الجزء الرابع عشر من رواية محظوظ ولكن

وفي الجزء الرابع عشر من رواية محظوظ ولكن دعونا نبدأ في معرفة ماذا سيجري من أحداث جميلة مع أبطالنا ؟ وهل ستكون كل الأحداث مميزة ام لا ؟ لنعرف إجابة ذلك التساؤل في السطور التالية بإذن الله مع الكاتبة لوزة .

الجزء الرابع عشر من رواية محظوظ ولكن

وقف عمر وبتوتر قال : تتسهوك ؟؟
فرج : ﻻ والله نازك هكي قتلي شوف ها
خدي عمر النقال قري المسج وفلت منه النقال وعيونه تشقلبوا لفوق وطاح طول وعرض …
فرج و خالد : عمر عمررر
قاموه ورفعوه للمستشفى … وخدوه منهم المسعفين ودخلوه لحجرة …
بعد شوي طلعلهم الدكتور
فرج : شن صار يادكتور ؟؟
الدكتور : المريض عنده غيبوبة سكر
فرج : غيبوبة سكر !

الدكتور : ايه بس نعتقد انها غيبوبة سطحية
فرج : كيف يعني
الدكتور : يعني ماطولش بإذن الله
فرج : ان شاء الله يارب
الدكتور : الباين ان عمر ماياخدش في دواء السكر بانتظام هدا من غير انه متعرض لأجهاد .. واضح على وجهه … عموما عطيته حقنة انسولين توا..
فرج : باهي يعني مش حطول يعني ف غيبوبته
الدكتور : ان شاء الله
فرج : ان شاء الله يارب ..نقدر نخش نشوفه ؟؟
الدكتور : غدوة الصبح خشله
فرج : تمام مشكور دكتور

خالد : مبردك يافرج تو عارف انه مش متقبل موضوع بيانه اتزيد اتقوله عرسك نهاية 2
فرج : كان ماقتﻻش انا بتقوله امه وبديرهاله بعركة كبيرة
خالد : وخيرها عليه الوالدة مدايرة فيه حالة
فرج : قصة قديمة …
خالد : شن هيا ..
فرج : تؤمين كانوا … عمر و عمار
واﻻم اتفضل عمار والبو ايحب عمر هلبا على خاطر مسمياته هيا على اسم بوها … في يوم اختي طلعت وخلت الصغار التﻻتة مع بوهم ..
الحصيلو عمار كان راقد ف الدار وحاتم يبي يلعب قدام الحوش فبوه خدي عمر و حاتم وطلع بيهم قدام الحوش وسكر الباب …حاتم يبي حلوة فرفعهم الزوز للمحل طبعا عمر شاده في غمره صغير متع عامين ونص…المهم شوره صارت ماصة في الحوش دفاية وانشعلت النار في دار الصغار وعمار راقد .. ماروح البو للحوش لين لقاه فحمة
من يومها ام عمر مدايرة ان بو عمر هوا السبب خﻻ عمار وطلع وبو عمر ايحب عمر لدرجة ماتتصورهاش ولهسبب تعامل في عمر هكي..
خالد : ﻻ حول وﻻ قوة اﻻ بالله … وبه كيف تعرف انت برغم انك انديده
فرج : حكهالي حاتم لكن رد بالك اتقولها لعمر
خالد : ﻻﻻ مش حنقوله اطمن …
فرج : غير ان شاء الله اينوض عالخير بس ..
خالد : ان شاء الله يارب .. كلم العويلة بش ايجوا
فرج : ﻻﻻ خليها الصبح خير ..

