صلاتي بتذكرها ، أنا لازم لازم اعرف أكتر عن الإنسانة دي
بعديها طلعنا أنا ودكتور علي وحصلنا البيت سلمنا علي ناس البيت وقلبوها ونسة وضحك لحدي بالليل قمتا دخلتا غرفتي وفتحتا اللابتوب وعلي جاء وراي شايل صينية فيها كبايتين قهوة ومعاها مكسرات حقت القهوة وبصفر ساي قال لي طولتا من قهوة الحجة دي يااخ قعد وبقىى يشرب يتونس معاي وإتصلنا علي دكتور أيمن صاحبنا مكالمة فيديو وجرينا الونسة وقال هو جاء أمس عاملها لينا مفأجاة وبجي علينا بكرة بعد قفلنا منو علي قال لي ايوااا ذكرتني الزهايمر يااخ لقد هرمنا هههه ااي قبيل شايفك إتفأجاتا لمن قلتا ليك دي نفس الزولة وشاااايفك أنا يا صحبي
عاين لي وقال احم احم وبقى يطقطق بأصابع يدو ويغني ويلحن كمان، ، ،
نظرات عيونك فيها كلام كتير ، ، قول لي يا جميل هل هذا الدليل!!؟؟؟
دليل الريد يا غااالي ، ، ولي قلبك طويل
قعدتا أضحك فيهو قلتا ليهو كالعادة أغنية قاطعها من رأسك ضحك وقال لي ااي لازم هو المستشفى دي بتخليك تحفظ أغاني ولاا حاجة المهم يا مان صارحني ، قلتا ليهو ما تكتر كلامك معاي بس إن شاء الله ، قام علي حيلو وقال أووو وفات كم خطوة كدا وجاء راجع وقال أخيييرا سيادة الدكتور أنور سعيد القلبو حديد لقى الزولة البتكسرو ليهو قال لي إنتا عارف والله مبدئيا كدا انا بقول ليك خيار موفق وأنا لو ما كنتا خاطب كان حأسبقك في الخطوة دي تصدق!! ، قلتا ليهو طيب الحمدلله بقيت خاطب ، قال لي لأنو الزولة دي شكلها ماشاء الله ومتعل….قلتا ليهو علي!! قال لي ما قلتا حاجة أنا بخطيبتي غمز لي عينو وقال لي يا غيور وقعد يضحك ، قام وقال لي أنا نعستا هوي بعد دا يا زول أنا سهرك دا ما بقدر عليهو يلا تصبح علي خير وتا تا تارا رررا…….قاطعتو وقلتا ليهو ما تبدأ لي تاني بس عليك الله الزول نهائي ما يوريك حاجة ، قعد يضحك وفات نام وأنا إشتغلتا في اللابتوب مسافة وجيت رقدتا وإبتسمتا لمجرد ما إتذكرتها قلتا في سري يااارب سومة وبس ونمتا
الصباح مشينا علي المستشفى وكل زول فات لمحلو وأيمن جانا هناك وسلام وطوالي قال لينا بداوم معاكم في المستشفى لأنو كنتا مأخد إجازة هناك وإشتقتا للشغل ههه….
قاعدين مع عمتي في المستشفى بعد المغرب كدا في دواء كدا قالوا عاوزنو مشيت الصيدلية بس قالوا خلصان لكن في مستشفى قريبة من دي بشارعين بس إسمها مستشفى الكفاح وفيها صيدلية قالوا لي إحتمال تلقيهو هناك وصفوها لي مشيت ليها والصيدلية كانت جوا المستشفى لكن بعيدة شوية من باقى المستشفى يعني طرف كدا قريبة للباب بس داخل المستشفى دخلتها وسألتا عن الدواء اديتو الأورشتة وطلع في الحمدلله شلتو وحاسبتو وطلعتا برا الصيدلية وقبل أطلع من المستشفى سمعتا صوت صواريخ وكوراك من الناحية علي يدي اليمين جوا المستشفى جريت علي إتجاه الصوت لقيت مرأة قاعدة في الأرض وبتكورك وبتقول عليكم الله دخلو لي ولدي عامل حادث عليكم الله ما عندي غيرو والله بندفع ليكم بس إستلموهو لي وجمبها بت بتها لأنو كانت بتبكي برضو وبتقول ليها قومي يا أمي أرح مستشفى تانية يما الزمن ما في صالحنا قومي عليك الله ، بعد تعب قومتا من الأرض وطلعو بالباب حق الطوارئ دا البدخلو بيهو عربات الإسعافات طلعوا وركبوا الأمجاد الجو بيها وكان جواها بت تانية بتبكي برضو والولد جوا ما لتقدروا تعاينو ليهو مرتين وشو ورأسو كلو دم وشكلو غايب عن الوعي لأنو اختو الجوا دي سانداهو عليها ، بتاع الأمجاد بعد حنس معاهم بدون فايدة في النهاية جاء ركب سريع وإتحركوا فاتو ، أنا دموعي بقت جارية لا شعوريا وإتصمغتا مكاني يعني بالجد منظر الأم وهي بتترجا في الدكاترة وتحنسهم عشان يعالجو ولدها ما هزا فيهم شعرة وهمهم كان بس أدفعوا التكاليف أول!!
