الجزء الرابع من رواية حبيبتي لا تنسيني

وفي الجزء الرابع هل ستزداد الحبكة أكثر وأكثر أم سنتجه تجاه آخر لم يكن في الحسبان مع ابطال حكايتنا ؟ كل هذا وأكثر سوف نعرفه في السطور التالية من كتابة المبدعة كيندا .

الجزء الرابع من رواية حبيبتي لا تنسيني

صاحب احمد << اشرف >> .. ممكت ناخد من وقتك 5 دقايق …
ملاك …. ااااه .. تفضل احكى ..
اشرف …. انى بصراحه قداش ليا نشوف فيك .. ولحد يوم بس قدرة نستجمع شجاعتى ونكلمك ..
ملاك … اها … كمل نسمع فيك ..
وفى لحظه هيا طلع صوت تالت مخترقهم … وقف كل المحادته وخلى الزوز يتلفتوله …
احمد …. احم .. احم … اه شكلكم تتكلم وفى موضوع خاص اسف قطعت عليكم ..
اشرف … شنى احمد فى شى ؟؟
احمد … لا لا الحق .. انى بس جيت نسأل فى شى ؟؟
اشرف … خيرك ياراجل .. شنى يعنى بيكون فى ؟؟
احمد …. << وهنا شبح لى ملاك وقال >> … لا بس مرات فى كلب نطلق عليكم متلا او اسد .. مهم انى موجود فى الجوار لو احجتو اى شى  ..
وهنا ملاك نزلت عينها وانفلقت بضحك ..
ملاك … هههههههههههههههههههه  
اشرف … << شبح لملاك واحمد وقاللهم >> اهاااا .. شكلكم تعرفو بعض صح ؟؟
ملاك .. هكى شى ..
احمد .. بصراحه كلبى بارك الله فيه هوا الا عرفنى عليها هههههه   .. على عموم انى رح نخليكم براحتكم لانا باين انا فى موضوع خاص …
اشرف … مادمك تعرفها ياراجل فاانت مش برانى ونبى نتكلم قدامك باش تكون شاهد عليها ..
احمد … هههههه اهم شى ان شالله ماتكونش بتعطى فيها كلمه بس … لانا كلبى سبقك الحق 
اشرف … شنى تقول انت ؟؟
احمد … << وهنا شبح لملاك وابتسم وقالله >> لا لا شى احكى …
استمر الحديت والمزاح بين احمد واشرف فى وجود ملاك الا كانت مستمعه ومتصمره فى مكانها وماكانش قدامها اى وسيله للانسحاب … وبصراحه هيا سمعت هلبه حكى من اشرف مع نظرات غريبه من احمد يعقبها صمت مفاجئ ..
اشرف … وانى اهو وخى احمد شاهد قدامى … انى واتى للزواج واعطينى فرصة شهرين بس نتعرفو ونتفاهمو وبعدها انى مستعد نجيب اهلى لعند حوشكم …
ملاك … انى مش مفكره فى الارتباط او زواج ..
اشرف … علاااااش .. لو على قرايه انى رح نتكفل بكل مصاريف قرايتك واحنا فى نفس المجال وبعتبار انى سابقك وحاليا فى الامتياز فاصدقينى رح نساعدك هلبه ونقدر نتخطى انى وانتى هالنقطه … ولا انت شن رأيك يااحمد ..
احمد … والله القرار ليها هيا … لانا هيا الا بتتزوج مش انى .. << وشبح لى ملاك واستأدن >>
بس قبل مايتلفت ويكمل طريقه سمع ملاك قالتله …
ملاك … << شبحت لاحمد وقالتله >> اوك … رح نفكر ونرد عليك .. اعطينى بس وقت ..
اشرف … اوك انى مسافر اسبوعين وراجع .. فى خلال هالوقت ان شالله تكونى فكرتى ..
ملاك .. اوك ..
اشرف … توا نستأدن منك ..
ملاك .. اوك …
رجعت ملاك لصاحبتها ومن اول ماقعمزة بدت تحكى شن صار معاها .. بينما اشرف مشى يجرى لى احمد وشد على كتفه من تالى وقاله …
اشرف … شنى تبى تطير بنت من ايدى عينى عينك ياكلب ههههههههه ..
احمد … << شبحله بنظرة جد وقاله >> فوتها بنت … طلعها من رأسك ..
اشرف … علاش سامع عليها شى ؟؟
احمد … تى شن تقول انت ياراجل … تى راهو انى نعرف خوتها واهلها يعنى مش متع جو هوا .. فالو غير بتهدرز بس فاصدقنى مش نوعيتك …