ليال : الو .. اهلين فاتن .. شن الجو
فاتن : باهية الحمد لله … ها شن صار
ليال : جت امه و اخته ومرت خوه لبستني امه الدبلة وروحت …
فاتن : الف الف مبروك حبيبتي
ليال : بس تمنيته ايجي حتى يوقف قدام الحوش بس
فاتن : بش قلتي طبعه واعر يعني اكيد مش حيجي
ليال : انحس مرات انه مايبينيش
فاتن : وكيف عرفتي
ليال : هكي من تصرفاته مايكلمش فيا بكل وكأني مش خطيبته … اهو حتى بعد ماروحوا اماليه ماتصلش وكلمني … كل اللحظات الحلوة محرومة منها
فاتن : متليشي يا ليال الفايدة في الهني هادي كلها دوة فارغة … نوضي توضي وصلي ركعتين وتو اتولي حالك باهي ..
ليال : ان شاء الله … تصبحي على خير فاتن
فاتن : وانتي من اهل الخير ..باي

خ امنة : ليال بنيتي خيرك حرجانة
ليال : ﻻ مش حرجانة … كنت انكلم في فاتن بس .. وتوا بنوض نصلي ركعتين
خ امنة : باهي ربي يفتحها عليك يابنتي
ليال : بري لسريرك وارتاحي يمى صقع عليك مش ﻻبسة كويس انتي
خ امنة : اي هي … تصبحي على خير
ليال : وانتي من اهل الخير ماما ..

ساعة 9 صباحا …
فرج : الو صباح الخير
نازك : صباح النور كيف حالك خالي
فرج : الحمدلله … اسمعي عمر في المستشفى
نازك : الللطف ! خيره شن فيه
فرج : غيبوبة سكر من خبر الزواج اللي قتيلي عليه امس
نازك : اه شن حالته توا
فرج : قاعد ف غيبوبته قال الدكتور مش معروف …
نازك : به تو نقول ل امي وحاتم ونجوا
فرج : باهي تمام ..

بعد ساعة اﻻ ربع وصلت الست وداد للمستشفى مع حاتم ونازك وسئلوا الريسبشن و مشوله في حجرة متعه
حاتم : اه فرج شن صار
خ وداد : وك عليا وليدي وينه
فرج : قاعد غيبوبة مافاقش
قربت خ وداد من عمر وتكلم فيه باعتبار ان مرضى الغيبوبة يسمعوا .. عمر … نوض ياوليدي نوض .. خيرك اللطف لمس كنت ﻻ سو وﻻ سوية شن جاك اللطف …
نازك : من الزواج يمى
خ وداد : اسكتي ياسوسة … الزواج فمصلحته خلي يتزوج ويكون اسرة ويدير صغار
فرج : مافيش فايدة فيك ياوداد تقعدي هكي طول عمرك ..ومش حترتاحي لين يريحك منك حتى عمر
خ وداد : بعيد السو عليه … تو طلعت انا غالطة

حاتم : خﻻص ياسر عراكات حتى الولد مريض مزال اديروا في النشاف فوق راسه …

فرج : ماه والله شي ايكطكط ياحاتم
حاتم : هيا كان بديروا العراك اطلعوا في الممر اتعاركوا واﻻ روحوا تعاركوا ف الحوش
خ وداد : اححح .. غير نوض ياعمر بس
نازك : ان شاء الله يارب اليوم قبل غدوة .. خلي نتصل ب ليال انقولها عمر في غيبوبة …

خ وداد : اتعالي اهنا يابنت ماتتصلي بحد بالك يومين وينوض ان شاء الله

نازك : عﻻش مانتصلش
خ وداد : ماتتصليش وخﻻص .

بعد تﻻتة ايام فاق عمر …
وفرحوا عيلته وداروله حفلة صغيرونة في الحوش بس عمر مزال خاطره متكدر ..
وفاتوا اسبوع ونص وجي نهاية 2 والكل ايوتي في روحه للعرس اﻻ عمر مقضي وقته غاطس تحت الميا
وماشري شي وماوتاش روحه حتى البدلة والكندرة خداهمله فرج وحاتم وحوشه مايندريش عليه شن ناقصه كله رتباته نازك … وعبتله الثﻻجة من مجاميعوا … والذهب شراته خ وداد من فلوس حاتم .. مدايرين عرس تام في الحوش من غير عريس ههههه وداروا الفاتحة ولبسوه عربي ووجه اجمر من الغيض ماحسش بالفرحة اللي كل عريس ايحس بيها..