قلتا يااربي تسهلا عليهم جمبي كانت في مراة قريبة لباب الطوارئ دا وشكلها جات بالكواريك برضو تشوف الحاصل بعديها هزت رأسها يمين شمال وإتحركت شوية كدا وقعدت في بمبر قدام صينيتها فيها فول وتسالي ونبق وحلويات و…….شكلها بتبيع هنا قريب اللمستشفى وانا لسا واقفة في محلي تلفوني رنا لمن إتخلعتا لقيتها دي امل صحبتي المتصلة رديت عليها قالت لي يا بت وصفي لي سريع الغرفة الفيها عمتك مالك ما وريتيني لو ما قبيل إتصلتا عليك في تلفون أمك ورتني ، قلتا ليها نسيت والله هسا انا ما في المستشفى قريبة ليها إنتي جمب وين!؟ قالت لي قربتا عليها بس الحافلة إتعطلت بينا ونزلتا مواصلة كداري جاية من ورا كدا محل مستشفى الكفاح إنتي وين محلك!؟ ، قلتا ليها أيواا بس يلا تعالي في شارعها زاتو قصاد شجرة كبيرة كدا بالطرف جمب باب الطوارئ ، قالت لي كويس إنتظريني قبلك ، ، ، ، مشيت وقفتا جمب المرأة القبيل ديك مساااافة بعديها قالت لي يا بتي مالك!؟ قلتا ليها حارسة صحبتي قالت لي خلاص تعالي أقعدي في البمبر الجمبي دا لمن تجي ، قعدتا قالت لي عندكم زول هنا ولاا شنو؟ قلتا ليها لالا في مستشفى دكتور أنور لكن جيت للصيدلة الهنا دي ، قالت لي والله غايتو بس الحمدلله ناسها صعبين المستشفى دي تعاملهم قروش بس لو تموت قدامهم ما دفعتا ما برفعوك ، قلتا ليها فعلا والله هسا عليك الله المرأة دي زعلتا ليها عديل والله ، قالت لي يا بتي هو إنتي شفتي حاجة أنا دي شغالة هنا طووول وكل مرة بتجي حالات ما بقبلوها يعني ما حاجة اول مرة وجديدة بس ربنا كريم والله الزول بشوفهم كدا بس يدعي ربنا إنو يديهو الصحة والعافية عشان ما يوم يضطر يجي عندهم يعني لو ما عندك قروش تموت بس
قعدت تتونس معاي مسافة لمن أمل إتصلت علي وقالت لي أنا في الشارع دا وينك ما شايفتك!؟ قمتا ورفعتا ليعا يدي وقلتا لخالتو مع السلامة قالت لي الله يسلمك إن شاء الله ومشيت لأمل سلمتا عليها ورجعنا المستشفى بعد حصلنا دخلنا لناس عمتي وامي ، أمل سلمت عليهم وقالت لعمتي حمدلله علي سلامتك وقعدت حبة معانا وقالت ماشة عشان ما تتأخر قدمتها لبرا الممر ونزلتا معاها تحت نحنا كنا في الطابق التاني وقلتا ليها بعد تصل تتصل لي ، قالت لي سمح وفاتت
بعديها عاينتا لقيت حوض زارعين فيهو أزهار صغار ياداب كدا شكلو دائري وجمبو كانت في عربيتين واقفات مشيت قعدتا فيهو بالطرف كدا قريب النص ساعة وأنا سرحانة وبفكر لسا في حالة الولد القبيل ديك وقربتا أبكي عديل إتأثرتا ليها من جوا قلبي بالجد حاجة محزنة وفي نص سرحتي دي في زول جاء وقف قدامي ومدا لي كوب قهوة لمن رفعتا رأسي عاينتا ليهو لقيتو دا الدكتور داك الإسمو تقريبا أكرم زي ما ناداهو دكتور علي………..
يوما ما سأحقق ما حلمت به
ذلك الذي حطمتم لي فيه مجاديف زورق أحلامي
ذلك الذي قصصتم لي فيه أجنحة آمالي
ذلك الذي قلتم لي مستحيييل
لن ألتفت لأقوالكم ، فقط سأدعو ربي وأتوكل
يتبع ………
لقراءة الجزء التالي : الجزء السابع من رواية طبيبة قلبي
لقراءة الجزء السابق : الجزء الخامس من رواية طبيبة قلبي
للإطلاع علي فهرس اجزاء الرواية : رواية طبيبة قلبي ( جميع الاجزاء كاملة ) للكاتبة اسماء محمد
جميع الحقوق محفوظة للكاتبة اسماء محمد .