اشرف … تى شن تقول انتى .. تى وحق ربى الا البنت نبيها فى جديات ومانبى نتسلى بيها … بس حسيت فى كلام بينكم .. منين تعرفها انت ؟؟
احمد … قريبتى وخلاص .. مهم تشرب قهوه ؟؟
اشرف … لا لا بنروح انى خلاص وقت على كورس الا تعطى فيه … نتلاقو توا سلام ..
احمد … تشاو …
سمر …. وانتى شن رديتى عليه ؟؟
ملاك … قتله توا نفكر … هوا بيبنى وبينك الولد مستريحتله من قبل .. ونحس فيه كويس وفوق من هدا قالى مستعد نكملك قرايتك … وانى هدا شرطى الوحيد …
سمر … والله حتى انى نحس فيه كويس … فالدلك موضوع اعطيه قيمه وفكرى فيه ..
ملاك .. اكيد .. مهم شنى هيا نوضو ؟؟
سمر .. اى هيا نركبو للقسم بالك جى دكتور … وبعدين فى شوى حاجات مش فاهمتهم فى شيت نبيك تفهميهملى قبل مانروحو ..
ملاك .. هيا مالا لانا بعدين مانقدر نتأخر على موعد مرواحى …
سمر … اوك هيا  
ركبت ملاك وسمر للقسم وبعد مرور ساعتين نزلت ملاك بس الغريب انها اول مانزلت .. كانت فى داخلها تدور على شى ماكانتش مقتنعه بينها وبين نفسها انها بجد تدور فيه … بس بعد ماتأكدت انه مش موجود … ابتسمت وكملت طريقها للواجهه ..
ملاك … يالله نخليك توا  بنروح خلاص وقت ..
سمر … خلاص وانى ماشيه للكورس بس اول مانكمل ونطلع رح نكلمك لانى احتمال نجيك العشيه ..
ملاك … ماشى خلاص الحوش حوشك تفضلى حتى بدون اتصال  بااااااااى
لبست ملاك نظراتها ومشت لسياره ووكيف ركبت لسيارتها اللتمحت حد راكب فى سيارته ويشبحلها من داخل سياره … واول ماقربت وركبت سيارتها نزل رأسه وابتسم وسطرب وكل طريقه  
ووهيا كدلك ابتسمت بينها وبين نفسها وولعت سيارتها وبصدفه اشتغلت اغنية انغام << قالى بحبك من دقيقه … والغريبه انو عارفنى من يومين … ودى تبقى جرأه ولا طيبه ولا جنون العاشقين … >>
وهنا مرت بيها لقطات ممكن بالنسبه لااى حد مجرد لقطات مرت فى لمح البص بس فى يومين … بس تركت بصمه فى قلب ملاك اكيييييييد رح تقعد تتفكرها لسنين … علت صوت الاغنيه شوى وقعدت تدندن معاها وتسوق لين وصلت للحوش واول ماوصلت ودرست سيارتها … ركبت للحوش وبدلت حوايجها وغسلت وجهها وقعدت تشوف للمرايه شوى وتبتسم زى بلاهاء وبعدين طلقت شعرها وحطته على كتافها وقعدت تشوفله شوى لحد ماخطر على بالها موقف الكل وكيف طار الوشاح وهيا مكرشه فيه وهنا قالت ,,,
ملام … اووووووووووووف غبيه غبيه … علاش مصره تتفكرى غبائك اه ه ه ه وبعدين علاش بدى يخطر على بالك هلبه … فيقى فيقى هدا سلف اختك والبنات عليه بالهبل فييييييييييييقى .. هههههههههههههههههههههه انى بجد هبلت .. نطلع نطيب الغدى خير مايزيد هبالى  
طلعت ملاك وحطت الغدى على نار وبعدين خشت لدارها لبست عباية صلاه وصلت ظهر ولما كملت قعمزة على سرير وطرحت شيتاتها وفتحت نقالها على الاغانى … واول ماطاب الغدى حطت المعاين فى لوندينو وخشت رقدت … ومافاقتش الا على صوت تلفونها … ترررررررن ترررررررن …
ملاك ….. اااااه رأسى … من غبي الا تتصل توا وانى فى عز نومى … الوووووو .. من الغبيه الا معاى على خط …
رقم …. للاسف الغبى معاك …
وهنا ملاك من شدت حلاوت الصوت فاقت وقعمزت وشعر مشفشف وقالت …