وفي يوم الدخول في الظهر
حاتم :الوو تي وينه عمر يافرج العراسة قدام الحوش يستنوا فيه بياخدوه للحﻻق و يتغدوا مع بعض
فرج : من جي
حاتم : سعد و اياد وصﻻح وخالد
فرج : والله شن بنقولك ياخاتم مالقيتاش راه… من بكري انلود في الشوارع
حاتم : اهو بيبدى العار هي العريس مهناكش شن بنقولوا ل امالي العروسة
فرج : والله ماعارف ياحاتم … سكر سكر خلي نتصل بخالد يطلع يدور معاي
حاتم : باهي به سﻻم .

فرج : ايوه خالد … نوض اطلع لراس الشارع تلقاني نستنى فيك …
خالد : عﻻش شن فيه ..
فرج : عمر معش لقيناه تعال نستنى فيك فيسع
واذن اذان العصر و مازال مالقوش عمر

خ وداد : انهاااااار والله احرررش
انهار والله متزووورق اكحل على دماغك ياعمر بيحشمنا بيحشمناااا قدام الناس بيحشمنا
حاتم : وتلفونه ينادي مايرد حد وفرج وصاحبه من بكري ايدورو .
خ وداد تخبط ع راسه وتقول : عليييبك عملة عللليييك افضيحة
حاتم : تو نزيدوا اندوروا وان شاء الله خير

فرج : والله لين راسي داخ ياخالد من الصبح وانا اندور حتى فطور مافطرت ..
خالد : به ارجع للحوش وتو انا نكمل تدوير ..
فرج : ﻻﻻ …
خالد :بالك خاطفينه
فرج : وعﻻش بيخطفوه
خالد :مش عارف قلت بالك
فرج : ﻻﻻ ..ﻻ اعتقد …
خالد :بالك ف جيهة العمل
فرج :دورت غادي
خالد : بالك غاطس ماشفتاش
فرج : مشيت غادي تﻻت مرات
خالد : ركبت للمنارة ؟؟
فرج : ﻻﻻ
خالد : معناها ف المنارة ادعس بنزينة
فرج : ان شاء الله يارب يكون غادي لان معش فيه وقت توا ساعة 6 مغرب قريب
ومشوا لمقر العمل وركبوا هما الزوز جري للمنارة وقت اقريب يوصلوا فيها بيفتحوا الباب شبحوا عمر انقز من روشن المنارة للبحر …
فرج : ياعدابنا وخﻻص انزل انزل فيسع
ونزلوا هما الزوز جري وخشوا للبحر وطلعوا عمر …
فرج يضرب على خد عمر ويقوله : عمر … عمر فيق… فيق ياعمر
….بعد شوي فاق عمر
خالد : هكي ادير فينا ياراجل
عمر : تعبان والله تعبان خليتوني بروحي
فرج : ساعة 6:20 ياحلو معش فيه وقت
عمر : مانبيش نتجوز يافرج مانبيش
خالد : خﻻص انت متجوز ياعمر فاتحتك مقرية من امس .. وهدا اللي ادير فيه توا ماينفعش ايجيب العار ليك وللبنت
فرج : استهدى بالله وهيا نوض معانا
عمر : الصبر ياربي
كلم فرج اخته وقالها لقيناه … و
كلم خالد سعد وقاله تعال انت واياد وصﻻح.. ورفعوه للحﻻق واسوه وبعدين للاستراحة … دارو الازم لعمر
عمر : مانيش خاش لصالة راه اونه اتخشلها امي تاخدها
حاتم : باهي تم … خلي نتصل ب امي نعطيها علم انك مش خاش … الو اه يمى … طلعيها انتي ايه عمر مش حيخش
خ وداد : تي كيف عاد
حاتم : مشيها يمى
خ وداد : باهي باهي تو نطلعها