ملاك …. متأسفه جداااااا من معاى ؟؟
رقم …. كنت حاب نسمع صوتك بس خلاص ارجعى ارقدى شكلك مافقتيش ..
ملاك … من معاى لوسمحت ؟؟
رقم …. اعتبرينى غالط …. خلاص سلام …
ملاك … اوك سلام 
سكرت ملاك تلفون وجاها نشاط مش عادى … حست قلبها ينبض ببساطه … حست روحها فرحانه … علاش ؟؟ ممكن لانا قلبها دليلها … وقلبها قاللها انا نفس الشخص الا كانت ممكن تتوقع منه اى شى .. هااااااا بس ممكن لانا لى هاللحظه لا انى .. ولاملاك … ولا حتى انتم متأكدين .. بس من هوا ياترى شخص هوا ؟؟؟
وليد …. ملاااااااااااااااااااااااك … ملاااااااااااااااااك … صاحبتك جت …
ناضت ملاك من سرير بسرعه وقالتله …
ملاك … هيا جيت 
طلعت ملاك لصاله وخدت سمر من ايدها وقالتلها ..
ملاك …. خشى يابلوه لين نعزمك .. خششششششششششششششى …
سمر … انى ميته بالجوع اول شى ارفعينى للمطبخ 
ملاك .. حتى انى مابتش نتغدى .. تعالى نوتو صفيره ونخشو بيها لدار ونقولك على حاجه …
سمر .. اوك …
خشت ملاك وسمر للمطبخ … وطلعو صفره وماخلو ماحطو فيها زيتون لى جبنه على تن على شاهى على بيض مقلى بالمرقاز ودخلو صفره لدار ملاك وسكروها … واول مابدلت سمر حوايجها وخدت بيجامه من بيجامات ملاك قالتلها …
سمر … بنقولك شى .. اليوم بنبات عندكم … بابا مبكرى كلم بوك  قاله خلى سمر تبات عندكم لانا احنا ماشين لغريان ومش مروحين لبكرا  
ملاك … بجدددددددددددددد رووووووووووووووووى   الليله بنقيموها عناد الليله مافيهاش رقاد 
سمر … علاش حاسه هاليومين فى فى نظره فى عينك جديده … ؟؟
ملاك … لا لا بالعكس علاش والله قاعده زى ماانى 
سمر … على عموم انى احساسى مايكدبنيش … وبنسألك مبكرى فى جامعه ونسيت …
ملاك … صدقينى لو فى شى رح نقولك … بس تعرفى مبكرى صارت حاجه غريبه .. فى رقم اتصل بيا .. وحسيت صوته كأنى سمعاته … وقالى اعتبرينى غالط ومش عارفه شن قال تانى .. وانى الحق ماكنتش مركزه معاه … لانى كنت مدوشره من نوم …
سمر …. اها …
ملاك …. شن اها … خلاص .. هوا هدا … قولت زعمك منى ؟؟
سمر … مايكونش اشرف هههههههههههههه
ملاك .. مصحك لا لا مااعتقدش …
سمر …. اى حقا شن بالنسبه لموضوع اشرف …؟؟
ملاك … مش عارفه الحق هوا الولد كويس ومريح نفسيا … بس انى خايفه من موضوع الارتباط بشكل جدى .. حاسه انه مش وقته ..
سمر … يعنى لامتى بتقعدى هكى ؟؟
ملاك .. مش عارفه ..
سمر … صدقينى هادى سبل انتى تتسبلى فيها … وعندى احساس انا فى هاليومين كأنا فى نسمة حلوه خشت لى حياتك بس انتى مخبيه صح ؟؟
ملاك … هههههههههههههههه لا والله لا .. قصدك احمد مستحيل .. الولد مجنون بكل ماتعانيه الكلمه ..
سمر .. اهاااااااا صدقتك صدقتك .. برى شوفى عيونك شن يتكلمو ..
ملاك … ههههههههههه بطلى .. شنى تشوفى فيا مراهقه نحبه فى يومين ؟؟
سمر … انى ماقولتش حب … بس اقلها اعجاب .. انبهار .. ارتياح … توافق كيميائى 
تجادب مغناطيسى هههههههههه
ملاك … ههههههههههههه مش عارفه … تبى الحق .. لما نشوفه او بالاحرى من اول ماشفته حسيت فى شى غريب يجدبنى ليه … بس اكيد مجرد انبهار مش اكتر … طبيعى هوا اصلا لانه مجنون هههههههههه صح ولا لا ؟؟
سمر …. انتى حاسه الا كلمك مبكرى هوا ؟؟
ملاك …. مانعرفش هههههههه ماتشبحيليش هكى والله مانعرف … بس مش عارفه بجد …
سمر … اوك خلينا نأكلو خير … ناس بالموضوعين وتلاته وناس جفاف قاتم كاتم مظلم مغبر وايامه سود هههههههههه
ملاك …. ههههههههه الا يسمع يقول حق … مش كل واحد يشبحلك معجب بيك مرات رايحه فردة شبشبه وشاك فيك ههههههههههههه
سمر .. هوا بينى وبينك انتى وجهك زى شلاكة عمى بوعجيله الا ورنا مهبول ههههههههههههههههههههههههه
وهنا ملاك ضربتها بالمخده واقعدو يشبحو لبعض وانفلقو بضحك ..
سمر وملاك …. هههههههههههههههههههههههههههههههههههههههههههههههه …
فاتت ساعه وراء ساعه وملاك وسمريهدرزو ويضحكو والا ماكملوشى بضحك وتهدريز .. كملوه بالهبال والرقص …. ومع ساعه 10 فى الليل …. فرشو زوز منادير لوطه قدام روشن وفتحو برسيان وطفو ضى وقعدت كل وحده منهم تشوف للقمر وتفكر فى شخص الا تحلم بيه على صوت ملكة الاحساس انغام  وماقطعتش على هالجو الرومانسى …
ملاك …. خاطرك ترجعى لزيد ؟؟ او حتى تسمعى صوته ؟؟
سمر …. اااااااااااااااااى زيد … هالاسم لا قدرة ننساه ولاقدرة نحب من غيره …
ملاك … خاطرك فى هاللحظه تسمعى صوته ؟؟
سمر … نكدب عليك لو نقولك لا …. بس انتى عارفه انا احنا مش لى بعض …
ملاك … تحسيه يحبك ؟؟؟
سمر …. تعرفى الا حارقنى شنى هوا ؟؟؟ انا انى حبيته سنه كامله حب الناس الاغبياء … بمجرد انه وقف عليا وكلمنى مره … واستمرت هالاحلام سنه كامله … يبعد ويقرب .. احيانا نحسه انى يبينى واحيانا نحسه لا … ومن هدا كللللللله ابسط سؤال ماعنديش اجابه عليه … هوا يحبنى او لا … بس كل الا نعرفه انى نحبه … وحاسه انى مستحيل نحب راجل زى ماحبيته …
ملاك …. ماتندريش مرات يكون من نصيبك …
سمر … ونبى ماتخليهاش على نصيبى … لانا نصيبى نعرفه من لما عرفتك … ههههههههههه
ملاك …. هههههههههههههههه امبحى ياكلبه هوا انتى تطولى  اسمعى ماتحسيش روحك جعانه ؟؟
سمر …. خيرنا بدينا زى الهوايش هههههههه نهار ابيض انى مش بعيد احد شروطى للى بيخطبنى يكون جزار هههههههههههه باش لحمه وتموين مايكملش من مطبخى هههههههه
ملاك …. ههههههههههههه انى خاطرى فى شكشوكه شن رايك نوضو نديروها …
سمر … ساعه 11 قريب نهاااااااااااار ابيض درنا العار .. باهى فى هريسه هههههههههه
ملاك … اى اى غير نوووووووووووضى
سمر … باهى خوتك وين ؟؟؟
ملاك … خوتى بايتين برا اليوم وبابا ضربها نومه من ساعه 9 … هيا والله مصارينى بنحطهم …
طلعت ملاك وسمر من دار بشووووووى واول ماوصلو للمطبخ … سمر سمعت تلفون ملاك يرن …
سمر …. ملاك … تلفونك يرن صح ؟؟
ملاك … اى … ابدى انتى طيبىها وانى نرد ونجيك .. هادى اكيد ماما ..
سمر … اوك …
مشت ملاك لدارها بشوى وخدت تلفون بسرعه وفتحت الخط من غير ماتشوف للرقم واول ماردت قالت …
ملاك …. ماما والوصايا سبعه  اليوم مااتصلتيش عاد كيف هههههه 
الرقم ….   احم … احم … الو

يتبع……..

لقراءة الجزء التالي : الجزء الخامس من رواية حبيبتي لا تنسيني

لقراءة الجزء السابق : الجزء الثالث من رواية حبيبتي لا تنسيني

للإطلاع علي فهرس اجزاء الرواية : جميع أجزاء رواية حبيبتي لا تنسيني كاملة للكاتبة كيندا

جميع الحقوق محفوظة للكاتبة كيندا من ليبيا .