عمر : سوق بيها ياحاتم انت وامي انا تلقوني قدام الحوش انا وفرج
حاتم : وﻻمتى بتهرب منها
عمر : ياحاتم ماتنرفزنيش
حاتم : باهي باهي برا روح هي

عمر : فرج يافرج هيا خود الشباب بنستناها ف جيهتنا
فرج : وعﻻش
عمر : بتجي واﻻ نمشي بروحي
فرج : باهي هي خلي انادي الشباب ..
وطلع عمر وصحابه متجهين لحوش عمر
طلعت خ وداد و ليال وركبتها السيارة وليال اتحاول اتبيت تحساب ان اللي يسوق عمر … شفاته ولقاته مش نفسه اللي شفاته في الرؤية الشرعية
زعما منو هدا بالك بدلولي العريس زي بنت جيرانة … ﻻﻻ بالك خوه لكن عﻻش خوه بيسوق بينا . . هيا تو نعرف بعدين هدا منو

وصلت العروس ودارو تدريجة عمر وهوا يتكزمط كان يلقى يهرب

{كنت نتمنى نتزوج عن حب وتكون حبيبتي متلهفة تستنى فيا وتسمع في التدريجة وقلبها في 200 بالله مش كل اتنين ايحبوا بعض حيتزوجوا وﻻ كل العلقات ناجحة او ربما ناجحة اﻻ معاي انا .. }

فرج : لحظات تفصلك عالقفص الذهبي ياعموري
{ساداتك نظرة … فيش داعي نرد عليك اذا اكان انت اكثر شخص تعرف شن فيه فبالي وتقول هكي اماﻻ مانلومش الناس التانية}

خالد : ابتسم ياراجل وانت مكشر حد يكشر في يوم دخوله ويدرجوا فيه
{لأي سبب بنبتسم على حظي واﻻ على اخت الجيش اللي واخدها… هاااه هاااه هدا شنووو شن اﻻصفر هداكا …تو والنبي فيه حد يلبس بدلة صفرا يرزيني فيك.. زعميته فرحان بأخته ﻻبس بدلة شي ايحشم }
حاتم : ياعمر انت ياولد …واسي قرواطتك رايح زي الرديف

{خليها هكي مانيش مواسي شي شي ايفدد }…
فرج : خيرك امبلم واللي ايكلمك ماتردش عليه
عمر : ﻻن كل اللي صاير فات حدودي الكﻻمية معش عندي مانقول فرج : يستر الله وخﻻص

وبعد ماتمت التدريجة …
عمر : واك انحس ف روحي مغموم
حاتم : خش ياعمر ادخل خﻻص خوتها يشبحونا
عمر : والله ماقادر
فرج : وراس امك بﻻ عار ..خش ياعمر
اياد : استهدى بالله عميرو خيرنا
عمر : حولوا من قدامي اتولع بقاز مانيش داخل
تلفت عمر ويلقى خوتها العشرة متسطرين واولهم ابو بدلة صفرا

تلفت تاني لجيهة فرج والقروب وقال : استغفر الله ياربي
فرج : سمي بسم الله واركب لحوشك
عمر :ﻻ حول وﻻ قوة اﻻ بالله …
اياد : هي توكل امشي اركب.. الليلة ليلتك اهو النساوبن يزغرطولك داخل …
عمر : يصبرني الله وخﻻص …

ركب عمر وهوا حزين … يكر فرجليه كران … ووصل لحوشه اتنهد تنهيدة زعل وفتح باب الحوش وخش …
يتبع 

لقراءة الجزء التالي : الجزء الخامس عشر من رواية محظوظ ولكن

لقراءة الجزء السابق : الجزء الثالث عشر من رواية محظوظ ولكن

للإطلاع علي فهرس اجزاء الرواية : رواية محظوظ ولكن ( جميع الاجزاء كاملة ) للكاتبة لوزة

جميع الحقوق محفوظة للكاتبة لوزة .